Nahali Bible
गिनती 7
मुखी माणहान बेट
ओवतो जुलबुखे मुसो तोम्बु उबो किऱ्यो, एने आखा सोमाना हिऱ्यो ताह अबिषेक केरीन ताह चोखो किऱ्यो, एने आखा सोमाना हिऱ्यो वेदीह बी अबिषेक केरीन तीह चोखी किऱ्यो, तेवी इस्राएल ने मुखी जा आप आपणा डायडायान गेराणान मुखी एदमी, एने वोसीन बी मुखी बोणीन गेणनेन कामा पोर लागेल एता, ता यहोवान सामने बेट लेन आवा, एने तान बेट सोव गाड़ा एने बारा बुयोल एता, मतलब दुय दुय आदिकारीन उगे रेन एक एक गाड़ो, एने एक एक आदिकारीन उगे रेन एक एक बुयोल; न्याह ता तोम्बुन सामने यहोवान जागे लेन गीया। तेवी यहोवा मुसाह केयो, “त्यु वोस्तुह तु ता फाय रेन मांग ले, काय मेल मिलापवाला तोम्बु माय सेवा केरनेन काम लागे, केरीन तु लेवीन एकेकाह तान कामा पारमाणे ताह वाट दे।” तेवी मुसा गाड़ा एने बुयोल लेन लेवीह आप दिनो। एने गेर्शोन वोसीन माणहाह तान सेवा केरनेन केरता तो ताह दुय गाड़ा एने चार बुयोल आप्यो; एने मरारी वोसीन माणहाह तान सेवा केरनेन केरता तो चार गाड़ा एने आठ बुयोल आप्यो; एने ज्यो सोब हारून चाकऱ्यान बिटोख ईतामारान आदिकारा माय केराय गीया। पुण कहात वोसीन माणहाह तो कायच नाह आप्यो, काहाकाय ताह चोखाली वोस्तुह तान खांदा पोर उखलीन ली जाणेन सेवा आपेल एती।
ओवतो जुलबुखे वेदीन अबिषेक एनो, तुलबुखे आदिकारी समर्पित बेट वेदीन आहने ली गीया। काहाकाय बोगवान मुसाह कियेल इतो, “वेदीन चेड़ावान केरता आदिकारी माणहे आप आपणी बेट आप आपणे ठेरायेल दिह्या पोर चेड़ावे।”
केरीन जो एदमी पिल्ले दिह बेट ली गीयो, तो यहुदान गेराणा वाला अम्मीनादाबान बिटोख नहशोन इतो; तान बेट ज्यी एती, मतलब चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्या दुय वोस्तु एन बेट ने केरता तेलाम कुहणेल फिटा केरीन बोरायेल एता; पोशो हालीयान डिक माय बोरायेल दोह शेकेल होनान एक दुणीदान; एने होमबोलीन केरता एक वासड़ो, एक मेंडो, एने एक वोरह्यान मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। अम्मीनादाबान बिटोख नहशोनान ज्यीस बेट एती। दिहरे दिह इस्साकारान आदिकारी सुवारान बिटोख नतनेल बेट लेन आवो; ती ज्यी एती, मतलब चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्या दुयू एन बेटीन केरता तेला केरीन गोलायेल मोयदा से बोरायेल एता; पोशो हालीयान डिगा माय बोरायेल दोह शेकेल होनान एक दुणीदान; एने होमबोलीन केरता एक वासड़ो, एक मेंडो, एने एक वोरह्यान एक मेंड्रीन पिलो; पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। सुवारान बिटोख नतनेलान ज्यी बेट एती। एने तीसरी दिह जबुलून वोसीन आदिकारी हेलोनान बिटोख एलीआब ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्या दुय एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; होमबोलीन केरता एक वासड़ो, एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा एने पाच बुकोड़, एने एक एक वोरह्यान पाच मेंड्रीन पिला। हेलोनान बिटोख एलीआबान ज्यीस बेट एती। चोवथे दिह रूबेन वोसीन आदिकारी शदेऊरान बिटोख एलीसुर ज्यो बेट लेन आवो, मतलब चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्या दुय वोस्तु एन बेट केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; होमबोलीन केरता एक वासड़ो, एने एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा एने पाच बुकोड़, एने एक एक वोरह्यान पाच मेंड्रीन पिला। शदेऊरान बिटोख एलीसुर ने ज्यीस बेट एती। पाचवे दिह शिमोन वोसीन आदिकारी सुरीशद्यान बिटोख शलुमीएल ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यी दुय वोस्तु एन बेटीन केरता तेला केरीन गोलायेल फिटा से बोरायेल एता; पोशो हालीयान डिका माय बोरायेल दोह शेकेल होनान एक दुणीदान; होमबोलीन केरता एक डांड्यो, एने एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। सुरीशद्यान बिटोख शलुमीएलान ज्यीस बेट एती। सोवले दिह गाद वोसीन आदिकारी दुएलान बिटोख एल्यासाप ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक पारात; होमबोलीन केरता एक डांड्यो, एने एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। दुएलान बिटोख एल्यासाप ने ज्यीस बेट एती। सातवे दिह एप्रेम वोसीन आदिकारी अम्मीहुदान बिटोख एलीशामा ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; होमबोलीन केरता एक डांड्यो, एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। अम्मीहुदान बिटोख एलीशाम ने ज्यीस बेट एती। आठवे दिह मनश्शे वोसीन आदिकारी पदासुरान बिटोख गम्लीएल ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; होमबोलीन केरता एक डांड्यो, एने एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़ एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। पदासुरान बेटाख गम्लीएलान ज्यीस बेट एती। एने नोव्वे दिह बिन्यामीन वोसीन आदिकारी गिदोनीन बिटोख अबीदान ज्यीस बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; एने होमबोलीन केरता एक डांड्यो, एने एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। गिदोनीन बेटाख अबीदानान ज्यीस बेट एती। एने दोहवे दिह दान वोसीन आदिकारी अम्मीशद्यान बिटोख अहीआजर ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; एने होमबोलीन केरता एक डांड्यो, एने एक मेंडो, एने एक वोरह्यान मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। अम्मीशद्यान बिटोख अहीआजरान ज्यीस बेट एती। इग्यारवे दिह आशेर वोसीन आदिकारी ओक्रानान बिटोख पगीएल ज्यी बेट लेन आवो, चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बोलीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; एने होमबोलीन केरता एक डांड्यो, एने एक मेंडो, एने एक वोरह्यान मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। ओक्रानान बेटाख पगीएलान ज्यीस बेट एती। एने बारावे दिह नप्ताली वोसीन आदिकारी एनान बिटोख अहीरा ज्यी बेट लेन आवो,
चोखाला जागान शेकेलान ईसाबे एक होव तीस शेकेल चांदीन एक पारात, एने सेत्तेर शेकेल चांदीन एक वाटको, ज्यु दुय वोस्तु एन बेटीन केरता तेला केरीन गोलायेल फिटा केरीन बोरायेल एता; पोशो हालीयान डिका माय बोरायेल दोह शेकेल होनान एक दुणीदान; होमबोलीन केरता एक डांड्यो, एने एक मेंडो, एने एक वोरह्यान एक मेंड्रीन पिलो; एने पापबोलीन केरता एक बुकोड़; एने मेल मिलाप बोलीन केरता दुय बुयोल, एने पाच मेंडा, एने पाच बुकोड़, एने एक एक वोरह्यान पाच मेंड्रीन पिला। एनान बिटोख अहीरान ज्यीस बेट एती।
वेदीह अबिषेक केरनेन बुखेत इस्राएलान आदिकारीन उगे रेन ता समर्पणान बेट ज्यीस एती, मतलब चांदीन बारा पारात्यु, चांदीन बारा वाटका, एने होनान बारा दुणीदान। एक एक चांदीन पारात एक होव तीस शेकेलान, एने एक एक चांदीन वाटको सेत्तेर शेकेलान इतो; एने चोखाला जागान शेकेलान ईसाबे ज्या सोब चांदीन ठामला दुय एजार चार होव शेकेलान एता। पोशा हालीयान डिका माय बोरायेल होनान बारा दुणीदान जा चोखाला जागान शेकेलान ईसाबे दोह दोह शेकेलान एता, त्यु आख्यु दुणीदान एक होव विह शेकेल होनान एत्यु। पोशो होमबोलीन केरता आखो मिलीन बारा डांड्या, बारा मेंडा, एने एक एक वोरह्यान बारा मेंड्रीन पिला, आप आपणी एन बेटी हेऱ्याच एता; एने पोशा पापबोलीन आखाच बुकोड़ बारा एता; एने मेल मिलाप बोलीन केरता सोब मिलीन चोव्वीस बुयोल, एने साठ मेंडा, एने साठ बुकोड़, एने एक एक वोरह्यान साठ मेंड्रीन पिला एता। वेदीन अबिषेक एणेन पासाण तान समर्पण बेट ज्यीस एनी।
जुलबूखे मुसा यहोवा हिऱ्यो वातु केरनेन केरता मेल मिलाप वाला तोम्बु माय गीयो, तेवी तो पासतावान डापण्या पोर रेन, जो पुरावा पोत्रान पेटीन उपेर एतो, दुय करूबान विची माय रेन तान बोल हुमल्यो, जो ता हिऱ्यो वातु केरने बाज रियेल इतो; एने तो बोगवाना हिऱ्यो वातु किऱ्यो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.