Nahali Bible
गिनती 4
लेवी कहातीन गेराणान जापापदारी
पुशो बोगवान मुसा एने हारूनाह केयो, लेवी माय रेन कहातीन वोसी माय रेन एने तान गेराणान पारमाणे गेणती किरो, एने जा तीस वोरह्या लागाड़ीन पाचाह वोरह्यान वोर वोयावाला माय, जोला बी मेल मिलाप केरन्या तोम्बु माय काम केरनेन बोरती हेते। एने मेल मिलापवाला तोम्बु माय जुलूम चोखाल्यु वोस्तुन बाराम कहातीन ज्य काम रेय।
जेवी पाड़ावान माणहे ओंगाण जाणेन तियार रेती, तुलबुखे हारून एने तान सोरा मेल मिलापवाला तोम्बु माय आवीन विची माय वाला पोड़दाह बुंदे खेचीन, ता केरीन पुरावान पेटीह डाप देय; तेवी ता तान उपेर देरीयावालो जेनवारान चामड़ा केरीन डापे, एने ता पोर पुरा निल्ला रेंगान फाड़को टाके, एने पेटी माय डांड्यु लागाड़े।
पोशा बेट चेड़ावण्या रोटान पाटला पोर निल्लो फाड़को आथरीन ता पोर पारात, चाटली, वाटको एने पिणेन बेट ने जेग मीले; एने कायेम बेट किरन्यो रूटो बी पाटला पोर मेलाय जाय। तेवी ता तान उपेर रातला रेंगान फाड़को आथरीन ताह देरीयावालो जेनवारान चामड़ा केरीन डापे, एने पाटलान डांड्युह तान जागे लागाड़े।
ता निल्ला रेंगान फाड़का लेन ता दिवाह जो उजालो केरनेन रेय, एने तान दिवा, केंदलीन वाटका, तेल्यु एने तान तेलान आखा ठामलाह ता केरीन डापे; तेवी ता आखा सामाना हेऱ्या दिवाह देरीया वाला जेनवारान चामड़ा केरीन डाप देय, एने उखलीन ली जाण्यी डांडी पोर मिले।
पोशा ता होनान वेदी पोर एक निल्लो फाड़को आथरीन ताह देरीया वाला जेनवारान चामड़ा केरीन डापे, एने तान डांडीह लागाड़ देय; तेवी ता सेवा केरनेन आखो सोमानाह लावीन, जा केरीन चोखाला जागाम सेवा इथे, ताहरी निल्ला फाड़का माय गुंडालीन देरीया वाला जेनवारान चामड़ा माय डापे, एने उखलीन ली जाण्यी डांडी पोर मिले। पोशा ता वेदी पोर रेन आखो रूखड़ो हातीन ता पोर जामण्या रेंगान फाड़को आथरे। तेवी जा सोमाना केरीन वेदी पोर सेवा केरनु तो आखो, आक्ठो मेलनेन ठामलो, काटा, पावड़ा, वाटका, एने वेदीन आखो सोमान ता पोर मिले; एने ता पोर देरीया वाला जेनवारान चामड़ो आथरीन वेदी पोर डांडीह लागाड़े। जेवी हारून एने तान सोरा पाड़ावाह ओंगाण जाणे बुखेत चोखालो जागो एने तान आखो सोमानाह डाप देय, तेवी तान पासाण कहाती तो उखेलनेन केरता आवी, पुण काल्ली बी चोखाली वोस्तुह नाय आथले, नाहते ता मोर जाती।
कहातीह विसणेन केरता मेल मिलापवाला तोम्बु माय ज्युस वोस्तु हेत्यु।
जी वोस्तु हारून चाकऱ्यान सुरो एलीआजराह देखरेख केरनेन केरता होपाय जाय त्यु ज्यु हेत्यु, उजालो केरनेन केरता तेल, एने गेंदाण्यी दुणी, एने कायेम ने एनबोली, एने अबिशेकान तेल, एने ता माय वाली आखी वोस्तु, एने चोखालो जागो एने तान आखो सामान।
पुशो बोगवान मुसाह एने हारूनाह केयो, “कहातीन वोसीन गेराणाह लेवी माय रेन खेतेम मा एणे दिहे; ता हेऱ्या ओहलो किरो, जुलबुखे ता जुलूम चोखाली वोस्तुन जागे आवी, तुलबुखे नाय मुरे पुण जीवतालाच रेय; केरीन हारून एने तान सोरा माय आवीन एक एकान केरता तान सेवान काम ताह होप देय। पुण कहाती चोखाली वोस्तुह देखणेन केरता एक तालने केरता बी माय नाय आवणे जुवे, नाहते ओहलो नाय एय काय ता मोर जाय।”
लेवीन गेर्शोनी गेराणान जापापदारी
पुशो बोगवान मुसाह केयो, तु गेर्शोन वोसीन एदम्यान बी गेणती तान डायडायान गेराणान एने वोसीन पारमाणे केर; तीस वोरह्याह रेन ते पाचाह वोरह्या वोर वोयावाला, जोला बी मेल मिलापवाला तोम्बु माय सेवा केरनेन केरता आवतेह, ता आखाह गेण ले। सेवा केरनेन एने सोमानान वोजो उखेलने माय गेर्शोनीन गेराणान ज्य काम रेय; ता रेण्या जागान पोड़दा, एने मेल मिलापवालो तोम्बु एने ताह डापणेन पुड़दो, एने तान उपेरल्यो देरीया वाला जेनवारान चामड़ो, एने मेल मिलापवाला तोम्बुन बायणान पोड़दा, एने तोम्बु, एने वेदीन कावदेन खोलीन पोड़दा, एने खोलीन बायणान पोड़दा, एने तान दोयड्यी, एने ता माय काम लागणार आखो सोमान, एने ज्यी वोस्तु केरीन जोलो काम इथे, तो आखो सेवान कामा माय आवी। गेर्शोन वोसीन आखी सेवा हारून एने तान सोरा केय तिहे एणे जुवी, मतलब जी जी सेवा ताह केरनो रेय, तान आखो बार तुमूच ताह होपज्यो। मेल मिलापवाला तोम्बु माय गेर्शोन वोसीन गेराणान ज्यीस सेवा ठेराय; ता पोर हारून चाकऱ्यान बिटोख ईतामार आदिकार मिले।
लेवीन मरारी गेराणान जापापदारी
पुशो मरारी वोसीन एदम्याह बी तु तान वोसीन एने डायडायान गेराणान पारमाणे गेण ले; तीस वोरह्या रेन ते पाचाह वोरह्यान वोयावाला, जोला बी मेल मिलापवाला तोम्बु माय सेवा केरनेन लायेक हेते, ता आखाह गेण ले। एने मेल मिलापवाला तोम्बु माय वाल्यु जी वोस्तुह विसणेन सेवा ताह जुड़ी त्यु ज्यु हेत्यु, तोम्बुन पाटड्या, बेड्यु, खांबा एने कुड़च्यु, एने कावदेन खोलीन खांबा, एने तान कुड़च्यु, खुटा, दोयड्यु एने बात बातीन कामान आखो सोमान विसीन ली जाणेन केरता ताह होपाय जाय, एने ता माय रेन एक एक वोस्तुन नाव लेन तु गेण ले। मरारी वोसीन गेराणान आखी सेवा जी ताह मेल मिलापवाला तोम्बुन बाराम केरनु हे, ती ज्यीस हे; एने ती हारूनान बिटोख ईतामार चाकऱ्यान देखरेत माय रेय।
लेवी माणहान गेणती
तेवी मुसा एने हारून एने मोंडलीन मुखी कहात वोसीन एदम्याह, तान गेराणान एने डायडायान गेराणान पारमाणे गेण लेदा, जा तीस वोरह्या रेन ते पाचाह वोरह्यान वोय वाला, जोला बी मेल मिलापवाला तोम्बुन सेवा केरनेन केरता बोरती इयेल एता, ता आखाह गेण लेदा; जा आप आपणी वोसी पारमाणे गेणाय जायेल एता, ता दुय एजार साड़े सात होव एता। कहात वोसी माय रेन जोला एदमी मेल मिलापवाला तोम्बु माय सेवा केरनेन केरता गेणाय गीया, ता ओलास एता; जो उकुम बोगवान मुसान उगे रेन आपेल इतो, तिहेस केरीन मुसा एने हारून ताह गेण लेदा। गेर्शोन वोस माय रेन जा तान वोस एने डायडायान गेराणान पारमाणे गेणाय गीया, जा तीस वोरह्यान देरीन ते पाचाह वोरह्यान वोयवाला, जा मेल मिलापवाला तोम्बुन सेवा केरताला, तान गेणती तान वोस एने डायडायान गेराणान पारमाणे दुय एजार सोव होव तीस एती। गेर्शोन वोस माय रेन जोला एदमी मेल मिलापवाला तोम्बु माय सेवा केरनारे गेणाय गीया, ता ओलास एता; यहोवान उकुमान पारमाणे मुसा एने हारून ताह गेण लिदो। पोशा मरारी वोस माय रेन एदम्यान गेणती, तान वोस एने डायडायान गेराणान पारमाणे गेणाय गीया, जा तीस वोरह्या रेन ते पाचाह वोरह्या वोयावाला वोर, जा मेल मिलापवाला तोम्बुन सेवा केरनेन केरता बोरती इयेल एता, तान गेणती तान गेराणान ईसाबे तीन एजार दुय होव एती। मरारीन वोस माय रेन जाह मुसा एने हारून, यहोवान ता उकुमा पारमाणे जो मुसान उगे रेन जुड़ेल इतो, गेण लेदा ता ओलास एता। लेवीन गेराणा माय रेन जाह मुसा एने हारून एने इस्राएली मुखी तान वोस एने डायडायान गेराणा पारमाणे गेण लियेल इतो, जा तीस वोरह्या वाला रेन ते पाचाह वोरह्या वोर वोयावाला, जोला बी मेल मिलापवाला तोम्बुन सेवा केरने एने बार उखेलेन काम केरनेन केरता बाग लेण्या एता, ता आखान गेणती आठ एजार पाच होव हायची एती। यहोवा मुसान द्वारा जो उकुम आपेल इतो, तान गेत आखाह तान काम होपानो, एने केयो काय ताह काय उखेलनु हे। इह केरीन तान गेणती केराय गीयी, जीह केरीन यहोवा मुसाह उकुम आपेल इतो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.