Nahali Bible
गिनती 3
हारूनान सोरा
जी टेम बोगवान सिनाय बोयड़ान जागे मुसा हिऱ्यो वातु किऱ्यो, ती टेम माय हारून एने मुसान ज्यी वोस एती। 1हारूनान सोरान नावे ज्या हेते, नादाब तान जेठालो बिटोख इतो एने अबीहु, एलीआजर एने ईतामार; ज्याच हारूनान सोरा निवाड़ेल चाकऱ्या एता, एने ताह चाकऱ्यान काम केरनेन केरतास ठेरायेल एतो। 2नादाब एने अबीहु जुलबूखे सिनाय जेंगला माय बोगवानान सामने बोली चेड़ावणेन केरता अस्वीकार आक्ठो ली गीया, तुलीसबूखे बोगवानान सामने ता मोर जायेल एता, एने तान सोरा बी नाह एता। एलीआजर एने ईतामार तान आबोख हारूनान सामने चाकऱ्यान काम किरते रेना।
लेवीह चाकऱ्यान सेवान केरता निवाड़नो
ओवतो बोगवान मुसाह केयो, “लेवी वोसी वालाह आहने लावीन हारून चाकऱ्यान सामने उबो केर काय ता तान मोदेक किरे। जो काय तान उगे रेन एने आखी मोंडलीन उगे रेन ताह होपाय जाय, तान देखरेख ता मिलापवाला तोम्बुन सामने केरती, इह केरीन ता तोम्बुन सेवा किरे; ता मिलापवाला तोम्बुन आखा सोमानान एने इस्राएली माणहान हुपेल आखी वोस्तुन देखरेख किरे, इहकेरीन तोम्बुन सेवा किरे। एने तु लेवीह हारून एने तान सोराह होप दे; एने ता इस्राएली माणहान उगे रेन हारूनाह हास केरीन आपायेल रेय। तु हारून एने तान सोराह चाकऱ्यान जागा पोर बोहाड़, एने ता सोतान चाकऱ्यान पोद होमालती; एने केदी दिहरो माणुह आहने आवी, ताहार तो माराय जाय।”
ओवतो बोगवान मुसाह केयो, “होमेल इस्राएल वाल्यु बायकुन जेठाला सोरान बोदले, मी इस्राएली माय रेन लेवीह लेय लेथु; केरीन लेवी माराच केवाती। 3एने आखा जेठाला सोरा माराच हेते; काहाकाय जे दिह मी मिस्र देसान जेठाला सोराह मारेल, ते दिह मी काय माणुह काय जेनवार इस्राएली माणहान आखा जेठाला सोराह मार केरता चोखाला ठेराव दियेल; केरीन ता माराच केवाती; मी यहोवा हे।”
लेवीन गेणती
पुशो बोगवान सिनाय जेंगला माय मुसाह केयो, “लेवी माय रेन जोला बी एदमी एक मोयनान नाहते ताह रेन वोदार वोयान एती, ताह तान डायडायान गेराणान गेत तान गेणती केर लिजे।” ज्यो उकुम होमलीन मुसा बोगवान कियेल तीहीच केरीन ताह गेण लिदो। एने लेवीन सोरान नावे ज्या हेते, गेर्शोन, कहात एने मरारी। एने गेर्शोनान सोरा जा पोर रेन तान वोस चालेल तान नावे ज्या हेते, लिबनी एने शिमी। एने कहातान सोरा जा पोर रेन तान वोस चालेल तान नावे ज्या हेते, अम्राम, यिसहार, हेब्रोन एने उज्जीएल। एने मरारीन सोरा जा पोर रेन तान वोस चालेल ज्या हेते, महली एने मुशी। ज्या लेवीन पिढीन तान डायडायान गेराणान पारमाणे हेते।
गेर्शोनान उगे रेन लिब्नी एने शिमीन गेराणो चालनो; एने गेर्शोनान वोसीन गेराणो ज्याच एता। ज्या माय रेन जोला एदम्यान वोय एक मोयनान नाहते ताह रेन जादा एती, ता आखान गेणती हात एजार पाच होव एती। गेर्शोन वोस तोम्बुन पासाण पश्चिम उगे तान पाड़ावो टाक्या किरे; एने गेर्शोनान डायला एदम्यान गेराणान मुखी लाएलान बिटोख एल्यासाप इतो। एने मेल मिलापवालो तोम्बुन जी बी वोस्तु गेर्शोन वोसीह होपाय गीयी, त्यु ज्यु हेत्यु, रेण्यो जागो एने तोम्बु एने तान डापणेन पुड़दो, एने मेल मिलापवाला तोम्बुन बायणान पुड़दो, एने जी खोली रेणेन एने वेदीन कावदेन हे तान पोड़दा, एने तान बायणान पुड़दो, एने आखी बातीन दोयड्यु ज्यु ता कामाम लागण्यु हेत्यु।
पोशा काहातान द्वारा अम्रामीया, यिसहारीया, हेब्रोनिया, एने उज्जीएल ने वोस चालना; कहातीन वोस ज्यास हेते। एने ता माय रेन जोला एदम्यान वोय एक मोयनान नाहते ताह रेन जादा एती, तान गेणती आठ एजार सोव होव एती। ता फाय चोखाला जागाह होमालनेन जापापदारी एती। एने कहातीन गेराणो तोम्बुन ती उगे तान पाड़ावो टाकेल एतो, जो दक्षिण उगे हे; एने कहातवाला गेराणान डायला एदम्यान गेराणान मुखी उज्जीएल ने बिटोख एलीसापान एतो। एने ज्यी वोस्तु ताह होपाय गियी ती पेटी, पाटलो, दिवो, वेद्यु एने चोखाला जागान तो सामान जा केरीन सेवा केरनु, एने पुड़दो; मतलब चोखाला जागाह लागण्यो आखो सामान एतो।
एने लेवीन मुखीन मुखी हारून चाकऱ्यान बिटोख एलीआजर रेणे जुवे, एने जा माणहे चोखाला जागान हुपेल वोस्तुन देखरेख केरती, तान उपेर तोच जापापदार ठेराय।
पोशो मरारीन वोस माय रेन महलीन एने मुशीन वोस चालनो; मरारीन वोस ज्यास हेते। एने ज्या माय रेन जोला एदम्यान वोय एक मोयनो नाहते ताह रेन वोदार एती, ता आखान गेणती सोव एजार दुय होव एती। एने मरारीन कुटूमान मुखी एदम्यान गेराणान मुखी अबीहेलान बिटोख सुरीएल इतो; ज्या माणहे तोम्बुन उत्तर उगे तान पाड़ावो टाकेल एतो, एने ज्यी वोस्तु मरारी वोसीह देखरेख केरनेन होपायेल एती, ती तोम्बुन खासा, डांड्यु, खुटा, कुड़च्यु, एने ता हेऱ्य आखो सामान; जो तान कामे लागण्यो एतो; एने कावदेन खोलीन बेला, एने कुड़च्यु, खुटा एने दोयड्यु एत्यु।
जाह मेल मिलापवाला तोम्बुन ओंगाण, मतलब रेणेन जागे, पुर्व उगे जा रेन दिह उगणे, तान पाड़ावो टाकतालो, एने ता मुसा एने हारून एने तान सोरान पाड़ावो रेय, एने चोखाला जागान देखरेख इस्राएली माणहान बोदले तास केरती, एने दिहरो जो कुण ता तोम्बुन जागे आवी तो माराय जाय। एने यहोवान ज्यो उकुम मानीन एक मोयनान, नाहते ताह रेन जादा वोयावाला जोला बी लेवी एदम्याह मुसा एने हारून तान वोसी पारमाणे गिणेल एता, ता आखान आखा बावीस एजार एता।
लेवीह जेठाला सोरान जागे लेणो
पुशो यहोवा मुसाह केयो, “इस्राएली माणहान जोला बी पेल्ला एदम्यान वोय एक मोयनो नाहते ताह रेन जादा हे, ता आखाह नाव देरीन गेणले। एने मार केरता इस्राएली माणहान आखा जेठाला सोरान बोदले लेवीह, एने इस्राएली माणहान जेनवारान आखा पेल्ला पिलान बोदले लेवीन जेनवाराह ले; मी यहोवा हे।” यहोवान ज्यो उकुम मानीन मुसा इस्राएली माणहाह आखा जेठालाह गेण लिदो। एने आखा जेठाला एदम्यान जान वोय एक मोयनो, नाहते ताह रेन जादा एतो, तान नावान गेणती बावीस एजार दुय होव त्र्यात्तर एती।
तेवी बोगवान मुसाह केयो, “इस्राएली माणहान आखा जेठाला सोरान बोदले लेवीह, एने तान जेनवारान बोदले लेवीन जेनवारे लिज्ये; एने लेवी मारास रेती; मी यहोवा हे। एने इस्राएली माणहान जेठाला सोरा माय रेन जा दुय होव त्र्यात्तर गेणती माय लेवीह रेन वोदार हेते, ताह सोड़ेवणेन केरता, एकेक एदम्यान केरता चांदीन पाच सिक्का लिज्ये; ता चोखाला जागान तोल ने ईसाबेस रेय; एने एक सिक्को बारा ग्राम4 ने रेय। एने जा पोयशा ता होवटाला जेठाला सोरान सोड़ोवती केरनेन रेय, ताह हारून एने तान सोराह आप दिज्ये।” तेवी जा इस्राएलीन जेठाला सोरा लेवीन द्वारा सोड़ायेल माय रेन वोदार एता, तान आथा केरीन मुसा सोड़ोवतीन पोयशा लिदो। एने एक एजार तीन होव पाहसठ चांदीन सिक्कान5 किमोत माय चोखाला जागान तोल ने ईसाबे इस्राएल से वोसुल एना। एने बोगवानान उकुम मानीन मुसा सोड़येल तान पोयशा हारून एने तान सोराह आप दिनो।
Source notes (5)
- Cross-reference गिनती 26:60
- Cross-reference लेव्यवस्था 10:1-2; गिनती 26:61
- Cross-reference निर्गमन 13:2
- Footnote एक सिक्को बारा ग्राम शेकेल
- Footnote एक एजार तीन होव पाहसठ चांदीन सिक्कान एक एजार तीन होव पाहसठ शेकेल
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.