Nahali Bible
गिनती 2
टोला माय बातबातीन टोलान क्रम
पुशो बोगवान मुसा एने हारूनाह केयो, इस्राएली माणहे मिलापवाला तोम्बुन कावदेन एने तान ओंगाण आप आपणा जेंडा एने आप आपणा डायडायान गेराणान निसाणीन जागे तान पाड़ावो उबो किरे।
जा तान पुर्व दिशा उगे, जान तान टोलान गेत पाड़ावा उबा केऱ्या किरे, ता यहुदान सेनान टोलावाला जेंडान माणहे रेती, एने तान मुखी अम्मीनादाबान बिटोख नहशोन रेय, एने तान टोलान गिणेल एदमी चोवऱ्यात्तर एजार सोव होव हेते। एने तान जागे जा पाड़ावो टाक्या किरे, ता इस्साकारान गेराणान रेणे जुवे, एने तान मुखी सुवारान बिटोख नतनेल रेय, एने तान टोलान गिणेल एदमी चोवपन एजार चार होव हेते। ता आहने जबुलूनान गेराणावाला रेती, एने तान मुखी हेलोनान बिटोख एलीआब रेय, एने तान टोलान गिणेल एदमी सत्तावन एजार चार होव हेते। इह केरीन यहुदान टोला माय जोला बी आप आपणा टोलान उगे रेन गेणाय गीया, ता सोब मिलीन एक लाख सियायसी एजार चार होव हेते। पेल ज्यास जाया किरे।
दक्षिण उगे रूबेन ने टोला माय जेंडान माणहे आप आपणा टोलान पारमाणे रेय, एने तान मुखी शदेऊरान बिटोख एलीसुर रेय, एने तान टोलान गिणेल एदमी साड़े सेचाड़ीस एजार हेते। एने तान जागे जा पाड़ावो उबा किरे ता शिमोनान गेराणान रेती, एने तान मुखी सुरीशद्यान बिटोख शलुमीएल रेय, एने तान टोलान गिणेल एदमी एकोनसाठ एजार तीन होव हेते। पोशा ता हेऱ्या गादान गेराणान रेय, एने तान मुखी रूएलान बिटोख एल्यासाप रेय, एने तान टोलान गिणेल एदमी पंचेचाड़ीस एजार साड़े सोव होव हेते। एने रूबेन ने सेनान टुलो पाड़ावा पोर जोला, आप आपणा टोलान पारमाणे गेणाय गीया, ता सोब मिलीन एक लाख एक्कावन एजार साड़े चार होव हेते। दिहरो जाणो न्यान रेय।
तान पासाण एने सोब सेनान टोलान विची माय लेवीन पाड़ावा हेऱ्योच मिलापवाला तोम्बुन जागे जाया किरे; जीह केरीन ता पाड़ावो उबा किरे तिहेच केरीन ता आप आपणा जागा पोर आपणा जेंडान आहने आहने चाले।
पश्चिम उगे एप्रेमान सेनान टुलो जेंडान माणहे आप आपणा टोलान पारमाणे रेय, एने तान मुखी अम्मीहुदान बिटोख एलीशामा रेय, एने तान टोलान गिणेल एदमी चालीह एजार पाच होव हेते। एने तान जागे मनश्शेन गेराणान रेती, एने तान मुखी पदासुरान बिटोख गम्लीएल रेय, एने तान टोलान गिणेल एदमी बत्तीस एजार दुय होव हेते। एने पोशा बिन्यामीनान वोसीन रेय, एने तान मुखी गिदोनीन बिटोख अबीदान रेय, एने तान टोलान गिणेल एदमी पोस्तीस एजार चार होव हेते। एने एप्रेमान पाड़ावा पोर जोला बी आप आपणा टोलान उगे रेन गेणाय गीया, ता सोब मिलीन एक लाख आठ एजार एक होव एदमी हेते। तीसरो जाणो न्यान एय।
“उत्तर उगे दानान सेनान टोलान जेंडान माणहे आप आपणा टोलान पारमाणे रेय, एने तान मुखी अम्मीशद्यान बिटोख अहीआजर रेय, एने तान टोलान गिणेल एदमी बाहसाठ एजार हात होव हेते। एने तान जागे जा पाड़ावो उबा किरे, ता आशेरान गेराणान रेय, एने तान मुखी ओक्रानान बिटोख पगीएल रेय, एने तान टोलान गिणेल एदमी एक्केचाड़ीस एजार पाच होव हेते। पोशा नप्तालीन गेराणान रेय, एने तान मुखी एनान बिटोख अहीरा रेय, एने तान टोलान गिणेल एदमी त्रेपन एजार चार होव हेते। एने दानान सेनान टोला माय जोला गेणाय जायेल एता, ता सोब मिलीन एक लाख सत्तावन एजार सोव होव हेते। न्या आप आपणा जेंडान आहने लागता आखान पासाण जाया किरे।”
इस्राएली माणहा माय रेन जा आप आपणा डायडायान गेराणान उगे रेन गेणाय गीया, ता ज्यास हेते; एने सोब सेनान टोला माय जोला बी एदमी आप आपणा टोलान पारमाणे गेणाय गीया, ता सोब मिलीन सोव लाख तीन एजार साड़े पाच होव एता। पुण बोगवान मुसाह जो उकुम आपेल इतो तीह केरीन लेवी ते इस्राएली माणहा माय नाह गेणाना।
इह केरीन जो जो उकुम बोगवान मुसाह आपेल इतो, इस्राएली माणहे ता उकुमान होस आप आपणा डायडायान गेराणान पारमाणे, आप आपणा जेंडान आहने पाड़ावो केऱ्या एने जाया केरताला।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.