गिनती 1

इस्राएली माणहान पेल्‍ली गेणती

11

जेवी इस्राएली माणहे मिस्र देसाम रेन निकली जाणेन दिहरा वोरह्यान दुसरा मोयनान पेल्ले दिह, यहोवा सिनाय जेंगलाम मेल मिलाप केरन्या तोम्बु माय मुसाह केयो, 2“इस्राएली माणहान आखी मोंडलीन कुटूम एने डायडायान गेराणान उगे रेन, एक एक एदम्यान नाव लेय लेन गिणजे। 3एने जोला बी इस्राएली विह वोरह्यान नाहते ताह रेन वोदार वोयान एती, एने जा लेड़ाय केरनेन लायेक एती, ता आखाह तान टोलीन गेत तु एने हारून ताह गेण लेय। 4एने तुमरी हेऱ्यो एक एक वोस ने एक एक एदमी बी रेणे जुवे, जो तान डायडायान वोसीन मुखी एदमी रेय।” 5तुमरी मोदेक केरती ता माणहान नावे ज्या हेते, रूबेन ने वोसी माय रेन शदेऊरान बिटोख एलीसुर; 6एने शिमोनान वोसी माय रेन सुरीशद्यान बिटोख शलुमीएल; 7एने यहुदान वोसी माय रेन अम्मीनादाबान बिटोख नहशोन; 8एने इस्साकारान वोसी माय रेन सुवारान बिटोख नतनेल; 9एने जबुलून ने वोसी माय रेन हेलोनान बिटोख एलीआब; 10एने युसूफान सोरा माय रेन ज्या हेते, मतलब एप्रेमान वोसी माय रेन अम्मीहुदान बिटोख एलीशामा, एने मनश्शेन वोसी माय रेन पदासुरान बिटोख गम्लीएल; 11एने बिन्यामीनान वोसी माय रेन गिदोनीन बिटोख अबीदान; 12एने दानान वोसी माय रेन अम्मीशद्यान बिटोख अहीआजर; 13एने आशेरान वोसी माय रेन ओक्रानान बिटोख पगीएल; 14एने गादान वोसी माय रेन दुएलान बिटोख एल्यासाप; 15एने नप्तालीन वोसी माय रेन एनान ने बिटोख अहीरा। 16एने मोंडल्यु माय रेन जा एदमी जीव जीवान डायडायान वोसीन आदिकारी बोणीन हादाड़ेल एता, ता ज्यास हेते, एने ज्या इस्राएलीन दिहऱ्यु मोंडल्यु माय मुखी एदमी एता।

17एने जा एदम्यान नावे उपेर लिखेल हेते, ताह आरही लेन मुसा एने हारून, 18दुसरा मोयनान पिल्ले दिह आखी मोंडलीह एकठा केऱ्या, तेवी इस्राएली माणहे जीव जीवान वोस एने जीव जीवान डायडायान गेराणान गेत विह वोरह्यान नाहते ताह रेन वोदार वोया वालान नावान गेणती केरावीन जान तान सोरान नावे लेखाड्या। 19जीह केरीन बोगवान मुसाह उकुम आपेल इतो, तिहेस केरीन तो सिनाय जेंगला माय तान गेणती किऱ्यो।

20एने इस्राएली माणहान जेठालो रूबेनान वोसीन जोला बी एदमी तान कुटूम एने तान डायडाया गेराणान उगे रेन विह वोरह्यान नाहते ताह रेन जादा वोयान एता एने लेड़ाणेन लायेक एता, ता आखाह जान तान नावा माय गेणाय गीया। 21एने रूबेन ने वोसीन गिणेल एदमी साड़े सेचाड़ीस एजार एता।

22शिमोनान वोसीन जोला बी एदमी तान कुटूमान एने तान डायडायान गेराणान उगे रेन विह वोरह्यान नाहते ताह रेन वोदार वोयान एता, जा लेड़ाय केरनेन लायेक एता, ता आखा जान तान नावाम गेणाय गीया। 23एने शिमोनान वोसीन गिणेल एदमी एकोनसाठ एजार तीन होव एता।

24गादान वोसीन जोला एदमी एता तान कुटूमान एने तान डायडायान वोसीन गेत विह वोरह्यान नाहते ताह रेन वोदार वोयान एता, एने लेड़ाय केरनेन लायेक एता, ता सोब जान तान नावा माय गेणाय गीया, 25एने गादान वोसीन गिणेल एदमी पंचेचाड़ीस एजार साड़े सोव होव एता।

26यहुदान वोसीन जोला बी एदमी तान कुटूमान एने तान डायडायान वोसीन उगे रेन विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया। 27एने यहुदान वोसीन गिणेल एदमी चोवऱ्यात्तर एजार सोव होव एता।

28एने इस्साकारान वोसीन जोला बी एदमी तान कुटूमान एने तान डायडायान गेराणान उगे रेन विह वोरह्यान एता, एने जा लेड़ाय केरनेन लायेक एता, ता आखा आप आपणा नावा माय गेणाय गीया, 29एने इस्साकारान वोसीन गिणेल एदमी चोवपन एजार चार होव एता।

30एने जबुलूनान वोसीन जोला बी एदमी तान कुटूमान एने तान डायडायान गेराणान उगे रेन विह वोरह्यान नाहते ताह रेन वोदार वोयान एता, एने जा लेड़ाय केरनेन लायेक एता, ता आखा आप आपणा नावा माय गेणाय गीया 31एने जबुलूनान वोसीन गिणेल एदमी सत्तावन एजार चार होव एता।

32एने युसूफान सोरा माय रेन एप्रेमान वोसीन जोला बी एदमी तान कुटूमान एने तान डायडाया गेराणान गेत विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया। 33एने एप्रेम वोसीन गिणेल एदमी चालीह एजार पाच होव एता। 34युसूफ ने बिटोख मनश्शेन वोसीन जोला बी एदमी तान वोसीन एने तान डायडायान गेराणान उगे रेन विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया। 35एने मनश्शेन गेराणान गिणेल एदमी बत्तीस एजार दुय होव एता। 36बिन्यामीनान वोसीन जोला बी एदमी तान कुटूमान एने तान डायडायान गेराणान उगे रेन विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया। 37एने बिन्यामीनान गेराणाम रेन गिणेल एदमी पोस्तीस एजार चार होव एता। 38दानान वोसीन जोला एदमी बी तान कुटूमान एने तान डायडायान गेराणान उगे रेन विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया, 39एने दानान वोसीन गिणेल एदमी बाहसाठ एजार सात होव एता। 40आशेरान वोसीन जोला बी एदमी तान कुटूमान एने तान डायडायान गेराणान उगे रेन विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया, 41आशेरान गेराणान गिणेल एदमी साड़े एक्केचाड़ीस एजार एता। 42नप्तालीन वोसीन जोला बी एदमी तान कुटूमान एने तान डायडायान गेराणान उगे रेन विह वोरह्यान नाहते ताह रेन वोदार वोयान एता एने जा लेड़ाय केरनेन लायेक एता, ता सोब आप आपणा नावा माय गेणाय गीया, 43नप्तालीन गेराणान गिणेल एदमी त्रेपन एजार चार होव एता।

44इह केरीन मुसा एने हारून एने इस्राएली माणहान बारा मुखी मिलीन, जा आप आपणा डायडायान गेराणान मुखी एता, ता आखाह गेण लियेल एने तान गेणती ज्यी एती। 45केरीन जोला बी इस्राएली माणहे विह वोरह्यान नाहते ताह रेन जादा वोयान एता, केरीन लेड़ाय केरनेन लायेक एता, ता तान डायडायान गेराणान उगे रेन गेणायेल एता, 46ता आखा गिणेल एदमी देरीन सोव लाख तीन एजार साड़े पाच होव एता।

47न्या माय लेवी तान डायडायान वोसी पारमाणे नाह गेणाना। 48काहाकाय बोगवान मुसाह कियेल इतो, 49“लेवीन वोसीन गेणती इस्राएली माणहा हेऱ्य मा किरहे; 50पुण तु लेवी माणहाह पुरावान तोम्बु पोर, एने तान आखा सामाना पोर, मतलब जो काय बी तान हे ताच पोर आदिकारी बाणावज्ये; एने आखा सोमाना हिऱ्यो रेणेन तोम्बुह बी ताच उखेलती, एने ताच ताम चाकरी बी केरती, एने तोम्बुन आस पास ताच तान पाड़ावो टाक्या किरे। 51जुलबूखे बी तोम्बुह ओंगाण लेन जाणो रेय तुलबुखे लेवी ताह पाड़ देय, एने जुलबूखे तोम्बुह उबो केरनो रेय, तुलबुखे लेवी ताह उबो केरती; एने केदी एगदो दिहरो आहने आवी ताहार तो माराय जाय। 52एने इस्राएली माणहे आप आपणो पाड़ावो आप आपणा टोला माय, एने आप आपणा जेंडान जागे उबो केऱ्या किरे; 53पुण लेवी तान पाड़ावो तान पुरावान तोम्बुन कावदेन उबा केऱ्या केरती, नाहते ओहलो नाय एय काय इस्राएली माणहान मोंडली पोर मारो राग बोड़की; एने लेवी तान पुरावान तोम्बुन राखवाली केऱ्या किरे।” 54जो उकुम बोगवान मुसाह आपेल इतो, इस्राएली तिहेच केरीन केऱ्या।