Nahali Bible
गिनती 30
मानता मान्नेन रिती
ओवतो मुसा इस्राएली वोसीन मुखी एदम्याह केयो, यहोवा ज्यो उकुम आपेल हे। 1जेवी एगदो माणुह यहोवान मानता मानी, नाहते सोताह वाचा बांदणेन केरता सुगोण खाय ते तो तान वचन नाय टाले, जो काय तान मुयाम रेन निकेलनो एय, तान गेत तो किरे।
जेवी एगदी बायकु तीन जुवानीन अवस्था माय, तीन आबाख ने गेरा माय रेणेन बुखेत यहोवान मानता मानी, एने सोताह वाचा माय बांदे, ताहार केदी तीन आबोख तीन मानता एने तीन तो वचन होमलीन, जा केरीन ती सोताह बांदेल एय, ताह कायच नाय केय; तेवी तीन आखी मानता टिकीन रेय, उंजु एगदा बोंदेन काहा नाय एती, जा से सोताह बांदेल एय, ता बी टिकीन रेय। पुण केदी तीन आबोख तीन होमलीन ते दिह तीह मोना किरे, ते तीन मानता एने दिहरी बातीन बोंदेन, जा केरीन ती सोताह बांदेल एय, ता माय रेन एक बी टिकीन नाय रेय। यहोवा ज्य जाणीन काय ती बायकुन आबोख तीह मोना केर दियेल हे, तीन ज्यो पाप माफ केरी।
केदी ती तीन एदम्यान ताबाम एय एने मानता मानी, एने बिगेर सोच विचार किरेल ओहलो कायच नाह फुसता, जा केरीन ती बोंदेन माय पोड़ी, एने केदी तीन एदमी होमलीन ते दिह तीह कायच नाय केय, तेवी तीन मानता टिकीन रेय, एने जा बोंदेन माय ती सोताह बांदेल एय, तो बी टिकीन रेय। पुण केदी तीन एदमी होमलीन ते दिह तीह मोना केर देय, ताहार जी मानता ती मानेल हे, एने जी वात बिगेर सोच विचार किरेल केणे से ती सोताह वाचा केरीन बांदेल एय, तो तुट जाय। यहोवा ती बायकुन पाप माफ केरी।
पोशी रांडायेल बायकु एने सोड़ेल बायकुन मानता, एने काल्ली बी बातीन वाचान बोंदेन काहा नाय रेय, जा केरीन ती सोताह बांदेल एय, ताहार ती टिकीन रेय।
केदी एगदी बायकु तीन एदम्यान गेरा माय रेते लेन मानता माने, नाहते सुगोण खाईन सोताह बांदे, एने तीन एदमी होमलीन कायच नाय केय, एने नाह तीह मोना किरे; ताहार तीन आखी मानता टिकीन रेय, एने एकेक बोंदेन काहा नाय रेय, जा केरीन ती सोताह बांदायेल एय, ती टिकीन रेय। पुण केदी तीन एदमी तीन मानता होमलीन ते दिह पुरी रिती से तोड़ देय, ताहार तीन मानता पेल जो काय तीन मुयाम रेन तीन बोंदेन ने वात निकेलनी एय, ती माय रेन एक वात बी टिकीन नाय रेय; तीन एदमी आखो तोड़ दियेल हे; केरीन यहोवा ती बायकुन तो पाप माफ केरी। काल्ली बी मानता एने सुगोण काहा नाय रेय, जा केरीन ती बायकु तीन जीवाह दुख देणेन वाचा बांदेल एय, तीह तीन एदमी एय सेकी ते पुरो केरी, नाहते तोड़े। केदी तीन एदमी दाड़ीन दिह तीह कायच नाय केय, ताहार ती तीन आखी मानता पेल्ला बोंदेनाह जा केरीन ती बांदायेल एय, मोजबुत केर दिथे; तो तीह काहाकाय ते दिह तो कायच नाह केयो। एने केदी तो होमेलनेन बाद तोड़ देय, ताहार तान बायकुन गुनान बार तोस उखली।
बायकु एदम्यान विचीम एने आबोख एने तान गेरा माय रेणार कुवारली बेटीख ने विचीम, जी रितीन उकुम यहोवा मुसाह आपेल तो ज्योस हे।
Source notes (1)
- Cross-reference व्यवस्था 23:21-23; मत्ती 5:33
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.