Nahali Bible
गिनती 29
नोवाला वोरह्यान तिवारान बोली
(लेव्यवस्था 23:23-25)
पुशो हातवा मोयनान पेल्ले दिह तुमरो चोखालो पोंचो रेय, ता माय मेहनेत ने काल्लो काम मा किरहो। तो तुमरी केरता बोड़ायीन बिरो फुकणेन दिह हे। तुमू होमबोली चेड़ावज्ये, जा केरीन यहोवान केरता मोग मोग गेंदाणार रेय, मतलब एक डांड्यो, एक मेंडो, एने एकेक वोरह्या सात मेंड्रान हाजाला पिला; एने तान एन बेट तेल चुपड़ेल हाजा फिटान रेय, मतलब डांड्या हिऱ्यो एपान तीन दोहवो ईसो, एने मेंडा हेऱ्य एपान दुय दोहवा ईसा, एने सात मेंड्रान पिला माय रेन एक एक पिलान पासाण एपान दाहवो ईसो फिट चेड़ावज्ये। एने एक बुकोड़ बी पापबोली केरीन चेड़ावज्ये, ज्यान केरता काय तुमरी केरता पाप डापाय जाय। ज्या सोबाह रेन वोदार नोवाला चांदान होमबोली एने तान एन बेट, एने कायेम ने होमबोली एने तान एन बेट, एने ता आखान पिणी बोली बी तान नेमान गेत मोग मोग गेंदाणार यहोवान केरता बोली केरीन चेड़ावज्ये।
पाप डापणेन ने दिह्यान बोली
(लेव्यवस्था 23:26-32)
एने उंजु सातवा मोयनान दोहवे दिह तुमरो चोखालो पोंचो रेय, तुमू तुमरा जीवाह तारास दिवो, एने काल्ली बी बातीन कामकाज मा किरहो, एने यहोवान केरता मोग मोग गेंदाणार होमबोली, मतलब एक डांड्यो, एक मेंडो, एने एकेक वोरह्यान सात मेंड्रान पिला चेड़ावज्ये, पुण ज्या सोब हाजाला रेणे जुवे। एने तान एन बेट तेल चुपड़ेल फिटान, मतलब डांड्या हेऱ्य एपान तीन दोहवो ईसो, एने मेंडा हेऱ्य एपान दुय दोहवो ईसो, एने हात मेंड्रान पिला माय रेन एक एक पिलान पासाण एपान दाहवो ईसो मोयदो चेड़ावज्ये। एने पापान बोलीन केरता एक बुकोड़ बी बोली चेड़ावज्ये, ज्य आखो पासतावान पापबोली एने कायेम ने होमबोली एने तान एन बेट, एने ता आखान पिणी बोलीन सावाय चेड़ावाय जाय।
खोपड़ीन तिवारान बोली
(लेव्यवस्था 23:33-44)
पुशो सातवा मोयनान पोंद्रावे दिह तुमरो चोखालो पोंचो रेय, एने ता माय मेहनेत ने काल्लो काम मा किरहो, एने सात दिह वोर यहोवान केरता तिवार माणावज्यो। तुमू होमबोली यहोवान केरता मोग मोग गेंदाणार बोली केरीन चेड़ावज्यो, मतलब तेरा डांड्या, एने दुय मेंडा, एने एकेक वोरह्यान चोवदा मेंड्रान पिला, ज्या सोब हाजाला रेणे जुवे। एने तान एन बेट तेल चुपड़ेल फिटान, मतलब तेरा डांड्यान पासाण एपान तीन दोहवो ईसो, एने ता दुयू मेंडा माय रेन एक एक मेंडान पासाण एपान दुय दोहवो ईसा, एने चोवदा मेंड्रान पिला माय रेन एक पिलान पासाण एपान दाहवो ईसो हाजो फिट चेड़ावज्ये। एने पापबोलीन केरता एक बुकोड़ बी बोली चेड़ावज्यो, ज्यी कायेम ने होमबोली एने तान एन बेट एने पिणी बोलीन सावाय चेड़ावाय जाय।
ओवतो दिहरे दिह बारा डांड्या, एने दुय मेंडा, एने एकेक वोरह्यान चोवदा हाजाला मेंड्रान पिला बोली चेड़ावज्यो। एने डांड्या एने मेंडान, एने मेंड्रान पिला हेऱ्या तान एन बेट एने पिणी बोली, तान गेणती पारमाणे, एने नेमा पारमाणे बोली चेड़ावज्यो। एने पापबोलीन केरता एक बुकोड़ बी चेड़ावज्यो, ज्यी कायेम ने होमबोली, एन बेट एने पिणी बोलीन सावाय चेड़ावाय जाय।
तीसरे दिह इग्यार डांड्या, एने दुय मेंडा, एने एक एक वोरह्यान चोवदा मेंड्रान हाजाला पिला चेड़ावज्यो। एने डांड्या, एने मेंडा, एने मेंड्रान पिला हेऱ्य तान एन बेट एने पिणी बोली, तान गेणती पारमाणे, एने नेमा पारमाणे चेड़ावज्यो। एने पापबोलीन केरता एक बुकोड़ बी चेड़ावज्यो, ज्यी कायेम होमबोली एने तान एन बेट एने पिणी बोलीन सावाय चेड़ावाय जाय।
पोशो जेवी चोवथो दिह दोह डांड्या, एने दुय मेंडा, एने एकेक वोरह्यान चोवदा हाजाला मेंड्रान नर पिला चेड़ावज्यो। डांड्या एने मेंडा, एने मेंड्रान पिला हेऱ्य तान एन बेट एने पिणी बोली, तान गेणती पारमाणे, एने नेमा पारमाणे चेड़ावज्यो। एने पापबोलीन केरता एक बुकोड़ बी चेड़ावज्यो, ज्या कायेम होमबली एने तान एन बेट एने पिणी बोलीन सावाय चेड़ावाय जाय।
पुशो पाचवे दिह नोव डांड्या, दुय मेंडा, एने एकेक वोरह्यान चोवदा हाजाला मेंड्रान नर पिला चेड़ावज्यो। एने डांड्या, मेंडा, एने मेंड्रान पिला हेऱ्य तान एन बेट एने पिणी बोली, तान गेणती पारमाणे, एने नेमा पारमाणे चेड़ावज्यो। एने पापबोलीन केरता एक बुकोड़ बी बोली चेड़ावज्यो, ज्यी कायेम होमबोली एने तान एन बेट एने पिणी बोलीन सावाय चेड़ावाय जाय।
पुशो सोव्वे दिह आठ डांड्या, एने दुय मेंडा, एने एकेक वोरह्यान चोवदा हाजाला मेंड्रान नर पिला बोली चेड़ावज्यो। एने डांड्या, एने मेंडा, एने मेंड्रान पिला हेऱ्या तान एन बेट एने पिणी बोली, तान गेणती पारमाणे, एने नेमा पारमाणे बोली चेड़ावज्यो। एने पापबोलीन केरता एक बुकोड़ बी बोली चेड़ावज्यो, ज्या कायेम होमबोली एने तान एन बेट एने पिणी बोलीन सावाय चेड़ावाय जाय।
पुशो सातवे दिह हात डांड्या, एने दुय मेंडा, एने एकेक वोरह्यान चोवदा हाजाला मेंड्रान नर पिला बोली चेड़ावज्यो। एने डांड्या एने मेंडा एने मेंड्रान पिला हेऱ्या तान एन बेट एने पिणी बोली, तान गेणती पारमाणे, एने नेमा पारमाणे बोली चेड़ावज्यो। एने पापबोलीन केरता एक बुकोड़ बी बोली चेड़ावज्यो, ज्यी कायेम होमबोली एने तान एन बेट एने पिणी बोलीन सावाय चेड़ावाय जाय।
पुशो आठवे दिह तुमरो एक मोटलो पोंचो रेय, ता माय मेहनेतीन काल्लो काम मा किरहो, एने ता माय होमबोली यहोवान केरता मोग मोग गेंदाणार बोली केरीन बोली चेड़ावज्यो, ती एक, डांड्यो, एने एक मेंडो, एने एकेक वोरह्यान हात हाजाला मेंड्रान नर पिला रेय। डांड्या एने मेंडा, एने मेंड्रान पिला हेऱ्य तान एन बेट एने पिणी बोली, तान गेणती पारमाणे एने नेमा पारमाणे बोली चेड़ावज्यो। एने पापबोलीन केरता एक बुकोड़ बी बोली चेड़ावज्यो, ज्यी कायेम होमबोली एने तान एन बेट एने पिणी बोलीन सावाय चेड़ावाय जाय।
तान मानता एने सोतान मोरजीन बोलीन सावाय, आप आपणा ठेरायेल टेमा माय ज्यीस होमबोली, एन बेट, पिणी बोली एने मेल मिलाप बोली, यहोवान केरता चेड़ावज्यो।
ज्यो आखो उकुम यहोवा मुसाह आप्यो, जो तो इस्राएली माणहाह होमलाड्यो।
Source notes (2)
- Cross-reference लेव्यवस्था 16:29-34
- Cross-reference लेव्यवस्था 23:34; व्यवस्था 16:13-15
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.