Nahali Bible
गिनती 31
मिद्यानी हेऱ्य बुदलो लेणो
ओवतो यहोवा मुसा केयो, “मिद्यानी माणहा फाय इस्राएली माणहान बुदलो ले; बाद माय तु तारा माणहा माय जाय मिलाहे।”
तेवी मुसा माणहाह केयो, “आपणा एदम्याह लेड़ायीन केरता आथ्यार देरावो, काहाकाय ता मिद्यानी माणहा पोर चेड़ाय केरीन यहोवान बुदलो ले। इस्राएलीन आखा वोस माय रेन, एकेक गेराणान एक एक एजार एदम्याह लेड़ाणेन केरता मुकलो।”
तेवी इस्राएलीन आखा गेराणा माय रेन एकेक एजार एदमी निवाड़ाय गीया, मतलब कायेम ने केरता आथ्यार चालाड़णारे बारा एजार एदमी एता। एकेक वोस माय रेन ता एजार एजार एदम्याह, एने एलीआजार चाकर्यान बेटाख पिनहासाह, मुसो लेड़ाणेन केरता मुकल्यो, एने तान आथा माय चोखाला जागान ठामलो एने ता बिरा एता संकट ने खुबेर आपणेन केरता एता। एने ज्यो उकुम यहोवा मुसान केरता आपेल इतो, तान गेत ता मिद्यानी माणहा हेऱ्या लेड़ाय केरीन आखा एदम्याह मार टाक्या। एने ता मारायेल एदम्या हेऱ्या, एबी, रेकेम, सुर, हुर एने रेबा नावान मिद्यानीन पाच राजाह मार टाक्या; एने बोरान बिटोख बिलामाह बी ता तालवारी केरीन मार टाक्या।
एने इस्राएली माणहे मिद्यानी बायकुह सोरा पोऱ्या हेऱ्या बोंदी बाणाव लेदा; एने तान गाय बुयोल, मेंड्रा बोकड्या, एने तान आखा मालदेनाह लुट लेदा। एने तान रेण्या आखा हेयराह एने आखा पाड़ावाह हेलगाड़ देना। तेवी ता काय माणहे काय जेनवारे, आखा बोंदी एने आखी लुट मारीह लेन यरीहोन आहने यरदन नेदीन मीरे, मोआब ने अराबा माय, पाड़ावान आहने, मुसा एने एलीआजार चाकऱ्यो एने इस्राएलीन मोंडलीन फाय आवा।
सेनान वापसी
तेवी मुसा एने एलीआजार चाकऱ्यो एने मोंडलीन आखा मुखी पाड़ावान बाहेर तान स्वागत केरनेन केरता निकेलना। एने मुसा सहस्रपती, शतपती, सेनापतीह, जा लेड़ाय केरीन फिरीन आवताला रागाम केणे बाज गीयो, “काय तुमू आख्यु बायकुह जीवताल्यु सोड़ देना? दिखो, ज्युस बायकु बिलाम ने राय से, पोअर ने बाराम इस्राएली हेऱ्या यहोवान बुरहो तोड्या, ज्यास केराया, एने यहोवान मोंडली माय बेमारी पोसरी गीयी। केरीन एवी सोरा पोऱ्या माय रेन एकेक सोराह, एने जोल्युक बायकु एदम्या हेऱ्यु हुयेल हेत्यु, त्यु आख्युह मार दिवो। पुण जोल्यु सोऱ्यु एदम्यान मुय निह दिखेल एत्यु, त्यु आख्युह तुमू तुमरी केरता जीवताल्यु मिलो। एने तुमू सात दिह वोर पाड़ावान बाहेर रिवो, एने तुमरे माय रेन जोलाक एगदा माणहाह माऱ्या एती, एने जोलाक एगदा मुरेल माणहाह आथल्या एती, ता आखा आप आपणा बोंदी हेऱ्या तीसरे एने सातवे दिह्या माय सोताह चोखा किरे। एने आखा फाड़का, एने चामड़ान बुणेल आख्यु वोस्तु, एने बोकड्यान रोचकान एने लाकड़ान बोणेल आख्यु वोस्तुह चोख्यु केर लिवो।”
तेवी एलीआजार चाकर्यो सेनान ता एदम्याह रेन जा लेड़ाणेन जायेल एता केयो, “नेमान जा रितीन उकुम यहोवा मुसाह आपेल हे तो ज्यो हे। होनो, चांदी, पितेल, लोड़ो, पात्रो एने सीसो, जो काय आक्ठा माय टाकाय सिकेह ताह आक्ठा माय टाको, तेवी तो चोखो ठेराय; तीबी तो खाराब पोणा से सोड़ोवणार पाण्या केरीन चोखो केराय जाय, पुण जो काय आक्ठा माय नाह थोब सेकी, ताह पाण्या माय बुड़ावो। तु सातवे दिह आपणा फाड़का दुवज्ये, तेवी तुमू चोखा एन पाड़ावा माय रिग सिकहो।”
लुटेल मालान वाटणो
ओवतो यहोवा मुसा केयो, “एलीआजार चाकऱ्यो एने मोंडलीन डायडायान गेराणान मुखी मुखी एदम्याह आरही लेन, तु लुटने मालदेन एने लेड़ाय माय देरायेल माणहाह एने जेनवारान गेणती केर। तेवी ताह आदो आदो केरीन एक ईसो ता सिपायाह जा लेड़ाणेन केरता जायेल एता, एने एक ईसो मोंडलीह आपो। पुण जा सिपाय लेड़ाणेन केरता जायेल एता, तान आरदा माय रेन यहोवा केरता, काय माणहे, काय गाय बुयोल, काय गेदड़ा, काय मेंड्रा बोकड्या, पाच होवान पासाण एकाह फालो मानीन लेय ले, एने यहोवान बेट हे केरीन एलीआजार चाकऱ्याह आप दिवो। ओवता इस्राएलीन आरदा ईसा माय रेन, काय माणहे, काय गाय बुयोल, काय गेदड़ा, काय मेंड्रा बोकड्या, नाहते काल्ली बी बातीन जेनवार रेय, तो पाचाह ने पासाण एक लेन यहोवान रेण्या जागान राखवाली केरनारे लेवीह आपी।” यहोवान ज्या उकुमान गेत जो तो मुसाह आपेल इतो, मुसा एने एलीआजार चाकर्यो केऱ्या।
जी वोस्तु सेनान एदमी आप आपणी केरता लुट माय रेन लियेल एता, ताह रेन वोदार लुट ज्यी एती; मतलब सोव लाख पोंच्यात्तर एजार मेंड्रा बोकड्या, बाहात्तर एजार गाय बुयोल, एकसाठ एजार गेदड़ा, एने माणहा माय रेन ज्यु बायकु एदम्या हेऱ्यु नाह हुयेल एत्यु, त्यु सोब बत्तीस एजार एत्यु। एने ज्यान आदा, मतलब तान ईसो जा लेड़ाणेन केरता जायेल एता, ता माय मेंड्रा बोकड्या तीन लाख तेहेतीस एजार पाच होव, ता माय रेन सोव होव पोंच्यात्तर मेंड्रा बोकड्या यहोवान बेट ठेराना। एने गाय बुयोल शत्तीस एजार, ता माय रेन बाहात्तर यहोवान बेट ठेराना। एने गेदड़ा तीस एजार पाच होव एता, ता माय रेन एकसाठ यहोवान केरता बेट ठेराय। एने माणहे सोला एजार एता, ता माय रेन बत्तीस यहोवान बेट ठेराय। ज्यी बेटीह जी यहोवान बेट एती, मुसो यहोवान उकुमान गेत एलीआजार चाकऱ्याह आप दिनो।
ज्यो इस्राएली माणहान आदो ईसो इतो, जाह मुसा सिपायीन ईसा से आलेग किरेल इतो। इस्राएल ने मोंडलीन आदा ईसा माय तीन लाख सदोतीस एजार पाच होव मेंड्रा बोकड्या, शत्तीस एजार गाय बुयोल, तीस एजार पाच होव गेदड़ा, एने सोला एजार माणहे एना। ज्या आरदा माय रेन, जाह मुसो इस्राएल ने लेड़ाय केरनारे एदम्या फाय रेन आंगे किरेल इतो, यहोवान उकुमान गेत मुसो, काय माणहे काय जेनवारे, पाचाहान पासाण एक लेन यहोवान रेण्या जागान राखवाली केरनारे लेवीह आप्यो।
तेवी सहस्रपती, शतपती एने जा पेल आदिकारी सेनान एजारान उपेर ठेरायेल एता, ता मुसा फाय आवा, एने मुसाह केणे बाज गीया, “जा सिपाय आमरा ताबाम एता, तान तारा पावोर गेणती केऱ्या, एने ता माय रेन एक बी नाह गेटनो। केरीन पायजेब, केड़ा, मुंद्यु कानावाला, बासट्या, होनान जो गेयणो, जो सापड़ायेल हे, ताह आमु यहोवान सामने आपणा जीवान बोदले पासतावो केरनेन केरता यहोवान बेट लायेल हेते।” तेवी मुसा एने एलीआजार चाकऱ्यो ता फाय रेन तो आखो होनान गेयणो लिदो। एने सहस्रपती एने शतपती जो बेटीन होनो यहोवान बेट आपेल, तो आखोन आखो सोला एजार सात होव पाचाह शेकेल1 एतो। एकेक सिपाय आप आपणो लुटीन माल लेय लियेल एता। ज्य होनो मुसा एने एलीआजार चाकर्यो सहस्रपती एने शतपती रेन मेल मिलापवाला तोम्बु माय पोचाड़ देना, काय इस्राएलीन केरता यहोवान सामने एर केरावण्यी वोस्तु ठेराय।
Source notes (1)
- Footnote शेकेल सोला एजार साड़े सात होव शेकेल कोमीत कोमी 190 किलो
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.