गिनती 25

इस्राएली माणहान सिनालो

1जेवी इस्राएली माणहे शित्तीम गावा माय रेताला, एने ता माणहे मोआबी सोऱ्यु हेऱ्या खाराब काम केरने बाज गीया। 2एने जेवी त्यु बायकु ता माणहाह तान देवतान बोलीन खाणा माय नेवता आप्यो, तेवी ता माणहे खाएन तान देवतान बोक्ती केरने बाज गीया। 3इह केरीन इस्राएली माणहे बालपोर देवतान पुजा केरने बाज गीया, तेवी यहोवान राग इस्राएल पोर बोड़की उठनो। 4एने यहोवा मुसाह केयो, “पोरजान आखा मुखीह देरीन यहोवा केरता दोपाम लेटकाड़ीन फासी आपो, जा से मारो बोड़केल राग इस्राएल पोर रेन सिटो एय जाय।” 5तेवी मुसा इस्राएली माणहान नियाव केरनाराह केयो, “तुमरा जा जा एदमी बालपोर देवता हेऱ्या मिलाय जायेल हेते, ताह मारो।”

6जेवी इस्राएली आखी मोंडली मेल मिलापवाला तोम्बुन बायणा पोर रेड़ने बाजरियेल एती, ते एक इस्राएली एदमी मुसान एने आखा माणहान डोलान सामने एक मिद्यानी बायकुह तान आरही तान बायाख फाय ली आवो। 7ज्याह देखीन एलीआजार ने बिटोख पिनहास, जो हारून चाकर्‍यान नातेणह्योक इतो, तो मोंडली माय रेन उठीन आथा माय एक बोरशो लिदो। 8एने तान तोम्बु माय जायीन इस्राएली एदम्यान एने मिद्यानी बायकु दुयून पेटाम बोरशो गुहपी दिनो, इह केरीन इस्राएल माय जी बेमारी पोसरी जायेल एती, ती थोब गीयी, 9पुण ती बेमारी माय चोववीस एजार माणहे मोर जायेल एता।

10तेवी यहोवा मुसाह केयो, 11“हारून चाकर्‍यान नातेणह्योक एलीआजार बिटोख पिनहास, जाह इस्राएलान विची माय मार गेत एतखाय आवी, तो मार रागाह न्या पोर जुलूम सिटो किरेल हे, केरीन मी न्याह राग केरीन ताह खेतेम नाह किऱ्यो। 12केरीन तु केय दे, काय मी ता हिऱ्यो सांतीन वाचा आपथु। 13एने तो तान केरता, एने तान पासाण तान वोस ने केरता कायेम ने चाकऱ्यान पोदान वायदो रेय, काहाकाय ताह तान बोगवानान केरता एतखाय उठनी, एने तो इस्राएल ने केरता पासतावो किऱ्यो।”

14जा इस्राएली एदमी मिद्यानी बायकु हिऱ्यो माराय गीयो, तान नाव जिम्री एतो, तो शेलुन बिटोख एने शिमोनी माणहा माय रेन तान डायडायान गेराणान मुखी इतो। 15एने जी मिद्यानी बायकु माराय गियी तीन नाव कोजबी एतो, ती सुरान बेटीख एती, जो मिद्यानी गेराणान मुखी इतो।

16ओवतो यहोवा मुसा केयो, 17“मिद्यानी माणहाह दोम, एने ताह मार; 18काहाकाय पोअर ने बाराम तुमूह दुको दिन सेतावतेह। कोजबी एक मिद्यानी मुखीन बेटीख एने मिद्यानी जातीन बोणीख एती, एने बेमारीन दिह्या माय पोअर ने मामला माय माराय गियी।”