गिनती 24

1ज्य देखीन काय यहोवा इस्राएलीह बोरकेतुस आपणे हुदेह, केरीन बिलाम काल्ली बातीन जादु टोनान वापेर केरीन ताह बोदेलने नाह हुद्यो, पुण तो जेंगलान उगे वोल गीयो। 2एने बिलाम निजेर टाकीन दिख्यो, एने इस्राएलीन आप आपणा वोस ने गेत वोह रियेल दिख्यो। तेवी बोगवानान जीव ता पोर उतेरनो। 3एने तो तान जाणाव केरने सुरवात किऱ्यो, एने केणे बाज गीयो,

“बोरान बेटाख बिलाम ने ज्यो बोल हे,

जा एदम्यान डोला बोंद एता ताच ने ज्यो बोल हे,

4बोगवानान वचन होमेलनार,

जा बोगवानान बोक्ती माय पुड़ेल, उगाड़ला डोला केरीन आखाम रेन ताकेतवालान देरसेन सापड़ावेह,

ताच ने ज्यो बोल हे।

5एय याकुब, तारा पाड़ावा एने एय इस्राएल,

तारा रेणेन जागा कोहला पुटे ओहला हेते।

6ता गाटान गेत

एने नेदीन दिड़ेवाला बोगीचान गेत ओहला पोसरी रेनाह,

जीह केरीन काय यहोवान लागाड़ेल अगर ने जाड़,

एने पाण्यान आहनेवाला देवदारून जाड़।

7एने तान गुंडाम रेन पाणी उबल्या केरी,

एने तान दाणा जुलूम पाणी बोरायेल खेता माय पोड़ती,

एने तान राजा अगाह रेन बी मुठो रेय,

एने तान राज वोड़तेच जाय।

8बोगवान ताह मिस्र देसा माय रेन काड़ीन लेन आवणे बाज रिनोह,

तो ते जेंगली बोयलान गेत ताकेत मिलेह,

देसा देसान माणहे तान दुसमोन हेते ताह तो खाय जाय, एने तान आड़े टुकड़ा टुकड़ा केरी,

एने तान बेलखा केरीन ताह खुपची। 91

तो सिहान गेत ताकावीन बोह रियेल हे,

तो सिंहणीन गेत लोट जायेल हे;

एवी ताह कुण विताड़ी? जो कुण तुवाह बोरकेत आपी तो बोरकेत सापड़ावी,

एने जो कुण तुवाह हाराप देय तो हाराप वालो रेय।”

10तेवी बालाकान राग बिलाम पोर बोड़की उठनो, एने तो आथा पोर आथ आसटीन बिलामाह केयो, “मी तुवाह मारा दुसमोनाह हाराप आपणेन केरता हादाड्यो, पुण तु ताह तीन वार बोरकेतुस बोरकेत आपेल हे। 11केरीन एवी तु तार जागे नाह जा; मी विचार किरेल इतो काय तारो आदार केरूह, पुण एवी यहोवा तुवाह आदार केरने से रोक मिलेल हे।”

12बिलाम बालाकाह जापाप आप्यो, “जा खोबर्‍याह तु मार फाय मुकलेल एता, काय मी ताह बी नाह कियेल इतो, 13बालाक तान गेराह होनो चांदी बोरीन माहु आप देय, तीबी मी यहोवान उकुम तोड़ीन मारा मोना केरीन नाहते हाजो केर सेकथु, एने नाहते बाकतो, जो यहोवा केय तोच मी केह।”

बिलाम ने सेवल्यो जाणाव

14बिलाम बालाकाह केयो, “एवी होमेल, मी मारा माणहा फाय वोलीन जाथु, पुण पेल मी तुवाह हास केरीन केय देथु, सेवेटल्या दिह्या माय ता माणहे तारी पोरजा हेऱ्या काय काय केरती।” 15ओवतो तो तान जाणाव केणेन सुरवात केर दिनो,

“बोरान बेटाख बिलाम ने ज्यो बोल हे,

जा एदम्या डोला बोंद एता, ताच ने ज्यो बोल हे,

16बोगवानान वचनाह होमेलनार,

एने बोगवानान एकलीह जाणनार,

जो बोगवानान बोक्ती माय पुड़ेल,

उगाड़ला डोला केरीन बोगवानान देरसेन सापड़ावेह, ताच ने ज्यो बोल हे।

17मी ताह देखुह ते खुरो,

पुण एवी नाह, मी ताह देखते रेह;

पुण आहने रेन नाह, याकुब माय रेन एक तारो पायदा एय,

एने इस्राएल माय रेन एक राज केरनार आवी,

जो मोआब ने एद्दीह चुरा केर देय,

एने आखा दिंगो केरनाराह ओदार देय जा शेत ने वोस हेते।

18तेवी एदोम एने सेईर बी,

जा तान दुसमोन हेते, तान ताबाम पोड़ती,

एने इस्राएल बाहदुरी देखाड़ते जाय।

19एने याकुब माय रेच ने एक आदिकारी आवी जो राज केरी,

एने हेयरा माय वुचेल ताह बी खेतेम केरी।”

20ओवतो तो अमालेकी माणहा पोर निजेर टाकीन तान जाणाव केरने सुरवात किऱ्यो, एने केणे बाज गीयो,

“अमालेक दिहरा राज्या माय मुठो ते इतो,

पुण तान सेवेट खेतेम हे।”

21पुशो तो केनी माणहान राज्या पोर निजेर टाकीन तान जाणाव केरने सुरवात किऱ्यो, एने केणे बाज गीयो,

“तारो रेणेन जागो जुलूम मोजबुत ते हे,

एने तारी वोहती सापरा पोर ते हे;

22तीबी केनी राज्य उजाड़ एय जाय।

एने सेवली बुखेत अश्शुर तुवाह बोंदी बाणावीन लेन जाय।”

23पुशो तो तान जाणाव केरने सुरवात किऱ्‍यो, एने केणे बाज गीयो,

“हाय जुलबूखे बोगवान ज्य केरी,

तुलबुखे कुण जीवतालो वोची?

24तीबी कित्ती माणहा फाय रेन डोंडह्यावाला आवीन अश्शुर;

एने एबेराह बी वेला केरावती,

एने सेवली बुखेत तो बी खेतेम एय जाय।”

25तेवी बिलाम चाल दिनो, एने तान ईलाका माय जात रिनो, एने बालाक बी तान वाट देर लिदो।