Nahali Bible
गिनती 23
बिलाम ने पेल्ली जाणाव
तेवी बिलाम बालाकाह केयो, “न्याहरी मार केरता हात वेद्यु बाणाव, एने ज्या जागा पोर हात डांड्या एने हात मेंडा तियार केर।”
तेवी बालाक बिलाम कियेल तीह केरीन किऱ्यो; एने बालाक एने बिलाम मिलीन एकेक वेदी पोर एक डांड्यो एने एक मेंडो चेड़ाया। ओवतो बिलाम बालाकाह केयो, “तु तारी होमबोलीन जागे उबरी, एने मी जाथु, एय सिकेह काय यहोवा माहु मिलनेन केरता आवी, एने जो काय तो माहु देखाड़ी तोच मी तुवाह केह।” तेवी तो एक उजाड़ बोयड़ा पोर गीयो। एने बोगवान बिलामाह मिलनो, एने बिलाम ताह केयो, “मी सात वेद्यु तियार किरेल हे, एने एकेक वेदी पोर एक डांड्यो एने एक मेंडो चेड़ायेल हे।”
यहोवा बिलामाह ज्यी वात केयो, “बालाक फाय जातरे, एने इही किज्ये।” एने बिलाम ता फाय फिरीन आवो, एने दिख्यो काय तो आखा मोआबी आदिकारी हिऱ्यो तान होमबोलीन जागे उबरिनोह।
तेवी बिलाम तान हाजाल्यु वातीन सुरवात किऱ्यो, एने केणे बाज गीयो,
“बालाक माहु अराम रेन,
मतलब मोआब राजा माहु पूर्वान बोयड़ा पोर रेन हादाड़ मुकल्यो,
‘आव, मार केरता याकुबाह हाराप देय, आव, इस्राएलीह निंदा केर!’
पुण जाह बोगवान जान निंदा नाह किऱ्यो, ताह मी हाराप काहा देव?
एने जाह यहोवा निंदा नाह किऱ्यो, ताह मी किहीक निंदा केरू?
सापरान चुटा पोर रेन ता माहु देखातेह,
बोयड़ा पोर रेन मी ताह देखथो,
तो ओहलो राज्य हे जो एखालो वोह रेय,
एने दिहरा राज्या माय रेन आंगे गेणाय जाय।
याकुबान वोस रेजड़ान काकऱ्यान गेत हे ताह कुण गेण सिकेह,
एने इस्राएलीन एक चोवथायीन गेणती कुण लेय सिकेह? हाजो,
केदी मारी मोत हाजा माणहान गेत,
एने मारो नास ताच ने गेत रेय।”
तेवी बालाक बिलामाह केयो, “तु मार हिऱ्यो काय किरेल हे? मी तुवाह मारा दुसमोनाह हाराप आपणेन हादाड़ेल इतो, पुण तु ताह बोरकेतुस बोरकेत आपेल हे।”
तो जापाप आप्यो, “जी वात यहोवा माहु हिकाड़ेल हे, काय माहु तीह चोकसी माय बोलने नाय जुवे?”
बिलाम ने दुसरो जाणाव
बालाक ताह केयो, “मार हिऱ्यो दिहरी जागे चाल, जाहरी रेन ता तुवाह देखाती; तु ता आखाह ते नाह, पुण निस्तो बाहेरल्या माणहाह देख सिकहे; ताहरी रेन ताह मार केरता हाराप दे।” तेवी तो ताह सोपीम नावान मोयदाना माय पिसगान बोयड़ान कोपरा पोर लेन गीयो, एने ताहरी सात वेद्यु बाणावीन आख्यु पोर एक डांड्यो एने एक मेंडो चेड़ायो।
तेवी बिलाम बालाकाह केयो, “तारी होमबोलीन जागे उबरी, एने मी ताहरी जायीन यहोवा हिऱ्यो मिलाह।”
एने यहोवा बिलाम हिऱ्यो मिलनो, एने तो ताह एक वात केयो, एने केयो, “बालाक फाय जात रे, एने इह केरीन किज्ये।” एने तो ता फाय गीयो, एने दिख्यो काय मोआबी आदिकारी हेऱ्या होमबोलीन जागे उबरिनोह। एने बालाक ताह फुशो, “यहोवा काय कियेल हे?” तेवी बिलाम तान हाजाल्यु वातु सुरवात किऱ्यो, एने केणे बाज गीयो,
“एय बालाक मोन लागाड़ीन होमेल,
एय सिप्पोरान बेटाख, मारी वाती पोर कान लागाड़।
बोगवान माणुह नाह सोतो काय जुठ बोली,
एने नाह तो एदमी हे,
काय तान मोरजी बोदले। काय जो काय तो केयो, ताह नाय किरे?
काय वचन आपीन ताह पुरो नाय किरे?
देख बोरकेतुच आपणेन उकुम मी सापड़ायेल हे, तो बोरकेत आप दियेल हे,
एने मी ताह नाह बोदली सिकेत
तो याकुब ने वोस माय बुराय नाह दिखेल सुतो,
एने नाह इस्राएल माय अन्याय दिखेल सुतो।
तान बोगवान यहोवा तान आरही हे,
एने ता माय राजान गेत जय जयकार ईथे,
ताह मिस्र देसा माय रेन बोगवान काड़ीन लेन आवणे बाजरिनोह,
तो जेंगली बोयलान गेत ताकेत आपेल हे।
खेरीस याकुब राज्यान विरूद वापेर एय सेकी,
ओहलो काल्लो बी जादुटोणा नाय एय,
पुण याकुब एने इस्राएल ने बाराम एवी माणहे केती,
‘दिखो, बोगवान कोलोक मोटलो काम किरेल हे!’
होमेल, तो टुलो सिंहणीन गेत उठी,
एने सिहान गेत उबरेय, तो जाह वोर सिकार नाय खाय लेय,
एने मारेल तान लुयीह नाय पिय लेय, ताह वोर आराम नाय केरी।”
तेवी बालाक बिलामाह केयो, “ताह नाह ते हाराप आपी, एने नाह बोरकेत आपी।”
बिलाम बालाकाह केयो, “काय मी तुवाह नाह केयो काय जो काय यहोवा माहु केय, तोस माहु केरने पोड़ी?”
बिलाम ने तीसरो जाणाव
बालाक बिलामाह केयो, “चाल, मी तुवाह एक दिहरी जागे ली जाथु, एय सिकेह काय बोगवानान मोरजी रेय काय तु ताहरी रेन ताह मार केरता हाराप देय।” तेवी बालाक बिलामाह पोरान बोयड़ान चुटा पोर ली गीयो, जाहरी रेन उजाड़ जिंगोल देखातालो, एने बिलाम बालाकाह केयो, “न्याहरी मार केरता सात वेद्यु बाणाव, एने सात डांड्या एने सात मेंडा तियार केर।” बिलाम ने केणेन गेत बालाक एकेक वेदी पोर एक डांड्यो एने एक मेंडो चेड़ायो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.