Nahali Bible
गिनती 22
बालाक राजान द्वारा बिलामाह मोकेलनो
तेवी इस्राएली फिरीन आवीन यरीहोन आहने यरदन नेदीन ती पार मोआब ने अराबा माय पाड़ावो उबो केऱ्यो।
सिप्पोरान बिटोख बालाक दिख्यो काय इस्राएल एमोरी हिऱ्यो काय काय किरेल हे। केरीन मोआब ज्य सोमजीन काय इस्राएली जुलूम हेते, तो ता माणहाह बिय गीयो; न्या वोर काय मोआब इस्राएली माणहान वोजेसे जुलूम चिन्ता माय पोड़ गीयो। तेवी मोआबी मिद्यानी माणहान डायडायाह केया, “एवी ती टोली आमरी कावदेन आखा माणहाह इह केरीन खेतेम केरीन जात रेय, जीह केरीन बुयोल निल्ला चाराह चिरेह।” ती टेम माय सिप्पोरान बिटोख बालाक मोआब ने राजा इतो; 1एने तो पतोर हेयराह, जो फरात नेदीन खाटा पोर बोरान बिटोख बिलाम ने हेगान खेत एतो, ताहरी बिलामा फाय खोबऱ्या मोकल्या काय ता इही केन हाद लावे, “हुमेल, एक टुलो मिस्र माय रेन निकलीन आयेल हे, एने खेत ता माय डापाय जायेल हे, एने एवी ता मार सामनेच आवीन वोह जायेल हेते। केरीन आव, ता माणहाह मार बोदले हाराप दे, काहाकाय, माहु रेन वोदार तेगड़ा हेते; तेवी एय सेकी काय आमु ताह जिक सेकहु, एने आमु आखा ताह आमरा देसाम रेन देन काड़ देहु; काहाकाय ज्य मी जाणथु काय जाह तु बोरकेत आपेह तो बोरकेतवालो रिथे, एने जाह तु हाराप आपेह तो हाराप वालो रिथे।”
तेवी मोआबी एने मिद्यानी माणहे डायडायाह जाणाव केणेन केरता दक्षिणा लेन गीया, एने बिलाम ने आहने पोचना, एने बालाकान वातु केय होमलाड्या। तो ताह केयो, “आज राती न्या थुबो, एने जी वात यहोवा माहु केय, तीहीच केरीन मी तुमूह जापाप आपुह।” केरीन मोआब ने आदिकारी बिलाम फाय थोब गीया।
तेवी बोगवान बिलामा फाय आवीन फुशो, “तार गेर न्याहरी ज्या काल्ला एदमी हेते?”
बिलाम बोगवानाह जापाप आप्यो, “सिप्पोरान सोरा मोआब ने राजा बालाक ताह मार फाय ज्यो केय मुकलेल हे, होमेल, जो टुलो मिस्र देसा माय रेन निकेल आयेल हे, ताह माणहा माय बुय डापाय जायेल हे; केरीन आवीन मार केरता ताह हाराप देय, एय सिकेह काय मी ता हिऱ्यो लेड़ाय केरीन ताह मार देसाम रेन काड़ सेकुह।”
बोगवान बिलामाह केयो, “तु न्या हिऱ्यो मा जाहे, एने ता माणहाह हाराप मा दिहे, काहाकाय ता बोरकेतवाला एय जायेल हेते।”
बिलाम विगोच उठीन बालाक ने आदिकारीह केयो, “तुमू तुमरा देसाम जात रिवो; काहाकाय यहोवा माहु तुमरी हिऱ्यो जाणेन उकुम नाह आपेत।” तेवी मोआबी आदिकारी जात रेना एने बालाक फाय जायीन केया, “बिलाम आमरी हिऱ्यो आवणेन मोना किरेल हे।”
ज्य होमलीन बालाक पोशो आदिकारी मोकल्यो, जो पेल रेन नावलायेल एने गेणती माय वोदार एता। ता बिलाम फाय आवीन केया, “सिप्पोरान बिटोख बालाक इही किथे, ‘मार फाय आवणेन बिगेर कारेण मोना मा किरे।’ काहाकाय मी निश्चय तारो आदार केरूह, एने जो काय तु माहु किहे तोच मी केरूह, केरीन आव, ता माणहाह मार बोदले हाराप दे।”
पुण बिलाम बालाकान काम केरनाराह जापाप आप्यो, “बालाक तान गेराह होना चांदी केरीन बोरीन माहु आपी, तीबी मी मारा बोगवान यहोवान उकुमाह बोदली नाह सिकेत, काय ताह गेटाड़ने नाहते वोदाड़ नाह सिकेत। केरीन एवी, तुमू आज राती न्यास थोब जावो, काहाकाय मी जाण लेव काय यहोवा माहु पुशो काय किथे।”
बोगवान राती बिलाम फाय आवीन केयो, “केदी ता एदमी तुवाह हादणेन आयेल हेते, ते तु ता हिऱ्यो जा, पुण जी वात मी तुवाह केह तिहेच केरीन किरज्ये।”
बिलाम एने तान गेदड़ी
तेवी बिलाम विगोस उठनो, एने तान गेदड़ी पोर काठी बांदिन, मोआबी आदिकारी हिऱ्यो चाल पोड़नो। एने तान जाणेन पासाण बोगवानान राग बोड़की उठनो, एने यहोवान हेरोगदुत तान विरूद केरनेन केरता वाट रोकीन उबरी गीयो। बिलाम तान गेदड़ी पोर बोहीन जाणे बाजरियेल इतो, एने ता हेऱ्या तान दुय चाकऱ्या बी एता। एने ती गेदड़ीह यहोवान हेरोगदुत आथा माय तालवार लेन वाटी पोर उबरियेल देखानो; तेवी गेदड़ी वाट सोड़ीन खेता माय जात रेनी, तेवी बिलाम गेदड़ीह देणे बाज गीयो काय वाटे पोशी आव लागे। तेवी यहोवान हेरोगदुत अंगुरान वाड़ीन विचीम वाली गेली माय, जान दुयू उगे बितड़ो एतो, उब रिनो। यहोवान हेरोगदुताह देखीन गेदड़ी बितड़ा हेरी लेटकी गीयी काय बिलाम ने पाय बितड़ा हिऱ्यो दाबाय गीयो, तेवी तो तीह पुशो दिनो। तेवी यहोवान हेरोगदुत ओंगाण वोड़ीन एक हाकेड़ली जागे उबरेय गीयो, ताहरी नाहते जीवड़े एने नाहते डाखरे उगे टेलनेन जागो इतो। ताहरी यहोवान हेरोगदुताह देखीन गेदड़ी बिलामाह लेतीच नेड़ी बोह गीयी, तेवी बिलाम ने राग उंजु बोड़की उठनो, एने तो गेदड़ीह डेंगा केरीन दिनो। तेवी यहोवा गेदड़ीन मुय उगाड़ दिनो, एने ती बिलामाह केणे बाज गीयी, “मी तारो काय किरेल हे? काय तु माहु तीन वारीन दियेल हे?”
बिलाम गेदड़ीह जापाप आप्यो, “ज्य काय तु मारी ईजुत खाराब केऱ्यी, केदी मार आथाम तालवार रेती, ताहार मी तुवाह एवी मार टाकतो।”
गेदड़ी बिलामाह केयी, “काय मी तारी पालेल गेदड़ी नाय मिले, जी पोर तु आत्योच रेन आज वोर बोहती आयेल हे? काय मी तार हेऱ्यी पेल ओहलो वेवार किरेल एती?”
तो जापाप आप्यो, “नाह!”
तेवी यहोवा बिलाम ने डोला उगाड्यो, एने ताह यहोवान हेरोगदुत आथा माय तालवार लेन वाटी पोर उबरियेल देखानो; तेवी तो डोंगाय गीयो, एने मुयान बोरहे पोड़ीन वोंद्यो। यहोवान हेरोगदुत ताह केयो, “तु तारी गेदड़ीह तीन वारीन काहा दिनो? होमेल, तारो विरूद केरनेन केरता मीच आयेल हे, ज्यान केरता काय तु मार सामने उलटी चाल चालेह; एने ज्यी गेदड़ी माहु देखीन मार सामने रेन तीन वार सेटी एय गीयी। केदी ती मार सोमोर रेन सेटी नाय एती, ताहार जोरूर मी एवी वोर तुवाह ते मारीच टाकतो, पुण ज्यीह जीवतालो सोड़ दितो।”
तेवी बिलाम यहोवान हेरोगदुताह केयो, “मी पाप किरेल हे; मी नाह जाणतालो काय तु माहु रोकणेन केरता वाटे उबरिनोह। केरीन एवी केदी तुवाह खाराब लागेह, ते मी वोलीन जाथु।”
यहोवान हेरोगदुत बिलामाह केयो, “न्या एदम्या हिऱ्यो तु जा; पुण फोक्तो तीच वातु किज्ये, जो मी तुवाह केह।” तेवी बिलाम बालाकान आदिकारी हिऱ्यो जात रिनो।
बालाकान द्वारा बिलाम ने स्वागत
ज्य होमलीन काय बिलाम आवणे बाजरिनोह, बालाक ताह मिलनेन केरता मोआब ने ता हेयरा माय वोर, जो ता देसान अर्नोनवाली एद्दी माय हे गीयो। बालाक बिलामाह केयो, “काय मी जुलूम आसा केरीन तुवाह नाह हादाड़ मुकलेल इतो? ओवतो तु मार फाय काहा नाह आवो? काय मी ज्यान लायकीन नाह सुतो काय खेरीच तार केरता आदार आप सेकथु?”
बिलाम बालाकाह केयो, “देख, मी तार फाय आयेल ते हे, पुण मी एवी काह केय सेकथु? जी वात बोगवान मार मुया माय टाकी, तीस वात मी केह।” तेवी बिलाम बालाकान आरही गीयो, एने ता किर्यथूसोत गाव वोर आवा। एने बालाक बुयेल एने मेंड्रा बोकड्याह बोली किऱ्यो, एने बिलाम एने ता हेऱ्या आदिकारी फाय मुकल्यो।
विगोच बालाक बिलामाह बामोतबाल देवतान उचाला बोयड़ा पोर लेन गीयो, एने ताहरी रेन ताह आखा इस्राएली माणहे देखाताला।
Source notes (1)
- Cross-reference निर्गमन 31:8; 2 पतरस 2:15,16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.