गिनती 15

बेटीन बाराम नेम

1पुशो यहोवा मुसाह केयो, 2इस्राएली माणहाह के काय जुलबुखे तुमू तुमरा रेणेन देसा माय पोचहो, जो मी तुमूह आपथु। 3यहोवान केरता काय होमबोली, काय मेल मिलाप बोली काह बेट चेड़ावो, नाहते तो खाज मानता पुरी केरनो एय नाहते खुसी माय किरेल बोलीन रेय, नाहते तुमरी ठेरायेल टेमीन रेय, नाहते गाय बुयोल नाहते मेंड्रा बोकड्या माय रेन रेय, जा केरीन यहोवान केरता पुटे ओहलो रेय। 4जो माणुह यहोवान केरता बेट लावे, तो एपान दोहवो बाग फिट, जा माय एक चोवथो ईसो हिन1 जेतुन ने तेल चुपड़ेल एय, एन बेट केरीन चेड़ावज्यो, 5होमबोलीन केरता एक एक गिदल्या हेऱ्य एक चोवथो ईसो हिन अंगुरान रूह पिणी बोली केरीन चेड़ावज्यो। 6एने मेंडान बोली हेऱ्या तीसरो ईसो हिन तेलाम कुहणेल एक एपान दुय दोहवो ईसो फिट, एन बेट केरीन चेड़ावज्यो; 7एने तान पिणी बोली यहोवाह खुस किरे ओहलो गेंदाण्यो एक तीसरो ईसो हिन अंगुरान रूह चेड़ावज्यो। 8एने जुलबूखे तुमू यहोवाह होमबोली नाहते एगदी खाज मानता पुरो केरनेन केरता मेल मिलाप बोली केरीन डांड्यो चेड़ावज्यो, 9तेवी डांड्याह चेड़ावणार ता हेऱ्या आरदो हिन तेला माय कुहणेल एपान तीसरो दाहवो ईसो मोयदो एन बेट केरीन चेड़ावे, 10एने ता हेऱ्यी पिणी बेट आरदो हिन अंगुरान रूह चेड़ावे, तो यहोवाह खुस केरनार चेड़ावो रेय।

11एकेक डांड्यो, मेंडो नाहते मेंड्रान पिला, नाहते बोकड्यान गिदल्या हेऱ्या इह केरीन चेड़ावो चेड़ावाय जाय। 12तुमरा बोली केरन्या जेनवारान जोलीक गेणती एय, तीस गेणतीन ईसाबे एकेका हेऱ्या ओहलोस केऱ्या किरज्‍यो। 13जोला देसावाला एती ता यहोवाह पुटे ओहलोह गेंदाणार वोस्तु चेड़ावणे बुखेत, ज्‍य काम इह केरीन केऱ्या किरे। 14केदी एगदो पाराया देसावालो तुमरी हिऱ्यो रेतेय नाहते, तुमरी एगदी पिढ़ी माय तुमरी हेऱ्यो एगदो रेणार एय, एने तो यहोवाह पुटे ओहलोह गेंदाणी वोस्तु चेड़ावणे हुदे, ताहार जीह केरीन तुमू किरहो तीह केरीन तो बी किरे। 15मोंडलीन केरता, मतलब तुमू एने तुमरी हेऱ्या रेणारे पाराया देसान दुयून केरता एकुस रिती रेय; तुमरी पिढीन पिढ़ी माय जी जेलेम ने रिती रेय, जीह केरीन तुमू हेते तीहीच केरीन पाराया देसावाला बी यहोवान केरता ठेराह। 162तुमरी एने तुमू हेऱ्या रेणारे पाराया देसावालान केरता एकुस कायदो एने एकुस नेम हे।

17पुशो यहोवा मुसाह केयो, 18इस्राएली माणहाह मारो ज्य वचन होमलाव, जुलबूखे तुमू ता देसाम पुचहो जाहरी मी तुमूह ली जाथु, 19एने ता देसान पाकीन एन खावो, तेवी यहोवान केरता विसेल बेट चेड़ाया किरो। 20तुमरो पेल कुहणेल फिटान एक पापड़ी विसेल बेट केरीन यहोवान केरता चेड़ावज्यो; जीह केरीन तुमू खोला माय रेन विसेल बेट चेड़ावहो तीहीच केरीन ताह बी चेड़ाया किरज्‍यो। 21तुमरी पिढ़ी पिढ़ी माय तुमरो पेल कुहणेल फिटा माय रेन यहोवाह विसेल बेट आप्या किरज्‍यो।

22पोशा जुलबूखे तुमू ज्या सोब उकुमा माय रेन जाह यहोवा मुसाह आपेल हे, एगदा उकुमान बुल चुक माय टालहो, 23मतलब जे दिह रेन यहोवा उकुम आपणे बाज गीयो, एने ओंगाणली तुमरी पिढीन पिढ़ी माय ते दिह रेन तो जोला उकुम मुसान द्‍वारे आपेल हे, 24ता माय केदी बुल चुक माय किरेल पाप मोंडलीह बिगेर मालुम पुड़ेल एनो एय, ताहार आखी मोंडली यहोवाह पुटे ओहली गेंदाणार होमबोली केरीन एक डांड्यो, एने ता हेऱ्यो नेमान गेत तान एन बेट एने पिणी बोली चेड़ावे, एने पापबोली केरीन एक बुकोड़ चेड़ावे। 25तेवी चाकऱ्यो इस्राएली माणहान आखी मोंडलीन केरता पाप डाप्या किरे, एने ताह माफी जुड़ी; काहाकाय तान पाप बुल चुक माय इयेल हे, एने ता तान गेलतीन केरता तान चेड़ावो, मतलब यहोवान केरता होमबोली एने सोतान पापबोली तान ओंगाण चेड़ाया। 26केरीन इस्राएली माणहान आखी मोंडलीन, एने ता हेऱ्या माय रेणारे परदेसा वालान बी ता पापे माफ केराय जाती, काहाकाय तो आखा माणहाह बुल चुक माय एना। 273

पोशो केदी एगदो माणुह बुल चुक माय पाप किरे, ताहार तो एक वोरह्यान एक बोकड़ी पापबोली केरीन चेड़ावे। 28एने चाकऱ्यो बुल माय पाप केरनार माणहान केरता यहोवान सामने पाप डाप्या किरे; ज्या पाप डापणेन वोजेसे तान पाप माफ केराय जाय। 29जो कुण विहरीन काह किरे, तो इस्राएली माय रेन रेय, नाहते तुमरी हेऱ्यो परदेसा वालो बोणीन रेतेय, आखान केरता तुमरो एकुस नेम रेय।

30पुण काय देसावालो काय पाराया देसावालो, जो माणुह जाणते लेन पाप किरेह, तो यहोवान ईजुत वेरनार केवाय, एने तो माणुह तान माणहा माय रेन आलेग केराय जाय। 31तो जो यहोवान वचनाह उदेड़ सुमजेह, एने तान उकुम टालनार हे, केरीन तो माणुह खेरीस आलेग केराय जाय; तान पाप तास ने मुंडी पोर पोड़ी।

विहेवणेन दिह्याह नाह मान्नेन डेन्ड

32जुलबूखे इस्राएली माणहे जेंगला माय रेताला, ता दिह्याम एक माणुह आराम ने दिह लाकड़े केरतालो सापेड़नो। 33एने जाह तो लाकड़े केरतालो सापेड़नो, ता ताह मुसा एने हारून, एने आखी मोंडली फाय लेन गीया। 34तेवी ता ताह देरीन बांद लेदा, काहाकाय ओहला माणहाह काय केरने जुवे तो ठेरायेल नाह एतो। 35तेवी यहोवा मुसाह केयो, “तो माणुह खेरीस माराय जाय; आखी मोंडलीन माणहे पाड़ावान बाहेर ताह देगड़ाठे।” 36जीह केरीन यहोवा मुसाह उकुम आपेल इतो तिहेस केरीन आखी मोंडलीन माणहे ताह पाड़ावान बाहेर ली जायीन देगड़ाठ्या, एने तो मोर गीयो।

जालर ने बाराम नेम

37पुशो यहोवा मुसाह केयो, 384“इस्राएली माणहाह के, काय तान पिढीन पिढी माय तान फाड़कान सेवड़ा पोर जालर लागाड़ज्यो, एने एक एक सेवड़ान जालर पोर एक निल्लो दुरो लागाड़ज्यो; 39एने तो तुमरी केरता ओहलो जालर केवाय, जाह तुमू जुलबुखे दिखहो तुलबुखे यहोवान आखो उकुम तुमूह एर आव जाय; एने तुमू तो उकुम पालेन किरज्‍यो, एने तुमू आप आपणो मोन एने आप आपणी नेजरीन ताबाम रेन सिनालो मा किरते फिरो, जीह केरीन पेल बी किरते आयेल हेते। 40पुण तुमू यहोवान आखी उकुम एर केरीन तान पालेन किरो, एने तुमरा बोगवानान केरता चोखा बुणो। 41मी यहोवा तुमरो बोगवान हे, जो तुमूह मिस्र देसा माय रेन काड़ीन लेन आवो काय तुमरो बोगवान ठेराव; मी तुमरो बोगवान यहोवा हे।”