Nahali Bible
गिनती 16
कोरह, दातान एने अबीरामान दिंगो
कोरह जो लेवीन पुतण्योक, कहातान नातण्योक, एने यिसहारान बिटोख इतो, तो एलीआबान बिटोख दातान एने अबीराम, एने पेलेतान बिटोख ओन रूबेन ने वोस एता। ज्या तीनु रूबेनीह जोड़ीन मोंडलीन एड़ी होव मुखी, जा सबासद एने नाव गाजेल एता, ताह आरही लेदा मुसान विरूद दिंगो केर देना; एने ता मुसा एने हारूनान विरूद माय उठ बोठा, एने ताह केणे बाज गीया, “तुमू जुलूम केर लेदा, एवी बास किरो; काहाकाय आखी मोंडलीन एक एक माणुह चोखो हे, एने यहोवा ता हिऱ्यो रिथे; केरीन तुमू यहोवान मोंडली माय उचाला पोदवाला काहा बोणीन बोठाह?”
ज्यो होमलीन मुसा तान मुयान बोरहे जाय पुड़नो; ओवतो तो कोरह एने तान आखी मोंडलीह केयो, “विगोस यहोवा देखाड़ देय काय तान कुण हे, एने चोखो कुण हे, एने ताह तान आहने हाद लेय; जाह तो सोता निवाड़ लेय ताहच तान आहने हादी बी लेय। केरीन एय कोरह, तुमू तुमरी आखी मोंडली हेऱ्या इही किरो, मतलब आप आपणी दुपदान ठिक किरो; एने हेकाले ता माय आक्ठो पेटाड़ीन यहोवान सामने दुणी दिज्यो, तेवी जाह यहोवा निवाड़ लेय तोस चोखालो ठेराय। एय लेवी, एवी जुलूम एय गीयो, एवी बास किरो।”
पुशो मुसा कोरहाह केयो, “एय लेवी, हुमलो, काय ज्यी वात तुमूह आत्यीस लागेह, काय इस्राएली माणहान बोगवान तुमूह इस्राएली माणहान मोंडली माय रेन आंगे केरीन तान गेरान सेवा केरनेन, एने मोंडलीन ओंगाण उबरीन बोगवानान बी सेवा केरनेन केरता तान आहने हाद लियेल हे; एने तुवाह एने तारा सोब लेवी बायह्याख बी तान आहने हाद लियेल हे, तीबी तुमू चाकऱ्यान पोद सापड़ावणेन केरता कोसीत केरने बाजरेनाह! एने ज्याच ने केरता तु तारी आखी मोंडलीह यहोवान विरूद टुलो किरेल हे; हारून कुण हे काय तुमू ता पोर कुरकुर केरतेह?”
ओवतो मुसा एलीआबान बिटोख दातान एने अबीरामाह हादणे मुकल्यो; पुण ता केया, “आमु तार फाय नाय आवहु। काय ज्यी एक आत्यीस वात हे काय तु आमुह ओहला देसाम रेन जा माय दुद एने मोवालान खोदरा वोयतेह, केरीन काड़ लायेल हे, काय आमुह जेंगला माय मार टाके? पुशो काय तु आमु पोर आदिकारी बोणीन उकुम चालाड़ेह? पुशो तु आमुह ओहला देसा माय जाहरीह दुद एने मोवालान खुदोर वोयतेह नाह पोचाड्यो, एने आमुह खेतान एने अंगुरान वाड़ीन आदिकारी बाणायेल। काय तु न्या माणहान डोलाम रेजड़ो टाकहे? आमु ते नाह आवहु।”
तेवी मुसान राग जुलूम बोड़की गीयो, एने तो यहोवाह केयो, “न्या माणहान बेट स्वीकार मा किरे। मी ते न्या फाय रेन एक गेदड़ो बी नाह लिदो, एने न्या माय रेन कुणीन बी नुकसान नाह किरेल सुतो।”
तेवी मुसा कोरहाह केयो, “हेकाले तु तारी आखी मोंडलीह लेन हारूना हिऱ्यो यहोवान ओंगाण टुलो इज्यो; एने तुमू आखा आप आपणी दुपदान लेन ता माय दुणी दिज्यो, ओवता आप आपणी पारात जा आखा हेऱ्याच एड़ी होव एती यहोवान ओंगाण लेन जाज्यो; खास केरीन तु एने हारून आप आपणी दुपदान लेन जाज्यो।” केरीन ता आप आपणी दुपदान लेन एने ता पोर आक्ठो मेलीन ताह दुणी देना; एने मुसा एने हारून हेऱ्या मेल मिलाप वाला तोम्बुन बायणा पोर उब रेना। एने कोरह आखी मोंडलीह तान विरूद मेल मिलापवाला तोम्बुन बायणा पोर टुलो केर लिदो। तेवी यहोवान उजोड़ आखी मोंडलीह देखानो। तेवी यहोवा मुसा एने हारूनाह केयो, “तुमू ज्यी मोंडली हेऱ्या रेन आंगे एय जावो, एने मी न्याह एकतालाम खेतेम केर देह।”
पुण मुसा एने हारून मुयान बोरहेस पोड़ीन केणे बाज गीया, “एय बोगवान, एय आखा जीवान आत्मान बोगवान, काय एक एदम्यान पापान वोजेसे तारो राग आखी मोंडली पोर रेय?”
तेवी यहोवा मुसाह केयो, “मोंडलीन माणहाह के काय कोरह, दातान, एने अबीरामान तोम्बुन आहने पाहने रेन सेटा एय जावो।”
तेवी मुसा उठीन दातान एने अबीराम फाय गीयो; एने इस्राएलीन डावाला माणहे तान पासाण पासाण गीया। एने मुसा मोंडलीन माणहाह केयो, “तुमू ता पापी माणहान पाड़ावान जागे रेन सेटा एय जावो, एने तान काल्लीस वोस्तु मा सापेलहो, ओहलो नाय एय काय तुमू बी तान आखा पापाम फोसीन खेतेम एय जाहो।” ज्य होमलीन माणहे कोरह, दातान, एने अबीरामान तोम्बुन आस पास रेन टेल गीया; पुण दातान एने अबीराम निकलीन तान लाड्यु, सोरा पोऱ्या हेऱ्या आप आपणा पाड़ावान बायणे उब रेना। तेवी मुसा केयो, “इह केरीन तुमू सोमजी जाहो काय यहोवा माहु मुकलेल हे काय ज्य आखो काम केरू, काहाकाय मी मारी मोरजी माय कायस नाह किरेल सुतो। केदी ता माणहान मोत दिहरा आखा माणहान गेत एय, एने तान डेन्ड आखा माणहान होस रेय, ताहार सोमजी जाज्यो काय यहोवा माहु नाह मुकलेल सुतो। पुण केदी यहोवा तान जुदीच ताकेत देखाड़ी, एने देरती तीन मुय पोसारीन ताह एने तान आखो काय गील जाय, एने ता जिवतालास आंदारकेली माय जाय पुड़े, ताहार तुमू सोमजी लिज्यो काय ज्या माणहे यहोवान ईजुत विरेल हेते।”
तो ज्यु सोब वातु कियेल इतो, तेवी उचकाहुच ता माणहान पायान बुंदे रेन बुय फाट गीयी; एने देरती तीन मुय उगाड़ लेदी एने ताह एने तान आखो गेरबारान सामान, एने कोरहान आखा माणहाह एने तान आखो मालदेनाह बी गील लेदी। ता एने तान आखो गेरबार जिवतालास आंदारकेली माय जाय पोड़नो; एने देरती ताह डाप लेदी, एने ता मोंडलीन विचीम रेन खेतेम एय गीया। एने जोला बी इस्राएली माणहे तान कावदेन एता, तान आयेड़नो होमलीन ज्यो कितेन नाठा, “देरती आपुह बी गील नाय जाय।”
तेवी यहोवान जागे रेन आक्ठो निकेलनो, एने ता एड़ी होव दुणी देणाराह हेलगाड़ देनो।
दुणीदान
तेवी यहोवा मुसाह केयो, “हारून चाकऱ्यान बिटोख एलीआजराह के काय त्यु दुणीदानाह आक्ठाम रेन विसले; एने आक्ठान इंगाले ताहरीच पोसराव दे, काहाकाय ता चोखाला हेते। जा पाप केरीन सोतास ने जीवाह नुकसान किरेल हेते, दुणीदान ने पात्राह चेंदी चेंदीन बाणावो, ता केरीन वेदी बाणावणेन काम आवी, काहाकाय ता यहोवान सामने मिलेल एता; केरीन ता चोखाला हेते। केरीन तो इस्राएली माणहान केरता एक निसाणी ठेराय।” केरीन एलीआजर चाकऱ्यो ती पितलान दुणीदानाह, जा माय ता हिलगेल माणहे दुणी दियेल एता, विसीन तान पात्रो चेंदी चेंदीन वेदी माय गेड़नेन केरता बाणाव देना, काय इस्राएली माणहाह ज्यी वातीन एर रेय काय काल्लो दिहरो, जो हारूनान वोसीन नाय रेय, यहोवान ओंगाण दुणी देणेन आहने नाय जाय, ओहलो नाय एय काय तो बी कोरह एने तान मोंडलीन होस खेतेम एय जाय, जीह केरीन काय यहोवा मुसान द्वारे ताह उकुम आपेल इतो।
हारूनान उगे रेन माणहान राखवाली
तेवी दिहरी दिह इस्राएली माणहान आखी मोंडली ज्य केन मुसा एने हारूनाह देखीन कुरकुर केरने बाज गीया, “यहोवान पोरजाह तुमू मार टाकेल हेते।” एने जुलबुखे मोंडलीन माणहे मुसा एने हारूनान विरूद एकठा एताला, तेवी ता मेल मिलापवाला तोम्बुन उगे देख्या काय वादेल ताह साव लियेल हे, एने यहोवान उजोड़ देखाणे बाज रिनोह। तेवी मुसा एने हारून मेल मिलापवाला तोम्बुन सामने आवा, तेवी यहोवा मुसा एने हारूनाह केयो, “तुमू ती मोंडलीन माणहान हेऱ्या रेन सेटा एय जावो, काय मी न्याह एकुसताल खेतेम केर टाकु।”
तेवी ता मुयान बोरहे जाय पोड़ना। तेवी मुसा हारूनाह केयो, “दुणीदानाह लेन ता माय वेदी पोर आक्ठो मेलीन दुणी दे, मोंडली फाय जेल्दीस जायीन तान केरता पाप डाप; काहाकाय यहोवान राग जुलूम बोड़की उठेल हे, एने बेमारी फेहेलने बाज जायेल हे।” मुसा कियेल तिहेस केरीन हारून दुणी लेन मोंडलीन जागे दोवड़ीन गीयो; एने ज्यो देखीन काय माणहा माय बेमारी पोसरने बाज रेनीह, तो दुणी हेलगाड़ीन माणहान केरता पाप डाप्यो। एने तो मुरील एने जीवतालान विची माय उबरीनो; तेवी बेमारी थोब गीयी। एने जा कोरह हेऱ्या बेचकायीन मोर जायेल एता, ताह सोड़ीन जा माणहे ज्यी बेमारी केरीन मोर गीया ता चोवदा एजार सात होव एता। तेवी हारून मेल मिलापवाला तोम्बुन बायणा पोर मुसा फाय जात रिनो, एने बेमारी थोब गीयी।
Source notes (1)
- Cross-reference न्यायियो 1:11
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.