गिनती 14

माणहे कुरकुर केरनो

1तेवी आखी मोंडली आयड़ी उठनी; एने रात बोर ता माणहे रेड़तेच रेना। 2एने आखा इस्राएली माणहे मुसा एने हारून पोर कुरकुर केरने बाज गीया; एने आखी मोंडलीन माणहे ताह केणे बाज गीया, “हाजो रेतो काय आमु मिस्र देसा मायच मोर जाता! नाहते ज्या जेंगलाच माय मोर जाता! 3यहोवा आमुह ता देसा माय ले जायीन काहा तालवारी केरीन मारावणे हुदेह? आमऱ्यु बायकु एने सोरा पोऱ्या ते लुटाय जाती; काय आमरी केरता ज्य हाजो नाह सोतो काय आमु मिस्र देसा माय वोलीन जात रिज्यो?” 4पोशा ता एका दिहराह केणे बाज गीया, “आवो, आपु एगदाह आपणो मुखी बाणाव लेता, एने मिस्र देसाम वोलीन जात रेता।”

5तेवी मुसा एने हारून इस्राएली माणहान आखी मोंडलीन ओंगाण मुयान बोरहे जाय पोड़ना। 6एने नुन ने बिटोख यहोशु एने यपुन्नेन बिटोख कालेब, जा देसान पुतो काड़नारा माय रेन एता, आप आपणा फाड़का फाड़ीन, 7इस्राएली माणहान आखी मोंडलीह केणे बाज गीया, “जा देसान पुतो काड़नेन केरता आमु न्यान पोला फिरीन आयेल हेते, तो जुलूम हाजो देस हे। 8केदी यहोवा आपु पोर खुस एय, ताहार आपुह ता देसा माय, जा माय दुद एने मोवालान खुदोर वुयेह, पोचाड़ीन ताह आपुह आप देय। 91निस्तो ओलोस किरो काय तुमू यहोवान विरूद गेलती मा किरो; एने ता देसान माणहाह मा बिहो, काहाकाय ता आपणो रूटो ठेराती; सावलो तान उपेर रेन उठ जायेल हे, एने यहोवा आपणी हिऱ्यो हे; ताह मा बिवो।” 10तेवी आखी मोंडली ताह देगड़ाठणेन केरता आयड़ी उठनी, तेवी यहोवान उजोड़ मेल मिलापवाला तोम्बु माय आखा इस्राएली माणहा पोर चोमेकनो।

माणहान केरता मुसान विन्ता

11तेवी यहोवा मुसाह केयो, “ज्या माणहे केदीह वोर माहु नाकारती? एने मारा आखा चोमेत्कार देखीन बी केदीह वोर मार पोर बुरहो नाय केरती? 12एने मी न्याह माहामारी केरीन मारूह, एने तान सोतान वाटाम रेन काड़ देह, एने तार माय रेन एक राज बाणावुह जो न्याह रेन मुठो एने ताकेतवालो रेय।” 132

तेवी मुसा यहोवाह केयो, “ताहार ते मिस्री जान विच माय रेन तु तारी ताकेत देखाड़ीन ता माणहाह काड़ीन लेन आयेल हे, ता ज्य होमेलती, 14एने ज्या देसाम रेणाराह केती। ता ते ज्य हुमलेल हेते काय तु जो यहोवा हे न्या माणहा हिऱ्यो रिथे; एने सामने देखाती, एने तारो वादेल न्या पोर थोब रिथे, एने तु दिह्या वादलान खांबा माय एने राती आक्‍ठान खांबा माय लागतो, न्यान ओंगाण ओंगाण चाल्या किरेह। 15केरीन केदी तु न्या माणहाह एकुस वार मार टाकहे, ताहार जा देसे तारी बोड़ाय हुमलेल हेते ता केती, 16काय यहोवा ता माणहाह, ता देसा माय जाह तो ताह आपणेन सुगोण खायेल इतो, पोचाड़ नाह सिक्यो, केरीन तो ताह जेंगला माय मार टाकेल हे। 17केरीन एवी, मालक्यान ताकेतीन बोड़ाय तु किथे तिहेस केरीन एय, 183काय यहोवा राग केरने माय दिर देरनार एने जुलूम गीणातो हे, पाप एने गुनो माफ केरनार हे, पुण तो गुनेगाराह किहीक बी केरीन निर्दोस नाय ठेरावी, एने डायडायान पापान डेन्ड तान सोरा एने नातण्याह्याक एने पुतण्याह्याक आपेह। 19एवी न्या माणहान पापाह तारी मोटली गीण केरीन, एने जीह केरीन तु मिस्र माय रेन न्या वोर माफ किरते रियेल हे, तिहेच केरीन एवी बी माफ केर दे।”

20तेवी यहोवा जापाप आप्यो, “तारी विन्तान गेत, मी ताह माफ केरथु; 214पुण ज्य खेरीच हे काय मी जीवतालो हे, आखी देरती मी यहोवान बोड़ाय माय बोरपुर एय जाय; 22ता आखा माणहे जा मार बोड़ाय मिस्र देसा माय एने जेंगला माय दिखेल हेते, एने मारो किरेल चोमेत्काराह देखीन बी दोह वार मारी पारेख किरेल हेते, एने मार वात नाह मान्या। 23केरीन जा देसान बाराम मी तान डायडाया हिऱ्यो सुगोण खादो, ताह ता केदिस नाय देख सेकती; मतलब जोला मारो आपमान किरेल हेते, ता माय रेन कुण बी ताह देख नाय सिके। 245 पुण ज्यान केरीन काय मार पावोर कालेब हेऱ्यी आलेगुस आत्मा हे, एने तो हास केरीन मार हिऱ्यो चालेल हे, एने मी ताह तो देस, जा माय तो जायीन आयेल हे पोचाडुह, एने तान वोस ता देसा पोर आदिकार केरती। 25अमालेकी एने कनानी माणहे गाटाम रेतेह, केरीन हेकाले तुमू फिरीन जाज्यो, एने रातला देरीयान वाटे रेन जेंगला माय जाज्यो।”

कुरकुर केरनेन डेन्ड

26पुशो यहोवा मुसा एने हारूनाह केयो, 27“ज्यी खाराब मोंडली मार विरूद कुरकुर किरते रिथे, ताह मी केदीह वोर वेठते रेव? इस्राएली माणहे जा मार पोर कुरकुर किरते रेतेह, तान ज्य कुरकुर केरनो मी हुमलेल हे। 28केरीन ताह के काय यहोवान ज्यो बोल हे, ‘मार जीवणान सुगोण जी वातु तुमू माहु होमेलतास कियेल हेते, मी तिहेच केरीन तुमरी हेऱ्यो वेवारो केरूह। 296 तुमरा देड़े ज्यास जेंगला माय पोड़ रेती; एने तुमू आखा माय रेन विह वोरह्यान नाहते ताह रेन वोदार वोयावाला जोला गेणाय जायेल एता, एने मार पोर कुरकुर केरताला। 30ता माय रेन यपुन्नेन बिटोख कालेब एने नुन ने बिटोख यहोशुह सोड़ीन कुण बी ता देसा माय नाय जाय सेकी, जान बाराम मी सुगोण खायेल हे, काय तुमूह ता माय वोहाडुह। 31पुण तुमरा सोरा पोऱ्या जान बाराम तुमू कियेल हेते, ता लुट माय जात रेती, ताह मी ता देसाम पोचाड़ देह; एने ता, ता देसाह सोमजी जाती जाह तुमू खाराब सुमजेल हेते। 32पुण तुमरा देड़े ज्यास जेंगला माय पोड़ रेती। 337 तुमरा सोरा एने तुमरा देड़े जाह वोर नास नाय एय, ताह वोर ता तुमरा सिनालान डेन्ड बोगती रेती, मतलब चालीह वोरह्या वोर तुमरा सोरा पोऱ्या जेंगला माय गोवाल बोणीन रेती, एने तुमरा सिनालान डेन्ड बोगतीन बोटेकती रेती। 34जोलाक दिह तुमू ता देसान पुतो काड़ते रेना, मतलब चालीह दिह तान गेणती माय, एक दिह्यान बोदले एक वोरह्यो, मतलब चालीह वोरह्या वोर तुमू तुमरा पापान देन्डान बार उखली रिहो, तेवी तुमू सोमजी जाहो काय मार विरूद एणे कोहलो ईथे। 35मी यहोवा ज्य केय दियेल हे, ज्यी खाराब मोंडलीन माणहे जा मार विरूद एकठा एय रेनाह ज्यास जेंगला माय मोरीन आरताय जाती; एने मी ओहलोच केरूह बी।’”

36तेवी जा एदम्याह मुसा ता देसान पुतो काड़नेन मुकलेल इतो, एने ता वोलीन आवीन ता देसान बाराम खाराब खुबेर पोसारीन आखी मोंडलीह मुसान विरूद कुरकुर केरनेन केरता बोड़कायेल एता, 37ता देसान बाराम खाराब खुबेर पोसरावणारे एदमी, बोगवानान सामने माहामारी से मोर गीया। 38पुण देसान पुतो काड़नेन मुकलेल ता एदम्या माय रेन नुन ने बिटोख यहोशु एने यपुन्नेन बिटोख कालेब दुयू जाणे जीवताला रेना।

ता देसा पोर पेल्‍ली हमलो

(व्यवस्था 1:41-46)

39तेवी मुसा ज्यु सोब वातु इस्राएली माणहाह केय होमलायो एने ता जुलूम रेड़ने बाज गीया। 40ता वेगास उठीन इही केरीन कितेन बोयड़ान चुटा पोर चेड़ने बाज गीया, “आमु पाप किरेल हेते; पुण एवी तियार हेते, एने ती जागे जाहु जान बाराम यहोवा वचन आपेल इतो।”

41तेवी मुसा केयो, “तुमू यहोवान उकुमाह काहा तोड़तेह? ज्य सफल नाय एय। 42यहोवा तुमरी हिऱ्यो नाह सुतो, चेड़ाय मा किरो, नाहते दुसमोना हेऱ्या आरवाय जाहो। 43ताहरी तुमरी ओंगाण अमालेकी एने कनानी माणहे हेते, केरीन तुमू तालवारी केरीन माराय जाहो; तुमू यहोवाह सोड़ीन सेटा एय जायेल हेते, केरीन तो तुमरी हिऱ्यो नाय रेय।”

44पुण माणहे मुसा पोर बुरहो नाह केऱ्या, ता उचाला बोयड़ा पोर गीया, पुण मुसा एने यहोवान वाचान पेटी माणहा हेऱ्यी नाह गीयी, पुण पाड़ावा मायच रेनी। 45तेवी अमालेकी एने कनानी जा ता बोयड़ा पोर रेताला, ता पोर चेड़ाय केर देना, एने होर्मा गाव वोर ताह मारतेन आवा।