गिनती 13

पुतो काड़नाराह कनान देसाम मोकेलनु

(व्यवस्था 1:19-33)

1पुशो यहोवा मुसाह केयो, 2“कनान देस जाह मी इस्राएली माणहाह आपण्यो हे, तान पुतो काड़नेन केरता माणहे मुकेल; एने ता तान डायडायान वोसीन एक एक मुखी एदमी रेणे जुवे।” 3यहोवा फाय रेन ज्यो उकुम सापड़ावीन मुसा ओहला एदम्याह पारान जेंगला माय रेन मोकली दिनो, जा आखान आखा इस्राएली माणहान मुखी एता। 4तान नावे ज्या हेते; रूबेन ने वोस माय रेन जक्कुरान बिटोख शम्मु; 5एने शिमोनान वोस माय रेन होर ने बिटोख शापात; 6एने यहुदान वोस माय रेन यपुन्नेन बिटोख कालेब; 7एने इस्साकारान वोस माय रेन युसूफान बिटोख यिगाल; 8एने एप्रेमान वोस माय रेन नुन ने बिटोख होशे; 9एने बिन्यामीनान वोस माय रेन रापुन बिटोख पलती; 10एने जबुलूनान वोस माय रेन सोदीन बिटोख गद्दिएल; 11एने युसूफान वोस माय, मनश्शेन वोस माय रेन सुसीन बिटोख गद्दी; 12एने दानान वोस माय रेन गमल्लीन बिटोख अम्मीएल; 13एने आशेरान वोस माय रेन मिकाएलान बिटोख सतुर; 14एने नप्तालीन वोस माय रेन वोप्सीन बिटोख नहुबी; 15एने गादान वोस माय रेन माकीन बिटोख गुएल;

16जा एदम्याह मुसा देसान पुतो काड़नेन मुकलेल इतो, तान नावे ज्यास एता। एने नुन ने बेटाख होशेन नाव मुसा यहोशु मिलेल इतो।

17जेवी मुसा ताह कनान देसान पुतो काड़नेन मोकेलने बुखेत केयो, “न्या रेन नेगेब जेंगलाम लागता दक्षिण ने बोयड़ावाला ईलाकाम जावो, 18एने बोयड़ान देसाम जायीन ता देसाह देख लिज्यो काय कोहलोक हे, एने ता देसाम वुहेल माणहाह बी दिखज्यो काय ता तेगड़ा हेते काय लोकड़ायेल हेते, थोड़ास हेते काय वोदार हेते, 19एने जा हेयराम ता वोह रेनाह तो कोहलोक हे, हाजो काय बाक्तो, एने ता कोहल्यु कोहल्यु वोहत्यु माय वोह रेतेह, एने तोम्बु माय रेतेह काय नाहते किला माय रेतेह, 20एने तो देस कोहलोक हे, पाके ओहलोह काय खेरबाट्यो हे, एने ता माय जाड़े हेते काय नाह। तुमू ईमोत केरीन जावो एने ता देसान पाकी माय रेन काह लेन आवज्यो।” एने तो टेम पेल्लो पाकेल अंगुरान इतो।

21केरीन ता चाल देना, एने सीन नावान जेंगला माय रेन लागता रहोब वोर, जो हमातान वाटे हे, आखा देसाह देखी बालीन तान पुतो काड्या। 22ता नेगेबान दक्षिण लागता हेब्रोन वोर गीया; ताहरी अहीमन, शेशे, एने तल्मे नावान अनाक वोसीन माणहे रेताला। हेब्रोन मिस्र माय वाला सोअनाह रेन सात वोरह्यान पेल वोहाड़ाय जायेल एतो। 23तेवी ता एशकोल नावान खोदरान जागे वोर गीया, एने ताहरी रेन एक डाल अंगुरान गुमसा हेऱ्याच तोड़ लेदा, एने दुय जाणे ताह डेंगा पोर टांगीन उखलीन चाल देना; एने ता दाड़ीम एने अंजीर ने फोला माय रेन थोड़ थोड़ोक लेन आवा। 24इस्राएली ताहरी रेन अंगुरान गुमसो तोड़ीन लायेल एता, केरीन ता जागान नाव एशकोल1 खुदोर मेलाय गीयो।

25चालीह दिह्या पोर ता कनान देसान पुतो काड़ीन फिरीन आवा। 26एने पारान जेंगलान कादेश नावान जागे मुसा एने हारून एने इस्राएली माणहान आखी मोंडली फाय पोचना; तेवी ताह एने आखी मोंडलीन माणहाह खुबेर देना, एने ता देसान फोले ताह देखाड्या। 27ता मुसाह ज्य केन होमलाड्या, “जा देसा माय तु आमुह मुकलेल इतो ता माय आमु जायेल; ता माय खेरीस दुद एने मोवालान खुदोर वोयतेह, एने तान पाक माय रेन थोड़ोक ज्योस हे। 28पुण ता देसाम रेणारे तेगड़ा हेते, एने तान हियोर किल्लावाला हेते एने जुलूम मोठा हेते; पोशा आमु ताहरी अनाक वोसीन माणहाह बी देख्या। 29एने नेगेबान दक्षिण माय अमालेकी वोह रेनाह; एने बोयड़ावाला देसा माय हित्ती, यबूसी एने एमोरी रेतेह; एने देरीयान दिड़े दिड़े यरदन नेदीन मीरे कनानी वोह रेनाह।”

30पुण कालेब मुसान ओंगाण पोरजान माणहाह ठावको केरनेन विचार केरीन केयो, “आपु एवीस जायीन ता देसाह आपणा ताबाम केर लेता; काहाकाय खेरीस आपणे माय ओहलो केरनेन ताकेत हे।”

31पुण जा एदमी तान आरही जायेल एता ता केया, “ता माणहा पोर चेड़ाय केरनेन ताकेत आपणे फाय नाह सोती; काहाकाय ता आपुह रेन जादा तेगड़ा हेते।” 32एने ता इस्राएली माणहान ओंगाण ता देसान जान पुतो ता काड़ेल एता, इह केन जुठी खुबेर बी केऱ्या, “तो देस जान पुतो काड़नेन केरता आमु जायेल एता ओहलो हे, जो ता माय रेणार माणहाह गील जाथे; एने जोला एदमी आमु ता माय देख्या, ता आखान आखा जुलूम उचा हेते। 332 पोशा आमु ताहरी नफिली, मतलब नफिली अनाक वोसीह देख्या; एने आमु आमरी नेजरी माय ते तान ओंगाण टिड्यान गेत देखाताला, एने ओहलास ता नेजरी माय मालुम पोड़ताला।”