गिनती 12

मिर्यामीह डेन्ड आपणे

1पुशो मुसा एक कुशी बायकु हिऱ्यो वाराड़ केर लियेल इतो। केरीन मिर्याम एने हारून तान ती वाराड़ किरेल, कुशी बायकुन वोजेसे तान निंदा केरने बाज गीया; 2ता केताला, “काय यहोवा मुसा हिऱ्यो उलोस वातु किरेल हे? काय तो आपु हिऱ्यो बी वातु नाह किरेल सुतो?” तान ज्यी वात यहोवा होमेल लिदो। 3मुसा ते देरती पोर रेणारा आखा माणहा माय रेन जुलूम गेरबोड़ा सोबावान इतो।

4केरीन यहोवा एकदोम मुसा, हारून एने मिर्यामीह केयो, “तुमू तीन जाणे मेल मिलापवाला तोम्बुन आहने जावो।” तेवी ता तीन जाणे आहने आवा। 5तेवी यहोवा वादलान खांबा पोर उतरीन तोम्बुन बायणा पोर उबरीन हारून एने मिर्यामीह हाद्यो; तेवी ता दुय जाणे आहने आवा। 6तेवी यहोवा केयो, “मार वातु हुमलो, केदी तुमू माय इखीह जाणकार एय, ताहार ता पोर मी यहोवा देरसेन आपीन सोताह देखाडुह, नाहते होपना माय ता हिऱ्यो वातु केरूह। 71पुण मार पावोर मुसा ओहलो नाह सुतो; तो ते मारा आखा गेराणा माय बोरहान लायेक हे। 8ता हिऱ्यो मी लिकीन नाह, पुण आमने सामने एने हुंबो एन वातु केरथु; एने तो यहोवान वेहरूप देख सिकेह। केरीन तुमू मार पावोर मुसान चिहटा किरते लेन काहा नाह बिना?”

9तेवी यहोवान राग ता पोर बोड़कनो, एने तो ता हिऱ्यो रेन जात रिनो; 10तेवी तो वादेल तोम्बु पोर रेन उठ गीयो, एने मिर्याम कोढ़ा माय बोरफान गेत दोवल्यी सोब बोण गीयी। एने हारून मिर्यामीन उगे दिख्यो काय ती कोड़ावाली बोण जायेल हे। 11तेवी हारून मुसाह केयो, “एय मारा मालीक, आमु दुय जाणे जी फोगवाय केरीन पाप किरेल हेते, ज्यो पाप आमु पोर मा लागणे देय। 12एने मिर्यामीह ता मुरेल माणहान गेत मा रेणे देय, जीहे काय तीन आईख ने पेटा माय रेन निकेलतास आदऱ्योस रिथे।”

13तेवी मुसा इही केन यहोवाह विन्ता किऱ्यो, “एय बोगवान, गीण केर, एने तीह हुदार दे।” 142

तेवी यहोवा मुसाह केयो, “केदी तीन आबोख तीन मुया पोर थुपेलच रितो, ताहार काय ती हात दिह वोर लाजवायेल नाय रेती? तान केरता ती हात दिह वोर पाड़ावान बाहेर बोंद रेय, तान पासाण ती पोशी माय आव सेकी।” 15तेवी मिर्याम हात दिह वोर पाड़ावान बाहेर बोंद रेनी, एने जाह वोर पोशी आव नाह सेकी ताह वोर माणहे नाह गीया। 16तान पासाण ता हसेरोत रेन निकलीन पारान नावान जेंगला माय तान पाड़ावो केऱ्या।