लुका 6

विहेवणेन दिह्यान मालीक

(मत्ती 12:1-8; मरकुस 2:23-28)

1विहेवणेन दिह यीशु तान चेला हिऱ्यो खेताम लागतो जाणे बाजरियेल ईतो, तेवी तान चेला गोवान उंब्या तोड़ीन आथा माय मोलीन खाणे बाजरियेल एता। 2तेवी थोड़ाक फरिसी केया, “तुमू तो काम काहा केरतेह जो विहेवणेन दिह केरने कायदान विरोद हे?”

3यीशु ताह जापाप आप्यो, “काय तुमू ज्य नाह वाशा, काय दाऊद एने तान हातीह बुख लागेल, तेवी तो काय किरेल? 4ता बोगवानान चोखाला मोंदिरा माय जाईन चोखाला रोटा खादा, ता रोटा चाकऱ्याह सोड़ीन दिहरा कुणीच नाह खाय सेकताला, पुण ता रोटाह दाऊद खादो एने तान हातीह बी खावाड़ेल।”

5तेवी यीशु ताह केयो, “मी माणहान बिटोख विहेवणेन दिह्यान बी मालीक हे।”

यीशु आथ पांगा माणहाह हुदारने

(मत्ती 12:9-14; मरकुस 3:1-6)

6दिहरे विहेवणेन दिह यीशु यहुदिन बोक्ती केरन्या गेरा माय जाईन हिकाड़ने बाजरियेल ईतो, एने ता एक माणुह एतो, तान जिवड्यो आथ पांगलो ईतो। 7तेवी थोड़ाक फरिसी एने देरेमगुरू यीशु पोर गुनो लागाड़ने ताकाव रियेल एता, ता ज्य देखणे होदताला काय यीशु विहेवणेन दिह आथ पांगा माणहाह हुदारेत काय नाह। 8पुण यीशु तान मोनान विचार जाणीन आथ पांगा माणहाह केयो, “उठ, आखान ओंगाण उबरी जा,” तेवी उठीन उबरी गीयो। 9तेवी यीशु ताह केयो, एवी तुमूह एक वात फुसथु आपणा नेम ने गेत विहेवणेन दिह काय केरने हाजो हे, काय बाकतो केरने हाजो हे? काय बोलो केरने? जीवाह वोचाड़ने काय जीवाह मारने? 101ताहरी बोह रियेल माणहान उगे फिरीन यीशु केयो, “तार आथ ओंगाण केर, तो तिहेस केऱ्यो, एने तान आथ पेल ने गेत हुदेर गीयो।”

11पुण फरिसी एने देरेमगुरू आपसा माय होमच्‍यो केरने बाज गीया, “आपु यीशु हेऱ्या काय किरज्‍यो?”

बारा प्रेरिताह यीशु निवाड़ने

(मत्ती 10:1-4; मरकुस 3:13-19)

12ता दिह्याम यीशु विन्ता केरनेन केरता बोयड़ा पोर गीयो, एने आखी रात बोगवाना फाय विन्ता केऱ्यो। 13एने उजालो एताच यीशु तान चेलाह हादिन ताम रेन बारा चेलाह निवाड़ लिदो, एने तान नाव प्रेरित मिल्यो। 14तान नावे ज्या हेते, शमोन जो तान यीशु पतरस बी मिल्यो, एने तान बाहख अन्द्रियास, याकुब एने तान बाहख योहान, फिलीपुस, बरतुल्मे, 15मत्ती, थोमा, हलफाईन बिटोख याकुब, शमोन जो देसान बक्त ईतो, 16एने याकुबान सोरो यहुदा, एने यीशुह देरावणार यहुदा इस्‍कोरिती।

यीशु जुलूम दुखाऱ्या माणहाह हुदारने एने हिकवोण आपणे

(मत्ती 4:23-25)

17जेवी यीशु एने तान चेला बोयड़ा पोर रेन उतरीन चोवगाना माय उब रेना, एने तान चेलान बिड़ जुलूम एती, एने सोब यहुदिया, यरूशलेम, सुर एने सेदान देरीयान दिड़े रेन जुलूम होवटा माणहे, जा यीशुन वातु होमेलने एने तान बेमारीह रेन हुदेरनेन केरता ता फाय आयेल एता, ताहरी एता। 18एने बुतड़ा लागेल ता बी यीशु फाय आवीन हुदेरना। 19एने आखा माणहे यीशुह आथेलने होदताला, काहाकाय ताम रेन ताकेत निकलीन आखाह हुदारताली।

बोरकेत एने हारापान वचन

(मत्ती 5:1-12)

20तेवी यीशु तान चेला उगे देखीन केयो,

बोरकेतवाला तुमू हेते, जा गेरबोड़ा हेते;

काहाकाय बोगवानान राज ताच ने हे!

21बोरकेतवाला तुमू हेते जा बुखल्या हेते;

काहाकाय तुमूह हाजो खाणे जुड़ी!

जा एवी आहवा गालतेह ता बोरकेतवाला हेते;

काहाकाय ता आहती! 222

बोरकेतवाला हेते तुमू; जेवी माणहान बेटाख ने कारेण माणहे तुमरे हेऱ्या दुसमोनाय केरती, एने तुमूह आंगे केर देती, एने तुमरी चिहटा केरती, एने तुमरा नावाह खाराब जाणीन खोड़ देती। 233ते दिह तुमू खुस एन नाचज्यो, काहाकाय तुमरी केरता हेरगा माय मोटलो ईनाम हे; एने तान बाप दादा बोगवानान जाणकारा हेऱ्या इहीचकेरीन केऱ्या केरताला।

24पुण एवी जा मालदार हेते, ता पोर हाय!

काहाकाय तुमूह एवी हुख जुड़ जायेल हे!

25जा एवी हाजोह खाते पितेह तान केरता हाय;

एक टेम ओहलो आवी काय ता बुखल्या रेती!

जा एवी आहतेह तान केरता बी हाय;

एक टेम ओहलो आवी काय ता दुख मोणावती एने आहवा गालीन रेड़ती!

26“जेवी सोब माणहे तुमूह हाजा केती, हाय तुमू पोर काहाकाय तान बाप दादा जुठा जाणकाराह हेऱ्या बी इहीचकेरीन केऱ्या केताला।”

दुसमोनाह मोंग केरने

(मत्ती 5:38-48; 7:12)

27पुण मी तुमू होमेलनाराह केथु, “तुमरा दुसमोनाह मोंग किरो, एने तुमरो चिहटा किरेह, तान बोलो किरो। 28जो तुमूह हाराप देय, ताह बोरकेत आपो, एने जा तुमरी हेऱ्या हाजा नाह रेते, तान केरता विन्ता किरो। 29एने जो तारा एक गाड़शा पोर थापोड़ देय, तान उगे दिहरो गाड़शो बी फिराव दे, जो तार डेगलो सांडाड़ लेय ताह तारो डेगलो बी ली जाणे दे। 30जो कुण बी तुवा फाय रेन काह उदार मांगी, ते ताह आप, एने जो तारी चिज सांडाड़ लेय ता फाय पुशो मा मांगहे। 314जोहलो तुमू होदतेह, माणहे तुमरी हेऱ्या केरती, तुमू बी ता हेऱ्या तोहलोच किरो।”

32केदी तुमूह मोंग केरनारा हेऱ्या तुमू मोंग केरतेह, ते तुमरी काय मोठाय? काहाकाय पापी माणहे बी ता पोर मोंग केरनारा हेऱ्या मोंग केरतेह। 33एने केदी तुमू बोलो केरनारा हेऱ्या बोलो केरतेह, ते तुमरी काय मोठाय? काहाकाय पापी माणहे बी ता पोर बोलो केरनारा हेऱ्या बोलो केरतेह। 34पोशा मांगणेन आसा केरीन उदार आपतेह, ते तुमरी काय मोठाय? काहाकाय पापी माणहे बी पापी हेऱ्या इहीचकेरीन केरतेह। 35पुण तुमरा दुसमोनाह मोंग किरो, एने हाजो किरो, पोशा मांगणेन आसा केरीन उदार मा आपहो, तेवी तुमूह मोटलो ईनाम जुड़ी, एने तुमू मोटला बोगवानान सोरा केवाहो, काहाकाय बोगवान दन्यवाद नाह केरनारा पोर एने खाराब माणहा पोर बी गीण केरने। 36एने जोहलो तुमरो हेरगावालो आबोख गीण केरनार हे, तिहेच केरीन तुमू बी गीण केरनार बुणो।

दिहरा पोर गुनो मा लागड़हो

(मत्ती 7:1-5)

37दिहरा पोर गुनो मा लागाड़हो, ते तुमू पोर बी गुनो नाय लागाड़ाय, आरोपी मा ठेरावो, ते तुमू बी आरोपी नाय ठेराहो, एने तुमू माफ किरहो, ते तुमूह बी माफी जुड़ी। 38तुमू दिहराह आप्या किरहो, ते दाब दाबीन पुरो बोरीन बोगवान तुमूह आपी, काहाकाय जा मापा केरीन तुमू मापहो तीच मापे तुमरी केरता बी मापाय जाय। 395

ओवतो यीशु एक किस्सो केयो, एक आंदलो दिहरा आंदलाह वाट नाय देखाड़ सेकी, तो देखाड़ी ते दुयू बी खाडाम जाय पोड़ती। 406चेला तान गुरूह रेन मोठा नाय बोण सेकी, पुण जो हास केरीन हिकलेय तोच गुरून गेत रेय।

41तु तारा बायाख ने डोलाम कोचरो काहा दिखेह, तुवाह तारा डोलाम होट्यो नाह मालुम पुड़ेत काय? 42तुवाह तारा डोला मायवालो होट्यो नाह देखात, ते तार बायाख किहीक केय सिकेह, एय बाहख मी तारा डोलाम रेन कोचरो काड़ देह? एय कोपट्या! पेल तारा डोलाम रेन होट्यो काड़ले, तेवी तु हास केरीन देखीन तारा बायाख ने डोलाम रेन काड़ सिकहे।

जोहलो जाड़ तोहलो फोल

(मत्ती 7:16-20; 12:33-35)

43“काल्लोस हाजालो जाड़ नाह सोतो, जो खाराब फोल लावी, एने काल्लोस खाराब जाड़ नाह सोतो, जो हाजो फोल लावी। 447जाड़ाह तान फोलाम रेन ओलेखतेह, काहाकाय काटाल्या जाड़ाम रेन अंजीरान फोल नाह तोड़ते, एने नाह काटाली बोरी पोर रेन अंगुर। 458हाजाला माणहे तान हाजाला मोनान मोटक्या माय रेन हाजी वातु केरतेह, एने खाराब माणुह तान खाराब मोनान मोटक्या माय रेन खाराब वातु केरतेह, काहाकाय जो माणहान मोना माय हे, तोच तान मुया माय रेन बाहेर आवीह।”

गेर बांदणारे दुय माणहे

(मत्ती 7:24-27)

46“जेवी तुमू मारो केणो नाह मानते, ते काहा माहु एय मालीक! एय मालीक केतेह? 47जो मार फाय आवीह एने मारी वातुह होमलीन किरेह, ते मी तुमूह केथु काय तो कुणीन गेत हे। 48तो इकेल केरीन गेर बांदणारान गेत हे, तो गेर बांदणे बुखेत उंडोच पायो खोदीन पाको पायो बोरीन गेर बाणावीह, पाणी पोड़नो एने वादोण वारो तान गेरा हेऱ्यो ठोकाह, पुण ताह आलाड़ नाह सिकेत, काहाकाय तो गेर देगड़ा पोर बांदायेल एतो।” 49पुण जो माणुह मारी वातीह होमलीन नाह मानेत, तो बिगेर पायान माटड्या माय गेर बांदणारान गेत हे, पाणी पोड़नो एने वादोण वार ठोकाह, तेवी तो गेर पोड़ीन खेतेम एय जाथे।