Nahali Bible
लेव्य 7
दोसबोली
दोसबोलीन केरता ज्यो नेम हे, तो जुलूम हाजो हे; जा जागा पोर होमबोली जेनवेराह मारतेह, तास जागा पोर दोसबोली जेनवार बी बोली किरे, एने तान लुयीह चाकर्यो वेदी पोर कावदेन सिड़के। एने तो ता माय वाली आखी चेरबीह चेड़ावे, मतलब तान चेरबीदार सेमटिह, एने जी चेरबी केरीन आतड्या डापेल रेतेह ती बी, दुयू बुका एने तान उपेरवाली एने कोमरावाली चेरबी, एने कालजान उपेरली कातली बुका बेल न्या आखाह आलेग केरी। एने चाकऱ्यो न्या आखा ईसाह यहोवान केरता वेदी पोर हेलगाड़े, ज्य यहोवाह आक्ठान द्वारा किरेल दोसबोली हे। चाकऱ्या मायवाला आखा एदमी ताम रेन खाय सेकतेह; तो एगदा चोखाला जागाम खावाय जाय; काहाकाय तो जुलूम हाजो हे।
जिह केरीन पापबोली हे तिहेच केरीन दोसबोली बी हे, त्यु दुयून एकुच नेम हे; चाकर्यो त्यु बोल्युह चेड़ावीन पाप डापेह, त्युस वोस्तुह लेय लेय। एने जो चाकर्यो एगदान केरता होमबोलीह चेड़ावी, ती होमबोली जेनवेरान चामड़ाह चाकर्यो लेय लेय। एकेक एन बेटीह चाकऱ्यान रेय, जी बाठा माय रांदेल एय, नाहते केड़ाय माय रांदेल एय नाहते तावाम रांदेल एय। एने सोब एन बेट, जो तेला माय बेचकायेल एय, नाहते हुकेल रेय, तो हारून ने सोराह एक हारको जुड़ी।
मेल मिलाप बोली
ज्यो मेल मिलाप बोलीन नेम हे, जाह एगदो माणुह यहोवाह चेड़ावेह। केदी एगदो माणुह ताह दन्यवाद ने केरता चेड़ावी, ताहार दन्यवाद बोली हेऱ्यो तेल बेचकायेल अखमीरी पुड्या, एने तेला केरीन चोपड़ेल अखमीरी रोटा, एने तेल माय कुहणील फिटान पुड्या बी चेड़ावे। एने तो तान दन्यवादवाली मेल मिलाप बोली हिऱ्यो खमीरी रोटा बी चेड़ावे। एने एकेक ओहला चेड़ावा माय रेन एकेक रूटो यहोवाह विसणेन बेट केरीन चेड़ावी, तो चाकर्यान रेय, जो मेल मिलाप बोलीन लुयीह सिड़केह। एने ता दन्यवादवाला मेल मिलाप बोलीन माह बोली केरने दिहुस खावाय जाय; ताम रेन कायच बी माह दिहरा दिह्यान केरता नाय वोचणे जुवे।
पुण केदी तान बोली केरनो मानतान एय, नाहते मोरजी से एय, ताहार ती बोलीह जेदिह ती चेड़ावाय जाय ते दिहस तो खावाय जाय, एने ताम रेन जो वोच जाय तो दिहरे दिह बी खावाय जाय। पुण जो काय बोलीन माहाम रेन तीसरे दिह वोर रेय जाय, तो आक्ठाम हेलगाड़ाय जाय। केदी एगदो माणुह मेल मिलाप बोलीन माह तीसरे दिह खाते, ताहार तो स्वीकार केराय नाय जाय, तो कायच फायदान गेणाय नाय जाय, एने तो खाराब काम सोमजाय जाय, एने जो कुण ताम रेन खाय तान गुनो तास ने मुंडी पोर पोड़ी। ओवतो जो माह एगदी एठी चिज सापली लेय, ताहार तो खावाय नाय जाय; तो आक्ठाम हेलगाड़ाय जाय, एने जोला जाणे चोखा हेते ता माह खाय, पुण जो एठो एन यहोवान मेल मिलाप बोलीन माहाम रेन काह खाय, तो तान माणहाम रेन खेतेम केराय जाय। एने केदी इखेह एगदी एठी चिजीह सापलीन यहोवान मेल मिलाप बोली जेनवेरान माहाम रेन खाय, ताहार तो बी तान माणहाम रेन खेतेम केराय जाय, केदी ता माणहान एगदी एठी चिज नाहते एठो जेनवार नाहते काल्ली बी एठी एने खाराब चिज रेय।
ओवतो यहोवा मुसाह केयो, “इस्राएल ने माणहाह इह केरीन के काय तुमू नाहते बुयेल, मेंड्रो एने बोकड्यान चेरबी खाहो। एने जो जेनवार खुद मोर जाय, एने जो दिहरा जेनवेरान द्वारा माराय जाय, तान चेरबी दिहरा कामाम लागाड़ज्यो, पुण तीह केदी बी खाहो मा। केदी एगदो माणुह ओहला जेनवेरान चेरबी खाते, जाह यहोवाह केरता होमबोली केरीन चेड़ाया केरतेह, ताहार ता माणहाह तान माणहाम रेन खेतेम केराय जाय। एने तुमू तुमरा गेराम काल्ली बातीन चिड़ान नाहते जेनवेरान लुय केदी मा खाहो। केदी एगदो माणुह थोड़ीक लुय खाते ताहार ता माणहाह तान माणहाम रेन खेतेम केराय जाय।”
ओवतो यहोवा मुसाह केयो, इस्राएल ने माणहाह इह केरीन के, जो यहोवान केरता मेल मिलाप बोली चेड़ावी तो तीस मेल मिलाप बोलीम रेन यहोवा फाय बेट लियावे; तो तास ने आथा केरीन यहोवान बोलीह, मतलब साती बेल चेरबीह लियावे काय साती आलाड़नेन बेट यहोवान सामने आलाड़ाय जाय। एने चाकर्यो चेरबीह ते वेदी पोर हेलगाड़े, पुण साती हारून एने तान सोरान रेय। ओवता तुमू तुमरी मेल मिलाप बोलीम रेन जिवड़ी जांगीह बी विसणेन बेट सोमजीन चाकऱ्याह आपज्यो; हारून ने सोराम रेन मेल मिलाप बोलीन लुय एने चेरबीह चेड़ावे जिवड़ी जांग तास ने ईसो रेय। काहाकाय इस्राएलीन मेल मिलाप बोलीम रेन आलाड़नेन बेटीन साती एने विसणेन बेटीन जांगीह लेन, मी हारून चाकऱ्याह एने तान सोराह आपेल हे काय इस्राएल माणहान केरता ज्यो नेम कायेम ने केरता रेय। जेदिह रेन हारून एने तान सोरा यहोवान आहने चाकर्यान पोद पोर निवेड़ना, तेदिह रेन यहोवाह आक्ठान द्वारा किरेल बेट हारून एने तान सोरान हे। जेदिह यहोवा तान अबिषेक किऱ्यो, ते दिहस तो उकुम आप्यो काय ताह इस्राएल ने उगे रेन ज्यो ईसो कायेम जुड़ी; तान पिढीन केरता ज्योस होक ठेराय जायेल।
होमबोली, एन बेट, पापबोली, दोसबोली, चाकर्यान अबिषेक बोली, एने मेल मिलाप बोलीन नेम ज्योस हे। जेवी यहोवा सीने बोयड़ान आहने उजाड़ी माय मुसाह उकुम आपेल काय इस्राएली मार केरता काय काय बेट चेड़ावे, तेवी तो ताह ज्योस नेम आपेल इतो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.