Skip to content
BibleKenya

Nahali Bible

लेव्य 6

उवतो यहोवा मुसाह केयो, “केदी एगदो माणुह यहोवान बुरहो तोड़ीन पापी ठेराय, जिह काय मालदेन, नाहते लेन देन, नाहते लुटेल मालान बाराम तान बायाख ठेगी, नाहते ताह दुको देय। नाहते पुड़ेल चिजीह सापड़ावीन तान बाराम जुठ बोले एने जुठो सुगोण बी खाय; ओहली काल्ली बी वात काहा नाय रेय जीह केरीन माणहे पापी ठेरातेह, ते जेवी तो ओहलो केरीन दोसी ठेराय, तेवी जो बी वोस्तु लुट, नाहते ठेगीन, नाहते मालदेन, नाहते टाकायेल चिज ने बाराम जुठ बोल्‍यो एय। केदी काल्ली बी चिज काहा नाय रेय जान बाराम तो जुठो सुगोण खादोय; ताहार तो ताह पुरो पुरो आप देय, एने पाचवो ईसो बी वोदाड़ीन बोर देय, जेदिह ज्‍य मालुम रेय काय तो दोसी हे ते दिहस तो जान हे ताह आप देय। एने तो यहोवान सामने तान दोसबोली बी लियावो, मतलब एक हाजो मेंडो दोसबोलीन केरता चाकऱ्या फाय लियावो, तो तोलीस किमतीन रेय जोलीक चाकर्‍यो ठेरावी। इह केरीन चाकर्‍यो तान केरता यहोवान सामने पाप डापे, एने जा कामाह केरीन तो दोसी एय जायेल हे तान माफी ताह जुड़ी।”

बात बातीन बोलीन नेम

होमबोली

उवतो यहोवा मुसाह केयो, हारून एने तान सोराह उकुम आपीन ज्‍य के काय होमबोलीन नेम ज्‍य हे। होमबोली आक्‍ठान उपेर रात बोर वेगोस वोर वेदी पोर पुड़ेल रेय, एने वेदीन आक्‍ठो वेदी पोर हेलेगते रेय। एने चाकर्‍यो तान होणीन फाड़का एने तान डिला पोर चोपकिन होणीन फाड़को पेरीन होमबोलीन रोखड़ो, जो वेदी पोर हेलेगणेन बाद वोच जायेल हे, ताह विसीन वेदीन आहने मेली। तेवी तो तान ज्या फाड़का काड़ीन दिहरा फाड़का पेरीन रोखड़ाह पाड़ावान बाहेर एगदा चोखा जागा पोर ली जाय। पुण वेदीन आक्‍ठो वेदी माय हेलेगते रेणे जुवे, तीह ओलाणे नाय देणे जुवे, चाकऱ्याह दाड़ीन वेगोस वेदी पोर लाकड़े हेलगाड़ने जुवे, ताह वेदी पोर लाकड़े मेलने जुवे, ताह मेल मिलाप बोलीन चेरबी हेलगाड़ने जुवे। वेदी पोर आक्‍ठो जेलेम हेलेगते रेणे जुवे; ती केदी ओलाणे नाय जुवे।

एन बेट

एन बेट केरनेन नेम ज्‍य हे, हारूनान सोरा ताह वेदीन ओंगाण यहोवान आहने लियावो। चाकऱ्याह एन बेट माय रेन मुठ बोर हाजालो फिट लेणे जुवे, तेल एने हालयान ढिक एन बेट पोर जोरेवरी रेणे जुवे, चाकऱ्याह ज्याह वेदी पोर हेलगाड़ने जुवे, ज्‍य यहोवाह एक हाजाली गेंद एने एर केरनी बेट रेय। एने ताम रेन जो वोच जाय ताह हारून एने तान सोरा खाय; तो बिगेर खमीर चोखाला जागाम खावाय जाय, मतलब ता मिलापवाला तोम्बुन खोलीम ताह खाय। तो खमीर हेऱ्यो रांदाणे नाय जुवी; काहाकाय यहोवाह आक्‍ठान द्वारा केरनी एन बेट माय रेन चाकऱ्याह तान ईसो एणेन केरता आपेल हे; केरीन जीहे पापबोली एने दोसबोली जुलूम हाजो हे, तिहेच केरीन तो बी हे। हारूनान सोराम रेन एकेक सोरो आक्‍ठान द्वारा यहोवाह चेड़ायेल बेटीम रेन खाय सिकेह, ज्‍य तुमरी पिढ्युन कायेम ने केरता नेम हे, जो कुण ज्यी एन बेटीह सापली तो चोखो ठेराय।

पुशो यहोवा मुसाह केयो, “जेदिह हारूनान अबिषेक एय, ते दिह तो तान सोरा हिऱ्यो यहोवाह ज्यी बेट चेड़ावे; मतलब एक किलो फिट कायेम एन बेट चेड़ावे, ताम रेन आदोक वेगोच एने आदोक हांज पोर ने टेम चेड़ावे। तो तावाम तेला माय रांदे; जेवी तो तेला केरीन तेलाय जाय, तेवी ताह लीयावजे, ज्यी एन बेटीन रांदायेल टुकड़ा यहोवान हाजाली गेंदीन केरता चेड़ावज्यो। हारूनान सोराम रेन जो बी तान जागा पोर चाकऱ्यान पोद माय अबिषेक एय, यहोवाह तो एन बेट चेड़ावे, ज्‍यो नेम कायेम ने केरता हे; यहोवान केरता एन बेट पुरी रिती से हेलगाड़ने जुवे। चाकर्‍यान एकेक एन बेट पुरी रिती से हेलगाड़ने जुवे; ज्‍यीह खाणे नाय जुवे।”

पापबोली

उवतो यहोवा मुसाह केयो, “हारून एने तान सोराह ज्‍य के काय पापबोलीन नेम ज्‍यो हे, जा जागाम होमबोली जेनवार माराय जाथे; तास जागाम पापबली जेनवार बी यहोवान सामने बोली केराय जाय; ज्‍य जुलूम हाजो हे। जो चाकऱ्यो पापबोलीह चेड़ावेह ताह तो खाय, एने चोखाला जागा पोर मिलापवाला तोम्बुन खोली माय खाणे जुवे। जो कुण तान माहाह सापेल लेय, तो चोखालो एय जाय; एने केदी तान लुयीन सीटा एगदा फाड़का पोर पोड़ जाय, ताहार ताह एगदा चोखाला जागाम दोव दिज्‍ये। केदी ताह एगदा माटड्यान ठामला माय उकाले, ताहार ता ठामलाह फोड़ देणे जुवे, केदी ताह पितलान ठामला माय उकाले, ताहार ठामलाह उजाले एने पाण्या केरीन दोवे। चाकऱ्या माय रेन आखा एदमी तीह खाय सेकतेह; ज्यी जुलूम हाजी चिज हे। पुण केदी पापबोलीन लुय माय रेन मिलापवाला तोम्बुन माय चोखाली जागे पाप डापणेन केरता पोचाड़ाय जाय, ताहार पापबोलीह आक्‍ठाम हेलगाड़ देणे जुवे, चाकर्‍यो तान माह नाह खाय सिकेत।”

Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.