Nahali Bible
लेव्य 8
हारून एने तान सोरान अबिषेक
(निर्गमन 29:1-37)
ओवतो यहोवा मुसाह केयो, “तु हारून एने तान सोरान फाड़का, एने अबिषेक ने तेल, एने पापबोलीन वासड़ो, एने दुय मेंडा एने अखमीरी रोटान टोपलीह ले, एने मिलापवाला तोम्बुन बायणा हिऱ्यो लियाव, एने ताहरीस आखी मोंडलीह टुलो केर।” यहोवान ज्या उकुमान गेत मुसो किऱ्यो; एने मोंडली मिलापवाला तोम्बुन बायणा हेऱ्यी एकठी एनी। तेवी मुसो मोंडलीह केयो, “जो काम केरनेन उकुम यहोवा आपेल हे, तो ज्यो हे।”
ओवतो मुसा हारून एने तान सोराह आहने ली जायीन पाण्या केरीन उंगलायो। तेवी मुसो हारूनाह फाड़का पेरायो, एने पुट्टो वेटालीन चोगा पेराव दिनो, एने एपोद लागाड़ीन एपोद1 ने गुथील पोट्टा से एपोदाह खेचीन बांद दिनो। तेवी मुसो सातीह ढापण्यो फाड़को बांद्यो एने खीसाम उरीम एने तुम्मीम मिल्यो। तेवी मुसो हारूनान मुंडी पोर पागड़ी बांदिन पागड़ीन सामने होनान पोट्टीह, मतलब चोखाला मुकूटाह लागाड्यो, जिह केरीन यहोवा मुसाह उकुम आपेल इतो।
तेवी मुसो अबिषेक ने तेल लेन रेणेन जागो एने जी बी चिज ता माय एत्यु, त्यु आख्यु चिजु पोर सेड़कीन त्युह चोख्यु किऱ्यो। एने मुसो अबिषेक ने थोड़ोक तेल लेन वेदी पोर हात वार सिड़क्यो, एने आखो सामान बेल वेदीन एने पाया बेल डेचक्यान अबिषेक केरीन ताह चोखो किऱ्यो। एने तो अबिषेक ने तेलाम रेन थोड़ोक हारूनान मुंडी पोर रोचवीन तान अबिषेक केरीन ताह चोखो किऱ्यो। ओवतो मुसो हारूनान सोराह आहने लावीन फाड़का पेरायो, एने कोमेर पुट्टो बांदिन तान मुंडी पोर टोपी मेल दिनो, जिह केरीन यहोवा मुसाह उकुम आपेल इतो।
तेवी मुसो पापबोलीन बोयलाह आहने ली गीयो; एने हारून एने तान सोरा तान आथ पापबोलीन बोयलान मुंडी पोर मेल्या। तेवी मुसो ताह बोली किऱ्यो, एने मुसो लुय लेन आंगली केरीन वेदीन चारू हिंगा पोर लागाड़ीन चोखो किऱ्यो, एने लुयीह वेदीन पाया पोर रोचीव दिनो, एने तानकेरता पासतावो केरीन ताह चोखो किऱ्यो। एने मुसो आतड्या पोर वाली आखी चेरबी, एने कालजाह डापण्यी कातली लिदो, एने चेरबी बेल दुयू बुकाह लेन वेदी पोर हेलगाड्यो। पुण मुसो बोयला माय रेन जो काय रेय गीयो ताह, मतलब चामड़ो, माह एने साणाह पाड़ावान बाहेर आक्ठाम हेलगाड्यो, जिह केरीन यहोवा मुसाह उकुम आपेल इतो।
ओवतो मुसो होमबोलीन मेंडाह लावो, हारून एने तान सोरा तान आथ मेंडान मुंडा पोर मेल्या। तेवी मुसो मेंडाह बोली किऱ्यो, एने तो वेदीन कावदेन लुय सिड़क्यो। तेवी मेंडो टुकड़ा टुकड़ा केराय गीयो, एने मुसो मुंड एने चेरबी बेल टुकड़ाह हेलगाड्यो। तेवी आते एने पाय पाण्या केरीन दोवाय गीया, एने मुसो पुरा मेंडाह वेदी पोर हेलगाड्यो, ज्यी आक्ठा माय बेट किरेल होमबोली एती। ज्यी यहोवान केरता हाजी गेंद एती, मुसो यहोवान उकुमान गेत आखा काम किऱ्यो।
तेवी मुसा दिहरा मेंडाह जो अबिषेक बोलीन मेंडो एतो ताह आहने लावो, हारून एने तान सोरा तान आथ मेंडान मुंडी पोर मेल्या। तेवी मुसो मेंडाह बोली किऱ्यो, एने तान लुयीम रेन थोड़ीक लेन हारूनान जीवड्या कानान सेवटा पोर एने तान जीवड्यो आथ एने जीवड्या पायान आंगठा पोर लागाड्यो। तेवी तो हारूनान सोराह आहने ली गीयो, एने लुयीम रेन थोड़ीक एक एकान जीवड्या कानान सेवटा पोर एने जीवड्यो आथ एने जीवड्या पायान आंगठा पोर लागाड्यो; एने मुसो लुयीह वेदी पोर कावदेन सिड़क्यो। एने तो चेरबी, एने चेरबी वाली सेमटी, एने आतड्या पोर वाली आखी चेरबी, एने कालजाह डापण्यी कातली बेल दुयू बुका एने जिवड़ी जांग, ज्य आखो लेन आलेग मेली। एने अखमीरी रोटान टोपली जी यहोवान ओंगाण मेलायेल एती, ताम रेन एक अखमीरी रूटो, एने तेला माय कुहणायेल मोयदान एक रूटो, एने एक रूटो लेन चेरबी एने जिवड्यी जांगी पोर मेल दिनो; एने मुसा ज्यु आख्यु वोस्तुह हारून एने तान सोरान आथाम मेल दिनो, एने आलाड़नेन बेटीन केरता यहोवान ओंगाण आलाड़ाय गियी। तेवी मुसो ज्यु चिजुह हारून एने तान सोरान आथाम रेन लिदो, ताह वेदी पोर होमबोलीन उपेर हेलगाड्यो, ज्य यहोवाह केरता हाजी गेंद आपणेन केरता अबिषेक ने बेट एने यहोवान केरता आक्ठान बोली एती। तेवी मुसो ता मेंडान सातीह लेन आलाड़नेन बेटीन केरता यहोवान ओंगाण आलाड्यो; एने अबिषेक ने मेंडा माय रेन मुसान ईसो ज्योस इनो, जिह केरीन यहोवा मुसाह उकुम आपेल इतो।
तेवी मुसो अबिषेक ने तेल एने वेदी पोर वाली लुय, दुयूम रेन थोड़ीक लेन हारून एने तान फाड़का पोर एने तान सोरा एने तान फाड़का पोर बी सिड़क्यो; एने तो फाड़का बेल हारूनाह बी चोखो किऱ्यो।
तेवी मुसो हारून एने तान सोराह केयो, “माहाह मिलापवाला तोम्बुन बायणा पोर रांदो, एने ता रोटाह जो अबिषेक बेटीन टोपली माय हे तोस खावो, जीह मी उकुम आपेल हे काय हारून एने तान सोरा ताह खाय। केदी माह एने रूटो वोच जाय, ताहार ताह हेलगाड़ दिज्यो। एने जाह वोर तुमरा अबिषेक ने दिह पुरा नाय एती ताह वोर, मतलब हात दिह वोर मिलापवाला तोम्बुन बायणान बाहेर मा जाहो, काहाकाय तो हात दिह वोर तुमूह अबिषेक केरते रेय। जिह केरीन आज केरायेल हे, तिहेच केरीन केरनेन उकुम यहोवा आपेल हे, जा केरीन तुमरा पाप डापाय जाय। केरीन तुमू मिलापवाला तोम्बुन बायणा पोर हात दिह वोर रात दिह रोकाय रिज्यो, एने यहोवान उकुमाह मानज्यो, ताहार तुमू मोर नाय जाहो; काहाकाय ओहलोच उकुम माहु आपायेल हे।” तेवी यहोवा कियेल ता आखा उकुमान गेत जो तो मुसान द्वारा आपेल इतो, हारून एने तान सोरा केऱ्या।
Source notes (1)
- Footnote एपोद चाकऱ्यान फाड़को
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.