Nahali Bible
लेव्य 25
हातवो वोरीह विहेवणेन वोरीह
(व्यवस्था 15:1-11)
ओवतो यहोवा सीने बोयड़ा पोर मुसाह केयो, “इस्राएल ने माणहाह के काय जेवी तुमू ता देसाम जाहो जो मी तुमूह आपथु, तेवी बुयीह यहोवान केरता आराम जुड्या किरे। तुमू सोव वोरह्या वोर तुमरा खेताम बियारो पेरज्यो, एने तुमू तुमरी अंगुरान वाड़ीम सोव वोरह्या वोर साट साटिन खेतान कामाय टुलो केऱ्या किरज्यो। पुण सातवे वोरीह बुयीह विहेवणे दिज्यो, ज्य यहोवाह आदार आपणेन केरता विहेवणेन खास दिह रेय, ताम नाहते तुमू तुमरो खेत पेरज्यो एने नाह तुमरा अंगुरान वाड़ी साटज्यो। तुमू ती कामायीन काटाय मा किरहो, जी कामाय काटणेन बाद तान तान उगेह, एने तुमरा ता अंगुरान वेलाम रेन अंगुर मा तुड़हो जान तुमू साटाय नाह किरेल सोता; काहाकाय ज्य बुयीन केरता विहेवणेन वोरीह रेय। पुण बुयीन विहेवणेन वोरीहवाली कामायी केरीन तुमूह, एने तुमरा पावोर पावेरन्युह, एने तुमरी हेऱ्या रेणारे मोंजर्या एने पाराया देसावालाह बी खाणो जुड़ी; एने तुमरा जेनवाराह एने देसाम जोला जीवजेन्तु रेती, तान बी चारो बुयीन आखी कामायी केरीन एय।”
आजादीन वोरह्यो
सात विहेवणेन वोरीह, मतलब तुमू हात वोरह्यान सातु टोलाह गेणज्यो, सातु विहेवणेन वोरह्यान ज्यो टेम चालीह ने नोव वोरह्या रेय। तेवी सातवा मोयनान दोहवे दिह्याह, मतलब पाप डापणेन दिह, जय जयकारान मोटला सोबदान बिरो तुमरा आखा देसाम आखी जागे फुकाड़ज्यो। एने तुमू पाचाहवे वोरह्याह चोखालो वोरह्यो मानज्यो, एने तुमरा देसाम रेणारे आखा माणहान केरता आजादीन पारचार किरज्यो; ज्या वोरह्याह तुमरी न्या आजादीन वोरीह केवाय जाय, तुमरे माय रेन आखाह तान तान खेत आपाय जाय; एने तुमरे कुटूमाम जात रिहो। पाचाहवो वोरीह तुमरी केरता आजादीन तिवारान वोरीह रेय; ती वोरीह तुमू मा पेरहो, एने जी कामाय आप आप उगी तीह बी मा काटहो, एने बिगेर साटेल अंगुराह वेलाम रेन अंगुर मा तुड़हो। काहाकाय तो जो आजादीन वोरीह रेय; तो तुमरी केरता चोखो रेय; तुमू तान कामाय खेताम रेस ने लेन खाज्यो।
ज्या आजादीन वोरह्याम एकेक माणहाह तान खेत पोशा जुड़ जाय। एने एगदा माणहाह तान जागो वेचणे माय मा ठेगहो, एने जेवी तुमू ता फाय रेन जागो लिहो, तेवी ताह तुमूह मा ठेगणे दिहो। आजादीन वोरह्यान बाद जोला वोरह्या वितेल एती, तान गेणती केरीन किमोत ठेरावीन एका दिहरा फाय रेन वेचाता लिज्यो, एने वोरह्यान कामायीन गेत तो तार आथाम वेची। जोला वोरह्या उंजु रेती, तोलीस किमोत वोदाड़ज्यो, काहाकाय वोरह्यान कामायीन गेणती गेटाड़ज्यो, काहाकाय वोरह्यान कामायीन गेणती जोली एय, तोलीस तो तार आथाम वेची। तुमू तुमरा बाय बांडलाह ठेगहो मा; तुमू तुमरा बोगवानान बिय मानज्यो; मी तुमरो बोगवान यहोवा हे।
सातवा वोरह्यान तेकलीत
तानकेरता तुमू मारा नेमाह एने विद्युह मानज्यो एने तान पालेन किरज्यो, इह केरीन किरहो, ताहार तुमू तुमरा देसाम हाजे हुके रिहो। बुय तुमरी केरता हाजी कामाय उगाड्या केरी, एने तुमू पेट बोरीन खाया किरहो, एने तुमू तुमरा देसाम हाजे हुके रिहो।
पुण केदी तुमू ज्य किहो, केदी आपु बियारो नाय पेरहु नाहते आपणी कामाय एकठी नाय केरहु, ताहार सातवे वोरीह आपणी केरता खाणेन केरता कायच बी नाय रेय? चिन्ता मा किरो, मी तुमूह सोव्वा वोरह्याम ओहली बोरकेत आपुह, काय बुय ने कामाय तीन वोरह्या वोर पुरी। तुमू आठवा वोरह्याम पेरहो, एने जुनाली कामायीम रेन खाते रिहो, एने नोव्वा वोरह्यान कामाय जाह वोर नाय जुड़ी, ताह वोर तुमू जुनाली कामायीम रेन खाते रिहो।
बुयीन मालदेन सोड़ेवणेन नेम
बुय कायेम ने केरता वेचाय नाय जाय, काहाकाय बुय मारी हे; एने तुमू देरती पोर निसता दिहरा देसावाला एने पारवासीन वेहा माय रेणे बाजरेनाह। पुण तुमू तुमरा आदिकारान आखी बुयीम रेन तुमू बुयीह सोड़ीव लिज्यो।
केदी तारो एगदो बायबांडलो गेरीब एन तान सोतान बुयीम रेन थोड़ीक वेच देय, ताहार तान आहेंल्या गेरल्या आवी एने तान गेरल्यान केरता विचेल बुयीह सोड़ीव लेय, केदी एगदा माणहान केरता कुण सोड़ेवणार निह एय, एने ता फाय ओला पोयशा एती काय सोतास तान ईसाह सोड़ीव सेकी, ते तो बुयीन वेचणेन टेम रेन वोरह्याह गेणीन वोरह्यान कामायीन किमोत ताह, जो बुयीह वेचातो लिदो एय, आप देय; तेवी बुय पोशी तान एय जाय। पुण केदी तो माणुह तानकेरता बुयीह पोशो सोड़ेवणेन केरता पुरा पोयशा निह एती काय तीह पोशो तान केर सेकी, ताहार तान विचेल बुय आजादीन वोरीह वोर वेचातो लेणारान आथाम रेय; एने आजादीन वोरह्याम सुट जाय तेवी तो माणुह तान सोतान बुयीन पोशो आदिकारी एय जाय।
केदी इखेह माणुह बितड़ा वाला गावाम तान गेर वेचेह, ताहार गेर वेचाणेन बाद एक वोरीह वोर ताह पोशो लेणेन आदिकार रेय, गेराह पोशो लेणेन तान आदिकार एक वोरीह वोर रेय। पुण केदी गेरान मालीक वोरीह बोर माय गेर नाय सोड़वे, ताहार तो गेर जो बितड़ा वाला गावाम एय वेचातो लेणारान एने पिढीन पिढ़ी माय तास ने वोचीन बोण जाय; एने आजादीन वोरीह माय बी नाय सुटे। पुण बिगेर बितड़ान गावान गेरे ते देसान खेतान गेत गेणाय जाती; ताह सोड़ेवणेन बी एय सेकी, एने ता आजादीन वोरह्याम सुट जाती। पुण लेवीन गावान बाराम जा गावे लेवीन सोतान हेते, ताम ता तान गेराह काल्ले बी टेम पोशा सोड़ीव सेकतेह। एने केदी इखेह लेवी तान ईसो नाय सोड़वी, ते तो विचेल गेर जो तान ईसान गावाम एय आजादीन वोरह्याम लेवीन एय जाय, काहाकाय इस्राएल ने माणहान विचीम लेवीन ईसो तान गावाम ता गेरेच हेते। पुण लेवी गावान कावदेन खेत एने चारो वेचाय नाह सेकते, ता खेते कायेम ने केरता लेवीन हेते।
गेरब्याह उदार आपणो
ओवतो केदी तारो इखेह बायबांडलो गेरीब एय जाय, एने तान देशा तार सामने किवीन लायकी एय जाय, ताहार तु ताह होमालज्ये; एने ताह बाहख एने पावणान गेत मिलज्ये। ताह आपेल तारा केर्जा पोर वियाज मा लेहे; तुमरा बोगवानान बिय मानज्ये, जान वोजेसे तारो बायबांडलो तार हिऱ्यो जिवतालो रेय सिके। ताह वियाज पोर पोयशा उदार मा आपहो, एने जो खाणो तो खाय, ता पोर इखेह फायदो लेणेन कोसीत मा किरो। मी तुमरो बोगवान यहोवा हे; मी तुमूह कनान देस आपणेन केरता एने तुमरो बोगवान बोणनेन केरता तुमूह मिस्र देसाम रेन निकाल लायेल हे।
गुलामाह सोड़ेवणेन नेम
ओवतो केदी तारो इखेह बायबांडलो तार सामने गेरीब एन सोताह तार आथाम वेच देय, ताहार ता हेऱ्या पावरान गेत चाकरी मा केरावहो। तो तार हेऱ्यो मोजुर नाहते एक पावणान गेत रेय, एने आजादीन वोरीह वोर तार हिऱ्यो रिन सेवा किरते रेय। तेवी तो सोरा बेल तार फाय रेन निकील जाय, एने तान कुटूमा माय एने तान डायडायान खास जागाम जात रेय। काहाकाय ता मारास सेवक हेते, मी ताह मिस्रीन गुलामीम रेन सोड़वीन मिस्र देसाम रेन निकाल लायेल हे; केरीन ता गुलामान गेत वेचाय नाय जाय। तुमू ओहला माणहा पोर काठोपोणा से आदिकार मा चालाड़हो; तुमू तुमरा बोगवानान बिय मानज्यो। तुमरा जा पावोर पावेरन्यु रेती ता तुमरे कावदेन देसाम रेन रेय, एने पावोर पावेरन्युह तास माय रेन रेय। जा माणहे तुमरी विचीम पाराया बोणीन रेती, ताम रेन एने तान कुटूमाम रेन बी जा तुमरे आहने पाहने एती, एने जा तुमरा देसाम पायदा इयेल हेते, ताम रेन तुमू पावोर एने पावेरनी लेय लिवो; एने ता तुमरो ईसो ठेराती। तुमू ज्या पाराया देसान पावराह तुमरा सोराह बी आप सेकतेह, जा तुमूह मोरनेन बाद तुमरा सोरान रेती, ता कायेम ने केरता तुमरा पावोर रेती, पुण तुमरा बायबांडला जा इस्राएली हेते ता पोर तुमरो आदिकार काठोपोणा से मा चालाड़हो।
ओवतो केदी तार सामने इखेह पाराया देसावालो मालदार एय जाय, एने तान सामने तारो बाहख गेरीब एन सोताह, तार सामने ता पाराया देसावाला नाहते तान वोचीन आथाम वेच देय, ताहार ताह वेचाणेन बाद तो पोशो सोड़ावाय जाय सिकेह; तान बायह्याख माय रेन एगदो ताह सोड़ीव सिकेह, नाहते तान काकोख, नाहते निवत्र्यो बाहख, नाहते तान गेराणान कुण बी आहेंल्यो गेरल्यो ताह सोड़ीव सिकेह; नाहते केदी तो मालदार एय जाय, ताहार तो सोतास ताह सोड़ीव सिकेह। तो ताह वेचातो लेणारा हिऱ्यो ताह वेचणेन वोरीह रेन आजादीन वोरीह वोर ईसाब केरी, एने ताह वेचणेन किमोत वोरह्यान गेणतीन गेत रेय, मतलब ती किमोत मोजुर ने दिह्यान गेत ता हेऱ्यो एय। केदी आजादीन वोरह्यान पेल जुलूम वोरह्या रेय जाती, ताहार जोला पोयशा केरीन तो लेवानो एय, ताम रेन तो तान सोड़वणेन किमोत तोलाक वोरह्यान आप देय। केदी आजादीन वोरीह वोर थोड़ास वोरह्या रेना एती, तीबी तो तान मालीक हिऱ्यो ईसाब केरीन सोताह, सोड़ेवणेन किमोत तोलास वोरह्यान नुसार आप देय। पुण तो माणुह देर वोरीह तान मालीक हिऱ्यो मोजुर ने गेत रेय, एने ता माणहा पोर काठोपोणा से मालीक ने आदिकार मा केरने दिवो। एने केदी तो माणुह एगदान द्वारा सोड़वाय नाय जाय, ताहार तो आजादीन वोरह्या माय तान सोरा बेल सुट जाय। काहाकाय इस्राएल ने माणहे मारास पावोर हेते; ता मारा सेवक हेते, मी मिस्रीन गुलामीम रेन ताह सोड़व्यो, मी तुमरो बोगवान यहोवा हे।
Source notes (1)
- Cross-reference व्यवस्था 23:10-11
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.