Nahali Bible
लेव्य 24
चोखाला दिवाह हिंगारनो
(निर्गमन 27:20-21)
ओवतो यहोवा मुसाह केयो, इस्राएल ने माणहाह ज्यो उकुम आप काय मार फाय उजालो केरनेन केरता कुटिन निकालेल हाजालो तेल लियावज्यो काय दिवो कायेम पेटाते रेय। हारून यहोवान मिलापवाला तोम्बुम गोवाय पोत्रान विचीवाला पोरदान बाहेर यहोवान सामने, कायेम हांज पोर रेन ते वेगोस वोर हेलगाड़ीन मेली; ज्यो नेम तुमरी पिढीन पिढ़ी केरता ठेराय। हारून दिवान हाजाला दिवट1 पोर यहोवान सामने दिवाह कायेम हेलेगताला मेली।
बेटीन रोटा
“तु मोयदा लेन बारा रोटा रांदज्ये, एक एक रूटो दुय किलो मोयदान बाणावाय जाय। तेवी तान दुय रांग बाणावीन, एक एक रांग सोव सोव रोटा, हाजाला होनान बागड़ा पोर यहोवान सामने मिलज्यो। एने एक एक रांग पोर चोखाला हालयान ढिक मिलज्यो काय तो रूटो यहोवाह एर केरावणेन वोस्तु एने बोली रेय। देर विहेवणे दिह हारून रोटाह यहोवान सामने आरी माय मेली, इस्राएल ने माणहा हेऱ्यी ज्यी वाचा कायेम बोणीन रेय। एने ता हारून एने तान सोरान रेती, ता रोटाह चोखाला जागाम खाय, काहाकाय ता रोटा यहोवाह आक्ठान द्वारा चेड़ायेल बेटीम रेन हेते; ता रोटा हारून ने केरता कायेम चोखी बेट रेय।”
नियाव से निषपक्ष डेन्ड
ता दिह्याम एक इस्राएली बायकुन बिटोख इतो, तान आबोख मिस्र देसाम रेणार इतो; तो इस्राएली माणहान विचीम जात रिनो, तो इस्राएली बायकुन बिटोख एने एक इस्राएली एदमी पाड़ावाम आपसाम लेड़ाणे बाज गीया, एने तो इस्राएली बायकुन बिटोख यहोवान नावान चिहटा केरीन हाराप आपणे बाज गीयो। ज्य होमलीन माणहे ताह मुसा फाय ली गीया, तान आईख ने नाव शलोमीत एतो, जी दानान कुटूमान दिब्रीन बेटीख एती। माणहे सोराह जेलीम कोंड्या, जाकेरीन यहोवान उकुमा से ज्यी वातु पोर विचार केराय जाय।
तेवी यहोवा मुसाह केयो, “तुमू ता हाराप देणाराह पाड़ावान बाहेर ली जावो; एने जोला बी चिहटा होमलेल एती, ता आखा आप आपणा आथ तान मुंडी पोर मेली, तेवी आखी मोंडलीन माणहे ताह देगड़ाठे। एने तु इस्राएल ने माणहाह के काय, केदी इखेह माणुह तान बोगवानाह हाराप देथे, ताहार ताह तान पापान डेन्ड वेठणे पोड़ी। यहोवान नावान चिहटा केरनार जोरेवरी माराय जाय, एने ताह आखी मोंडली देगड़ाठे; केदी तो देसावालो एय नाहते पारायो एय, केदी इखेह माणुह यहोवान नावान चिहटा केरी, ताहार तो माराय जाय।”
“एने केदी इखेह माणुह एगदा दिहरा माणहाह मार टाकेह, ताहार तो जोरेवरी माराय जाय। केदी इखेह माणुह एगदा पालन्या जेनवाराह मार टाकेह, तो ताह बोर देय, मतलब जीवान बोदले जीव।”
“ओवतो केदी इखेह माणुह एगदा दिहरा माणहाह दुख पोचाड़ी, ताहार जिह केरीन तो किरेल एय, तिहेच केरीन ता हेऱ्यो बी केराय जाय, मतलब आड़ तोड़नेन बोदले आड़ तोड़ाय जाय, डोलान बोदले डोला, दातान बोदले दात, जोहलो दुख जो बी एगदाह पोचाड़ेल एय, तिहेच केरीन ताह बी पोचाड़ाय जाय। जेनवाराह जो मार टाकेह तो ताह बोर देय, पुण माणहाह जो मार टाकेह, तो जोरेवरी माराय जाय। तुमरो नेम एकुस रेय, जोहलो देसावालान केरता, तिहेच केरीन पारायान केरता बी रेय, काहाकाय मी तुमरो बोगवान यहोवा हे।” तेवी मुसो इस्राएल ने माणहाह ज्य सोमजाड्यो; तेवी तो ता हाराप देराणा माणहाह पाड़ावान बाहेर ली जायीन ताह देगड़ाठ्या। एने इस्राएल ने माणहे तिहेच केरीन केऱ्या, जिह केरीन यहोवा मुसाह उकुम आपेल इतो।
Source notes (1)
- Footnote दिवट दिवो मेलनेन जागो, नाहते कोठी
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.