Nahali Bible
लेव्य 26
उकुम मान्नेन बोरकेत
(व्यवस्था 7:12-24; 28:1-14)
तुमू तुमरी केरता मुरती मा बाणावहो, एने एगदी गिड़ेल मुरती नाहते तुमरी केरता एगदो दिगोड़ मा उबराखाड़हो, एने तुमरा देसाम पुजा केरनेन केरता देगड़ान मुरती मा बाणावहो; काहाकाय मी तुमरो बोगवान यहोवा हे। तुमू मारा विहेवणेन दिह्याह पालेन किरज्यो एने मारा चोखाला जागान आदार किरज्यो; मी यहोवा हे।
केदी तुमू मारा नेमा पोर चालहो एने मारा उकुमाह मानीन तान पालेन किरहो, ताहार मी तुमरी केरता टेमा टेमा पोर पाणी पाडुह, खेत कामाय पाकाड़ी एने बुय ने जाड़े फोल्या केरती; तुमरी कामाय निकालनेन काम ताह वोर चाली, जाह वोर अंगुर एकठा केरनेन टेम आवी एने अंगुर एकठा केरनेन ताह वोर चाली, जाह वोर पेरनेन टेम आवी, तेवी तुमरी फाय खाणेन केरता जुलूम रेय, एने तुमू तुमरा देसाम हाजे हुके रिहो। मी तुमरा देसाम सान्ती आपुह, एने तुमू सान्ती से हुवहो एने कुण तुमूह बिवाड़ने नाय आवी; एने मी ता देसाम जीव लेण्या जेनवेराह रेणे नाय देव, एने तुमरा देसा माय तालवार नाय चाली। एने तुमू तुमरा दुसमोनाह दितेन नाहाड़ देह, एने ता तुमरी तालवार केरीन माराय जाती। तुमरे माय रेन पाच माणहे होव माणहाह एने होव माणहे दोह एजार माणहाह नाहाड़ती; एने तुमू तुमरा दुसमोनाह आरेवहो एने ताह तालवार केरीन मार टाकहो। एने मी तुमरी उगे किव केरूह एने तुमूह होवटाला सोरावाला बाणावुह, एने तुमरी हिऱ्यो मार वायदाह मोजबुत केरूह। एने तुमू मेलीन जुनाला दाणाह खाहो, एने नोवालो रेय तीबी जुनाला दाणाह जुगारने पोड़ी। एने मी तुमरे विचीम मारो रेण्यो जागो बाणावीन मेलुह, एने मी तुमूह रेन आलेग नाय एव। एने मी तुमरी विचीम चालुह एने तुमरो बोगवान रेह, एने तुमू मारा माणहे रिहो। मी ते तुमरो बोगवान यहोवा हे, तुमू मिस्र देसाम गुलाम एता, पुण मी तुमूह मिस्र देसाम रेन निकाल लावो; पुण मी तुमरा खांदान जुवालाह तोड़ जुगार्यो, एने मी तुमूह पोशो गर्व से चालनारे बाणायो।
उकुम नाह मान्नेन डेन्ड
(व्यवस्था 28:15-68)
“केदी तुमू मारे नाय होमेलहो, एने ज्या आखा उकुमाह नाय मानहो, एने मारी विदीह खाराब जाणहो, एने तुमरी आत्मा मार नेमाह नफरत किरे, एने तुमू मारा आखा उकुमान पालेन नाय किरहो, ताहार तुमू मारी वाचाह तोड़ दियेल हेते। ताहार मी तुमरी हिऱ्यो ज्य केरूह; मतलब मी तुमूह गाबरावुह, एने जुलूम मोठो रोग एने हेऱ्या माय दुखाऱ्यो केरूह, एने न्यान वोजेसे तुमरा डोला जीन्वाल्लाह एय जाती, एने तुमरो मोन जुलूम नाराज एय। एने तुमरो बियारो पेरनो कामान नाय रेय काहाकाय तुमरा दुसमोन ती कामाय खाय जाती; एने मी बी तुमरी विरूद एय जाह, एने तुमू तुमरा दुसमोनाह रेन आरवाय जाहो; एने तुमरा दुसमोन तुमरी उपेर आदिकार चालाड़ती, एने जेवी इखेह तुमूह दोवड़ावी बी नाय तीबी तुमू नाहहो।
“केदी तुमू ज्यु वातुन बाद बी मारो उकुम पालेन नाह केरतेह, ताहार मी तुमरा पापान केरता सात गुणा वोदार डेन्ड आपुह। एने मी तुमरी ताकेतीन गोमेंड तोड़ देह, एने तुमरी केरता जुगाह लोड़ान गेत एने बुयीह पितलान गेत बाणाव देह एने पाणी नाय पोड़ी। तुमू केठीण मेहनेत किरहो, पुण ज्य केरीन काय बी फायदो नाय एय, तुमरो खेत कामाय नाय उगाड़ी एने बुय ने जाड़ा पोर फोल नाय लागती।”
केदी तुमू मारे विरूद चालतेस रिहो, एने मारो केणो नाय मानो, ताहार मी तुमरा पापान गेत तुमरी पोर उंजु सात गुणा तेकलीत टाकुह। एने मी तुमरी विचीम जेंगली जेनवाराह मोकलुह, ता तुमरा सोराह तुमरी फाय रेन सांडाड़ ली जाती, एने तुमरा पालन्या जेनवाराह खेतेम केर देती, एने तुमरी गेणती गेटाड़ती, जाकेरीन तुमरी सेड़क्यु हुनाल्यु पोड़ जाती।
ओवता केदी तुमू न्यु वातु पोर बी मारी हिकवोणी केरीन नाय हुदेरहो, एने मार विरूद चालतेस रिहो, ताहार मी तुमरी विरूद चालुह, एने मी यहोवा, तुमरा पापान केरता तुमूह सात गुणा डेन्ड आपुह। तुमू मारी वाचाह तुड़ेल हेते, केरीन मी तुमूह डेन्ड आपुह, मी तुमरी विरूद सेना मोकलुह; तुमू वोचणेन केरता तुमरा गावाम जाहो, पुण मी ओहलो केरूह काय तुमरे माय बेमारी पोसरी, तेवी तुमरा दुसमोन तुमूह आरेवती। जेवी मी तुमरी केरता एनान आदाराह सेटो केर देह, तेवी दोह बायकु तुमरा रोटा एकुस चुलाम रांदीन तोल तोलीन वाट देती; एने तुमू खाएन बी आफेरहो नाय।
“ओवता केदी तुमू ज्यान बाद बी मारे नाय होमेलहो, एने मारे विरूद चालतेस रिहो, ताहार मी मारा नियावा माय तुमरे विरूद चालुह, एने तुमरा पापान केरता सात गुणा डेन्ड आपुह। एने तुमूह तुमरा बेटा एने बेटीख ने माह खाणे पोड़ी। एने मी तुमरा पुजान उचाला जागाह खेतेम केर देह, एने मी तुमरी हाजाली गेंदीन आक्ठान वेदीह तोड़ देह, एने तुमरा देड़ाह तुमरी तुड़ेल मुरती पोर टाक देह; एने तुमू माहु जुलूम खाराब लागहो। एने मी तुमरा गावाह उजाड़ देह, एने तुमरा चोखाला जागाह उजाड़ देह, एने तुमरी बेटीन हाजाली गेंदिह स्वीकार नाय केरू। एने मी तुमरा देसाह हुनालो केर देह, एने तुमरा दुसमोन जा ताम रेतेह ता ज्यु वातुन वोजेसे बोंगलाती। एने मी तुमूह बात बातीन देसाम वेरासेर केर देह, मी मारी तालवार खेचुह एने तुमूह खेतेम केरूह, एने तुमरो देस हुनालो एय जाय, एने तुमरा गाव उजाड़ एय जाती। तेवी जोला दिह तो देस हुनालो पुड़ेल रेय एने तुमू तुमरा दुसमोनान देसाम रिहो, तोलाक दिह तो तान विहेवणेन टेमाह मानते रेय, तेवीस तो देस विहवी, मतलब विहेवणेन टेम मानते रेय। जोला दिह तो हुनालो पोड़ रेय, तोलास दिह तो आराम केरी, मतलब जो आराम ताह तुमू ता रेणेन बुखेत तुमरे विहेवणेन टेमाम निह जुड़नो एय, तो ताह तेवी जुड़ी।”
एने तुमरे माय जा माणहे वोचेल रेती, ता तान दुसमोनान देसाम तान ईमोत गोवाड़ देती, ता आखी चिजी से बिती, ता वाराम उड़ताला पानटान गेत कावदेन नाहती, ता ओहला नाहती जीहे इखेह तालवार लेन तान पासाण पोड़ रेनोह। जेवी इखेह तान पासाण केरनार निह एय तीबी सोमजो तालवारीह बिन ता एका दिहरा हेऱ्या रेन ठोकेर खाएन पोड़ते जाती, एने तुमूह तुमरा दुसमोनान सामने उब रेणेन कायच ताकेत नाय रेय। तेवी तुमू देस देसान विचीम पोचीन खेतेम एय जाहो, एने तुमू दुसमोनान देसाम आरताय जाहो। इह केरीन तुमरा सोरा तुमरा दुसमोनान देसाम तान पापाम सेड़ती, एने तान डायडायान गुनान वोजेसे ता तिहेच केरीन सेड़ती जिह केरीन तान डायडाया सेड़ेल।
“पुण केदी ता तान एने तान डायडायान गुनाह मान लेती, एने माने काय ता मारे विरूद इयेल एता, एने ता ज्य बी माने काय आमु यहोवान विरूद पाप किरेल हेते, तानकेरता ता माने काय मी तान विरूद ईनो एने ताह तान दुसमोनान देसाम लावो, केदी ता माणहे तान काठो मोन नम्र एय जाय एने तान पापान केरता डेन्ड स्वीकार केरती; तेवी जी वाचा मी याकुबा हिऱ्यो बांदेल इतो, तीह मी एर केरूह एने जी वाचा मी इसाहाक हिऱ्यो एने जी वाचा मी अब्राहाम हिऱ्यो बांदेल इतो, तीह बी एर केरूह। देस हुनालो रेय, देस विहेवणेन टेमान खुसी मोणावी, तेवी तुमरा वोचेल माणहे तान पापान केरता डेन्ड स्वीकार केरती, ता हिकती काय ताह ज्यानकेरता डेन्ड जुड़नो काय ता मारा नेमाह नाह मान्या, एने मारा उकुमान पालेन नाह किरेल एता, एने तान जीवाह मारी विदी से नफरत एती। ओलो एणेन बाद बी, जेवी ता तान दुसमोनान देसाम बी रेती; मी ताह इह केरीन नाय सोडु, एने मी ता हिऱ्यो मारी ओहली नफरत नाय केरू काय ताह खेतेम केर देव, एने मारी ती वाचाह तोड़ देव; जी मी ता हिऱ्यो बांदिल इतो, काहाकाय मी तान बोगवान यहोवा हे! पुण मी तान हाजान केरता तान डायडाया हेऱ्यी बांदिल वाचाह एर केरूह; जाह मी दिहरी जातीन डोलान सामने मिस्र देसाम रेन निकालीन लावो काय मी तान बोगवान ठेराव; मी यहोवा हे।”
ज्यु विद्यु एने नेम एने कायदो यहोवा तान उगे रेन इस्राएल ने माणहान केरता सीने बोयड़ा पोर मुसान द्वारा ठेरायेल इतो, ता ज्यास हेते।
Source notes (1)
- Cross-reference लेव्यवस्था 19:4; निर्गमन 20:4; व्यवस्था 5:8; 16:21-22; 27:1
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.