Nahali Bible
यहोशु 8
आई गावा पोर ताबो एने खेतेम केरने
तेवी बोगवान यहोशुह केयो, “मा बिय, ईमोत मा सोड़ो, तुमरा आखा सिपायाह आई गावा माय ली जा; मी आईन राजाह आरेवणे माय तुमरी मोदेक केरूह। मी तान माणहाह, एने तान हेयराह एने तान देसा बेल तार ताबाम केर दिनोह। एने जीहे तु यरीहो एने तान राजा हिऱ्यो किरेल तिहेच केरीन आय गाव एने तान राजा हिऱ्यो बी किरज्ये; फोक्ता तुमू जेनवारा बेल तान लुट ते तुमरी केरता लेय सिकहो; केरीन तुमू तुमरा थोड़ाक एदम्याह हेयरान पासाण लिकणेन उकुम आपो।”
केरीन यहोशु तान पुरी सेना बेल आय पोर चेड़ाय केरनेन तियारी किऱ्यो; एने यहोशु हाजाला तीस एजार सिपाय निवाड़ीन रातीस उकुम आपीन मोकल्यो। एने ताह उकुम आप्यो, “हुमलो, तुमू हेयरान पासाणले उगे जायीन चेड़ाय केरनेन केरता लिकाय रिज्यो; हेयराह रेन जुलूम सेटा मा जाहो, एने आखान आखा तियार रिज्यो; एने मी मारा आखा हाती हिऱ्यो ता हेयरान आहने जाह। एने जेवी ता पेलुन गेत आमरी पोर चेड़ाय केरनेन आवती, तेवी आमु तान सामने रेन दोवेड़ने बाज जाहु; तेवी ता ज्य सोचीन काय ता पेलुन गेत आपणे सामने रेन नाहणे बाजरेनाह, आमरी पासाण पोड़ती; इहकेरीन आमु तान सामने रेन नाहीन ताह हेयराम रेन सेटा निकाल ली जाहु; तेवी तुमू तुमरे लिकणेन जागे रेन उठीन गावाह तुमरे आदिकार माय केर लिज्यो; काहाकाय तुमरो बोगवान यहोवा ताह तुमरा आथाम केर देय। एने जेवी हेयराह तुमरे ताबाम केर लिहो, ताहार हेयराम आक्ठो लागाड़ दिज्यो, तुमू बोगवानान वचनान गेत इहीच केरीन किरज्यो; मी तुमूह उकुम आपेल हे।” तेवी यहोशु ता सेनिकाह तान लिकणेन जागा पोर मोकील दिनो एने वाट जोवणे बाज गीयो, ता बेतेला निही आईन विचीवालो एक जागे गीया, ज्यो जागो आईन पश्चिम माय इतो।
यहोशु वेगोस उठीन माणहाह एकठा किऱ्यो, एने इस्राएल ने मुखी सिपाया हिऱ्यो ओंगाण ओंगाण आई हेयरान उगे निकल्या। यहोशुन आखा सिपाय आई हेयरा पोर चेड़ाय केऱ्या, एने आई हेयरान आहने पोचीन तान सामने उत्तर उगे पाड़ावो टाक देना, तान एने आईन विचीम एक खोय एती। तेवी यहोशु कोमीत कोमी पाच एजार सेनिकाह निवाड़ीन बेतेल एने आईन विचीम हेयरान पश्चिम उगे लिकणेन केरता मोकील दिनो। इहकेरीन यहोशु सेनिकाह लेड़ाय ने केरता तियार किरेल इतो, मुखी पाड़ावो हेयरान उत्तर माय इतो; दिहरा सिपाय पश्चिम माय लिक रियेल एता, तेवी यहोशु तीस राती खोयरान विचीम रात निकाल्यो। जेवी आईन राजा ज्य देख्यो, तेवी तो एने तान हेयरावाला आखा माणहे वेगास उतवाल्याह उठीन इस्राएल ने सिपाया हिऱ्यो लेड़ानेन केरता यरदन मोयदाना उगे जो अराबान सामने हे गीया। पुण ताह मालुम नाह एतो काय हेयरान पासाण माणहे लेड़ाणेन केरता लिक रेनाह। तेवी यहोशु एने आखा इस्राएली ताह रेन आरवाय गीयाह, ज्य बाहानो केरीन उजाड़ीन वाट देरीन नाहणे बाज गीया। तेवी हेयरान आखा माणहे इस्राएलीन पासाण पोड़नेन केरता आयड़ीन हादाय गीया; एने ता यहोशुन पासाण पुड़ते लेन हेयराह रेन सेटा निकील गीया। एने आई हेयरा माय एने बेतेल हेयरा माय काल्लोस एदमी नाह रिनो, जो इस्राएली माणहान पासाण पोड़ने नाह गीयो एय; ता हेयराह हुनालो सोड़ीन इस्राएलीन पासाण पोड़ना।
तेवी यहोवा यहोशुह केयो, “तारा आथावालो बोरशो आई हेयरान उगे केर; काहाकाय मी ताह तार आथाम केर देह।” एने यहोशु तान आथावालो बोरशाह हेयरान उगे किऱ्यो। यहोशुन आथ ओंगाण केरतास जा माणहे लेड़ाणेन केरता लिक रियेल एता, ता उतवाल्याह तान जागे रेन उठना; एने दोवड़ीन हेयराम रिगना एने ताह तान आदिकार माय केर लेदा; एने चालोस हेयराम आक्ठो लागाड़ देना। जेवी आई हेयरान एदमी पासाण फिरीन देख्या, काय हेयरान दुवाड़ो जुगाम जातालो ताह देखानो, तेवी ताह नाह ओरो नाहणेन ताकेत रेनी, एने नाह पोरो नाहणेन, एने जा माणहे जेंगला निही नाहताला ता फिरीन तान पासाण पोड़नारा पोर टुट पोड़ना। जेवी यहोशु एने तान सिपाय देख्या काय तान सेना हेयरा पोर आदिकार केर लियेल हेते, तान हेयराम रेन दुवाड़ो उपेर जातालो देख्या; तुलबुखे ता दोवेड़ने बोंद केर देना, एने पासाण फिरीन आई हेयरान एदम्याह मारने बाज गीया। तेवी ता सिपाय जा लिकायेल एता, लेड़ाय केरनेन केरता हेयराम रेन बाहेर निकील आवा; आई हेयरान सेनिकान ओंगाण एने पासाण इस्राएल ने सिपाय एता, आईन सिपाय फोस जायेल एता, इस्राएल ताह आरीव देना, ता ताह वोर लेड़ाते रेना जाह वोर आईन एक बी एदमी जीवतालो नाह रिनो, ताम रेन कुण नाहीन गीयो नाह। एने आई हेयरान राजाह ता जीवतालो देरीन यहोशु फाय लेन आवा।
एने जेवी इस्राएली आईन आखा माणहाह चोवगानाम, मतलब ता जेंगलाम जाहरी ता तान पासाण पुड़ेल एता, मारनेन काम पुरो केऱ्या, एने ता आखान आखा तालवार केरीन माराय गीया; तेवी इस्राएल ने आखा सिपाय आई हेयराम वोलीन आवा, तेवी सिपाय ता माणहाह जा हेयराम जीवताला एता, मार देना। एने बायकु एदमी, आखा मिलीन जा ते दिह माराय जायेल ता बारा एजार एता, एने आई हेयरान आखा बायकु एदमी ओलास एता। काहाकाय जाह वोर यहोशु आई हेयरान माणहाह खेतेम नाह केर दिनो ताह वोर तो तान आथ, जा केरीन बोरशो ओंगाण किरेल इतो, पोशो पासाण नाह किऱ्यो। बोगवानान ता उकुमान गेत जो तो यहोशुह आपेल इतो, इस्राएली ता हेयरावाला पालन्या जेनवार सोब हेयरान लुट सोतान केरता लेय लेदा। तेवी यहोशु आई हेयराह हेलगाड़ दिनो, तो हियोर हुनाला देगड़ान डिग बोण गीयो; जो आज बी उजाडुस हे। यहोशु आईन राजाह एक जाड़ा पोर फासी लागाड़ीन टांग दिनो, तो ताह हांज पोर वोर जाड़ा पोर टांग मिल्यो; एने दिह बुड़ता बुड़ता यहोशुन उकुम से तान देड़ जाड़ा पोर रेन उतारीन हेयरान फाटेक ने सामने जुगार देना, एने ता पोर देगड़ान मोटलो डिग वाल देना, जो आज वोर ताहरी हे।
एबाल बोयड़ा पोर नेम वाचीन होमलाड़ ने
तेवी यहोशु इस्राएल ने बोगवान यहोवान केरता एबाल बोयड़ा पोर एक वेदी बाणायो, 2 जिहकेरीन बोगवानान सेवक मुसो इस्राएल ने माणहाह कियेल इतो काय वेदी किहीक बाणावी, केरीन यहोशु वेदीह तिहेच केरीन बाणायो जीह केरीन मुसान नेमान पुस्तेक माय सोमजाड़ेल एतो काय, वेदी बिगेर काटायेल देगड़ा केरीन बोणेल एती। ता देगड़ा पोर केदी एगदा आथ्यारान वापेर नाह इयेल, ता ती वेदी पोर बोगवानाह होमबोली एने मेल मिलाप बोली चेड़ाया। ता जागा पोर यहोशु मुसान नेमाह देगड़ा पोर तो ज्य इस्राएल ने आखा माणहाह देखणेन केरता किऱ्यो। एने ता काय देसावाला काय पाराया देसावाला, आखा इस्राएली तान डावाला माणहे, आदिकारी एने नियाव केरनारा बेल यहोवान वाचान पेटी विसणारे लेवीय चाकऱ्यान सामने ता पेटीन जीवड़े उगे एने डाखऱ्ये उगे उब रेना, मतलब थोड़ाक माणहे ते गिरीजीम बोयड़ान सामने एने थोड़ाक एबाल बोयड़ान सामने उब रेना, जीह केरीन यहोवान सेवक मुसा पेल उकुम आपेल इतो, काय इस्राएली माणहाह बोरकेत आपीन जाय। तान बाद यहोशु बोरकेत एने हारापान नेमान आखा वचन, जीहे-जीहे नेमान पुस्तेक माय लेखायेल हेते, तिहे-तिहे वास वाचीन होमलाड़ दिनो, जोल्युक वातुन मुसो उकुम आपेल इतो, ताम रेन काल्ली ओहली वात नाह रेय गियी जो यहोशु इस्राएल ने आखी सोबा, एने बायकु एने सोरा, एने ता हेऱ्या रेणारे दिहरा देसावाला माणहान सामने बी वाचीन होमलाड्यो।
Source notes (2)
- Cross-reference व्यवस्था 27:2-8
- Cross-reference निर्गमन 20:25
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.