Nahali Bible
यहोशु 7
आकानान पाप
पुण इस्राएल ने माणहे बेट केरनेन वोस्तुन बाराम बोगवानान बुहरो तोड़ देना; मतलब यहुदान वोचीन आकान, जो जेरह वोचीन जब्दीन बोतोरजोहख एने कर्मीन बिटोख इतो, तो बेट किरेल चिजीम रेन थोड़ोक लेय लिदो; केरीन इस्राएल ने माणहा पोर बोगवानान राग बोड़ेक उठनो।
जेवी ता यरीहोह आरवी देना, तेवी यहोशु थोड़ाक माणहाह आई नावान हेयरान आहने, जो बेतावेन रेन लागीन बेतेलान पुर्व निही, थोड़ाक माणहाह ज्य केन मोकल्यो, “जायीन देसान पुतो लागाड़ीन आवो।” एने ता माणहे जायीन आई गावान पुतो लागाड्या। बाद माय ता माणहे यहोशु फाय पोशा आवीन केया, “आखा माणहे ताहरी नाय जाय, फोक्ता दुय तीन एजार एदमी जायीन आई हेयराह जिक सेकतेह; आखा माणहाह ताहरी जाणेन तेकलीत मा आपी, काहाकाय ता थोड़ास हेते।” केरीन कोमीत कोमी तीन एजार एदमी ताहरी गीया; पुण आई हेयराम रेणारा माणहान सामने रेन ता नाहीन आवतरना। तेवी आई हेयराम रेणारे ताम रेन कोमीत कोमी सेत्तीस एदमी मार टाक्या, एने तान बायणे रेन ते देगड़ान बोयड़े वोर तान पासाण पोड़ीन वोर ताह मारते गीया; केरीन माणहान मोन पिगलीन पाण्यान गेत बोण गीयो।
तेवी यहोशु तान फाड़का फाड्यो, एने तो एने इस्राएल ने डायडाया माणहे बोगवानान पेटीन सामने बुय पोर हांज पोर वोर लोट रेना; एने ता आप आपणी मुंडी पोर रेजड़ो टाक्या। एने यहोशु केयो, “हाय, मालीक बोगवान, तु तारा न्या माणहाह यरदन नेदीन ज्यी पार काहा लियावो? काय आमुह एमोरी वोसीन ताबाम केरीन खेतेम केरनेन केरता ली आयेल हे? हाजो रेतो काय आमु खुस एन यरदन नेदीन ती पार रेय जाता! एय मालीक, इस्राएली तान दुसमोनाह डील देखाड़ेल हेते; एवी मी काय केव काहाकाय कनानी एने ज्या देसान आखा माणहे ज्य होमलीन आमुह कोंड लेती, एने आमरो नाव देरती पोर रेन मिटाड़ देती; ओवतो तु तारा मोटला नावान केरता काय किरहे?”
तेवी बोगवान यहोशुह केयो, “उबरी जावो! तुमू काहा बुय पोर पोड़ रेनाह? इस्राएल ने माणहे मार विरूद पाप किरेल हेते; एने जी वाचा मी ताह मार हिऱ्यो बांदाड़ेल इतो तीह ता तोड़ दियेल हेते, ता बेट केरनेन वोस्तु माय रेन लेय लेदा, एने चोरी बी किरेल हेते, एने ती चिज तान सोमानाम मेल लियेल हेते। केरीन इस्राएली माणहे तान दुसमोनान सामने टिकते नाह; ता तान दुसमोनाह डील देखाड़तेह, काहाकाय ता सोता बेट किरेल चिज बोण जायेल हेते। एने केदी तुमू तुमरे विचीम रेन बेट केरनेन वोस्तुह खेतेम केऱ्या सावाय, न्या रेन ओंगाण मी तुमरी हिऱ्यो रेव नाय।” उठ, माणहाह चोखो केर एने ताह के; “हेकालेन केरता तुमू सोताह चोखा केरीन मिलो;” काहाकाय इस्राएल ने बोगवान यहोवा ज्य किथे, “एय इस्राएल तार विचीम बेट केरनेन वोस्तु हे; केरीन जाह वोर तु बेट केरनेन वोस्तुह तुमरे विची माय रेन सेटी नाय केरी ताह वोर तु तारा दुसमोनान सामने टिकहे नाय। केरीन वेगास तुमू आखाह यहोवान सामने उबरेणे पोड़ी; एने जा कुटूमाह यहोवा देरी तो एक एक वोच आहने आवी; एने जी वोचीह यहोवा देरी ता कुटूम कुटूम आहने आवी; ओवतो जा कुटूमाह यहोवा देरी ता एक एक एदमी आहने आवी। तेवी जो एदमी बेट किरेल चिज मेल रियेल देराय जाय, तो एने जो काय तान एय आखो आक्ठाम टाकीन हेलगाड़ाय जाय; काहाकाय तो बोगवानान वाचाह तुड़ेल हे, एने इस्राएल माय खाराब काम किरेल हे।”
यहोशु उठ्यान विगोस उठीन इस्राएल ने आखा माणहाह बोगवानान सामने ली गीयो, आखा कुटूमे बोगवानान सामने उबरी गीया; तेवी यहुदान कुटूम देराय गीयो। तेवी यहोशु यहुदान कुटूमाह सामने लावो, तेवी जेरह वोचीन कुटूम देराय गीयो; ओवतो जेरह वोचीन कुटूमान एक एक एदम्याह सामने लावो, तेवी जब्दीन कुटूम देराय गीयो; तेवी यहोशु तान कुटूमान एक एक एदम्याह सामने लावो, तेवी यहुदान वोचीन आकान, जो जेरह वोचीन जब्दीन नातण्योक एने कर्मीन बिटोख इतो, देराय गीयो। तेवी यहोशु आकानाह केयो, “एय मारा बेटा, इस्राएल ने बोगवान यहोवान आदार केर, एने तान ओंगाण कबुल केर; एने जो काय तु किरेल हे तो माहु केय दे, एने माहु से काय मा लिकाड़े।”
आकान यहोशुह जापाप आप्यो, “खेरीच मी इस्राएल ने बोगवान यहोवान विरूद पाप किरेल हे, एने इहकेरीन मी किरेल हे, काय जेवी माहु लुटी माय शिनार देसान एक जुलूम हाजा फाड़का, एने दुय किलो चांदी, एने आदो किलो होनान एक ईटड़ो देखानो, तेवी मी तान लालेच केरीन ताह मेल लिदो; ता मारा तोम्बु माय बुयी माय गाड़ेल हेते, एने आखान बुंदे चांदी हे।”
तेवी यहोशु थोड़ाक माणहाह तोम्बु माय मोकल्यो, एने ता दोवड़ीन पोचना एने त्यु चिजुह तोम्बु माय गाड़ेल देख्या, एने आखान बुंदे चांदी हे। त्युह ता तोम्बुम रेन निकालीन यहोशु एने इस्राएल ने आखा माणहा फाय लावीन बोगवानान सामने मेल देना। तेवी यहोशु एने आखा माणहे जेरहान बिटोख आकानाह एने ता हेऱ्या ती चांदी एने फाड़का एने होनान ईटड़ाह, एने तान बेटा बेट्युह, एने तान बुयेल, गेदड़ा एने मेंड्रा बोकड्याह, एने तान तोम्बुह, एने जो काय तान एतो ता आखाह आकोर नावान गाटाम ली गीया। तेवी यहोशु आकानाह केयो, “तु आमुह काहा तेकलीत आपेल हे? आजीन दिह बोगवान तुवाह तेकलीत आपी।” तेवी आखा इस्राएली माणहे ताह देगड़ाठ्या; एने ताह आक्ठाम टाकीन हेलगाड्या, एने तान उपेर दिगोड़ टाक देना। एने ता तान उपेर देगड़ान मोटलो डिग लागाड़ देना जो आज वोर बोणेल हे; तेवी बोगवानान बोड़केल राग ओलाय गीयो।
केरीन ता जागान नाव आज वोर आकोर 1गाट पुड़ेल हे।
Source notes (1)
- Footnote आकोर दुख आपणार गाट
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.