Nahali Bible
यहोशु 3
इस्राएली माणहान यरदन नेदीह पार केरनो
यहोशु दिहरे दिह वेगोस उठनो, एने आखा इस्राएलीह आरही लेन शित्तीमाह सोड़ीन यरदन नेदीन देड़े आवा; एने ता पार केरनेन पेल यरदन नेदीन हेऱ्याच पाड़ावो टाक्या। तीन दिह्यान बाद डायला माणहे पाड़ावान विचीम जायीन एने माणहाह ज्यो उकुम आप्या, “जेवी तुमूह लेवी चाकऱ्यो यहोवा बोगवानान वाचान पेटी 1उखलीन देखाय, तेवी तुमरा जागाह सोड़ीन तान पासाण पासाण चालज्यो। पुण पेटीन एने तुमरे विचीम दुय एजार आथान कोमीत कोमी सेटो रेय; तुमू पेटीन आहने मा जाहो। काहाकाय तुमू देख सीको, काय काल्ली वाटे तुमूह चालनु हे, काहाकाय ज्यान पेल ज्यी वाटी पोर रेन तुमू केदी चाल्या नाह।”
उवतो यहोशु माणहाह केयो, “तुमू आपणे आपाह चोखा किरो; काहाकाय हेकाले बोगवान तुमरे विचीम चोमेत्कार किरन्यो हे।” बाद माय यहोशु चाकऱ्याह केयो, “वाचान पेटी उखलीन माणहान ओंगाण ओंगाण चालो।” तेवी ता वाचान पेटी उखलीन ओंगाण ओंगाण चालना।
तेवी बोगवान यहोशुह केयो, “आज रेन मी आखा इस्राएलीन सामने तारी बोड़ाय केरने सुरवात केरूह, तेवी माणहे जाणती काय जीहे मी मुसा हिऱ्यो रेतालो तिहेच केरीन मी तार हिऱ्यो बी हे। एने तु वाचान पेटीह उखेलनारे चाकऱ्याह ज्यो उकुम आप, जेवी तुमू यरदन नेदीन देड़े पोचहो, तेवी यरदन माय उब रिज्यो।”
उवतो यहोशु इस्राएल ने माणहाह केयो, “आहने आवीन तुमरा बोगवान यहोवान वचन हुमलो।” एने यहोशु केणे बाज गीयो, “ज्या केरीन तुमू जाण जाहो काय जीवतालो बोगवान तुमरे विचीम हे, एने तो तुमरे सामने रेन कनानी, हित्ती, हिव्वी, परिज्जी, गिर्गाशी, एमोरी, एने यबूसी न्याह तान देसाम रेन निकाल देय। होमलो, आखी दुनियान बोगवानान वाचान पेटी तुमरे ओंगाण ओंगाण यरदन माय जाण्यी हे। केरीन एवी तुमू इस्राएल ने गेराणा माय रेन बारा एदमी निवाड़ लिवो, एक एक गेराणा माय रेन एक एक। चाकऱ्या आखी दुनियान मालीक ने पेटीह लेन चालती। एने जेवी ता ती पेटीह तुमरे सामने यरदन नेदी माय ली जाती, जेवी ता पाण्या माय जाती; ते यरदन नेदीन पाणी वोयणो बोंद एय जाय, एने बांदान गेत थोब रेय।”
जेवी माणहे यरदन नेदी पार केरनेन केरता तान तोम्बुह सोड्या, एने चाकऱ्या वाचान पेटी उखलीन ओंगाण ओंगाण चालताला,
एने पेटीह उखेलनारे यरदन नेदीन मीरे पोचना, एने पेटीह उखेलनारे चाकऱ्या पाण्या माय पाय मेल्या। यरदन नेदी काटणेन टेम आखा दिह वोर पुरी बोरायीन वुयेह। तेवी जो पाणी उपेरली उगे रेन वोयतेन आवतालो तो जुलूम सेटो, मतलब आदम गावान आहने जो सारतान हेयरान आहने हे रोकायेन बांदान गेत उबरी गीयो, एने बितड़ान गेत उबरीनो, आराबान देरीयो, जो खाऱ्यो देरीयो बी केवाथे तान उगे वोयतालो, तो आखो हुक गीयो; एने माणहे यरीहोन सामने पार उतेर गीया। ता जागावाली बुय हुक गियी एने चाकऱ्या बोगवानान वाचान पेटीह नेदीन विचीम ली जायीन उब रेना, एने आखा इस्राएली हुकेल बुय पोर चालीन ती पार उतेरते रेना, सेवल्यी बुखेत ता आखा माणहे यरदन नेदी पार एय गीया।
Source notes (1)
- Footnote पेटी जा माय दोह उकुमान पाट्यु मेलाय जाताल्यु।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.