Nahali Bible
यहोशु 2
यरीहो गावाम मालमात केरने मोकेलने
तेवी नुन ने बिटोख यहोशु थोड़ाक इस्राएली एदम्याह पोतो लागाड़नेन केरता शित्तीम रेन चोराये ज्य केन मुकल्यो, “जावो, एने ता देसाह, खास केरीन यरीहोह हाच केरीन दिखो।” केरीन ता गीया एने राहाब नावान वेश्यान गेर पोचीन तास रोकाना। तेवी इखेह यरीहोन राजाह खुबेर केऱ्यो काय थोड़ाक इस्राएली माणहे, देसान जाणकारी काड़नेन केरता आज राती न्या आव रेनाह। तेवी यरीहोन राजा राहाबाह खोबेर केन मोकल्यो काय, “जा एदमी तार फाय आवीन तारा गेराम थोब रेनाह ताह बाहेर लेन आव, काहाकाय ता आखा देसान जाणकारी काड़नेन केरता आयेल हेते!”
ती बायकु ता दुय एदम्याह लिकाड़ मेली एने केयी, “मार फाय जुलूम एदमी आयेल ते एता, पुण माहु नाह मालुम काय ता कावाला एता; एने जेवी आंदारो एनो, एने गावान बायणा बोंद एणेन बुखेत ता माणहे जात रेना; माहु नाह मालुम काय ता का गीया, पुण केदी तुमू उतवाल्याह जाहो, ताहार ताह देर लिहो।” राहाब ताह गेरान साजा पोर चेड़ावीन होण माय ताह लिकाड़ दियेल एती, जान डिग ती साजा पोर हिसाड़ेन मेल रियेल एती। तानकेरता ता एदम्यान होदवाल्या राजान माणहे जात रेना, राजान माणहे गावाम रेन निकेलनेन बाद गावान बायणा बोंद केराय गीया; ता एदमी ता जागा पोर गीया जा रेन माणहे यरदन नेदीह पार केरताला।
एने दुयू एदमी राती हुवणेन तियारी माय एता, पुण राहाब साजा पोर गियी; एने ताह केयी, “माहु मालुम हे काय ज्यो देस बोगवान तुमरा माणहाह आपेल हे, तुमू आमुह बिवाड़तेह, ज्या देसाम रेणारे आखा माणहे तुमूह बितेह। 2 काहाकाय आमु होमलेल हेते काय जेवी तुमू मिस्र देसाम रेन बाहेर निकलीन आवणेन बुखेत, बोगवान तुमरे सामने रातला देरीयान पाणी आटाड़ दिनो। एने तुमू सीहोन एने ओग नावान यरदन नेदीन दिह उगता रेणारे एमोरीन दुयू राजाह किहीक खेतेम केऱ्या। एने त्यु गेटनाह होमेलतास आमु जुलूम बिय गीयाह, एने एवी आमरे माय रेन काल्लो माणुह ओलो ईमोतवालो नाह काय तुमरी हिऱ्यो लेड़ाय सेकी; काहाकाय तुमरो बोगवान यहोवा उपेरवाला हेरगान एने बुंदेवाली देरतीन बोगवान हे। मी तुमरी पोर गीण किरेल हे, केरीन एवी मार सामने बोगवानान सुगोण खावो काय, तुमू बी मारा आबाख ने गेराणा पोर गीण किरहो; एने तान खेरली निसाणी माहु आपो, काय तुमू मारा आईख आबाख, बायह्याख एने बोणह्युख, एने जो काय तान हे ता आखाह बी जीवताला सोड़ दिज्यो, एने आमरे आखान जीवाह मोरने से वोचाड़ लिहो।”
तेवी ता एदमी तीह केया, “तु आमरी ज्यी वात कुणीह केयी नाह, ते तुमरी केरता आमु आमरो जीव देहु, एने बोगवान आमुह ज्यो देस आपी, तेवी आमु तार हेऱ्या गीण एने खेराय केरीन वेवार केरहु।”
तेवी राहाब जीन गेर गावान बितड़ा हेऱ्योच एतो, एने ती तास रेताली, ती ताह खिड़की माय रेन दोयड़ी केरीन उतारीन गावान बाहेर केर देनी। एने ती ताह केयी, “बोयड़ा माय जात रिवो, इही नाय एय काय होदणारे तुमूह सापड़ावे। केरीन जाह वोर तुमूह होदणारे वोलीन नाय आवती रेती ताह वोर मतलब तीन दिह ताच लिकीन रिज्यो, तान बाद तुमरे वाटे जाज्यो।”
ता एदमी तीह केया, “जो सुगोण तु आमुह खावाड़ेल हे तान बाराम आमु ते निर्दोस रेहु। हुमेल, जेवी आमु ज्या देसाम आवहु, तेवी जी खिड़की माय रेन तु आमुह उतारेल हे ती माय रातला रेंगान दोयड़ी बांद दिज्ये; एने तारा आहख आबोख, बाहख, एने तारा आबाख ने आखा गेराणाह ज्यास गेराम तार फाय एकठा केरीन मिलज्ये। तेवी जो कुण तारा गेराम रेन बाहेर निकली, तान खुनान दोस तास ने मुंडी पोर पोड़ी, आमरी पोर तान दोस आवी नाय; पुण गेराम तार हेऱ्या जा रेती ता पोर इखेह आत टाकी ताहार तान खुनान दोस आमरी मुंडी पोर पोड़ी। केदी तु ज्यी वात एगदाह किहे काय आमु काय केरन्या हेते, ताहार जो सुगोण तु आमुह खावाड़ेल हे ता माय रेन आमु सुट जाहु।” ती केयी, “तुमरा केणान गेत एय।” तेवी ती ताह मोकल्यी, एने ता जात रेना; एने ती रातला रेंगान दोयड़ी खिड़कीह बांद देनी।
एने ता तीन गेराह सोड़ीन बोयड़ाम जात रेना, ताहरी ता तीन दिह रेना; राजान माणहे आखी वाटे ताह होद्या, पुण ता ताह सापेड़ना नाह। तेवी ता दुयू एदमी बोयड़ाम रेन उतेरना, एने नेदीह पार केरीन नुन ने बिटोख यहोशु फाय पोचना एने जो काय ता हेर्य इयेल एतो। ता यहोशुह केया, “बोगवान खेरीच आखो देस आपुह आप दियेल हे, ता देसान आखा माणहे आपुह बिय रेनाह।”
Source notes (2)
- Cross-reference इब्रानियो 11:31
- Cross-reference निर्गमन 14:21; गिनती 21:21-35
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.