Nahali Bible
यहोशु 4
एरीन बारा दिगोड़
जेवी आखा माणहे यरदन नेदीह पार केर लेदा, तेवी बोगवान यहोशुह केयो, “माणहाम रेन बारा एदमी निवाड़ो, एक एक वोस माय रेन एक एक एदमी निवाड़ो, एने माणहाह किवो काय तुमू यरदन नेदीन विचीम, जाहरी चाकऱ्या उबरियेल एता ता रेन बारा दिगोड़ विसीन आपणी हेऱ्या ती पार ली चालो, एने जाहरी आज राती पाड़ावो रेय ताहरी ताह मेल दिज्यो।”
तेवी यहोशु ता बारा एदम्याह जाह तो इस्राएलीन एक एक वोस माय रेन साटीन निवाड़ मिलेल इतो, ताह हाद्यो, यहोशु केयो, “तुमू आपणो बोगवान यहोवान पेटीन ओंगाण यरदन नेदीन विचीम जायीन इस्राएल माणहान गेणतीन गेत एक एक दिगोड़ विसीन आप आपणा खांदा पोर मिलो, ज्या दिगोड़ तुमरे विचीम निसाणी ठेराती, एने ओंगाणल्या दिह्याम जेवी तुमरा सोरा ज्य फुसती, ‘ज्या देगड़ान काय मतलब हे?’ तेवी तुमू ताह किज्यो काय, यरदन नेदीन पाणी यहोवान वाचान पेटीन सामने दुय बाग एय जायेल एतो; काहाकाय जेवी पेटी यरदन नेदीन ती पार जाणे बुखेत यरदन नेदीन पाणी दुय बाग एय गीयो। इहकेरीन ज्या दिगोड़ इस्राएल माणहान केरता कायेम ने केरता एर केरावणारे ठेराती।”
यहोशुन ज्या उकुमान गेत इस्राएल माणहे केऱ्या, जीहे बोगवान यहोशुह कियेल इतो, तिहेच केरीन ता इस्राएली माणहान गेणतीन गेत बारा दिगोड़ यरदन नेदीन विचीम रेन विस लेदा; एने ता देगड़ाह आपणे आरही ली जायीन पाड़ावा माय मेल देना। एने यरदन नेदीन विचीम, जाहरी चाकऱ्या वाचान पेटीह उखलीन उबरियेल एता ताहरी यहोशु बारा दिगोड़ उबराखाड्यो; ता आज वोर तास हेते। एने चाकऱ्या पेटी उखलीन तुलबुखे वोर यरदन नेदीन विचीम उब रेना, जाह वोर त्यु आख्यु वातु पुऱ्यू नाह एन्यु, ज्युह बोगवान यहोशुह माणहाह केणेन उकुम आपेल इतो। ओवता आखा माणहे उतवाल केरीन ती पार उतेर गीया। एने जेवी आखा माणहे नेदीह पार केर लेदा, तेवी चाकऱ्या बोगवानान पेटी लेन माणहान सामने पार एना। जीह केरीन मुसो कियेल इतो तिहेच केरीन रूबेनी, एने गाद, एने मनश्शेन वोसीन आदा माणहे आथ्यार बांदिन इस्राएली माणहान सामने ती पार गीया; लेड़ानेन केरता ता चालीह एजार एदमी बोगवानान सामने नेदी उतरीन यरीहोन आहने मोयदाना माय पोचना। ते दिह बोगवान इस्राएल ने आखा माणहान नेजरीम यहोशुह एक महान माणुह बाणाव दिनो। तेवीह रेन माणहे यहोशुन बिय एने आदार केरने बाज गीया, ता यहोशुन आदार जीवाय बोर केरने बाज गीया जीह केरीन मुसान आदार केरताला।
ओवतो बोगवान यहोशुह केयो, “वाचान पेटी उखेलनारे चाकऱ्याह यरदन नेदीम रेन बाहेर निकील आवणेन उकुम आप।” तेवी यहोशु चाकऱ्याह उकुम आप्यो, “यरदन नेदीम रेन बाहेर निकील आवो।” एने इह केरीन एनो काय बोगवानान पेटी विसणारे चाकऱ्या यरदन नेदीन विचीम रेन जेवी बाहेर निकील आवा, एने तान पाय जीहे मेराम मेल्या, तिहे यरदन नेदीन पाणी पोशो तान जागा पोर आवो, एने पेल ने गेतुस बोरायीन वोयणे बाज गीयो।
इस्राएली माणहे पेल्ला मोयनान दोहवे दिह यरदन नेदीम रेन निकलेल एता, एने यरीहोन दिह उगतान एद्दी पोर गीलगाल माय पाड़ावो टाक्या। एने जा बारा दिगोड़ यरदन नेदीम रेन निकालेल एता, ताह यहोशु गीलगाल माय उब राखाड्यो। तेवी यहोशु इस्राएल ने माणहाह केयो, “ओंगाणल्या दिह्याम जेवी तुमरा सोरा आप आपणा आबाख ज्य फुसे, ज्या देगड़ान काय मतलब हे? तेवी तुमू तुमरा सोराह किज्यो, इस्राएली माणहे हुकेल बुयी पोर चालीन ज्यी यरदन नेदीह पार किरेल एता। काहाकाय तुमरो बोगवान यहोवा नेदीन पाणीह वोयणे रोक दिनो, नेदी ताह वोर आट रेनी जाह वोर माणहे नेदीह पार नाह केर लेदा; बोगवान यरदन नेदी पोर माणहान केरता तोस किऱ्यो, जो तो माणहान केरता रातला देरीया पोर किरेल इतो, एर किरो काय यहोवा रातला देरीयान पाणी वोयणे ज्यान केरता रूकेल इतो काय माणहे पार केर सेके। ज्यान केरता काय देरतीन आखा देसान माणहे जाण लेय काय बोगवानान आथ ताकेतवोर हे; एने तुमू जेलेम तुमरो बोगवान यहोवान बिय मानते रिवो।”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.