Nahali Bible
यहोशु 10
एमोरी पोर जिक
जेवी यरूशलेम ने राजा अदोनीसेदेक होमल्यो काय यहोशु आई हेयराह जिक लियेल हे, एने ताह खेतेम केर दियेल हे, एने जीहे तो यरीहो एने तान राजा हिऱ्यो किरेल इतो, तिहेच केरीन आई हेयराह एने तान राजा हिऱ्यो बी किरेल हे, एने ज्य बी होमल्यो काय गीबोन माय रेणारे, इस्राएल हेऱ्या मेल केरीन तान विचीम रेणे बाजरेनाह। तेवी अदोनिसीदेकाह जुलूम बिय गीयो, काहाकाय गीबोन ज्यो मोटलो हियोर एन एगदा राजवाड़ान गेत एने आई हेयराह रेन मोठो एतो, एने ताम आखा रेणारे एदमी ताकेतवोर एता। केरीन यरूशलेम ने राजा अदोनीसेदेक हेब्रोन ने राजा होहाम, यर्मुत ने राजा पिराम, लाकीश ने राजा यापी, एने एग्लोन ने राजा दबीर फाय ज्य केय मोकल्यो, “मार फाय आवीन मारी मुदेक किरो! आपु मिलीन गीबोनाह आरवहु, काहाकाय तो यहोशु एने इस्राएली हिऱ्यो मेल केर लियेल हे।” केरीन एमोरीन पाच राजा मतलब यरूशलेम, हेब्रोन, यर्मुत, लाकीश एने एग्लोनान राजा एकठा एन एने आप आपणी सेना हेऱ्या गीबोन ने आहने पाड़ावो टाकीन ता हेऱ्या लेड़ाणे बाज गीया।
तेवी गीबोन ने माणहे गीलगाल ने पाड़ावाम यहोशुह खोबेर केय मोकल्या, “आमु तारा सेवक हेते! आमुह एखालास मा सोड़े; आमरी फाय उतवाल्युह आवीन आमुह वोचाड़ ले, एने आमरी मुदेक केर; काहाकाय बोयड़ा पोर रेणारे एमोरीन आखा राजा आमरे विरूद एकठा एय जायेल हेते।”
तेवी यहोशु तान आखा सिपाय एने आखा हाजाला सेनिकाह लेन लेड़ाणेन केरता गीलगाल रेन चाल पोड़नो। एने बोगवान यहोशुह केयो, “ताह बिय मा; काहाकाय मी ताह तार आथाम केर दियेल हे; ताम रेन एक एदमी बी तार सामने टिक नाय सेकी।” तेवी यहोशु गीलगाल रेन रात बोर चालीन उचकाहुस ता पोर हामलो किर दिनो। एने बोगवान ती सेनाह, इस्राएली सेनान द्वारा ताह आरवीन मोटली जिक आप्यो, एने तो गीबोन ने आहने जुलूम जाणाह मारीन बेथोरोनान चेड़ाव पोर तान पासाण पोड़ीन अजेका एने मक्केदा वोर ताह मारते गीया। ओवता जेवी ता इस्राएलीन सामने रेन नाहीन बेथोरोन ने उतेरती पोर आवा, तेवी अजेका पोचणे वोर बोगवान जुगाम रेन मोट-मोटला गारा ता पोर पाड्यो, एने ता मोर गीया; जा गारा केरीन माराय गीया, तान गेणती इस्राएल माणहे तालवारी केरीन मारेल ताह रेन वोदार एती।
बोगवान एमोरीह इस्राएल माणहान ताबाम केर दिनो, केरीन यहोशु इस्राएलीन सामने यहोवाह केयो,
“एय दिह, तु गीबोन पोर, एने एय चांद, तु अयालोन ने गाटान उपेर उब रे।” 1
एने दिह तुलबुखे वोर थोब रिनो; एने चांद तुलबुखे वोर थोब रिनो, जाह वोर ती जातीन माणहे तान दुसमोना हेऱ्या बोदलो नाह लेदा। काय ज्यी वात याशार नावान पुस्तेक माय नाह लिखेल सोती? काय दिह जुगान विचीम थोब रिनो, एने कोमीत कोमी पुरो दिह थोब रिनो। ओहलो दिह तान पेल नाहते तान पासाण आवो नाह; ते दिह बोगवान माणहान विन्ता होमल्यो, काहाकाय बोगवान इस्राएल ने माणहान केरता लेड़तालो।
ओवतो यहोशु आखा इस्राएली माणहा हिऱ्यो गीलगाल वाला पाड़ावाम पोशो आवतरनो।
एमोरीन पाच राजाह बोंदी बाणावाय जाणो
लेड़ाय ने बुखेत पाचु राजा नाहीन ता मक्केदान आहनेवाली गुफा माय लिकाय गीया। तेवी यहोशुह ज्यी खोबेर जुड़नी, पाचु राजा मक्केदान आहनेवाली गुफा माय लिकायेल आमुह जुड़नाह। यहोशु केयो, “गुफान मुयाला पोर मोट मोटला दिगोड़ देन, थोड़ाक एदम्याह गुफान राखवालीन केरता ताहरी मिलो। पुण तुमू ताहरी मा थोबो, तुमरा दुसमोनान पासाण पोड़ीन ताम रेन जा जा पासाण रेय जायेल हेते ताह मार दिवो, ताह तान हेयराम पोचणे मा दिवो; काहाकाय तुमरो बोगवान यहोवा ताह तुमरा आथाम केर दियेल हे।” इहकेरीन यहोशु एने इस्राएल ने माणहे पुरा दुसमोनाह मार देना; एने ताम रेन जा वोच गीया ता आप आपणा किल्लावाला हेयराम जायीन लिक गीया। तेवी आखा माणहे मक्केदान पाड़ावाम हाजे हुके यहोशु फाय आवतरना; एने इस्राएल माणहान विरूद कुण काय नाह केयो।
तेवी यहोशु केयो, “गुफान मुयालो उगाड़ीन ता पाच राजाह ता रेन मार फाय लेन आवो।” केरीन यहोशुन माणहे पाचु राजाह गुफाम रेन बाहेर लावा, ज्या पाचु यरूशलेम, हेब्रोन, यर्मुत, लाकीश, एने एग्लोनान राजा एता। जेवी ता राजाह यहोशु फाय लेन आवा, तेवी यहोशु इस्राएल ने आखा एदम्याह हाद्यो, एने यहोशु सेनान आदिकारीह केयो, “न्या आवो! न्या राजान बोची पोर तुमरा पाय मिलो।” केरीन यहोशुन सेनान आदिकारी आहने आवा; ता राजान बोची पोर तान पाय मेल्या। तेवी यहोशु तान सेनिकाह केयो, “मोजबुत एने ईमोत किरो! बिवो मा, काहाकाय जा हेऱ्या तुमू लेड़ाहो ता तुमरा आखा दुसमोनान बोगवान इहीच केरीन केरी।” तेवी यहोशु पाचु राजाह मारावीन पाच जाड़ा पोर ताह टांग दिनो, एने ता हांज पोर वोर ता जाड़ा पोर टांगायेल रेना। दिह बुड़ता-बुड़ता यहोशु तान माणहाह देड़ाह जाड़ा पोर रेन उतारनेन केयो, ता उतारीन तीस गुफाम जाहरी ता लिक जायेल एता टाक देना, एने ती गुफान मुयाला पोर मोट-मोटला दिगोड़ मेल देना, ता आज वोर तास मेलायेल हेते।
यहोशुन एमोरी राज्या पोर जिक
ते दिह यहोशु मक्केदाह आरव्यो, यहोशु राजाह एने ता हेयरान माणहाह तालवार केरीन मार दिनो; तो कुणीह बी जीवतालो नाह मिल्यो, यहोशु मक्केदान राजा हिऱ्यो बी तोस किऱ्यो जो तो यरीहोन राजा हिऱ्यो किरेल इतो।
तेवी यहोशु आखा इस्राएलीह आरही लेन मक्केदा रेन चालीन लीबना गावा माय गीयो, एने लीबना हिऱ्यो लेड़ानो; यहोवा इस्राएल ने माणहाह तो हियोर एने तान राजाह आरेवणे दिनो, इस्राएल ने माणहे ता हेयरान एक एक माणहाह तालवार केरीन मार दिनो; ताहरी कुणाह बी जीवतालो नाह मिल्यो, एने माणहे राजा हेऱ्या तोस केऱ्या जा ता यरीहोन राजा हेऱ्या किरेल एता।
ओवतो यहोशु एने आखा इस्राएली माणहे लीबना गावाम रेन चालीन लाकीश गीया, एने तान आहने पाड़ावो टाकीन ता हेऱ्या लेड़ाना। एने यहोवा लाकीशाह इस्राएल ने आथाम केर दिनो, दिहरे दिह तो ता हेयराह आरीव दिनो; इस्राएल ने माणहे लीबनान माणहाह तालवार केरीन मारेल, तिहेच केरीन लाकीश हेयरान एक एक माणहाह तालवार केरीन मार दिनो। तेवी गेजेर गावान राजा होराम लाकीशान मोदेक केरनेन आवो, पुण यहोशु ताह एने तान सेनाह ओलो माऱ्यो काय तामवालो एक बी जीवतालो रिनो नाह।
तेवी यहोशु एने इस्राएल ने आखा माणहे लाकीश गावाम रेन एग्लोन गावा माय गीया, ता एग्लोनान कावदेन पाड़ावो टाक्या एने ता पोर चेड़ाय केऱ्या। एने तेदिस ता हेयरा पोर आदिकार केर लेदा, एने हेयरान आखा माणहाह मार देना; जीहे ता लाकीश ने माणहाह तालवार केरीन मारेल तिहेच केरीन एग्लोनान माणहाह माऱ्या;
ओवतो यहोशु एने इस्राएल ने आखा माणहे एग्लोन रेन हेब्रोन गावा माय गीया, एने ता हेब्रोन ने विरूद बी लेड़ाय केऱ्या। ता हेयराह एने हेब्रोन ने आहनेवाला आखा आतल्या गावा पोर आदिकार केर लिदो, इस्राएल ने माणहे राजाह एने गावान ता माय वाला आखा जेनवेराह तालवार केरीन मार दिनो; जीह केरीन यहोशु एग्लोना हिऱ्यो किरेल इतो, तिहेच केरीन तो हेब्रोन माय बी कुणीह जीवतालो नाह सोड्यो; ता हेब्रोन ने एने तामवाला आखा माणहाह मार देना।
तेवी यहोशु एने इस्राएल ने आखा माणहे पासाण फिरीन दबीर माय गीया, एने ता हेयरा पोर चेड़ाय किऱ्यो। ता तो हियोर, तान राजा एने दबीरान आहनेवाला आखा गावाह जिक लेदा; एने ता तामवाला आखा माणहाह तालवार केरीन मार देना; कुणीह जीवताला नाह मेल्या, जीहे यहोशु हेब्रोन एने लीबना एने तान राजा हिऱ्यो किरेल इतो, तिहेच केरीन ता दबीर एने तान राजा हेऱ्या बी केऱ्या।
इह केरीन यहोशु ता आखा देसाह, मतलब बोयड़ावालो देस, देक्षिण देस ने नेचला एने आड़वायावाला देसान राजाह आरीव दिनो; एने इस्राएल ने बोगवान यहोवा उकुम आपेल तिहकेरीन कुणीह नाह सोड्यो, आखा माणहाह मार दिनो। यहोशु कादेशबर्ने रेन गाजा पोर वाला आखा हेयरा पोर आदिकार केर लिदो, तो मिस्र माय गोशेनान देरती रेन गीबोन पोर वाला आखा हेयरा पोर कोब्जा केर लिदो। न्या आखा राजाह तान देसा बेल यहोशु एकास टेमाम जिक लिदो, काहाकाय इस्राएल ने बोगवान यहोवा इस्राएलीन उगे रेन लेड़तालो। तेवी यहोशु एने इस्राएल ने आखा माणहे गीलगालान तान पाड़ावा माय आवतरना।
Source notes (1)
- Cross-reference 2 शमुएल 1:18
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.