Nahali Bible
यहोशु 11
राजा याबीन एने तान मोदेक केरनार यहोशुन द्वारा आरवाय जाणो
हासोरान राजा, याबीन जो काय एनो तान बाराम होमल्यो, केरीन तो मोकता राजान सेनाह एकठोस हादणेन निर्णय लिदो, याबीन मादोन ने राजा योबाब, शिम्रोनान राजा, एने अक्षापान राजाह, एने जा जा राजा उत्तर निही बोयड़ावाला देसाम, एने किन्नेरेतान देक्षिण ने अराबा माय, एने नेचाला देसाम, एने पश्चिमा निही दोरान उचाला देसाम रेताला, ताह खोबेर मोकल्यो, एने पुर्व पश्चिम दुयू उगेवाला रेणारे कनानी, एमोरी, हित्ती, परिज्जी, एने बोयड़ावाला यबूसी, एने मिस्पा देसाम हेर्मोन बोयड़ान नेचा रेणारे हिव्वी माणहाह बी खोबेर मोकल्यो। केरीन ज्या आखा राजान सेना रेटान गेत एती, एकठीस आवी, एने ता हेर्य जुलूम होवटा गोड़ा एने टांगा बी एता। ता आखा राजा आतली नेदी मेरोम नावान तेलान आहने एकठा एना, एने तान सेनाह एक पाड़ावाम एकठा केऱ्या; ता इस्राएल ने विरूद लेड़ाणेन योजना बाणाया।
तेवी यहोवा यहोशुह केयो, “ती सेनाह मा बिवो, काहाकाय काल ज्यीस टेमाम मी तुमूह ताह आरेवणे देह, तुमू ता आखाह मार टाकहो; तुमू गोड़ान नेह काट दिज्यो, एने तान आखा टांगाह हेलगाड़ दिहो।” केरीन यहोशु एने तान पुरी सेना, मेरोम नावान तेला हेऱ्या उचकाहुच आवीन ता पोर चेड़ाय केऱ्या। एने यहोवा ताह इस्राएलीन आथाम केर दिनो, केरीन इस्राएल ने सेना ताह आरीव देना, एने मोटला हियोर सीदोन एने मिस्रपोतेम वोर एने पुर्व निही मिस्पेन गाटे वोर तान पासाण पोड़ना; एने ताह ओला माऱ्या काय ताम रेन कुणीह जीवताला नाह सोड्या। तेवी यहोशु तोस किऱ्यो जो यहोवा कियेल इतो, मतलब यहोशु तान गोड़ान पायान नेह काटाड़ दिनो एने तान टांगाह हेलगाड्यो।
तेवी यहोशु आवो, एने हासोर हेयराह जो पेल ता आखा राज्याम मुखी हियोर इतो आदिकार माय केर लिदो, एने तान राजाह तालवार केरीन मार टाक्यो। एने इस्राएल ने सेना ता हेयरान एक एक माणहाह तालवार केरीन मार देना, कुण बी जीवतालो नाह रिनो; एने हासोर हेयराह यहोशु आक्ठो पेटाड़ीन हेलगाड़ दिनो।
यहोशु ज्या आखा हेयरा पोर आदिकार किऱ्यो, एने तो तान आखा राजाह मार दिनो, यहोशु ज्या हेयरान एक एक चिजीह खेतेम केर दिनो; एने बोगवानान सेवक मुसाह जीह केरीन उकुम आपेल इतो तिहेच केरीन तालवार केरीन खेतेम किऱ्यो। पुण इस्राएल ने सेना काल्ला बी ओहला हेयराह नाह हेलगाड्या जा बोयड़ा पोर बोणेल एता, ता बोयड़ा पोर बोणेल एखालास हासोर हेयरास हेलगाड्या; ज्यो तो हियोर इतो, जाह यहोशु हेलगाड्यो। एने ज्या हेयरान पालन्या जेनवार एने न्यान आखी चिजुह इस्राएल ने माणहे लुट ली गीया, पुण माणहाह ता तालवार केरीन मार टाक्या, एक बी माणुह जीवताला मेल्या नाह। जो उकुम यहोवा तान सेवक मुसाह आपेल इतो, तास ने गेत मुसो यहोशुह उकुम आपेल, एने तिहेच केरीन यहोशु किऱ्यो, एने जो जो उकुम यहोवा मुसाह आपेल इतो ताम रेन एकाह बी यहोशु पुरो केऱ्या सावाय नाह सोड्यो।
यहोशुन द्वारा जिकेल देस
इह केरीन यहोशु ज्या पुरा देसान आखा माणहाह आरीव दिनो, बोयड़ावालो देस, एने आखा देक्षिण देस, एने आखो गोशेन देस, एने नेचाला देस, अराबा एने इस्राएल ने बोयड़ावाला देस, एने तान नेचाला देस, यहोशुन आदिकार सेईर ने आहने हालाक नावान बोयड़े रेन, हेर्मोन बोयड़ान निड़ो लबानोन ने गाटाम बालगाद वोर, आखा देसा पोर एय गीयो एने ता हेयरान आखा राजाह देरीन मार टाक्यो। यहोशु ता आखा राजा हिऱ्यो जुलूम वोरीह लेड़ानो। गीबोन माय रेणारे हिव्वीह सोड़ीन दिहरो एगदो हियोर इस्राएल ने माणहा हिऱ्यो मेल नाह किऱ्यो, एने आखा हेयराह ता लेड़ लेड़ीन जिक लेदा। 1काहाकाय यहोवा होदतालो काय तान ता उकुमान गेत जो तो मुसाह आपेल इतो, ता पोर कायच बी गीण नाय केरी; पुण खेतेम केर देय, केरीन तो तान मोन ओहलो कठोर केर दिनो काय ता इस्राएलीन चेड़ाय केरीन ता हेऱ्या लेड़ाना।
तुलबुखे यहोशु बोयड़ावाला देसाम आवीन हेब्रोन, दबीर, अनाब, एने यहुदा एने इस्राएल दुयून आखा बोयड़ावाला देसाम रेणारे अनाकीह खेतेम किऱ्यो; यहोशु हेयरा बेल ताह खेतेम केर दिनो। इस्राएल माणहान देसाम एक बी अनाकी जीवतालो रिनो नाह; फोक्तो गाजा, गत, एने अश्दोद गावा माय थोड़ाक जीवताला रेय गीया।
जीहे यहोवा मुसाह कियेल इतो, तिहेच केरीन यहोशु तो आखो देस आदिकार माय केर लिदो; एने ताह इस्राएल ने गेराणा एने वोचीन गेत वाटीन ताह आप दिनो। तेवी देसाह लेड़ाने से सान्ती जुड़नी।
Source notes (1)
- Cross-reference व्यवस्था 7:16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.