Nahali Bible
उत्पत्ती 22
अब्राहाम ने पारेख माय पोड़नेन वर्णन
ज्यु वातुन पासाण ओहलो एनो काय बोगवान अब्राहामाह ज्य केन तान पारेख किऱ्यो, “एय अब्राहाम!” एने अब्राहाम जापाप आप्यो, “काय उकुम हे, मी न्या हे।”1
बोगवान ताह केयो, “तारा सोराह,” मतलब “तारो एकुच बेटाख इसाहाकाह, जा पोर तु मोंग मिलेह, ताह आरही लेन मोरियाह देसाम जातरे, एने ताहरी ताह एक बोयड़ा पोर जो मी तुवाह केह होमबोली केरीन चेड़ाव।”2
तेवी अब्राहाम उठ्यान विगोच उठीन गेदड़ो तियार केरीन ता पोर बोलीन केरता लाकड़े फोड़ीन मेल दिनो, एने तान दुय पावराह एने तान सोरा इसाहाकाह आरही लेन ता बोगवान कियेल ती जागा उगे चाल पोड़ना। तीन दिह वोर चालीन ता ताहरो पोचाना, ओवतो अब्राहाम निजेर टाकीन ता जागाह सिटोच रेन दिख्यो। एने अब्राहाम तान पावराह केयो, “तुमू न्याच गेदड़ान जागे रिवो; मी एने ज्यो सुरो ताहरी जायीन बोक्ती केरीन पोशा तुमरी फाय फिरीन आवहु।”
तेवी अब्राहाम बोलीन लाकड़े लेन तान सोरा इसाहाक खांदा पोर मिल्यो, एने आक्ठो एने एक सुरो तान आथाम लिदो; एने ता दुयू एकठास चाल पोड़ना। इसाहाक तान आबाख अब्राहामाह केयो, “एय मारा आबा!” तो केयो, “एय मारा सोरा, काय वात हे?” इसाहाक केयो, “देख, आक्ठो एने लाकड़े ते आपु फाय हेते; पुण होमबोली केरनेन केरता मेंड्रो का हे?”
अब्राहाम ताह जापाप आप्यो, “हे मारा सोरा! बोगवान होमबोलीन केरता मेंड्रान उपाय सोताच केरी।” एने ता दुयू आरही आरही ओंगाण चालती गीया।
एने जेवी ता बोगवान कियेल ती जागे जाय पोचना, तेवी अब्राहाम ताहरी एक वेदी बाणायो, एने ती वेदी पोर लाकड़े निवाड़ी निवाड़ीन हिसाड़ दिनो, एने तान सोरा इसाहाकाह बांदिन वेदी पोर हिचेल लाकड़ा पोर लोटाड़ दिनो।3 ओवतो अब्राहाम तान आथ ओंगाण केरीन सुरो विस लिदो काय तान सोराह बोली केरी। तेवी बोगवानान दुत हेरगाम रेन ताह आयड़ीन केयो, “हे अब्राहाम, हे अब्राहाम!”
तो केयो, “काय उकुम हे।”
दुत केयो, “तु ता सोरा पोर आथ मा लागाड़े, एने ताह काय मा केरी; काहाकाय एवी मी जाण जायेल हे काय तु जो मार हिऱ्यो तारा एकुच सोराह बी नाह मिल्यो; एने बोली केरनेन केरता तियार एय गीयो ता माय मी जाण गीयो काय तु बोगवानान बिय मानेह।”
तेवी अब्राहाम निजेर टाकीन दिख्यो, ते तान पासाण जुरखेल्याम एक मेंड्रो 4तान हिंगे एटकायेल हे। तेवी अब्राहाम जायीन ता मेंड्राह काड़ीन लियावो, एने तान सोरान जागा पोर होमबोली केरीन चेड़ायो। अब्राहाम ता जागान नाव “यहोवा यिरे5 मिल्यो,” तान गेत आज वोर बी केवाय जाथे, बोगवानान बोयड़ा पोर आपाय जाथे।
ओवतो बोगवानान दुत अब्राहामाह दिहरी वार हेरगाम रेन आयड़ीन केयो, “बोगवानान ज्यो बोल हे, तु जो ज्य काम किरेल हे, काय तु तारा एकुच सोराह बी नाह सुड्यो; केरीन मी सुगोण खाएन वचन आपथु।6 ज्यान केरता मी जोरूड़ तुवाह बोरकेत आपीन तारी वोसीह जुगावाला तारा हारका एने देरीयान मिरेन रेटान गेत गेणाय नाय ओहला केरूह, तारी वोसीह तारा दुसमोनान हेयरा पोर आदिकार आपुह।7 एने देरतीन आखा देस तारी वोसी सोताह तारी वोसीन कारेण बोरकेतवाला मानती; काहाकाय तु मारी वात मानेल हे।”8 तेवी अब्राहाम तान पावरा फाय फिरीन आवो, एने ता आखा बेर्शेबा माय आरही आरही गीया; एने अब्राहाम बेर्शेबा माय रेणे बाज गीयो।
नाहोरान वोस
ज्यी वातुन पासाण ओहलो एनो काय अब्राहामाह ज्यी खुबेर जुड़नी, मिल्कान तारा बाहख नाहोर उगे रेन सोरो पायदा इयेल हे। मिल्कान ज्या सोरा पायदा इयेल एता, डावालो सोरो ऊस, एने ऊसान बाहख बुज, एने कमूएल, ज्यो अराम ने आबोख इनो। तान पासाण केसेद, हजो, पिल्दास, यिदलाप एने बतुएल ओहला तान नावे हेते। ज्या आठ सोरा मिल्का अब्राहाम ने बाहख नाहोर ने उगे रेन पायदा एना। एने बतुएल ने रिबीका पायदा एनी। पुशो नाहोर ने रूमा नावान एक राखेल बी एती; तीन तेबाह, गहम, तहश, एने माका, ओलाक सोरा पायदा एना।
Source notes (8)
- Cross-reference इब्रानियो 11:17; उत्पत्ती 31:11; निर्गमन 3:4
- Cross-reference 2 इतिहास 3:1
- Cross-reference याकुब 2:21
- Footnote मेंड्रो हिंगावालो मेंड्रो
- Footnote यहोवा यिरे बोगवान उपाय केरने
- Cross-reference इब्रानियो 6:13-14
- Cross-reference इब्रानियो 11:12
- Cross-reference प्रेरितान काम 20:25; गलातीयो 3:16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.