Nahali Bible
उत्पत्ती 23
सारान मोत एने बुजणो
सारा ते एक होव सत्तावीस वोरह्या वोर जीवताली रेनी। तेवी ती किर्याथ हेब्रोन बी केवाथे ता मोर गियी, ज्य ते कनान देसाम हे, केरीन अब्राहाम सारान केरता रेड़ने किकेलने केरता ताहरी गीयो।
तेवी अब्राहाम देड़ान आहने रेन उठीन हित्ती माणहाह केणे बाज गीयो, “मी तुमरा देसाम पावणो एने पाराया देसान हे; माहु तुमरी विचीम माहणान केरता ओहली बुय आपो, जो मारी सोतान एय जाय काय मी मार मुरेल बायकुन देड़ाह बुजीन मारा डोला हिऱ्यो रेन सिटो केरू।”1
तेवी हित्ती माणहे अब्राहामाह केया, “एय आमरा मालीक, तु आमरी वात हुमेल; तु ते आमरी विची माय मुठलो मुखी हे। आमरा माहणाम रेन जो तुवाह पुटे ता माय तारा मुरदाह बुज, आमु माय रेन कुण बी तुवाह माहेण लेणेन नाय रूके काय तु तारा मुरदाह ता माय बुज नाय सिके।”
तेवी अब्राहाम उठीन उबरेय गीयो, एने हित्तीन सोमोर, जा ता देसाम रेणार एता, ताह वोंदीन केणे बाज गीयो, “केदी तुमरी मोरजी एय ते मी मारा मुरदाह बुजीन मारा डोलान हिऱ्यो सिटो केरू, ते मारी विन्ता हे, काय सोहर ने बेटाख एप्रोन फाय मार केरता विन्ता किरो। काय तो तान मकपेलावाली गुफा, जी तान खेतान हिली पोर हे, तान पुरी किमोत लेन माहु आप देय, काय ती तुमरी विचीम माहणान केरता मारी सोतान बुय बोण जाय।”
एप्रोन ते हित्तीन विचीम ताहरी बोह रियेल इतो, केरीन जोला हित्ती तान हेयरान फाटेक पोर लागता माय जाताला, ता सोबान सामने तो अब्राहामाह जापाप आप्यो, “एय मालीक, ओहलो नाह सोतो मारी वात हुमेल; ती बुय मी तुवाह आपथु. ता माय जी गुफा हे, ती बी मी तुवाह आपथु, मारा बाय बांडलान सोमोर मी तुवाह आपथु एने तु तारा बायकुन देड़ाह माहणाम मेल।”
तेवी अब्राहाम हित्ती देसाम रेणारान सोमोर वोंद्यो। अब्राहाम आखान सोमोर एप्रोनाह केयो, “केदी तारी मोरजी एय, ते मारी वात हुमेल। ती बुईन किमोत ज्यी एय ती मी आपथु, तीन किमोत मार फाय रेन लेय ले, तेवी मी मार बायकुन देड़ाह ताहरी बुजूह।”
तेवी एप्रोन अब्राहामाह जापाप आप्यो, “एय मालीक मारी वात हुमेल; ती बुईन किमोत ते चार होव चांदीन सिक्का हेते; पुण मारी एने तारी विचीम ज्य काय हे? तु तारी बायकुन देड़ाह माहणाम मेल।” अब्राहाम एप्रोन ने वात मानीन ताह तोलाक रूपिया तोल दिनो, जोला तो हित्ती माणहान ओंगाण कियेल इतो, मतलब चार होव चांदीन सिक्का तोलीन आप दिनो।
इह केरीन एप्रोन ने बुय, जी मम्रेनान आहने मकपेला माय एती, ती गुफा बेल एने ता आखा जाड़ा बेल बी जा तान चार चोमखेर हिली पोर एता। जोला हित्ती तान हेयरान फाटेक माय लागता जाताला, ता सोबान सोमोर अब्राहामान आदिकार माय हास केरीन आव गीयो।
तान पासाण अब्राहाम तान बायकु सारान देड़ाह ती मकपेलावाली बुईन गुफा माय जी मम्रेनान मतलब हेब्रोन गावान सोमोर कनान देसाम हे, ताहरो बुज्यो। इहकेरीन ती बुय गुफा बेल जी ता माय एती, हित्तीन उगे रेन माहणान केरता अब्राहाम ने हुका माय हास केरीन आव लागी।
Source notes (1)
- Cross-reference इब्रानियो 11:13; प्रेरितान काम 7:16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.