Nahali Bible
उत्पत्ती 17
खेतना एने वाचान निसाणी
जेवी अब्राहाम नोवह्यान नोव वोरह्यान एय गीयो, तेवी यहोवा बोगवान ताह देरसेन आपीन केयो, “मी आखी ताकेतवालो बोगवान हे, मारी एजुरी माय चाल एने पाको इती जा। मी तार हिऱ्यो वाचा बांदुह, एने तारी वोसीह जुलूम वोड़ावुह।” तेवी अब्राहाम मुयान बोरहे पोड़ीन ताह वोंद्यो। एने बोगवान ता हिऱ्यो ज्यु वातु किरती गीयो, देख, मारी वाचा तार हेरी बांदाय रेय, केरीन तु आखा देसान केरता मुटलो आबोख बोण जाहे। केरीन एवी रेन तारो नाव अब्राहाम नाय रेह पुण तेरा नाव अब्राहाम रेय; काहाकाय मी तुवाह आखा देसान डावालो आबोख ठेराव दियेल हे।1 मी तुवाह जुलूमच वोदाडुह, एने तुवाह देसा देसान मुल बाणाव देह, एने तारी वोस माय राजा पायदा एती।
“एने मी तार हिऱ्यो, एने तार पासाण पिढीन पिढ़ी वोर तारी वोसी हिऱ्यो बी जेलेम जेलेम ने वाचा बांदथु, काय मी तारो एने तार पासाण तारी वोसीन बी बोगवान रेह।2 एने मी तुवाह, एने तार पासाण, तारी वोसीह बी ज्यो आखो कनान देस, जा माय तु पारायो बोणीन रिथे, इहकेरीन आपुह काय तो जेलेम जेलेम तान सोतान बुय रेय, एने मी तान बोगवान रेह।”3
पुशो बोगवान अब्राहामाह केयो, “तु बी मार हिऱ्यो बांदायेल वाचाह पालजे; तु एने तार पासाण तारी वोसीह बी जान तान पिढ़ी माय ताह पाले। मार हेऱ्या बांदिल वाचा, जीह तुवाह एने तार पासाण तारी वोसीह केरने पोड़ी, तो ज्य हे, काय तुमू माय रेन एक-एक एदम्यान खेतना एय।4 तुमू जीव जीवान चामड़ान खेतना केराव लिज्यो : ज्यी वाचा मारी एने तुमरी विची माय हे तान ज्यी निसाणी रेय। पिढ़ी पिढ़ी माय निस्तो तारी वोसीन ओलाच माणहे नाह पुण जो तारा गेराम पायदा एनो एय पावोर निह ते पोयशा से वेचातो लियेल एय, ओहला आखा एदम्यान आठ दिह्यान एय जाती, तेवी तान खेतना केराय जाय। जो तारा गेराम पायदा एनो एय, निह ते पोयशा से वेचातो लेवानो एय, तान खेतना जोरूड़ केराय जाय, इह केरीन मारी वाचा जीन निसाणी तुमरा सेरीराम रेय ती कायेम कायेम ने रेय। जा एदम्यान खेतना निह एनो एय, मतलब जान चामड़ान खेतना निह एय, तो माणुह तुमरी विचीम रेन खेतेम केराय जाय, काहाकाय तो मार हेरी बांदिल वाचाह तोड़ दियेल हे।”
ओवतो बोगवान अब्राहामाह केयो, “तारी जी बायकु सारे हे, तीह तु एवी सारे5 मा किहे, तीन नाव सारा रेय। मी तीह बोरकेत आपुह, मी तुवाह तीन द्वारे सोरो आपुह, एने मी तीह ओहली बोरकेत आपुह, काय ती देसा देसान डावाली आहख बोण जाय; एने तीन वोस माय राज राजान राजा पायदा एती।”
तेवी अब्राहाम बुय पोर पोड़ीन वोंदीन सोतान मोनाम केतालो, “काय होव वोरह्यान एदम्यान बी सोरो एय एने काय सारा ज्यी नोव्वद वोरह्यान हे ती सोरो पायदा केरी?” ओवतो अब्राहाम बोगवानाह केयो, “इश्माएल तारी नेजरीम जिवी! ज्योच जुलूम हे।”
तेवी बोगवान केयो, “जोरूड़ तारी बायकु सारान तार उगे रेन एक सोरो पायदा एय; एने तु तान नाव इसाहाक6 मिलजे; एने मी ता हिऱ्यो ओहली वाचा बांदुह ज्यी तान पासाण तान वोसीन केरता जेलेम जेलेम ने केरता वाचा रेय। इश्माएलान बाराम बी मी तारी वात हुमलेल हे; मी ताह बी बोरकेत आपुह, एने ताह जुलूम वोदाडुह एने ता पोर रेन बारा मुखी पायदा एती, एने मी ता पोर रेन मी एक मोटलो देस बाणावुह। पुण मी मारी वाचा इसाहाक हिऱ्योच बांदुह जो सारान ओंगाणली वोरीह ज्यीच ठेरायेल टेम माय पायदा एय।” तेवी बोगवान अब्राहाम हिऱ्यो वातु पुरी किऱ्यो, एने बोगवान अब्राहामाह सोड़ीन हेरगाम जात रिनो।
तेवी अब्राहाम तान बेटाख इश्माएला एने तान गेराम जोला पायदा इयेल एता, एने जोला पोयशा से वेचाता लियेल एता, मतलब जोला एदमी तान गेराम एता, ता सोबाह लेन ते दिहच बोगवानान वचन कियेल तिहेच तान चामड़ान खेतना किऱ्यो। अब्राहाम नोवह्यानोव वोरह्यान इतो तेवी तान चामड़ान खेतना एनो। एने तान बिटोख इश्माएल तेरा वोरह्यान इतो तेवी तान चामड़ान खेतना एनो। अब्राहाम एने तान सोरा इश्माएल दुयून खेतना एकुच दिह्या इयेल एतो। एने जोला एदमी तान गेराम पायदा इयेल एता, एने जोला पाराया देसावाला फाय रेन पोयशा आपेन वेचाता लियेल एता, ता आखान खेतना ता हेऱ्योच एनो।
Source notes (6)
- Cross-reference रोमीयो 4:17
- Cross-reference लुका 1:55
- Cross-reference प्रेरितान काम 7:5
- Cross-reference रोमीयो 4:11; प्रेरितान काम 7:8
- Footnote सारे डावाली आहख
- Footnote इसाहाक तो आहणे
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.