Nahali Bible
उत्पत्ती 16
हाजीरा एने इश्माएल
अब्राहाम ने बायकु सारान काल्लाच सोरा नाह एता; एने तीन हाजीरा नावान मिस्र देसावाली एक पावेरनी एती। सारे अब्राहामाह केयी, “देख बोगवान ते मारो खुलो बोंद केर मिलेल हे, केरीन मी तुवाह विन्ता केरथु काय तु मारी पावेरनी फाय जा; एय सिकेह काय मारो गेर तीन उगे रेन वोह जाय।” अब्राहाम सारान वात मान लिदो। केरीन जेवी अब्राहामाह कनान देसाम दोह वोरह्या एय गीया, तेवी तान बायकु सारे तीन मिस्री पावेरनी हाजीराह ली जायीन तीन एदमी अब्राहामाह आप देनी, काय ती तान बायकु बुणे। तो हाजीरा फाय गीयो, एने ती अब्राहाम उगे रेन पेटावाली बोणनी, तेवी हाजीरा जाण लेदी काय ती पेटावाली हे, तेवी ती तीन मालकीह तीन नेजरीम कोमीच सोमेजणे बाज गियी।
तेवी सारे अब्राहामाह केयी, “जो मार पोर दुख इयेल हे तो तारा मुंडा पोर रेय। मी ते मारी पावेरनी हाजीरा तारी बायकु बाणाव देनी; पुण ती जाण गियी काय ती पेटावाली हे, तेवी ती माहु कोमीच सोमेजणे बाज गियी, ता माय यहोवा बोगवान मारी एने तारी विची माय न्यायनिवाड़ो केरी!”
पुण अब्राहाम साराह केयो, “हाजीरा तारी पावेरनी हे, एने ती तारा ताबाम हे; जोहलो तुवाह हाजो लागी तोहलोच ती हिऱ्यो केर।” तेवी सारे तीह दोमणे बाज गियी, केरीन हाजीरा तीन सामने रेन नाह गियी।
तेवी बोगवानान दुत तीह जेंगला माय शुरान वाटी पोर पाण्यान एक जोवरान जागे देखीन केयो, “हे सारान पावेरनी हाजीरा तु कारीन आवीह? एने तु का जाथे?” तेवी ती केयो, “मी मारी मालकीण सारान सोमोर रेन नाहीन आयेल हे।”
पुण बोगवानान दुत तिह केयो, “तारी मालकीण फाय फिरीन जातरे एने तीन ताबाम रे।” एने बोगवानान दुत पुशो तीह केयो, “मी तारो वोसीह जुलूम वोड़ावुह, ओला वोर काय जुलूम रेती ता माय तान गेणती नाय एय सेकी।” एने बोगवानान दुत तीह केयो, “देख तु पेटावाली हे, एने तारो सोरो पायदा एय तान नाव तु इश्माएल मिलजे काहाकाय यहोवा बोगवान तारा दुखान हाल होमली लियेल हे। एने तो सोरो जेंगली गेदड़ान गेत रेय, तान आथ सोबान विरूद माय उठी, एने सोबान आथ तान विरूद माय उठती; एने तो तान बाय बोन्दान विचीम वोह रेय।”
तेवी हाजीरा यहोवान नाव जो ती हिऱ्यो वातु किरेल एतो; अत्ताएलरोइ, मतलब बोगवान आखो देखणार हे। मेलीन केयी, “काय मी न्या बी ताह जातालो देख लेदी एने देखीन बी जीवताली रेनी?” केरीन ती वावड़ीन नाव लेहरोई, “मतलब जो माहु दिखेह, तो पोड़नो;” तो ते कादेश एने बेरेद ने विची माय हे।
हाजीराह अब्राहाम उगे रेन एक सोरो पायदा इनो; अब्राहाम ता सोरान नाव इश्माएल मिल्यो।1 जेवी हाजीरा अब्राहाम उगे रेन इश्माएलाह जेल्मो देनी ती टेम माय अब्राहाम शिह्यांशी वोरह्यान इतो।
Source notes (1)
- Cross-reference गलातीयो 4:22
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.