Nahali Bible
उत्पत्ती 15
अब्रामा हेरी बोगवानान वाचा
ज्यु वातुन पासाण यहोवा बोगवानान ज्य वचन देरसेन माय अब्राहाम फाय पोचनो, “एय अब्राहाम, मा बिय मी तारी ढाल एने तारो जुलूम मुठो फोल हे।”
पुण अब्राहाम केयो, “एय मालीक यहोवा बोगवान मारो काल्लो सुरो नाय मिले, एने मारा गेरान वारीस ज्यो दमिश्क वालो एलीएजेर रेय, एने तु माहु काय आपहे? एने अब्राहाम केयो, माहु ते तु वोस नाह आपेल सुतो, एने मारा गेराम पायदा इयेल एक पावोरच मारो वारीस रेय।”
तेवी यहोवा बोगवानान ज्य वचन अब्राहामा फाय पोचनो, “एलीएजेर तारो वारीस नाय रेय, तारो सोतान सुरो रेय, तोच तारो वारीस रेय।” एने बोगवान ताह बाहेर ली जायीन केयो, “जुगा उगे निजेर टाकीन ताराह गेण, काय तु ताह गेण, सिकेह?” पुशो तो ताह केयो, “तारी वोस बी ओहलीच रेय।”1
तो यहोवा बोगवाना पोर बुरहो किऱ्यो; एने बोगवान ज्यी वातीह तान लेखा माय देरमी गिण्यो।2
एने यहोवा बोगवान अब्राहामाह केयो, “मी तोच यहोवा हे जो तुवाह कसदिन देस ऊर हेयराम रेन बाहेर लेन आवो, काय तुवाह ज्या देसान आदिकार आपु।”
पुण अब्राहाम केयो, “हे मालीक यहोवा मी किहीक जाणु काय मी ज्या देसान आदिकारी रेह?”
बोगवान ताह केयो, “मार केरता तीन वोरह्यान एक वासड़ी, एने तीन वोरह्यान एक बोकड़ी, एने तीन वोरह्यान एक मेंड्रो, एने ओलान एक पिलो लियाव।” एने अब्राहाम ज्य आखो लेन, तान विचीम रेन दुय तुकड़ा केर दिनो एने तुकड़ाह आमने सामने मिल्यो, पुण ओलाह तो तुकड़ा नाह किऱ्यो। जेवी माह खाणारे चिड़ा जेनवेरान खाली पोर जापट्या, तेवी अब्राहाम ताह टांगाड़ दिनो।
जेवी दिह बुड़ने बाज गीयो, तेवी अब्राहामाह बोर निंद आवी; एने दिखो, जुलूम बिय एने मोटलो आंदारो ताह साव लेदो।3 तेवी बोगवान अब्राहामाह केयो, “ज्य जोरूड़ जाण ले काय तारी वोस पाराया देसा माय पारका बोणीन रेती, एने ता देसान माणहान पावोर बोण जाती; एने ता ताह चार होव वोरह्या वोर वेला केरावती;4 पोशा जा देसान ता पावोर रेती, ताह मी डेन्ड आपुह; एने तान पासाण ता मोटलो देन तारेन लेन निकलीन आवती।5 तु ते तारा मुरेल डायडाया माय हुकेच बेचकाय जाहे, एने तुवाह पुरा डायावाराम बुजती। पुण चार पिढीन पासाण ता पोशा न्या आवती : काहाकाय एमोरी माणहान पाप पुरो नाह इयेल सोतो।”
एने ओहलो एनो काय, जेवी दिह बुड़ गीयो एने जुलूम आंदारो सावाय गीयो, तेवी एक बुलो ता मारेल जेनवेरान पुड़ेल देड़ान दुयू टुकड़ाम लागतो दुवाड़ो एने आक्ठो बोणीन निकली गीयो। ते दिह यहोवा बोगवान अब्राहामा हिऱ्यो ज्यी वाचा बांद्यो, मिस्र देसान मोठली नेदी वोर फरात नावान मोठली नेदी वोर जोलो देस हे,6 मतलब केनियो, कनिज्जियो, कदमोनियो, हित्ती, परिज्जी, रपाइयो, एमोरी, कनानी, गिर्गाशी एने यबूसी माणहान देस, मी तारी वोसीह आपुह।
Source notes (6)
- Cross-reference रोमीयो 4:18; इब्रानियो 11:12
- Cross-reference रोमीयो 4:3; गलातीयो 3:6; याकुब 2:23
- Cross-reference अयुब 4:13-14
- Cross-reference निर्गमन 1:1-14; प्रेरितान काम 7:6
- Cross-reference निर्गमन 12:40-41; प्रेरितान काम 7:7
- Cross-reference प्रेरितान काम 7:5
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.