Nahali Bible
निर्गमन 15:2
Verse 2 is marked below, with the whole chapter around it. Read from the start
मुसान गीत
तेवी मुसा एने इस्राएली माणहे यहोवान केरता ज्य गीत गाया :
“मी यहोवान गीत गावुह, काहाकाय तो मोटलो काम किरेल हे;
तो गोड़ा बेलुस गोड़ा पोर बोहणाराह बी तो देरीयाम वोयाड़ दियेल हे।1
यहोवा मार ताकेत एने बोजेन गावणेन कारेण हे,
एने तोच मारो सुटकारो बी ठेरानो; मारो बोगवान तोच हे,
मी ताच ने बोक्ती केरूह, मी तान केरता रेणेन जागो बाणावुह,
मार डायलान बोगवान तोच हे, मी तान बोड़ायीन गीत गावुह।2
बोगवान लेड़नार हे;
तान नाव यहोवा हे।”
तो फिरोनान टांगा एने सिपायाह देरीयाम जुगार दियेल;
एने तान हाजाम रेन हाजा टांगा एने आदिकारीह बी रातला देरीयाम बुड़ाव दिनो।
उंडालो पाणी ताह ढाप लियेल;
ता देगड़ान गेत उंडाला माय बुड़ गीया।
एय यहोवा, तार जिवड्यो आथ सेक्तीम मुठलो ताकेत वालो हे,
यहोवा तार जिवड्यो आथ दुसमोनाह केच्या केच्या वाल दिथे।
तु तार विरोदीह तार मोठली ताकेत केरीन पाड़ दिथे;
तु तार राग बोड़कावणे, एने ता कूटारान गेत हेलगी जाणु।
तारा नाकान फुकी केरीन पाणी एक्ठो एय गीयो,
पाण्यान दार डिग वुलीलचे थोब गीयो;
देरीयान विचीम उंडालो पाणी जोम गीयो।
दुसमोन कियेल इतो, “मी पासाण जाह, मी जायीन देरूह,
मी लुटीन माल वाट लेह, ता केरीन मार जीव बोराय जाय।
मी मार तालवारी केरीन मार आथे ताह खेतेम केर देह।”
तु तार हाहीन वारो लागाड़ील, तेवी देरीयो ताह डाप लियेल;
एने ता बिवाड़े ओहला पाण्या माय लोड़ान गेत बुड़ गीया।
“एय यहोवा, देवताम रेन तार गेत कुण हे? तु
ते चोखालान कारेण मुटलो ताकेतवालो हे,
एने तार बोक्ती केरनारान केरता बिय ने लायेक हे,
एने बोंगलाय ओहला काम केरनार हे।
तु तार जीवड्यो आथ ओंगाण किऱ्यो, एने देरती ता दुसमोनाह गिल जायेल हे।
तार गीण केरीन तु तार सोड़वेल माणहाह लेन चालनो,
तार ताकेत केरीन तु ताह तार चोखाला रेणेन जागाम लेन जाणे बाज रिनोह।
देसा देसान माणहे होमलीन कापती;
पलिश्ती देसान माणहे बिय गीया।
एदोमान आदिकारी बिती;
मोआब ने मुखी थुर थुर कापती;
एने आखा कनान माय रेणारान मोन पिगेल जाती।
तार ताकेत देखीन ता माणहे बिय जाती,
एने बोगवानान माणहे मतलब तु सोड़येल ता माणहे निकलीन ती पार जात रेती।
ताह वोर ता तार माणहाह बिगेर काय केरी,
देगड़ान गेत एकुच जागी उब रेती;
तु ताह पोचाड़ीन तारा खाज जागान बोयड़ा पोर मिलहे,
ज्यो तोच जागो हे, एय यहोवा जाह तु तार जागान केरता बाणायेल हे,
एने तोच चोखालो जागु हे, जाह एय मालीक, तु सोतास बाणायेल हे।
यहोवा जेलेम जेलेमक्योस राज किरते रेय।”
मरीयम ने गीत
ज्य गीत गावणेन कारेण ज्य हे, काय फिरोन राजान गोड़ा टांगा एने ता पोर बुहरियेल ता हिऱ्यो देरीयान विच माय जात रेना, एने यहोवा ता पोर देरीयान पाणी फिराव दिनो; पुण इस्राएली देरीयान विच माय रेन कोयड़ी बुय पोर चालीन ती पार गीया।
तेवी हारूनान बोणीख मरीयम नावान जाणकारनी आथाम डफ लेदी; एने आख्यु बायकु डफ लेन नाच तेन तीन पासाण चाल देन्यु।3 एने मरीयम त्यु हेरी ज्य गीत गावतीन गियी, “यहोवान गीत गावो, काहाकाय तो मुठलो ताकेत वालो ठिरेल हे; गोड़ा बेल ता पोर बुहरियेल ताह तो देरीयाम जुगार दियेल हे।”
कोड़वो पाणी
तेवी मुसा इस्राएली माणहाह रातला देरीयान ओंगाण लेन गीयो, एने ता शुर नावान जेंगलाम आवा; एने जेंगलाम जाणे बुखीत तीन दिह वोर पाणी नाह जुड़नो। एने ओवता मारा नावान एक जागे पोचना, तावालो पाणी कोड़वो एतो, तो पाणी ता पिय नाह सेकना; केरीन ता जागान नाव मारा मिलेल। तेवी ता इही किन मुसा उगे कुर कुर केरने बाज गीया, “एवी आमु काय पिज्यो?” तेवी मुसा बोगवाना फाय विन्ता किऱ्यो, एने बोगवान ताह एक जाड़ देखाड्यो, एने जेवी तो पाण्याम टाक्यो, तेवी तो पाणी मिठालो एय गीयो।
तास जागा पोर यहोवा तान केरता एक रिती एने नेम बाणायो, एने तास तो ज्य किन तान पारेख किऱ्यो, “केदी तु तार बोगवान यहोवान वचन मोन लागाड़ीन हुमेल हे, एने जो तान नेजरीम ठिक हे तोच किरहे, एने तान उकुमा पोर कान लागाड़हे एने तान आखी रितीह मानहे, ताहार जोली बेमारी मी मिस्री माणहा पोर मुकलेल हे ताम रेन एक बी तार पोर नाय मोकलु; काहाकाय मी तुवाह हुदारनार यहोवा हे।”
तेवी ता एलीम नावान जागा माय आवा, ता पाण्यान बारा खुदोर एने सेत्तेर खजुरान जाड़े एता; एने ताहरीक ता पाण्यान जागे पाड़ावो केऱ्या।
Source notes (3)
- Cross-reference प्रकाशितवाक्य 15:3
- Cross-reference यशाया 12:2; बजन 118:14
- Cross-reference 1 शमुएल 18:6
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.