Nahali Bible
निर्गमन 12
फसहान तिवार
पुशो बोगवान मिस्र देसा माय मुसा एने हारूनाह केयो, “ज्य मोयनो तुमरी केरता सालान पेल्लो मोयनो रेय। इस्राएलान आखी मोंडलीह इहकेरीन किवो, काय ज्यास मोयनान दोहवे दिह तुमू जान तान डायलान गेराणान होस, गेरान केरता एक एक मेंड्रो लेय मिलो। एने केदी एगदान गेरा माय एक मेंड्राह खाणेन केरता माणुह कोम एय, ते तो तान आखाम रेन आहने रेतेय ता हेऱ्यो जेनवेराह गेणीन एक मेंड्रो लेय मिले; एने तुमू एक एक जाणान खाणान गेत मेंड्रान इसाब किरज्यो। तुमरो मेंड्रो निर्दोस एने एक वोरह्यान बुकोड़ रेणे जुवी, एने तो तुमू मेंड्राह रेन लिवो नाहते बोकड्याम रेन।1 एने ज्या मोयनान चोवदा दिह वोर ताह होमालीन एने जीवतालोच मिलज्यो, एने ते दिह हांज पोर इस्राएलान आखी मोंडलीन माणहे ताह बोली केरती। तेवी ता माणहे ता मेंड्रान लुय थोड़ीक लावीन जा गेरा माय ता खाण्या हेते, ता गेरान बायणान दुय उगे डेलीन सेंडा पोर लागाड़ देती। एने ता तान माह तीस राती आक्ठा माय बुंजीन बिगेर खमीरान रूटो एने कोड़वा बाजीपाला हेऱ्या खाती।2 ताह मुंड, पाय, एने आतड्या हेऱ्या आक्ठा माय बुंजीन खाज्यो, काचालो नाहते पाण्याम चुड़ावीन मा खाहो। एने ता माय रेन थोड़ोक बी वेगोस वोर मा रेणे दिहो, एने केदी थोड़ोक वेगोस वोर वोच बी जाय, ते ताह आक्ठा माय हेलगाड़ दिज्यो। एने ताह खाणेन ज्यी रिती हे; कोमेर बांदिन पायाम चाट्या पिरे, एने आथाम डेंगी लेन ताह तावणी देन खाज्यो; तो ते बोगवानान फसह तिवार रेय।”3
“काहाकाय ती राती मी मिस्र देसान विच माय लागतो जाह, एने मिस्र देसान काय माणुह काय जेनवार, आखा पेल पायदा इयेल ताह मार टाकुह; एने मिस्र देसान आखा देवाह बी मी डेन्ड आपुह; मी ते यहोवा हे।4 एने जा गेरा माय तुमू रिहो ता पोर ती लुय तुमरी केरता निसाणी ठेराय; मतलब मी ती लुयीह देखीन तुमूह सोड़ देह, एने जुलबुखे मी मिस्र देसान माणहाह मारूह, तुलबूखी ती पिढ़ा तुमू पोर नाय आवी एने तुमू खेतेम नाय इहो।5 एने तो दिह तुमूह एर केरावण्यो दिह ठेराय, एने तुमू ताह यहोवान केरता तिवार केरीन मानज्यो; तो दिह तुमरी पिढ्यु माय तिवार कायेम मोणाया किरज्यो।”
बिगेर खमीरान रूटो
उवतो बोगवान पुशो केयो, “सात दिह वोर बिगेर खमीरान रूटो खाज्यो, ता माय रेन पिल्लेस दिह आपणा आपणा गेराम रेन खमीर जुगार दिज्यो, पुण जो पिल्ले दिह रेन सातवे दिह वोर काल्लीस बी खमीरवाली वोस्तु खाय, तो जेनवार इस्राएली माय रेन बाहेर निकालाय जाय। पिल्ले दिह एक चोखालो पुंचो मिलो, एने हातवे दिह बी एक चोखालो पुंचो मिलो। ता दुय दिह्या माय काल्लोस काम नाय केरने जुवी; पुण तुमू खाणो बोणाव सेकतेह। केरीन तुमू बिगेर खमीरान रोटान तिवार वालज्यो, काहाकाय ते दिहच मी तुमूह टुलो टुलो केरीन मिस्र देसा माय रेन काड़ील हे; इहकेरीन तो दिह तुमरी पिढ्यु माय जेलेमकी रिती सोमजीन मानती।6 पेल्ला मोयनान चोवदा दिह्यान हांज देरीन ते एकविसवा दिह्यान हांज वोर तुमू बिगेर खमीरान रूटो खाज्यो। सात दिह वोर तुमरा गेरा माय काईस बी खमीरान वोस्तु नाय रेणे जुवे, काहाकाय जो कुण काह खमीरवाली वोस्तु खाय, उवतो तो देसावालो रेय नाहते पाराया देसावालो रेय, तो जेनवार इस्राएली माणहा माय रेन बाहेर केराय जाय। काल्ली बी खमीरी वोस्तु मा खाहो; तुमरा सोब गेरा माय बिगेर खमीरान रूटो खाया किरज्यो।”
पिल्लो फसह ने तिवार
तेवी मुसा इस्राएलान आखा डायलाह हादिन केयो, “तुमू आपणा आपणा गेराणान ईसाबे एक एक मेंड्रो आंगे केर मिलो, एने फसहान तिवारा माय जेनवार बोली किरज्यो। एने तान लुय जा वाटकाम रेय, ता माय जुफान एक गुमसो बुड़ावीन ता माय वाली लुयी केरीन बायणान डेलीन सेंडा पोर एने दुय उगे जारीक लागाड़ दिज्यो; एने वेगास वोर तुमू माय रेन कुण बी गेरान बाहेर मा निकेलहो। काहाकाय यहोवा देसान विच माय लागतो मिस्री माणहाह मारतेन जाय; केरीन जा जा तो डेलीन सेड़ा पोर, एने तान दुय उगे ती लुयीह देखी, ते तो ता बायणाह सोड़ देय, एने खेतेम केरनाराह तुमरा गेरा माय मारनेन केरता रिगणे नाय देय।7 ओवता तुमू जी रितीह तुमरे एने तुमरी वोसीन केरता जेलेमकी रिती सोमजीन मानज्यो। जेवी तुमू ता देसा माय जाह यहोवा तान कियेल तिहे तुमूह आपी, जाहो, तेवी तिहेस केरीन तुमू ज्यी रितीह केऱ्या किरज्यो। एने जेवी तुमरा सोरा पोऱ्या तुमूह फुसती, ‘ज्यी रिती आपु काहा केरतेह, एने ज्यान मतलब काय हे?’8 तेवी तुमू ताह जो जापाप आपज्यो, यहोवा जो मिस्री माणहाह मारने बुखीत मिस्र माय रेणारे आपु इस्राएली माणहान गेराह सोड़ीन आपणा गेराह वोचाड़ील, केरीन तान फसहान तिवारान ज्यी बोलीदान केरनु।”
तेवी इस्राएली माणहे मुंड नेचो केरीन वोंद्या। तेवी ता इस्राएली माणहे जात रेना, एने जो उकुम यहोवा मुसा एने हारूनाह आपेल इतो, तान गेतुच केऱ्या।
दाहवी पिढ़ा पेल्ला सोरान मोत
ओहलो एनो काय आरदी राती यहोवा मिस्र देसा माय राजगादी पोर बोहणार फिरोनाह देरीन ते जेलीम देरायेल आरापीन सोरा वोर आखान पेल्ला सोरा, एने जेनवेरान वोर सोब पेल्ला पिलाह वोर मार दिनो।9 तेवी फिरोन एने तान सोब आदिकारी रातीस उठ बोठा; काहाकाय आखा मिस्र देसा माय आयड़ो बियड़ो सुट रियेल इतो, एने काल्लो ओहलो गेर नाह वोचनो जा माय कुणीन पेल्ला सोरा मोरना निह एती। तेवी फिरोन रातीस मुसा एने हारूनाह हादिन केयो, “तुमू इस्राएली हेऱ्या मारा माणहान विची माय रेन निकेल जावो; एने तुमू केतेह तिहेस केरीन जायीन बोगवानान बोक्ती किरो। एने तुमू कियेल तिहकेरीन तुमरा मेंड्रा बोकड्या एने गाय बुयेल आरही लेन जावो; एने जाणे बुखीत माहु बोरकेत आपती जावो।”
एने मिस्री माणहे केताला, “आमु ते आखा मोर जाईल हेते।” ता इस्राएली माणहा पोर दाबाव टाकीन केया, “ज्या देसा माय रेन चेटचेट निकेल जावो, नाहते आमु मोर जाहु।” तेवी ता तान कुहणीन फिटाह बिगेर खमीरान फाड़का माय बांदिन जान तान खांदा पोर टाक लेदा। इस्राएली माणहे मुसा कियेल तिहे मिस्री माणहा फाय रेन होना चांदीन गेयणो एने फाड़का मांग लेदा।10 एने यहोवा बोगवान मिस्री माणहाह तान माणहा पोर गिणाता किऱ्यो काहाकाय ता जो काय ता फाय मांग्या तो आखो ता ताह आप्या। एने इहकेरीन इस्राएली माणहे मिस्री माणहाह लुट लियेल।11
इस्राएली माणहे मिस्र देस सोड़नो
तेवी इस्राएली माणहे रामसेस माय रेन सुक्कोत गावा माय जात रेना, एने बायकु सोरा पोऱ्याह सोड़ीन ता कोमीत कोमी सोव लाख पाये चालनारा एदमी एता।12 ता हेऱ्या थोड़ाक बिगेर इस्राएली माणहे बी गीया, एने मेंड्रा बोकड्या, गाय बुयेल, एने जुलूम होवटा जेनवार बी तान आरही गीया। एने जो कुहणील फिट ता मिस्र माय रेन आरही लायेल एता, तान ता बिगेर खमीर लागाड़ील रोटा बाणाया; काहाकाय ता मिस्र माय रेन ओहला तावणी केरीन निकालील एता, एने ताह टेम बी नाह जुड़नो काय वाटी खाणेन काह बाणाव लेय, एने केरीन तो कुहणेल फिट बिगेर खमीर चोपड़ेल इतो।
एने इस्राएली माणहे मिस्र देसा माय चार होव तीस वोरह्या वोर रियेल एता।13 एने ता चार होव तीस वोरह्या वितीन, ठिक ते दिह यहोवान आखा माणहे मिस्र माय रेन निकेल गीया। यहोवा इस्राएली माणहाह मिस्र माय रेन काढ़ लावो, केरीन ती रात तान केरीन मान्नेन लायेक हे; ज्यी यहोवान तीस रात हे जीह पिढीन पिढ़ी वोर मान्नेन इस्राएली माणहान केरता जोरवरी हे।
फसह तिवारान नियम
पुशो यहोवा मुसा एने हारूनाह केयो, “तिवारान नियम ज्य हे; काय कुण बी परदेसी फसह ने बोलीदान नाय खाणे जुवी; पुण एगदो पावोर पोयशा केरीन वेचातो लियेल एय, एने तुमू तान खेतना केऱ्या एती, ताहार तो ताह खाय सेकी। पुण परदेसी एने मोंजर्या तो नाह खाय सेकते। तान खाणो एकुस गेरा माय रेणे जुवी; मतलब तुमू तान माहाम रेन जारीक बी बाहेर मा ली जाहो; बोली किरेल जेनवेरान काल्लोस आड़ मा तुड़हो।14 तिवाराह मान्नेन आखी इस्राएली मोंडलीन जोरवोरी हे एने केदी इखेह दिहरा देसावालो तुमू हेऱ्यो रेन यहोवान केरता फसहान तिवार वालने हुदेह, ताहार तो तान ता वाला आखा एदम्यान खेतना केरावी, एने तो तान आहने आवीन ताम बेलाय; तेवी तो इस्राएली माणहाह गेत गेणाय। पुण कुण बी बिगेर खेतनावालो एदमी ता माय रेन खाणे नाय जुवी। तान नेम देसावालान केरता एने तुमरी विच माय रेणारे दिहरा देसावाला दुयून केरता एकुस रेय।”15 ज्यो उकुम यहोवा मुसा एने हारूनाह आपेल इतो, तान होस आखा इस्राएली माणहे केऱ्या। एने ठिक तेदिहच यहोवा आखा इस्राएली माणहाह मिस्र देसा माय रेन काड़ ली आवो।
Source notes (15)
- Cross-reference लेव्यवस्था 22:19; 1 पतरस 1:19
- Cross-reference 1 कुरिंथीयो 5:7
- Cross-reference लेव्यवस्था 23:5; गिनती 9:1-5; 28:16
- Cross-reference गिनती 33:4
- Cross-reference इब्रानियो 11:28
- Cross-reference लेव्यवस्था 23:6-8; गिनती 28:17-25; मत्ती 26:17
- Cross-reference यहेजकेल 9:6; इब्रानियो 11:28
- Cross-reference व्यवस्था 32:7; यहोशु 4:6
- Cross-reference बजन 78:51; 105:36; 135:18; 136:10
- Cross-reference निर्गमन 3:22
- Cross-reference निर्गमन 3:21-22
- Cross-reference गिनती 33:5; 1:46
- Cross-reference उत्पत्ती 15:13; प्रेरितान काम 7:6; गलातीयो 3:7
- Cross-reference गिनती 9:12; योहान 19:36
- Cross-reference गिनती 9:14; 15:15; 16:29; लेव्यवस्था 24:22
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.