व्यवस्था 3

ओग ने राजाह आरेवणे

(गिनती 21:31-35)

1तेवी आपु फिरीन बाशान ने वाटे चेड़ीन आवा; एने बाशान ने ओग नावान राजा तान आखी सेना लेन आपणो सामनो केरनेन निकेल आवो, काय एद्रेई माय लेड़ाय केरी। 2पुण बोगवान माहु केयो, “ताह मा बिय; काहाकाय मी तान आखी सेनाह एने देसा हिऱ्योच तारा आथाम केर देथु; जिह केरीन तु हेशबोन माय रेणार एमोरीन राजा सीहोना हिऱ्यो किरेल इतो, तिहेच ता हिऱ्यो बी किरज्ये।”

3इह केरीन आमरो बोगवान यहोवा आखी सेना हिऱ्योच बाशान ने राजा ओगाह बी आपणा आथाम केर दिनो; आपु ताह न्या वोर मारती रेना काय ताम रेन कुण बी वोच नाह सेकनो। 4ती टेम माय आपु तान आखा हेयराह लेय लेदा, काल्लो बी उहलो हियोर नाह रेय गीयो, जाह आपु ता फाय रेन निह लेदा एती, इह केरीन बोगवान अर्गोबान आखो देस, जो बाशान माय ओगान राज माय एतो एने ता माय साठ हियोर एता, ताह आपणा होक माय लेय लेदा। 5ज्या सोब हियोर किल्‍ला वाला एता, एने तान उचालो बितड़ो, फाटेक, वाड़ एत्यु, एने ताह सोड़ीन बिगेर बितड़ावाला बी जुलूम हियोर एता। 6जिहकेरीन आपु हेशबोन ने राजा सीहोन ने हेयरा हेऱ्या किरेल एता, तिहेच केरीन न्या हेयरा हेऱ्या बी केऱ्या, मतलब आखा वुहेल हियोर बायकु एने सोरा पोऱ्या हेऱ्याच आखाह मार देना। 7पुण सोब पालन्या जेनवारे एने हेयराह लुटीन ताह मेल लेदा।

8इह केरीन आपु ती टेम माय यरदन नेदीन ज्यी पार रेणारे एमोरीन दुयू राजान आथा केरीन अर्नोनान खोदरा रेन हेर्मोन बोयड़ा वोर देस लेय लेदा। 9हेर्मोन बोयड़ाह सीदोनी माणहे सिर्योन, एने एमोरी माणहे सनीर केतेह। 10सापाट देसान आखा हियोर, एने आखो गिलाद, एने सल्का, एने एद्रेई वोर जा ओग ने राज्यान हियोर एता, आखो बाशान आपणा होक माय लेय लेदा। 11जा रपाई माणहे रेय जायेल एता, ताम रेन निस्तो बाशान ने राजा ओग रेय जायेल इतो,

तान खाटलो जो लोड़ान हे, तो अम्मोनीन रब्बाह हेयराम पुड़ेल हे, सादा एदम्यान आथान इसाब माय तान लाम्बाय नोव आथ एने चोवड़ाय चार आथान हे।

देसान जागान वाटणो

(गिनती 32:1-42)

12जो देस आपु ती टेम माय आपणा ताबाम लेदा तो ज्य हे, मतलब अर्नोन खोदरान दिड़े वाला अरोएर हियोर रेन लेन आखा हेयरा हेऱ्या गिलादान बोयड़ान देसान आदो ईसो, जाह मी रूबेनी एने गादीयोह आप दिनो। 13एने गिलादान वुचेल ईसो, एने आखो बाशान मतलब अर्गोब ने आखो देस जो ओग राजान राज माय एतो, ताह मी मनश्शेन आदा गेराणाह आप दिनो।

आखो बाशान ते रपाइयोन देस केवाथे। 14एने मनश्शे याईर गशुरी एने माकावासीन हिल वोर अर्गोब ने आखो देस लेय लेदा, एने बाशान हेयरान नाव तान नावा पोर रेन हब्बोतयाईर मेल्यो, एने तोच नाव आज वोर बुणेल हे।

15एने मी गिलाद देस माकीराह आप दिनो, 16एने रूबेनी एने गादीयोह मी गिलाद रेन अर्नोन खोदरा वोर देस आप दिनो, मतलब ता खोदरान विचीम तान हिल ठेरायो, एने यब्बोक नेदी वोर जो अम्मोनियोन हिल हे; 17एने किन्नेरेत रेन ते पिसगान आड़खा बुंदेन अरबान देरीयो वोर जो खारलो देरीयो बी केवाथे, अरबा एने यरदन नेदीन पुर्व उगेन आखो देस बी मी ताहच आप दिनो। 181

ती टेम मी ज्यो उकुम आप्यो, तुमरो बोगवान यहोवा तुमूह ज्यो देस आपेल हे काय ताह तुमरा आदिकार माय मिलो; तुमू सोब बाहदुर आथ्‍यार बांदिन तुमरा बाहख इस्राएलीन ओंगाण ओंगाण पार चालो। 19पुण तुमरा बायकु सोरा, एने जेनवारे जाह मी जाणथु काय ता जुलूम हेते, ता सोब तुमरा हेयराम जो मी तुमूह आपेल हे रेय जाय। 20एने जेवी यहोवा तुमरा बायहाक तोहलोच आराम आपी जिह केरीन तो तुमूह आपेल हे, एने ता देसान ता आदिकारी बोण जाय, जो तुमरो बोगवान यहोवा ताह यरदन पार आपी; तेवी तुमू बी आप आपणा होकान बुय पोर जो तुमूह आपेल हे, जाहो।

21उवतो मी ती टेम माय यहोशुह केयो, “तु तारा डोला केरीन दिखेल हे, काय तारो बोगवान यहोवा ज्या दुय राजाह हिऱ्यो काय काय किरेल हे; तिहेच केरीन यहोवा ता सोब राज्या हेऱ्यो केरी, जा माय तु पार इन जाहे। 22ताह मा बिहे, काहाकाय जो तुमरी उगे रेन लिड़न्यो हे, तो तुमरो बोगवान यहोवा हे।”

मुसा कनान देसाम जाय नाय सेकी

23तुलबुखे मी यहोवा से रावण्या केरीन विन्ता किऱ्यो, 24“एय मालीक यहोवा, तु तारा पावराह तारी बोड़ाय एने ताकेत वालो आथ देखाड़ने बाज रिनोह; हेरगा माय एने देरती पोर ओहलो काल्लो देवता हे, जो तार बाराबोर काम एने ताकेत वाला कामे केर सिके? 25केरीन माहु ती पार जाणे दे, एने यरदन नेदीन पार ता हाजाला देसाह, तो हाजालो बुयड़ो एने लबानोनाह बी देख सेकु।”

26पुण यहोवा, तुमरी कारेण मार हिऱ्यो रागाय गीयो, एने मारी विन्ता नाह हुमल्यो; पुण यहोवा माहु केयो, “बास केर, ज्या बाराम पुशो केदी मार हेऱ्यो वातु मा किरहे। 27पिसगा बोयड़ान चुटा पोर चेड़ जा, एने पुर्व, पश्चिम, उत्तर, दक्षिण चारो उगे निजेर टाकीन ता देसाह देख ले, काहाकाय तु यरदन नेदीन पार जाय नाय सिकहे। 28एने यहोशुह उकुम आप, एने ताह ईमोत आपीन पाको केर; काहाकाय ज्या माणहान ओंगाण ओंगाण तोच पार जाय, एने जो देस तु दिखहे ताह तोच तान सोतान ईसो केराव देय।”

29केरीन आमु बेतपोरान दिहरी उगे आड़वाया माय थोब रेना।