Leidung 52

Lidila kemak Tinggwang keku de bam muila

Kenlang leibungkekwame ziemne; David gu maschil ge; Edomme ge Doeg Saul da gwang nah ranggai, nah pe da rang eh, “Ahimelech kiga David gwang bam dida.”

1Nnui kengkieng minadung, daitei nnui mide teikeherei kecu gade hegie lano?

Tinggwang samkak kelu kenlum au tingnai ramsang gwang la.

2Nnui mleu mariemdung kengkap au hegeu pemui nzautau kebam nzwa, mide kecwa ta teibam.

3Nnui keyibe swade kesia nnui suila

nah makesangbe swade kenret kerangbe. Selah

4Nnui mikedame de teimsia di kela samdung pelane nnui suila,

nnui mleu mide kecwabe.

5Cinzwa eh Tinggwang de nnuide kelungta ziemne ngkapdi zie;

pa nnui de ngngwa hang dizie nah paiki gade teu mpet dizie

nah pa keringme deu gade nnuide keugi dizie. Selah

6Makesangme liede cide ngau nah hing zie;

penui pecu nui eh rang zie,

7“Pielo, mina aipaude Tinggwang de ngngei luma,

dede pa pe mahei kekiee kebam de nlumla,

nah pa au ngkieng pa kedame de ngkap kecudau.”

8Dede a ziemne au, Ih au Tinggwang kiga kemdiak Olive bang ge nzwa lie;

Ih Tinggwang samkak kenlum de kelungta nah kelungta nlum lazie.

9Ih ncu rünne hetwa peula mui zie nang tei kegai dungde ziemne.

Ih n zi ziemne kwabam zie, kedanemene cide au yi kecune,

ncu kenlum medung kebam gade.