Munda Bible
ବୁଗିନ୍ ଇନିତୁ 27:17
Verse 17 is marked below, with the whole chapter around it. Read from the start
ଆମ୍ ଗାପା ନାଗେନ୍ତେ ଆଲମ୍ ମାରାଙ୍ଗ୍ କାଜି କାଜିୟା, ଚିଆଃଚି ଆମ୍ କାମ୍ ସାରିୟା ମୁସିଙ୍ଗ୍ରେ ଚିନାଃକ ହବାୱା।
ଏଟାଃ ହଡ଼ ଆମାଃ ମାନାରାଙ୍ଗ୍ ରିକାଏକା, ମେନ୍ଦ ଆମାଃ ମଚା ଏନ୍ଲେକା ଆଲକାଏ ରିକାଏକା, ମିହୁଡ଼୍ କା ଚିହ୍ନାର୍ ହଡ଼ ରିକାଏକା, ମେନ୍ଦ ଆମାଃ ମଚା ଆଲକାଏ ରିକାଏକ।
ଦିରି ଓଡ଼ୋଃ ଗିତିଲ୍ ପୁରାଃ ହାମ୍ବାଲ୍ଆଃ, ମେନ୍ଦ ଡଣ୍ଡରାଃ ରିସ୍ମି ଏନ୍ ବାରାନାଃ ହେତେ ପୁରାଃ ହାମ୍ବାଲ୍ ତାଇନାଃ।
ରିସ୍ମି ବରୱାନ୍ ଓଡ଼ୋଃ ମାରାଙ୍ଗ୍ ଟୁଡା ଦାଆଃ ଲେକ୍ନାଃ ତାନାଃ, ମେନ୍ଦ ହିସିଙ୍ଗା ଆୟାର୍ରେ ଅକଏ ତିଙ୍ଗୁ ଦାଡ଼ିୟା ?
ଉକୁକାନ୍ ଦୁଲାଡ଼୍ ହେତେ ବାହାରିରେ ଏଗେର୍ତେୟାଃ ବୁଗିନ୍ ତାନାଃ।
ଦୁଲାଡ଼୍ତାନ୍ନିୟାଃ ଘାଅ ପାତିୟାର୍ରଃ ଲେକାନାଃ ତାନାଃ, ମେନ୍ଦ ବାଇରିୟାଃ ଚଅଃ ପୁରାଃଗିଆ।
ଲାହିଦ୍ ବିୟାକାନ୍ ହଡ଼କେ ହୁରୁମ୍ସୁକୁ ହିଲାଙ୍ଗ୍ ଆଟ୍କାରିୟା, ମେନ୍ଦ ରେଙ୍ଗେଃ ହଡ଼କେ ମେହେର୍ ତେୟାଃ ହଗି ହେଡ଼େମ୍ ଆଟ୍କାରିୟା।
ଅକନ୍ ହଡ଼ ଆୟାଃ ଠାୟାଦ୍ ବାଗିକେଦ୍ତେ ହନର୍ ବାଡ଼ାଃଏ, ଇନିଃ ଆପ୍ନାଃ ଥକା ହେତେ ଆଫିର୍ତାନ୍ ଅଡ଼େ ଲେକାନ୍ ତାନିଃ।
ସୁନୁମ୍ ଓଡ଼ୋଃ ବୁଗିନ୍ ସହାନ୍ତେ ମନ୍ସୁରୁଦ୍କେ ରାସିକା ରିକାଃଏ, ଏନ୍ଲେକା ଗାତିରାଃ ହେଡ଼େମ୍ ଉନୁଦୁବ୍କାଜିତେ ରାସିକା ରିକାଃଏ।
ଆପ୍ନାଃ ଗାତି ଓଡ଼ୋଃ ଆପୁରାଃ ଗାତିକେ ଆଲମ୍ ବାଗିୟା, ଓଡ଼ୋଃ ଆମାଃ ସାଙ୍କାଟ୍ ସାମାଏରେ ଆପ୍ନାଃ ହାଗାରାଃ ଅଡ଼ାଃତେ ଆଲମ୍ ସେନାଃ। ସାଙ୍ଗିନ୍ରେ ତାଇନ୍ତାନ୍ ହାଗା ହେତେ ହେପାଦ୍ରେ ତାଇନ୍ ତାନ୍ ହୋପର୍ଜାପାଃନିଃ ବୁଗିନ୍ ତାନିଃ।
ହେ ଆଇଁୟାଃ ହନ୍, ସେଣାଁନ୍ ହବାଅଃମେ ଓଡ଼ୋଃ ଆଇଁୟାଃ ମନ୍ସୁରୁଦ୍କେ ରାସିକା ରିକାଏମେ, ଏନାରେ ଆଇଙ୍ଗ୍ ଆଇଁୟାଃ ନିନ୍ଦା ରିକାତାନ୍କକେ କାଜିରୁହାଡ଼୍ ଦାଡ଼ିୟାଇଙ୍ଗ୍।
ମିଆଦ୍ ଚାତୁର୍ ହଡ଼ ସାଙ୍କାଟ୍ ନେଲ୍କେଦ୍ତେ ଉକୁନ୍ତାନା, ମେନ୍ଦ କା ସେଣାଁନ୍ ହଡ଼ ଆୟାର୍ତେ ସେନାଃ ଓଡ଼ୋଃ ଦୁକୁ ନାମାଃଏ।
ଅକଏ କା ଚିହ୍ନାର୍ ହଡ଼ ନାଙ୍ଗ୍ ଜିମାଅଃ ତାନାଏ, ଇନିୟାଃ ଲିଜାଃ ଇଦିମେ ଓଡ଼ୋଃ ଅକଏ କା ଚିହ୍ନାର୍ କୁଡ଼ି ନାଙ୍ଗ୍ ଜିମାଅଃ ତାନାଏ ଇନିଃକେ ଗାହାଁନା ଦହିମେ।
ଅକନ୍ ହଡ଼ ପୁରାଃ ସେତାଃ ଇଦାନ୍ରେ ଆପ୍ନାଃ ହୋପର୍ଜାପାଃନିଃକେ କାଉରି କେଦ୍ତେ ଆଶିଷ୍ ଏମାଇୟା, ଇନିୟାଃ ଏନ୍ କାମି ସାର୍ପାଅ ତାନ୍ ଲେକା ହବାଅଃଆ।
ପୁରାଃ ଦାଆଃ ଗାମାସାଃ ସାମାଏରେ ସବେର୍ ଇମ୍ତା ଦାଆଃ ଟିପାଃ ଓଡ଼ୋଃ ମିଆଦ୍ ଏପେରାଙ୍ଗ୍ କୁଡ଼ି ବାରାନାଃ ମିଆଦ୍ଗି ତାନାଃ। ଅକଏ ଏନାକେ ରକାଅ ତାନାଏ, ଇନିଃ ହୟକେ ରକାଅୟା ଓଡ଼ୋଃ ଆୟାଃ ଜମ୍ସାଃରେୟାଃ ତିଃଇ ଚେତାନ୍ରେ ଉୟୁଗଃଆ।
ଜେ'ଲେକା ମେଡ଼େଦ୍ ମେଡ଼େଦ୍କେ ଲେସେର୍ ରିକାଏ, ଏନ୍ଲେକା ହଡ଼ ଆପ୍ନାଃ ଗାତିରାଃ ମେଦ୍ମୁହାଁଡ଼୍କେ ତେଜ୍ ରିକାଏ।
ଅକଏ ଲଆ ଦାରୁକେ ଜାତ୍ନାଅ ତାନା, ଇନିଃ ଏନାରାଃ ଜ ଜମେୟାଁ ଓଡ଼ୋଃ ଅକଏ ଆପ୍ନାଃ ଗମ୍କେକେ ମାନାତିଙ୍ଗ୍ ତାନାଏ, ଇନିଃ ମାଇନ୍ ନାମେୟାଁ।
ଜେ'ଲେକା ଦାଆଃରେ ମେଦ୍ମୁହାଁଡ଼୍ରାଃ ଉମ୍ବୁଲ୍ ନେଲଆଃ, ଏନ୍ଲେକା ହଡ଼ରାଃ ମନ୍ସୁରୁଦ୍ ହଡ଼କେ ଉଦୁବ୍ ରିକାଏ।
ଜେ'ଲେକା ପାତାଲ୍ ଓଡ଼ୋଃ ଜୀଅନ୍ ଠାୟାଦ୍ ଚିଉଲା କା ପେରେଜଃଆ, ଏନ୍ଲେକା ହଡ଼ରାଃ ମେଦ୍ ଚିଉଲା କା ପେରେଜଃଆ।
ଜେ'ଲେକା ରୁପା ଓଡ଼ୋଃ ସୋନାକେ ଭାଟିରେ ସେଙ୍ଗେଲ୍ତେ ଫାର୍ଚି ରିକାନାଃ, ଏନ୍ଲେକା ହଡ଼ରାଃ ମାଇନ୍ତେ ବିଡ଼ାଅ ହୁଇନାଃ।
ଆମ୍ ଗହମ୍ଲଃ ଡଣ୍ଡକେ ଢିଙ୍କିରେ ରୁଡ଼ୁଙ୍ଗ୍ ରେୟଗି, ଆୟାଃ ଡଣ୍ଡତେୟାଃ କା ସେନାଃ।
ଆମ୍ ଆପ୍ନାଃ ମିଣ୍ଡି ଗୋଟ୍ରାଃ ଦାସାକେ ସାରିନାଙ୍ଗ୍ ଜାତାନ୍ ଇଦିମେ ଓଡ଼ୋଃ ଆପ୍ନାଃ ଜାଁତୁକଆଃ ଝୁଣ୍ଡ୍ ବୁଗିଲେକା ଧ୍ୟାନ୍ ରିକାଏମେ। ଚିଆଃଚି ଖୁର୍ଜି ଜାନାଅ କା ତାଇନାଃ ଓଡ଼ୋଃ ମୁକୁଟ୍ ଚିନାଃ ପିଢ଼ି ପିଢ଼ି ଜାକେଦ୍ ତାଇନାଃ ? ତାସାଦ୍କେ ଇର୍ଲେରେ ନାୱା ତାସାଦ୍ ନେଲଃଆ ଓଡ଼ୋଃ ବୁରୁକରେ ତାସାଦ୍ ହୁଣ୍ଡିକଆଃ। ମିଣ୍ଡି ହନ୍କ ଆମ୍କେ ଲିଜାଃ ଏମାମେୟା ଓଡ଼ୋଃ ଆମାଃ ମେରମ୍ ଲୟଙ୍ଗ୍ରେୟାଃ ଗନଙ୍ଗ୍ ଲେକା ଏମାମେୟା। ଓଡ଼ୋଃ ମେରମ୍କଆଃ ତଆ ଆମାଃ ଓଡ଼ୋଃ ଆମାଃ ଅଡ଼ାଃରେନ୍କଆଃ ଜମେୟାଁଃ ନାଗେନ୍ତେ ପୁରାଃଗି ହବାଅଃଆ, ଓଡ଼ୋଃ ଆମାଃ କାମ୍ଡ଼ିକ ନାଙ୍ଗ୍ ଜୀଦାନ୍ ବିତାଅଃ ତାନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.