Munda Bible
ଯିଶାୟ 57
ଇସ୍ରାଏଲ୍ରାଃ ମୁରୁତ୍ ସେୱା
ଧାର୍ମାନ୍ ହଡ଼ ଜିୟନଃତାନାଏ ଓଡ଼ୋଃ ଏନ୍ କାଜିରେ ଜେତାଏୟାଃ ମନ୍ରେ ଦାୟା ହିଜୁଃତାନା। ଧାରାମ୍ ହରାରେ ସେସେନ୍ ହଡ଼କ ଇଦିୟଃତାନା। ଓଡ଼ୋଃ ଧାର୍ମାନ୍ ହଡ଼କ ହିଜୁଃ ସାଙ୍କାଟ୍ଏତେ ଇଦିୟଃତାନାକ, ନେଆଁ ଜେତାଏ କାକ ଆଟ୍କାର୍ଉରୁମ୍ ତାନା। ବୁଗିନ୍ ହରାରେ ସେସେନ୍ତାନ୍କ ସୁକୁତେ ବଲତାନା, ଇନ୍କୁ ଗନଏଃରେ ସୁକୁ ନାମେତାନା।
ହେ ନାଜମ୍କୁଡ଼ିରାଃ ହନ୍କ, ହଡ଼୍ମରେୟାଃ ଏତ୍କାନ୍ କାମି ରିକାତାନ୍ ହନ୍କ, ବେଶ୍ୟା ଓଡ଼ୋଃ ଆପାଙ୍ଗିର୍ କାମିତାନ୍ ହନ୍କ, ହେପାଦ୍ତେ ହିଜୁଃପେ। ଅକଏକେ ଆପେ ଲାନ୍ଦାଇତାନା ? ଆପେ ଅକ ସାଃରେ ମେଦ୍ମୁହାଁଡ଼୍ କେଦ୍ତେ ଜିଲିଙ୍ଗ୍ଗି ଜାଗାର୍ ତାନାପେ ? ଚିୟାଃ ଆପେ କା ଧାର୍ମାନ୍ରେନ୍ ହନ୍କ ଓଡ଼ୋଃ ହସଡ଼ରେନ୍ କିଲିକ ତାନ୍ପେ ? ଆପେ ସବେନ୍ ଅଲୋନ୍ ଦାରୁ ପୁରାଃ ତାଇନ୍ତାନ୍ ଥାଲାରେ ଓଡ଼ୋଃ ହାରିୟାର୍ ସାକାମ୍ତେ ପୁରାଃଗି ତାଇନ୍ ଦାରୁ ଥାଲାରେ ହଡ଼ମ ରେୟାଃ ଏତ୍କାନ୍ କାମି ରିକା ନାଗେନ୍ତେ ପୁରାଃଗି ସାନାଙ୍ଗ୍ତାନା। ଆପେ ଆପେୟା ହନ୍କକେ ଟାପୁରେ ଓଡ଼ୋଃ ସେରେଙ୍ଗ୍ କରେ ଦାଣେଁକ ଏମାକ ତାନା। ଟାପୁରେୟାଃ ଚିକାନ୍ ଦିରି ଥାଲାରେ ତାଇକାନ୍ ମୁରୁତ୍କ ଇନ୍କୁ ଆପେୟାଃ ହିସା ଓଡ଼ୋଃ ଆକ୍ତେୟାର୍ ହୁଇନାଃ। ଓଡ଼ୋଃ ଇନ୍କୁ ନାଗେନ୍ତେ ଆପେ ନୁଏଁ ଦାନ୍ ଦୁଲାକାଦା, ଦାଣେଁ ରାକାବାକାଦା। ଚିୟାଃ ନେ ସବେନାଃ ନାଗେନ୍ତେ ଆଇଙ୍ଗ୍ ସୁକୁଆଃ ? ଆମ୍ ମିଆଦ୍ ସାଲାଙ୍ଗି ଓଡ଼ୋଃ ଚାକାର୍ ବୁରୁରେ ଆମାଃ ଡିସ୍ନା ଲିଜାଃ ଆଟେଦ୍ କାଦା। ଏନ୍ତାଃରେ ଆମାଃ ଦାଣେଁ ସବେନାଃକେ ରାକାବ୍ ନାଗେନ୍ତେ ସେନଃତାନା। ଆମାଃ ଦୁହାର୍ ଓଡ଼ୋଃ ଚାଉଖାଟ୍ ରେୟାଃ ତାକ୍ତା ଚେତାନ୍ରେ ଆମ୍ ସାଅଁସାର୍ ହଡ଼କଆଃ ମୁରୁତ୍କକେ ଦହକାଦ୍କଆ। ଆମ୍ ଆଇଙ୍ଗ୍କେ ବାଗିକେଦ୍ତେ ଏଟାଃ ନିଃତାଃରେ ମାରାଙ୍ଗ୍ୟେଁନ୍ ନାଗେନ୍ତେ ଚେତାନ୍ତେ ସେନଃୟାନା। ଆମାଃ ଡିସ୍ନା ଚାକାର୍ କେଦ୍ତେ ଇନ୍କୁଲଃ ବାନାର୍ସା ତଲାକାଦାମ୍, ଆମ୍ ଅକତାଃରେ ଇନ୍କୁଆଃ ଡିସ୍ନା ନେଲ୍କେଦାମ୍, ଏନାକେ ଦୁଲାଡ଼୍ ତାନାମ୍। ଆମ୍ ଜାଇତୁନ୍ ସୁନୁମ୍ ଇଦିକେଦ୍ତେ ରାଜାରାଃ ହେପାଦ୍ତେ ସେନାକାନାମ୍ ଓଡ଼ୋଃ ଗନଙ୍ଗାନ୍ ସୁନୁମ୍ ପୁରାଃଗି ପସା କାଦା। ଓଡ଼ୋଃ ଆମ୍ ପୁରାଃ ସାଙ୍ଗିନ୍ ଦିଶୁମ୍ତେ ଆମାଃ ଦୁଁତ୍କକେ କୁଲାକାଦ୍କଆ ଓଡ଼ୋଃ ପାତାଲ୍ ହୁଆଙ୍ଗ୍ ଜାକେଦ୍ ଆପାନ୍କେ ଲାତାର୍ କାଦାମ୍। ଆମ୍ ନେ ସବେନାଃ କାମିକେଦ୍ତେ ଲାଗାକାନ୍ ରେହ “ନେଆଁରେ ଜେତାନ୍ ଆସ୍ରା ବାନଃଆ” ମେନ୍ତେ କାମ୍ କାଜିକେଦା। ଆମ୍ ଜୀଉରେ ନାୱା ପେଡ଼େଃ ନାମ୍କେଦା, ଏନାମେନ୍ତେ ଆମ୍ କାମ୍ ଲାଗାୟାନା।
ଆମ୍ ଅକଏୟାଃ ବରତେ ହସଡ଼ କାଜି କାଜିକେଦା ଓଡ଼ୋଃ ଅକଏକେ ବରକେଦ୍ତେ ଆଇଙ୍ଗ୍କେ କାମ୍ ପାହାମ୍ କେଦିୟାଁ ଚାଏ ଆଇଁୟାଃ ଚେତାନ୍ରେ ମନ୍ କାମ୍ ଏମ୍କେଦା ? ଚିୟାଃ ଆଇଙ୍ଗ୍ ପୁରାଃ ମାହା ଜାକେଦ୍ ହାପାକେଦ୍ତେ ତାଇନ୍ୟାନ୍ତେ ଚିୟାଃ ଆଇଁୟାଃ ଚେତାନ୍ରେ ଆମାଃ ବର ବାନଆଃ ? ଆଇଙ୍ଗ୍ ଆମାଃ ଧାର୍ମାନ୍ ଓଡ଼ୋଃ କାଜିକାମିକ ଉଦୁବେୟା, ମେନ୍ଦ ଏନାତେ ଆମାଃ ଜେତ୍ନାଃ ବୁଗିନାଃ କା ହୁଇନାଃ। ଆମ୍ ଅକ ମୁରୁତ୍କକେ ସେୱାକ ତାନାମ୍, ଇନ୍କୁତାଃରେ ରାଃଆ ଇମ୍ତା ଇନ୍କୁଗି ଦେଙ୍ଗାମେକାକ। ଇନ୍କୁଗି ଆମ୍କେ ସାଙ୍କାଟ୍ଏତେ ବାଞ୍ଚାଅମେକାକ। ମେନ୍ଦ ହୟ ଇନ୍କୁକେ ଅଟାଙ୍ଗ୍ ଇଦିକଆ ଓଡ଼ୋଃ ମିଦ୍ ସାହେଁଦ୍ ହରାତେ ଇନ୍କୁ ଆତମ୍ କଆ। ମେନ୍ଦ ଅକଏ ପ୍ରାଭୁତାଃରେ ଆସ୍ରା ଇଦିୟା, ଇନିଃ ଦିଶୁମ୍ ଆକ୍ତେୟାର୍ ରିକାୟା ଓଡ଼ୋଃ ପାବିତାର୍ ବୁରୁ ଆକ୍ତେୟାର୍ ରିକାୟା।
ଲେବେଃ ମନ୍ ହଡ଼କେ ପ୍ରାଭୁଆଃ ଦେଙ୍ଗା
ଓଡ଼ୋଃ ନେ' ଲେକା କାଜିୟଃଆ, “ଆପେ ବାଇୟେପେ, ବୁଗିଲେକା ବାଇୟେପେ, ଚାକାର୍ ହରା ବାଇୟେପେ, ଆଇଁୟାଃ ହଡ଼କଆ ଆୟାର୍ ଏତେ ସବେନ୍ ତହଦଃ ତେୟାଃ ସାଙ୍ଗିନେପେ।”
“ଚିୟାଃଚି ଅକଏ ସାଲାଙ୍ଗିଉତାର୍ ଓଡ଼ୋଃ ଜାନାଅଗି ତାଇନ୍ନିଃ, ଅକେୟାଃ ନୁତୁମ୍ ଚି ପାବିତାର୍ ଓଡ଼ୋଃ ପୁରାଃ ମାରାଙ୍ଗ୍, ଇନିଃ ନେ କାଜି କାଜିତାନାଏ, ଆଇଙ୍ଗ୍ ଚେତାନ୍ରେ ଓଡ଼ୋଃ ପାବିତାର୍ ଠାୟାଦ୍ରେ ଓଡ଼ୋଃ ଅକଏ ଲେବେଃ ମନ୍ରେନ୍ ହଡ଼ ଇନ୍କୁତାଃରେ ତାଇନ୍ତାନା। ଲେବେଃ ମନ୍ରେନ୍ ହଡ଼କଆଃ ଆତ୍ମାକେ ଜିହୀଦ୍ ରିକାୟା ଓଡ଼ୋଃ ଦୁକୁତାନ୍ ହଡ଼କଆଃ ମନ୍ସୁରୁଦ୍କେ ରାସ୍କାତେ ପେରେଜେୟା। ଚିୟାଃଚି ଆଇଙ୍ଗ୍ ଜାନାଅଗି ବିରୁଧ୍ କାଇଙ୍ଗ୍ ରିକାୟା ଚାଏ ଖିସ୍ କାଇଙ୍ଗ୍ ଦହେୟା। ଚିୟାଃଚି ସବେନ୍ ହଡ଼କକେ, ଜାଁତୁକକେ ଆଇଁୟାଃ ଜୀଉ ଆତ୍ମା ଏମାକାଦ୍କଆ। ଓଡ଼ୋଃ ଆଇଙ୍ଗ୍ ଇନ୍କୁଆଃ ଚେତାନ୍ରେ ଖିସ୍ ରିକାଏ ରେଦ ସବେନାଃ ଜିୟନ୍କଆ। ଆଇଙ୍ଗ୍ ଇନିୟାଃ ହାୟା ରେୟାଃ ପାପ୍ ନାଗେନ୍ତେ ଖିସ୍କେଦ୍ତେ ଇନିଃକେ ସାଜାଇ ଏମ୍କିୟାଃ। ଓଡ଼ୋଃ ଖିସ୍କେଦ୍ତେ ଆଇଁୟାଃ ମେଦ୍ମୁହାଁଡ଼୍ ଇନିଃତାଃଏତେ ଉକୁ କେଦା। ମେନ୍ଦ ଇନିଃ କାଜି କା ମାନାତିଙ୍ଗ୍ ତାନ୍ଲଃ ଢିଟ୍ କେଦ୍ତେ ଆୟାଃ ହରାରେ ସେନଃୟାନା।
“ଆଇଙ୍ଗ୍ ଇନିୟାଃ ସେସେନ୍ ନେନେଲ୍ କାଦା, ଏନ୍ରେହ ଇନିଃକେ ବୁଗି ରିକାୟା। ଇନିଃକେ ହରା ହରା ସୁତୁଃ ଇଦିୟା। ଇନିଃକେ ଓଡ଼ୋଃ ଆୟାଃ ଦୁକୁତାନ୍ ହଡ଼କକେ ଆଡଃଗି ଜୀଉରାଡ଼େଃ ଏମାକଆ। ଆଇଙ୍ଗ୍ ଇସ୍ରାଏଲ୍ ହଡ଼କଆ ମଚାରେ ମାଇନାନ୍ ରେୟାଃ ଦୁରାଙ୍ଗ୍ ଏମାକଆ। ପ୍ରାଭୁ କାଜିତାନାଏ, ଅକନ୍କ ହେପାଦ୍ରେ ଓଡ଼ୋଃ ସାଙ୍ଗିନ୍ରେ ମେନାକଆ ଇନ୍କୁ ଚେତାନ୍ରେ ପୁରାଃ ସୁକୁ ହବାଅଃକା। ଓଡ଼ୋଃ ଆଇଙ୍ଗ୍ ଇନ୍କୁକେ ବୁଗିକଆ। ମେନ୍ଦ ଏତ୍କାନ୍ ହଡ଼କ ଦରେୟାରେୟାଃ ଆଲ୍ପୁଙ୍ଗ୍ ଲେକା ନେତେହେନ୍ତେ ହବାଅଃତାନା। ଏନା ମିଦ୍ତାଃରେ କା ତାଇନ୍ତାନା। ଓଡ଼ୋଃ ଏନ୍ ଦାଆଃରେ ଲସଦ୍ ଓଡ଼ୋଃ ଗାଦେଜ୍ ଉଫ୍ଲାଅଃ ତାନା। ଏତ୍କାନ୍ ହଡ଼କଆଃ ଚିଉଲାହ ଜୀଉସୁକୁ ବାନଃଆ,” ନେ କାଜି ପାର୍ମେଶ୍ୱାର୍ କାଜିତାନାଏ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.