Munda Bible
ଯିଶାୟ 56
ସାଅଁସାର୍ ହଡ଼କଆଃ ଜୀଉବାଞ୍ଚାଅ
ପ୍ରାଭୁ କାଜିତାନାଏ, “ଆପେ ନ୍ୟାୟ ବିଚାର୍ ମାନାତିଙ୍ଗ୍ପେ, ସାର୍ତି କାମିକ ରିକାଏପେ। ଚିୟାଃଚି ଆଇଁୟାଃ ଜୀଉବାଞ୍ଚାଅ ଓଡ଼ୋଃ ଧାର୍ମାନ୍ରେୟାଃ କାମି ନାଡ଼େଃ ସେଟେରାକାନା। ଅକ ମାନୱା ହଡ଼ ନେଆଁ ମାନାତିଙ୍ଗ୍ ରିକାୟା ଓଡ଼ୋଃ କେଟେଃଦ୍ କେଦ୍ତେ ସାବେୟା, ଅକଏ ରୁଡ଼ୁନ୍ ହୁଲାଙ୍ଗ୍କେ ପାବିତାର୍ ମେନ୍ତେ ମାନାତିଙ୍ଗ୍ ରିକାଏ ରେଦ ଓଡ଼ୋଃ ସବେନ୍ ରାକାମ୍ରେୟାଃ ଏତ୍କାନ୍ କାଜିକାମିକ ଏତେ ଆପାନ୍କେ ପାବିତାର୍ କେଦ୍ତେ ତାଇନ୍ନିଃ ଆଶିଷ୍ ନାମେ।”
“ସାର୍ତିଗି ପ୍ରାଭୁ ଆଇଙ୍ଗ୍କେ ଆୟାଃ ହଡ଼କତାଃଏତେ ଫାର୍କାଇଁୟା,” ନେଆଁ ପ୍ରାଭୁତାଃରେ ମେସାଅଃତାନ୍ ଏଟାଃ ଦିଶୁମ୍ରେନ୍ ହଡ଼ ଆଲକା କାଜିକା ଚାଏ, ନେଲେପେ, ଆଇଙ୍ଗ୍ ମିଆଦ୍ ରହଡ଼୍ ଦାରୁ, ମେନ୍ତେ ଚାକୁରା ହଡ଼ ଆଲକାଏ କାଜି। ଚିୟାଃଚି ଚାକୁରାକଆଃ ବିଷାଏରେ ପ୍ରାଭୁ ନେ କାଜିତାନାଏ, “ଅକନ୍କ ଆଇଁୟାଃ ରୁଡ଼ୁନ୍ ଦିନ୍କେ ମାନାତିଙ୍ଗ୍ ରିକାଏତାନା ଓଡ଼ୋଃ ଆଇଁୟାଃ ବୁଗିନାଃ ବିଷାଏକକେ ସାଲା ରିକାୟା ଓଡ଼ୋଃ ଆଇଁୟାଃ ସବେନ୍ ରାଜିନାମାକେ ମାନାତିୟାଁଃ,” “ଇନ୍କୁକେ ଆଇଙ୍ଗ୍ ଆଇଁୟାଃ ଅଡ଼ାଃ ଥାଲାରେ ଓଡ଼ୋଃ ଆଇଁୟାଃ ପାଚ୍ରି ଭିତାର୍ରେ ହନ୍କଡ଼ା ହନ୍କୁଡ଼ି ଏତେ ପୁରାଃ ବୁଗିନାଃ ନୁତୁମ୍ ଓଡ଼ୋଃ ଖୁଣ୍ଟୁ ବାଇକଆ। ଆଇଙ୍ଗ୍ ଇନ୍କୁକେ ଜାନାଅ ଜୀଦାନ୍ରେୟାଃ ନୁତୁମ୍ ଏମାକଆ ଏନା ଓଡ଼ୋଃ କା ରିଡ଼ିଙ୍ଗ୍ୟଁଆ।”
ଏନ୍ଲେକାଗି ଏଟାଃ ଦିଶୁମ୍ରେନ୍ ହଡ଼କ ପ୍ରାଭୁଆଃ ସେୱା ରିକା, ପ୍ରାଭୁଆଃ ନୁତୁମ୍କେ ଦୁଲାଡ଼୍ତାନା ଓଡ଼ୋଃ ପ୍ରାଭୁଆଃ ଦାସି ହବା ନାଗେନ୍ତେ ପାର୍ମେଶ୍ୱାର୍ତାଃରେ ହେପାଦ୍ତେ ହିଜୁଃଆ, ମେନ୍ଦ ପ୍ରାଭୁଆଃ ରୁଡ଼ୁନ୍ ହୁଲାଙ୍ଗ୍କେ ମାନାତିଙ୍ଗ୍ କେଦ୍ତେ କାକ ପାପ୍ ରିକା ଓଡ଼ୋଃ ଆଇଁୟାଃ ରାଜିନାମାକେ ମାନାତିଙ୍ଗ୍ ରିକା, ଏନ୍ ସବେନ୍କକେ ଆଇଁୟାଃ ପାବିତାର୍ ବୁରୁତେ ଆଉକଆକ ଓଡ଼ୋଃ ଆଇଁୟାଃ ବିନ୍ତି ଅଡ଼ାଃରେ ଇନ୍କୁକେ ରାସ୍କା ଏମାକଆଇଙ୍ଗ୍। ଇନ୍କୁଆଃ ଉରୁବ୍ଦାଣେଁ ରାକାବ୍ ଓଡ଼ୋଃ ପାପ୍ଛାମାରେୟାଃ ଦାଣେଁ ସବେନାଃ ଆଇଁୟାଃ ବେଦି ଚେତାନ୍ରେ ତେଲାଅଃଆ। ଚିୟାଃଚି ଆଇଁୟାଃ ଅଡ଼ାଃ ଦିଶୁମ୍ରାଃ ସବେନ୍ ଜାତିକ ନାଗେନ୍ତେ ବିନ୍ତିଅଡ଼ାଃ ନୁତୁମଃଆ।
ଅକଏ ଇସ୍ରାଏଲ୍ରେନ୍ ସାଙ୍ଗିନ୍କାନ୍ ହଡ଼କକେ ମିଦ୍ତାଃରେ ହୁଣ୍ଡିତାନାଏ, ଏନ୍ ପ୍ରାଭୁ, ପାର୍ମେଶ୍ୱାର୍ କାଜିତାନାଏ, “ଆଇଃକ୍ ହୁଣ୍ଡିୟାକାଦ୍ ହଡ଼କକେ ଏସ୍କାର୍ ବାଗିକେଦ୍ତେ ଓଡ଼ୋଃ ଏଟାଃ ହଡ଼କକେ ହଁଗି ହୁଣ୍ଡିକଆ।”
ଇସ୍ରାଏଲ୍ରେନ୍ ଆଗୁଆଇକକେ ଚିଟା
ହେ ଅତେରେନ୍ ଜାଁତୁକ, ହେ ବିର୍ରେନ୍ ସବେନ୍ ଜାଁତୁ, ଆପେ ସବେନ୍କ ଜିଅନ୍ ନାଗେନ୍ତେ ହିଜୁଃପେ। ଇସ୍ରାଏଲ୍ରେନ୍ ହରତାନ୍ନିଃକୁ ଆନ୍ଧା ଗିୟାକ, ଇନ୍କୁତାଃରେ ଜେତାନ୍ ସେଣାଁ ବାନଆଃ, ଇନ୍କୁ କନ୍ଦାଗିୟାଃକ, ସେତା ଲେକା ଭୁଃଉ କାକ ଦାଡ଼ିୟାଃ। ଇନ୍କୁ ଗିତିଜ୍କେଦ୍ତେ କୁମୁ ନେଲେତାନା, ଓଡ଼ୋଃ ଦୁଡ଼ୁମ୍କେ ପୁରାଃ ଦୁଲାଡ଼୍ତାନା। ସେତା'କ ଲେକା ଇନ୍କୁ ଜଜମ୍ ନାଗେନ୍ତେ ହାୟାକାନା, ଚିଉଲାହ ଇନ୍କୁ କାକ ବିୟଃଆ। ଇନ୍କୁ କା ଆଟ୍କାର୍ଉରୁମ୍ ମିଣ୍ଡି ଗୁପିନିଃ ଲେକା କାନା, ଆପାନ୍ ଆପାନ୍ ହରାରେ ସେସେନ୍ତାନା, ସବେନ୍କ ଆପ୍ନାଃ ବୁଗିନାଃ ନାଗେନ୍ତେ ପାହାମେତାନା। ଇନ୍କୁ କାଜିୟଃତାନା, “ଏଲାବୁ, ଦାଖ୍ରାସି, ଇଲିଆର୍ଖି ଆଉଇୟା ଓଡ଼ୋଃ ଇଲିଆର୍ଖି ନୁଁ କେଦ୍ତେ ବୁଲଃଆ। ଓଡ଼ୋଃ ତିସିଙ୍ଗ୍ ଚିଲ୍କା, ଏନ୍ଲେକା ଗାପା ହଁ ରିକାୟା, ଏନା ପୁରାଃ ମାରାଙ୍ଗ୍ ହୁଇନାଃ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.