Munda Bible
ଯିଶାୟ 55
ପ୍ରାଭୁଆଃ ସାୟାଦ୍
ପ୍ରାଭୁ କାଜିତାନାଏ,
“ହେ ତେତାଙ୍ଗ୍ତାନ୍ ହଡ଼କ, ଆପେ ଦାଆଃ ହେପାଦ୍ତେ ହିଜୁଃପେ,
ଅକଏତାଃରେ ଜେତା ଟାକା ବାନଆଃ, ଇନିଃ ହିଜୁଃକାଏ।
ଆପେ ହିଜୁଃପେ, କିରିଙ୍ଗେପେ ଓଡ଼ୋଃ ଜମେପେ।
ହାଁ ହିଜୁଃପେ, ଟାକା ଓଡ଼ୋଃ ଗନଙ୍ଗ୍ ଏମ୍କେଦ୍ତେ ଦାଖ୍ରାସି ଓଡ଼ୋଃ ତଆ କିରିଙ୍ଗେପେ।
ଅକଆଃ ଜମେୟାଃ ତେୟାଃ ନାହାଁଲା, ଏନାନାଗେନ୍ତେ ଚିୟାଃ ମେନ୍ତେପେ ରୁପା ଖାର୍ଚା ରିକାଏତାନା
ଓଡ଼ୋଃ ଅକଆଃ ହେତେ ଲାହିଦ୍ କା ପେରେଜଃ ତାନା,
ଏନା ନାଗେନ୍ତେ ଚିନାଃ ମେନ୍ତେ କାମିତାନା ? ବୁଗିଲେକାତେ ଆଇଁୟାଃ କାଜି ଆୟୁମେମେ
ଓଡ଼ୋଃ ସିବିଲ୍ ଜଜମାଃ ଜମେଁମେଁ ଓଡ଼ୋଃ ପେଡ଼େଃ ଏମେତାନ୍ ଜଜମାଃ ଜମେଁମେଁ।
“ଆୟୁମେପେ ଓଡ଼ୋଃ ଆଇଁୟାଃତାଃତେ ହିଜୁଃପେ, ଏନ୍ରେଦ ଆପେୟାଃ ଜୀଉ ବାଞ୍ଚାଅଃଆ।
ଆଇଙ୍ଗ୍ ଅକ ପାତିୟାର୍ରଃ ଦୁଲାଡ଼୍ରାଃ ରାଜିନାମାକେ ଦାଉଦ୍କେ ଉଦୁବିୟା ମେନ୍ତେଇଙ୍ଗ୍ କିରିୟାକାଦା,
ଏନ୍'ଲେକା ଆପେଲଃ ହଗି ଜାନାଅରେୟାଃ ରାଜିନାମାରାଃ କିରିୟା ରିକାୟାଇଙ୍ଗ୍।
ନେଲେପେ ଆଇଙ୍ଗ୍ ଇନିଃକେ ରାକାମ୍ ରାକାମ୍ କିଲିକତାଃରେ ଗାୱା ଏମଃନିଃ ଲେକା ବାଇକିୟା।
ଇନିଃକେ ପୁରାଃ କିଲିରେନ୍ ଆଗୁଆଇ ଓଡ଼ୋଃ ଗୁସିୟାଁ ବାଇକିୟା।
ଅକନ୍ ହଡ଼କକେ ଆମ୍ କାମ୍ ସାରିୟାଃ, ଇନ୍କୁକେ ଆମ୍ କେଡ଼ାକଆ।
ଅକନ୍ କିଲିକତାଃରେ ଆମ୍ କାମ୍ ସାରିୟାଃ କାନା, ଇନ୍କୁ ଆମାଃତାଃତେ ନିର୍ ହିଜୁଆଃ।
ପ୍ରାଭୁ ପାର୍ମେଶ୍ୱାର୍ ଓଡ଼ୋଃ ଇସ୍ରାଏଲ୍ରେନ୍ ପାବିତାର୍ନିଃ ହରାତେ ନେ କାଜି ହବାଅଃଆ।
ଚିୟାଃଚି ଇନିଃ ଆମ୍କେ ମାଇନାନ୍ ରିକାକାଦା।”
ପ୍ରାଭୁକେ ଦାଣାଁ ନାମେ ରେୟାଃ ନେଣ୍ଡା ତାଇନ୍ ତାଇନ୍ଗି ଦାଣାଁଇପେ।
ଇନିଃ ହେପାଦ୍ରେ ତାଇନ୍ ଇମ୍ତାଗି ଇନିଃକେ ବିନ୍ତିପେ।
ଏତ୍କାନ୍ ହଡ଼ ଆୟାଃ ହରା ଓଡ଼ୋଃ କା ଧାର୍ମାନ୍ନିଃ ଆୟାଃ ପାହାମ୍ ଉଡ଼ୁଃ ବାଗିକା।
ଓଡ଼ୋଃ ଇନିଃ ପ୍ରାଭୁତାଃତେ ରୁହାଡ଼୍ ହିଜୁଃକା, ଏନ୍ରେଦ ଇନିଃକେ ଦାୟା ରିକାଇୟାଃ।
ଇନିଃ ଆବୁଆଃ ପାର୍ମେଶ୍ୱାର୍ତାଃତେ ରୁହାଡ଼୍ ହିଜୁଃକାଏ,
ଚିୟାଃଚି ଇନିଃ ପୁରାଃତେ ଛାମା ଏମାଇୟା।
ଚିୟାଃଚି ପ୍ରାଭୁ କାଜିତାନାଏ, ଆଇଁୟାଃ ଉହାଟ୍ ସବେନାଃ ଆପେୟାଃ ଉହାଟ୍ ଲେକା ନାହାଁଲାଃ,
ଚାଏ ଆପେୟାଃ ହରା ଆଇଁୟାଃ ହରା ଲେକାନାଃ ନାହାଁଲାଃ।
ଚିୟାଃଚି ଅତେ ଏତେ ସିର୍ମା ଚିଲ୍କା ସାଲାଙ୍ଗିରେୟା, ଏନ୍ଲେକା ଆଇଁୟାଃ
ଓଡ଼ୋଃ ଆପେୟାଃ ଥାଲାରେ ସେସେନ୍ ହରା ଓଡ଼ୋଃ ଉଡ଼ୁଃ ପାହାମ୍ ଥାଲାରେ ପୁରାଃଗି ଫାରାକ୍ ମେନାଃ।
ଗାମା ଦାଆଃ ଓଡ଼ୋଃ ଅସ୍ ଦାଆଃ ରିମିଲ୍ ଏତେ ଆଡ଼୍ଗୁ ହିଜୁଃଆ ଓଡ଼ୋଃ ଏନ୍ତାଃତେ କା ସେନଃ ରୁହାଡ଼ଃଆ।
ମେନ୍ଦ ଏନା ଅତେକେ ଆଲି ତାନାଏ, ଓଡ଼ୋଃ ଏନା ହରାତେ ଅତେରେ ବାହା
ଓଡ଼ୋଃ ଜ ଅମନ୍ ରିକା କେଦ୍ତେ ଲୟଙ୍ଗ୍ କାମି ରିକା ନିଃକେ ହିତା
ଓଡ଼ୋଃ ଜଜମ୍ନିଃକେ ଜଜମାଃ ଏମାଇତାନାଏ।
ଆଇଁୟାଃ ମଚାଏତେ ଅଡଙ୍ଗ୍ଅଃତାନ୍ କାଜିକ ଏନ୍ଲେକା ହବାଅଃଆ,
ଏନା କା ପୁରାକେଦ୍ତେ ଆଇଁୟାଃତାଃତେ କା ହିଜୁଃରୁହାଡ଼ାଃ, ମେନ୍ଦ ଆଇଁୟାଃ ପାହାମ୍ କାଜିକାମିକେ ପୁରା ରିକାଏୟା।
ଓଡ଼ୋଃ ଅକ କାମିକେ ରିକା ନାଗେନ୍ତେ କୁଲ୍ପେ ତାନା, ଏନ୍ କାମିକେ ପୁରାୟାପେ।
ଆପେ ସବେନ୍କ ରାସ୍କାତେ ବାହାରି ଅଡଙ୍ଗ୍ନାଃପେ ଓଡ଼ୋଃ ସୁକୁତେ ଆୟାର୍ତେ ସେସେନ୍ ରିକାୟା।
ଆପେୟାଃ ଆୟାର୍ରେ ବୁରୁବେଡ଼ା କାଉରି କେଦ୍ତେ ଦୁରାଙ୍ଗ୍ ରିକାୟା।
ଓଡ଼ୋଃ ବିର୍ ରେୟାଃ ଦାରୁକ ତିଃଇ ଥାପ୍ଡ଼ିୟା।
ଜାନୁମ୍ ଦାରୁ ବାଦ୍ଲାରେ ଦେବ୍ଦାରୁ ଓଡ଼ୋଃ ଅତେ ଦଧାଡ଼ି ବାଦ୍ଲାରେ ମେହେନ୍ଦି ଦାରୁ ଅମନ୍ ହୁଇନାଃ।
ଓଡ଼ୋଃ ନେ ସବେନାଃ ପ୍ରାଭୁଆଃ ମାଇନାନ୍ ନାଗେନ୍ତେ
ଓଡ଼ୋଃ ଜାନାଅଗି ଚିହ୍ନା ଲେକା ତାଇନଃ ନାଗେନ୍ତେ ନେ ସବେନାଃ ହୁଇନାଃ ଚିଉଲାହ କା ଜିୟନ୍ ରିକାନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.