Munda Bible
ଯିଶାୟ 58
ସାର୍ତି କାଟାବ୍
“ପୁରାଃଗି କାଉରି କେଦ୍ତେ କାଜିପେ, ମାଡ଼ିତେ ଆଲପେ କାଜିୟାଃ, ବିଙ୍ଗୁଲ୍ ସାଡ଼ି ଲେକା ଆପେ ପୁରାଃଗି କାଉରି ତାନ୍ଲଃ କାଜିପେ, ଆଇଁୟାଃ ହଡ଼କକେ ଇନ୍କୁଆ କା ଧାର୍ମାନ୍ କାଜିକ ଓଡ଼ୋଃ ଯାକୁବ୍ଆଃ କିଲିକେ ଇନ୍କୁଆଃ ପାପ୍ ସବେନାଃ ଉଦୁବାକପେ। ଇନ୍କୁ ସବେନ୍ ହୁଲାଙ୍ଗ୍ ଆଇଙ୍ଗ୍କେ ଦାଣାଁଇଙ୍ଗ୍ ତାନା ଓଡ଼ୋଃ ଆଇଁୟାଃ ସେଣାଁନ୍ ହରା ସାରିନାମ୍ ନାଗେନ୍ତେ ସାନାଙ୍ଗ୍ତାନା। ଅକନ୍ କିଲିକ ଧାର୍ମାନ୍ କାଜିକାମିକ ରିକାଏତାନା ଓଡ଼ୋଃ ଇନ୍କୁ ପାର୍ମେଶ୍ୱାର୍ଆଃ ବିଧିକେ କାକ ବାଗିୟାକାଦା। ଇନ୍କୁ ଆଇଙ୍ଗ୍କେ ଧାରାମ୍ରେୟାଃ ବିଧିକ କୁଲିତାନା ଓଡ଼ୋଃ ପାର୍ମେଶ୍ୱାର୍ତାଃ ହିଜୁଃ ନାଗେନ୍ତେ ପୁରାଃଗି ରାସ୍କାଅଃତାନା।”
ଇନ୍କୁ ଆକ ଆକରେ କାଜିୟଃତାନା, “ଚିୟାଃ ମେନ୍ତେ ଆଲେ କାଟାବ୍ ରିକାଏତାନା, ମେନ୍ଦ ପ୍ରାଭୁ ଏନା କାଏ ନେଲ୍ତାନା ? ଚିୟାଃ ମେନ୍ତେ ଆଲେ ଆଲେୟାଃ ଜୀଉକେ ଦୁକୁ ଏମ୍କେଦା, ମେନ୍ଦ ଆମ୍ ଜେତ୍ନାଃ କାମ୍ ସାରିକେଦା ?”
ମେନ୍ଦ ପ୍ରାଭୁ କାଜିକେଦା ନେଲେପେ, ଆପେ କାଟାବ୍ ହୁଲାଙ୍ଗ୍ ଆପେୟାଃ ଇଛା ସାନାଙ୍ଗ୍ ଲେକାତେ ସେସେନ୍ ତାନା ଓଡ଼ୋଃ ଆପେୟାଃ କାମିହଡ଼କକେ ପୁରାଃ କେଟେଦ୍କାମି ରିକା ଆଚୁକ ତାନାପେ। ନେଲେପେ, ଆପେ ଲାପ୍ଡ଼ାଇ, ଏପ୍ରାଙ୍ଗ୍, ଓଡ଼ୋଃ ଏତ୍କାନ୍ ମନ୍ ଇଦିକେଦ୍ତେ ମିହୁଡ଼୍ ଆଡଃମିହୁଡ଼୍କେ ମୁକାଲଃ ଦାଲ୍ ନାଗେନ୍ତେ କାଟାବ୍ ରିକାଏତାନା। ଚିଲ୍କା ଆପେୟାଃ କାଉରି ଚେତାନ୍ରେ ଆୟୁମଃଆ, ଏନ୍ଲେକାନ୍ କାଟାବ୍ କାପେ ରିକାଏତାନା। ଅକ କାଟାବ୍ରେ ହଡ଼ ଆୟାଃ ଜୀଉକେ ଦୁକୁ ଏମେତାନାଏ, ଏନ୍ ଲେକାନ୍ କାଟାବ୍ରେ ଚିୟାଃ ଆଇଙ୍ଗ୍ ସୁକୁ ଇଚିୟଃଆ ? ଜିଲିଙ୍ଗ୍ ତାସାଦ୍ ଦାରୁ ଲେକା ଅମ୍ବାକେଦ୍ତେ ବହଃତିରୁବ୍ ରେୟାଃ, ବାସ୍ତା ଲିଜାଃ ତୁସିଙ୍ଗ୍ କେଦ୍ତେ, ତରେକ୍ ଚେତାନ୍ରେ ଦୁବ୍ତେୟାଃ, ନେଆଁକେ ଚିନାଃ ଆପେ କାଟାବ୍ ତାନାଲେ ଓଡ଼ୋଃ ପ୍ରାଭୁଆଃ ସୁକୁଆନ୍ ଦିପିଲି ମେନ୍ତେ କାଜିତାନାପେ ?
“ଆଇଙ୍ଗ୍ ଅକ କାଟାବ୍ ସାନାଙ୍ଗ୍ତାନା ଏନା ନେ'ଲେକ୍ନାଃ ତାନା, ଏତ୍କାନ୍ ତନଲ୍ ଏତେ ରାଡ଼ାଅଃରେୟାଃ, ଆଡ଼୍ନାଏତେ ବାହେର୍ ରାଡ଼ାଅଃରେୟାଃ, ହାମ୍ବାଲ୍ ରେୟା ଦୁକୁତେ ଲାଦିକାନ୍ ହଡ଼କକେ ରାଡ଼ାକେଦ୍ତେ ବାଗିରେୟାଃ ଓଡ଼ୋଃ ସବେନ୍ ଆଡ଼୍ନା ଟହେଜ୍ ନାଙ୍ଗ୍, ରେଙ୍ଗେଃ ହଡ଼କକେ ଜଜମାଃ ଏମଃତେୟାଃ ଓଡ଼ୋଃ ନାରାଦୁରା କେଦ୍ତେ ଦୁକୁତାନ୍ ହଡ଼କକେ ଆପାନ୍ ଅଡ଼ାଃତେ ଆଉତେୟାଃ, ଆପେ ସାମା ହଡ଼୍ମ ତାଇନ୍ନିଃକେ ନେଲିରେ ଲିଜାଃ ତୁସିଙ୍ଗ୍ତେୟାଃ ଓଡ଼ୋଃ ଆପାନ୍ କିଲିକତାଃଏତେ କା ଉକୁ ତେୟାଃ, ନେଆଁ ସାର୍ତି କାଟାବ୍ତାନା।
“ନେ' ଲେକା ରିକାଏ ରେଦ ସିଙ୍ଗିତୁରଃ ମାସ୍କାଲ୍ ଲେକା ଆପେତାଃରେ ମାସ୍କାଲ୍ ଉଦୁବଃଆ ଓଡ଼ୋଃ ଆପେୟାଃ ବୁଗିୟଃତେୟାଃ ଇମ୍ତାଗି ଉଦୁବଃଆ। ଆପେୟାଃ ଧାର୍ମାନ୍ ଆପେକେ ଅତଙ୍ଗ୍ପେୟା, ପ୍ରାଭୁଆଃ ମାନାରାଙ୍ଗ୍ ଆପେୟାଃ ଆୟାର୍ ଆୟାର୍ତେ ସେନାଃ। ଇମ୍ତା ଆପେ ପ୍ରାଭୁକେ ଦେଙ୍ଗାନାଙ୍ଗ୍ ରାଆଃକେଦ୍ତେ କେଡ଼ାଇ ରେଦ ଇନିଃ ଆପେକେ କାଜିରୁହାଡ଼୍କେଦ୍ତେ କାଜିୟା, ଆଇଙ୍ଗ୍ ନେତାଃରେ ମେନାଇଁୟାଃ।
“ମେନ୍ଦ ଆପେ ଆପେୟାଃ ଥାଲା ଏତେ ସିଗିଦ୍ ଏମ୍ତାନ୍ ଦୁକୁରେୟାଃ ହାମ୍ବାଲ୍ ଏଟାଃକକେ ଚିଟାରେୟାଃ ଗୁହ୍ନାଁ ଓଡ଼ୋଃ କା ଧାର୍ମାନ୍ ନିନ୍ଦା କାଜିକ ଆପେତାଃଏତେ ସାଙ୍ଗିନେପେ। ରେଙ୍ଗେଃତାନ୍ ହଡ଼କକେ ଜଜମାଃ ଏମଃ ନାଗେନ୍ତେ ଆପାନ୍କେ ଜିମା ରିକାଏ ରେଦ, ଦୁକୁତାନ୍ ହଡ଼କକେ ଦେଙ୍ଗାକ ରେଦ, ନୁବାଃରେ ଆପେୟାଃ ମାସ୍କାଲ୍ ଉଦୁବଃଆ ଓଡ଼ୋଃ ନୁବାଃ ଆପେୟାଃ ନାଗେନ୍ତେ ତିକିନ୍ ସିଙ୍ଗି ଲେକା ହୁଇନାଃ। ପ୍ରାଭୁ ଆପେୟାଃ ସେସେନ୍ ହରାରେ ସୁତୁଃ ଇଦିପେୟା ଓଡ଼ୋଃ ବିର୍ରେ ଆପେୟାଃ ଜୀଉକେ ବି'ପେୟା। ଆପେୟାଃ ନାରାଦୁରା ହଡ଼୍ମକେ ପେଡ଼େଃ ଏମେୟା, ଏନାରେ ଆପେ ଦାଆଃ ବାଗାନ୍ ଲେକା ହବାଅଃଆପେ ଓଡ଼ୋଃ ସେତେଙ୍ଗ୍ ଏତେ ଲିଙ୍ଗିୟଃତାନ୍ ଦାଆଃ ଲେକାପେ ହୁଇନାଃ। ଆମାଃ କିଲିରେନ୍ ହଡ଼କ ହାଦୁଡ଼ାକାନ୍ ଭିତ୍କକେ ବାଇରୁହାଡ଼େୟା ଓଡ଼ୋଃ ପୁରା ମାହା ଦିପିଲିରେ ବାଇୟାକାନ୍ ନିହିଁଗାଡା ଚେତାନ୍ରେ ଆଡଃମିସା ବାଇରୁହାଡ଼େୟା। ଆପେ ହାଦୁଡ଼ାକାନ୍ ପାଚ୍ରିକେ ବାଇତାନ୍କ ଓଡ଼ୋଃ ହଡ଼କ ତାଇନଃତାନ୍ ଠାୟାଦ୍କେ ଆଡଃମିସା ବାବାଇନିଃକୁ ମେନ୍ତେ କାଜିଅଃଆପେ।”
ରୁଡ଼ୁନ୍ ହୁଲାଙ୍ଗ୍କେ ମାନାତିଙ୍ଗ୍ରାଃ ନିୟାମ୍
“ପାବିତାର୍ ହୁଲାଙ୍ଗ୍କେ ବୁଗିଲେକା ମାନାତିଙ୍ଗ୍ ରିକାଏ ରେଦ, ଆମାଃ ଇଛା ସାନାଙ୍ଗ୍ ଲେକା କା ସେସେନ୍ କେଦ୍ତେ ଆମାଃ କାଟାକେ ଥାବର୍ ଦହେ ରେଦ, ରୁଡ଼ୁନ୍ ହୁଲାଙ୍ଗ୍କେ ରାସ୍କା ଲେକା ତାଇନ୍ ରେଦ ଓଡ଼ୋଃ ପ୍ରାଭୁଆଃ ପାବିତାର୍ ହୁଲାଙ୍ଗ୍କେ ମାଇନ୍ ରିକାଏ ରେଦ। ଓଡ଼ୋଃ ଆପ୍ନାଃ କାମି କା ରିକାକେଦ୍ତେ, ଆପ୍ନାଃ ସାନାଙ୍ଗ୍କେ କା ପୁରା କେଦ୍ତେ ଚାଏ ଆପ୍ନାଃ କାଜିକେ କା କାଜିକେଦ୍ତେ ଏନାକେ ମାଇନ୍ ରିକାଏପେ। ତାବ୍ଦ ଆପେ ପ୍ରାଭୁରେ ରାସ୍କା ରିକା ଦାଡ଼ିୟାଃପେ, ଅତେରେୟାଃ ସାଲାଙ୍ଗି ଠାୟାଦ୍କରେ ଆମ୍କେ ଇଦିମେୟାଁ ଓଡ଼ୋଃ ଆମାଃ ଆପୁ ଯାକୁବ୍ଆଃ ଆକ୍ତେୟାର୍ ଆମ୍କେ ଏମାମେୟା, ଚିୟାଃଚି ନେଆଁଦ ପ୍ରାଭୁ ପାର୍ମେଶ୍ୱାର୍ଆଃ ମଚା ନେ କାଜି କାଜିକାଦାଏ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.