Munda Bible
ଯିଶାୟ 50
ଇସ୍ରାଏଲ୍ରାଃ ପାପ୍
ପ୍ରାଭୁ ନେ କାଜି କାଜିତାନା,
ଆଇଙ୍ଗ୍ ଆପେୟାଃ ଏଙ୍ଗାକେ ବାଗିରେୟାଃ ଅକ ଅନଲ୍ ଚିଠା ଏମାକାଜାଇଙ୍ଗ୍,
ଏନ୍ ଅନଲ୍ ଚିଠା କତାଃରେୟା ?
ଚାଏ ଆଇଙ୍ଗ୍ ଆଇଁୟାଃ କିରିଙ୍ଗ୍ ଆଖ୍ରିଙ୍ଗ୍ ହଡ଼କଏତେ ଅକଏତାଃରେ ଆପେକେ ଆଖ୍ରିଙ୍ଗ୍କାଦ୍ ପେୟାଇଙ୍ଗ୍ ?
ଆପେ ଆପେୟାଃ ପାପ୍ ନାଗେନ୍ତେ ଆଖ୍ରିଙ୍ଗ୍ କାନାପେ,
ଆପେୟାଃ କା ଧାର୍ମାନ୍ କାଜି ନାଗେନ୍ତେ ଆପେୟାଃ ଏଙ୍ଗା ବାଗିୟାନାଏ।
ଆଇଙ୍ଗ୍ ଚିମ୍ତା ହିଜୁଃ ୟାନାଇଙ୍ଗ୍ ଚିନାଃମେନ୍ତେ ଜେତାଏ କାପେ ତାଇକେନା ?
ଆଇଙ୍ଗ୍ ଚିମ୍ତା ହାକାଅ କେଦାଇଙ୍ଗ୍, ଚିନାଃମେନ୍ତେ ଜେତାଏ କାପେ କାଜିରୁହାଡ଼୍ କେଦା ?
ଚିନାଃ ଆଇଁୟାଃ ତିଃଇ ନିମିନ୍ ହୁଡିଙ୍ଗ୍କାନା ଯେ, ଜେତାଏକେ ରାଡ଼ା କାଏ ଦାଡ଼ିୟା ?
ଚାଏ ବାଞ୍ଚାଅ ନାଗେନ୍ତେ ଚିନାଃ ଆଇଁୟାଃ ପେଡ଼େଃ ବାନଆଃ ?
ନେଲେପେ ଆଇଙ୍ଗ୍ ମାରାଙ୍ଗ୍ ମଚାକେଦ୍ରେ ଦରେୟାରାଃ ଦାଆଃ ଆଞ୍ଜେଦ୍ ୟାନା,
ଆଇଙ୍ଗ୍ ଗାଡା ଡଡାକକେ ବିର୍ ବାଇ କେଦାଇଙ୍ଗ୍,
ଏନ୍ତେ ଏନାରେ ତାଇନ୍ତାନ୍ ହାକୁକ ତେତାଙ୍ଗ୍ତେ ଗଏଃୟାନ୍ଲଃ ସିତ୍ରୁ ସହାନଃଆକ।
ଆଇଙ୍ଗ୍ ରିମିଲ୍କେ ହେନ୍ଦେ ହାରୁବ୍କେଦାଇଙ୍ଗ୍
ଓଡ଼ୋଃ ବାସ୍ତା ଲିଜାଃ ଏନାରେ ଦାପାଲ୍କେଦା।
ଆନାଚୁ ମାନାତିଙ୍ଗ୍ତାନ୍ ପ୍ରାଭୁଆଃ ଦାସି
ଆଇଙ୍ଗ୍ ଚିଲ୍କା ଲାଗାକାନ୍ ହଡ଼କେ ବାଚାନ୍ ହରାତେ ପେଡ଼େଃ ଏମ୍ ଦାଡ଼ିୟାଇଙ୍ଗ୍,
ଏନାମେନ୍ତେ ପ୍ରାଭୁ ଆଇଙ୍ଗ୍କେ ଇତୁକାନ୍ ହଡ଼କଆଃ ଆଲାଙ୍ଗ୍ ଏମାକାଦିୟାଁ।
ଇନିଃ ଆଇଙ୍ଗ୍କେ ସବେନ୍ ହୁଲାଙ୍ଗ୍ ସେତାଃରେ ବିରିଦାଃଏ,
ଇତୁକାନ୍ ହଡ଼ ଲେକା ଆୟୁମ୍ ନାଙ୍ଗ୍ ଇନିଃ ଆଇଁୟାଃ ଲୁତୁର୍କେ ଚିର୍ଗାଲ୍ତାନା।
ପେଡ଼େୟାନ୍ ପ୍ରାଭୁ ଆଇଁୟାଃ ଲୁତୁର୍କେ ନିଜାକାଦା।
ଆଇଙ୍ଗ୍ ବିରୁଧ୍ ରିକାତାନ୍ନିଃ ଲେକା କାଇଙ୍ଗ୍ ହବାକାନା
ଚାଏ ଦୟାସାଃତେ କାଇଙ୍ଗ୍ ରୁହାଡ଼୍କାନା।
ଆଇଙ୍ଗ୍ ଦାଲ୍ନିଃ ନାଙ୍ଗ୍ ଆପ୍ନାଃ ଦୟା,
ଦାଢ଼ି ତୁଦ୍ତାନ୍ ହଡ଼କ ନାଗେନ୍ତେ ଆଇଁୟାଃ ଜଆକେଇଙ୍ଗ୍ ଉଦୁବାଦ୍କଆ।
ନିନ୍ଦା କାଜି କାଜିତାନ୍ ଓଡ଼ୋଃ ବେଃକ୍ତାନ୍ ହଡ଼ କତାଃଏତେ
ଆଇଁୟାଃ ମେଦ୍ମୁହାଁଡ଼୍ କାଇଙ୍ଗ୍ ଉକୁକେଦା।
ଚିୟାଃଚି ସବେନାଃତେ ପେଡ଼େୟାନ୍ ପ୍ରାଭୁ ଆଇଙ୍ଗ୍କେ ଦେଙ୍ଗାଇଁୟା।
ଏନାମେନ୍ତେ ଆଇଙ୍ଗ୍ କାଇଙ୍ଗ୍ ହିନିସ୍ତାକାନା।
ଚାକ୍ମାକ୍ ଦିରି ଲେକା ଆଇଙ୍ଗ୍ ଆଇଁୟାଃ ମଚାକେ ଦହକାଦାଇଙ୍ଗ୍
ଓଡ଼ୋଃ ଆଇଙ୍ଗ୍ କାଇଙ୍ଗ୍ ଗିହୁଗଃଆ, ଏନା ସାରିତାନାଇଙ୍ଗ୍।
ଅକଏ ଆଇଙ୍ଗ୍କେ ଧାର୍ମାନ୍ ରିକାଃଏ,
ଇନିଃ ଆଇଁୟାଃ ହେପାଦ୍ରେ ମେନାଇୟା,
ଅକନ୍ ଗମ୍କେ ଆଇଁୟାଃ ବିରୁଧ୍ରେ ତିଙ୍ଗୁନାଏ ?
ଦେଲା, ଆବୁ ମିଦ୍ତାଃରେ ଆମ୍ନା ସାମ୍ନା ତିଙ୍ଗୁନାଃବୁ,
ଆଇଁୟାଃ ବିରୁଧ୍ରେ ଅକଏ ତିଙ୍ଗୁନାଏ ?
ଇନିଃ ଆଇଁୟାଃ ଆୟାର୍ତେ ହିଜୁଃକା।
ନେଲେପେ, ପେଡ଼େୟାନ୍ ପ୍ରାଭୁ ଆଇଙ୍ଗ୍କେ ଦେଙ୍ଗାଇଁୟା,
ଆଇଙ୍ଗ୍କେ ଅକଏ ଚିଟାଇୟାଁ ? ନେଲେପେ,
ଇନ୍କୁ ସବେନ୍କ ଲିଜାଃ ଲେକା ମାରିୟଃଆକ।
ତିଜୁକ ଇନ୍କୁକେ ଜମ୍କଆକ।
ଅକ ହଡ଼ ପ୍ରାଭୁକେ ବରଆଃଏ
ଓଡ଼ୋଃ ଆୟାଃ ଦାସିଆଃ କାଜିକେ ମାନାତିଙ୍ଗ୍ ରିକାଃଏ,
ଏନ୍ଲେକାନ୍ ହଡ଼ ଆପେକଏତେ ଅକଏ ମେନାଇୟା ? ଅକଏ ନୁବାଃରେ ସେସେନାଃଏ
ଓଡ଼ୋଃ ଇନିଃତାଃରେ ମାସ୍କାଲ୍ ବାନଃ ରେଦ,
ଇନିଃ ପ୍ରାଭୁଆଃ ନୁତୁମ୍ରେ ବିଶ୍ୱାସ୍ ରିକାଏକା
ଓଡ଼ୋଃ ପାର୍ମେଶ୍ୱାର୍ଆଃ ଚେତାନ୍ରେ ଆସ୍ରା ଦହଏକାଏ।
ମେନ୍ଦ ନାହାଁଃ ଆପେକଏତେ ଅକନ୍କ ଆପ୍ନାଃ ସେଙ୍ଗେଲ୍ ଜୁଲ୍ ତାନାପେ
ଓଡ଼ୋଃ ଆପ୍ନାଃ ନାଗେନ୍ତେ ସେଙ୍ଗେଲ୍ ଲୁଠି ଜୁଲ୍ ତାନାପେ,
ତାବ୍ଦ ନାହାଁଃ ଜୁ ସେନଃପେ, ଆପେୟାଃ ଜୁଲ୍ତାନ୍ ସେଙ୍ଗେଲ୍ ଲୁଠି ଥାଲାରେ ସେସେନ୍ପେ।
ଆପେ ଆଇଁୟାଃ ତିଃଇଏତେ ନେଆଁପେ ନାମେୟାଁ ଓଡ଼ୋଃ ଏୟମ୍ତାନ୍ଲଃ ଦୁଡ଼ୁମାପେ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.