Munda Bible
ଯିଶାୟ 49
ପ୍ରାଭୁଆଃ ଦାସି
ହେ ଟାପୁ ସବେନ୍, ଆଇଁୟାଃ କାଜି ଆୟୁମେପେ,
ହେ ସାଙ୍ଗିନ୍ରେନ୍ ରାଇଜ୍ ସବେନ୍, ଆଇଁୟାଃ କାଜି ଆୟୁମେପେ।
ଆଇଙ୍ଗ୍ ଜାନାମଃ ସିଦାରେ ପ୍ରାଭୁ ଆଇଙ୍ଗ୍କେ ସାଲାକାଦିୟାଁ,
ଆଇଙ୍ଗ୍ ଏଙ୍ଗାରାଃ ହାମ୍ବାଲ୍ରୋୱା ହବାଅଃ ସିଦାରେ ପ୍ରାଭୁ ଆଇଁୟାଃ ନୁତୁମ୍ ଅଲାକାଦା।
ଇନିଃ ଆଇଁୟାଃ ମଚାକେ ତାରାଉଡ଼ି ରେୟାଃ ଲେସେର୍ ଲେକା ବାଇକେଦାଏ,
ଆୟାଃ ତିଃଇରାଃ ଉମ୍ବୁଲ୍ରେ ଆଇଙ୍ଗ୍କେ ଉକୁକେଦିୟାଁ।
ଇନିଃ ଆଇଙ୍ଗ୍କେ ଲେସେରାକାନ୍ ଚିଆରି ଲେକା ବାଇକେଦ୍ତେ ଆୟାଃ ବାଉରାଅ ନାଗେନ୍ତେ ସେକାଡ଼ାକାଦିୟାଁ।
ଇନିଃ ଆଇଙ୍ଗ୍କେ କାଜି କେଦିୟାଁ, “ଆମ୍ ଆଇଁୟାଃ ଦାସି, ଇସ୍ରାଏଲ୍,
ଆମାଃ ହରାତେ ଆଇଙ୍ଗ୍ ମାଇନାନ୍ ନାମେୟା।”
ମେନ୍ଦ ଆଇଙ୍ଗ୍ କାଜିରୁହାଡ଼୍ କେଦା, “ଆଇଙ୍ଗ୍ ଇନ୍କୁ ନାଗେନ୍ତେ ବେଗାର୍ ଗି କାମିକେଦା
ଓଡ଼ୋଃ ଆଇଙ୍ଗ୍ ସାମାଗି ଆଇଁୟାଃ ପେଡ଼େଃକେ ଆଦ୍କେଦା।
ଏନ୍ରେହ ଅକଆଃ ଆଇଁୟାଃ ନାଲା ନାମେତେୟାଃ ପ୍ରାଭୁଆଃ ତିଃଇରେ ମେନାଃ।
ଆଇଁୟାଃ କାମିରାଃ ନାଲା ପାର୍ମେଶ୍ୱାର୍ତାଃରେ ମେନାଃ।”
ଯାକୁବ୍ଆଃ କିଲିକକେ ଆୟାଃତାଃତେ ରୁହାଡ଼୍ ଆଉ ନାଗେନ୍ତେ ଓଡ଼ୋଃ ଇସ୍ରାଏଲ୍ ହଡ଼କକେ ଆୟାଃତାଃରେ ହୁଣ୍ଡିକ ନାଗେନ୍ତେ,
ଇନିଃ ଆଇଙ୍ଗ୍କେ ଏଙ୍ଗାରାଃ ଲାହିଦ୍ରେ ଆୟାଃ ଦାସି ଲେକା ସାଲାକେଦିୟାଁ, ଚିୟାଃଚି ପ୍ରାଭୁଆଃ ଆୟାର୍ରେ ଆଇଙ୍ଗ୍ ମାଇନାନ୍ ନାମାକାଦାଇଙ୍ଗ୍
ଓଡ଼ୋଃ ଆଇଁୟାଃ ପାର୍ମେଶ୍ୱାର୍ ଆଇଁୟାଃ ପେଡ଼େୟାନ୍ନିଃ ଲେକା ହବାକାନାଏ।
ପ୍ରାଭୁ ଆଇଙ୍ଗ୍କେ କାଜିକେଦିୟାଁ,
“ଆମ୍ ଆଇଁୟାଃ ଦାସି ଲେକା ଯାକୁବ୍ଆଃ କିଲିକକେ ମାରାଙ୍ଗ୍ ବାଇକଆ
ଓଡ଼ୋଃ ଇସ୍ରାଏଲ୍ରେନ୍ ବାଞ୍ଚାଅଃ କେଦ୍ତେ ସାରେୟାକାନ୍ ହଡ଼କକେ ସୁତୁଃକେଦ୍ତେ ଆଉରୁହାଡ଼୍କଆ,
ନେଆଁ ଆମାଃ ନାଗେନ୍ତେ ହୁଡିଙ୍ଗ୍ କାମି ଲେକ୍ନାଃ ତାନାଃ।
ଅତେ ଦିଶୁମ୍ ରେୟାଃ ଟୁଣ୍ଡୁ ଜାକେଦ୍ ଆଇଁୟାଃ ବାଇକାଦ୍ ଜୀଉବାଞ୍ଚାଅ ଏମ୍ ନାଗେନ୍ତେ
ଆଇଙ୍ଗ୍ ଆମ୍କେ ସାଅଁସାର୍ ହଡ଼କଆଃ ନାଗେନ୍ତେ ମାର୍ସାଲ୍ ଲେକାଇଙ୍ଗ୍ ବାଇମେୟାଁ।”
ଅକଏକେ ହଡ଼କ କାକ ମାଇନ୍କିୟା ଓଡ଼ୋଃ ଦିଶୁମ୍ରେନ୍ କିଲିକ ଇନିଃକେ ହିସିଙ୍ଗାକିୟା,
ଅକଏଚି ରାଇଜ୍ତାନ୍କଆଃ ଦାସି ଲେକା ହବାୟାନାଏ,
ଇନିଃକେ ଇସ୍ରାଏଲ୍ରେନ୍ ବାଞ୍ଚାଅନିଃ ଓଡ଼ୋଃ ପାବିତାର୍ ପାର୍ମେଶ୍ୱାର୍ ମେନ୍ତେ କାଜିୟଃତାନା।
“ପ୍ରାଭୁ ଅକଏଚି ପାତିୟାର୍ନିଃ, ଇସ୍ରାଏଲ୍ରେନ୍ ପାବିତାର୍ ପାର୍ମେଶ୍ୱାର୍
ଓଡ଼ୋଃ ଅକଏ ଆପେକେ ସାଲାକାଦ୍ପେୟା,
ଇନିୟାଃ ନାଗେନ୍ତେ ରାଜାକ ଆମ୍କେ ନେଲ୍କେଦ୍ତେ ତିଙ୍ଗୁଃଆ,
ଓଡ଼ୋଃ ହାକିମ୍କ ଆମ୍କେ ନେଲ୍କେଦ୍ତେ ଜହାର୍ମେୟାଁକ।”
ଯୀରୁଶାଲେମ୍ରାଃ ଆଡଃମିସା ବାଇରୁହାଡ଼ଃ
ପ୍ରାଭୁ ଆୟାଃ ହଡ଼କକେ କାଜିକତାନାଏ,
“ଆଇଙ୍ଗ୍ ସୁକୁଆନ୍ ଦିପିଲିରେ ଆପେକେ କାଜିପେୟା, ଜୀଉବାଞ୍ଚାଅ ହୁଲାଙ୍ଗ୍ରେ ଆଇଙ୍ଗ୍ ଆପେକେଇଙ୍ଗ୍ ଦେଙ୍ଗାକେଦ୍ପେୟା।
ଓଡ଼ୋଃ ଆପେକେ ବାଞ୍ଚାଅପେୟା, ଚିୟାଃଚି ଏନାତେ ଦିଶୁମ୍କ ଆଡଃମିସା ବାଇରୁହାଡ଼ଃ ନାଗେନ୍ତେ,
ହଡ଼କକେ ଆକଆଃ ଆକ୍ତେୟାର୍କେ ଆଡଃମିସା ନାମେ ନାଗେନ୍ତେ
ଆଇଙ୍ଗ୍ ଆପେକେ ଇନ୍କୁ ନାଗେନ୍ତେ ମିଆଦ୍ ରାଜିନାମା ଲେକା ବାଇପେୟା।
ଜେ'ଲେକାଚି ତଲାକାନ୍ ହଡ଼କକେ କାଜିୟଃଆ, ‘ବାହାରିତେ ଅଡଙ୍ଗଃପେ’
ଓଡ଼ୋଃ ନୁବାଃରେ ତାଇକାନ୍ ହଡ଼କକେ କାଜିୟଃଆ, ‘ମାସ୍କାଲ୍ତେ ହିଜୁଃପେ।’
ଇନ୍କୁ ହରାଗେନାରେ ଆତିଙ୍ଗ୍ୟାଁଃକ
ଓଡ଼ୋଃ ତାସାଦ୍ କା ତାଇନ୍ ବୁରୁ ଠାୟାଦ୍କରେ ଇନ୍କୁଆଃ ଆତିଙ୍ଗ୍ ଠାୟାଦ୍ ହବାଅଃଆ।
ଇନ୍କୁ କାକ ରେଙ୍ଗେଜଃଆ ଚାଏ କାକ ତେତାଙ୍ଗ୍ଅଃଆ,
ଚାଏ ସିତୁଙ୍ଗ୍ ସାହା ଚି ସିଙ୍ଗିରେୟାଃ ତେଜ୍ ରାଁପ୍ ଇନ୍କୁକେ କା ହାସୁକଆ।
ଚିୟାଃଚି ଇନିଃ ଇନ୍କୁକେ ଦାୟାକଆ, ଇନିଃ ଇନ୍କୁକେ ହରା ହରା ସୁତୁଃ ଇଦିକଆ
ଓଡ଼ୋଃ ଲିଙ୍ଗିୟଃତାନ୍ ଦାଆଃ ଗେନା ଗେନାତେ ଇନ୍କୁକେ ସୁତୁଃଇଦିକଆ।
“ଆଇଙ୍ଗ୍ ବୁରୁ ସବେନାଃକେ ମିଦ୍ ସାମାନ୍ ରିକାକେଦ୍ତେ ହରା ବାଇୟାଃ
ଓଡ଼ୋଃ ଆଇଁୟାଃ ସବେନ୍ ହରାକେ ଚାକାର୍ ହରା ଲେକା ସାଲାଙ୍ଗିଗି ବାଇୟାଇଙ୍ଗ୍।
ନେଲେପେ, ଇନ୍କୁ ସାଙ୍ଗିନ୍ ଏତେ ହିଜୁଃଆକ, ଚିମିନ୍କ ଉତ୍ତାର୍ ସାଃଏତେ
ଓଡ଼ୋଃ ଚିମିନ୍କ ପାଶ୍ଚିମ୍ ସାଃଏତେ ହିଜୁଃଆକ।
ଓଡ଼ୋଃ ଚିମିନ୍କ ସିନିମ୍ ଦିଶୁମ୍ଏତେ ହିଜୁଃଆକ।”
ହେ, ସିର୍ମାରାଃ ସବେନାଃ, ଦୁରାଙ୍ଗ୍ୟେଁପେ, ହେ ଅତେଦିଶୁମ୍ ରାସ୍କାଅଃପେ,
ହେ ବୁରୁ ସବେନ୍ କାଉରିକେଦ୍ତେ ଦୁରାଙ୍ଗ୍ୟେଁପେ।
ଚିୟାଃଚି ପ୍ରାଭୁ ଆୟାଃ ହଡ଼କକେ ଜୀଉକେଟେଃ ଏମାକାଦ୍କଆ
ଓଡ଼ୋଃ ଆପ୍ନାଃ ଦୁକୁରେ ତାଇନ୍ତାନ୍ ହଡ଼କକେ ସାୟାଦ୍କଆ।
ମେନ୍ଦ ସିୟୋନ୍ କାଜିକେଦାଏ,
“ପ୍ରାଭୁ ଆଇଙ୍ଗ୍କେ ବାଗିକାଦିୟାଁ,
ପ୍ରାଭୁ ଆଇଙ୍ଗ୍କେ ରିଡ଼ିଙ୍ଗ୍ କାଦିୟାଁ।
ଚିୟାଃ ଏଙ୍ଗା ଆୟାଃ ଜାନାମ୍କାଇ ହନ୍କେ କା ଦୁଲାଡ଼୍କେଦ୍ତେ
ଚିୟାଃ ଆୟାଃ ତଆ ଆନୁଇତାନ୍ ହନ୍କେ ରିଡ଼ିଙ୍ଗ୍ ଦାଡ଼ିୟା ?
ହାଁ, ଇନ୍କୁ ରିଡ଼ିଙ୍ଗ୍ ଦାଡ଼ିୟା ମେନ୍ଦ ଆଇଙ୍ଗ୍ କାଇଙ୍ଗ୍ ରିଡ଼ିଙ୍ଗ୍ପେୟା।
ନେଲେମେ, ଆଇଙ୍ଗ୍ ଆଇଁୟାଃ ବାରାନ୍ ତିଃଇରେୟାଃ ପାପ୍ଲିରେ ନୁତୁମ୍ ତାମାଃ ଅଲାକାଦାଇଙ୍ଗ୍
ଓଡ଼ୋଃ ଆମାଃ ପାଚ୍ରି ସବେନ୍ ଇମ୍ତା ଆଇଁୟାଃ ଆୟାର୍ରେ ମେନାଃ।
“ନେଲେମେ ଆଡଃମିସା ବାଇରୁହାଡ଼୍ ନାଗେନ୍ତେ ଆମାଃ ହନ୍କ ଚେତ୍ଗାର୍ ତାନ୍ଲଃ ହିଜୁଃତାନା, ମେନ୍ଦ ଜିୟନ୍ ରିକାତାନ୍କ
ଓଡ଼ୋଃ ଅକନ୍କ ଆପେକେ ସିଗିଦ୍ କେଦ୍ପେୟା, ଇନ୍କୁ ଆପେ ଥାଲା ଏତେ ସାଙ୍ଗିନ୍ତେ ନିରାଃକ।
ଚିନାଃ ହବାଅଃଆ, ଏନା ସାରି ନାଗେନ୍ତେ ଚାରିଓସାଃ ନେଲେପେ,
ଏନ୍ ସବେନ୍କ ମିଦ୍ତାଃରେ ହୁଣ୍ଡିକେଦ୍ତେ ଆମାଃତାଃ ହିଜୁଃ ତାନାକ।
ପ୍ରାଭୁ କାଜିତାନାଏ, ‘ଆଇଙ୍ଗ୍ଦ ଜୀନିଦ୍ ପାର୍ମେଶ୍ୱାର୍ ତାନିଙ୍ଗ୍ ହରାତେ
ଆପେ ତୁସିଙ୍ଗ୍କାନ୍ ସୋନା ରୁପା ଲେକା ଇନ୍କୁକେ ତୁସିଙ୍ଗ୍କଆପେ।
ଆଣ୍ଦିୟଃତାନ୍ କୁଡ଼ି ସୋନା ରୁପାତେ ସିଙ୍ଗାରଃ ଲେକା ଆପେ ତୁସିଙ୍ଗ୍କଆପେ।’
“ଆମାଃ ଅକ ଠାୟାଦ୍ ସିଃସଏଃ, ହାସୁର୍ କାନା
ଓଡ଼ୋଃ ଆମାଃ ଅକ ଦିଶୁମ୍କ ଖାଣ୍ଡାର୍ ଲେକା ହବାକାନା,
ଏନ୍ତାଃରେ ନାହାଁଃଦ ଆମାଃ ହଡ଼କ କାକ ତାଇନ୍ ଦାଡ଼ିୟା
ଓଡ଼ୋଃ ଇନ୍କୁ ସବେନ୍କ ସାଙ୍ଗିନ୍ତେ ନିରାଃ।
ଆମାଃ ଅକନ୍ ହନ୍କକେ ଆମାଃତାଃ ଏତେ ସାଙ୍ଗିନ୍ତେ ଇଦିୟାକାନା,
ଇନ୍କୁ ରୁହାଡ଼୍ କେଦ୍ତେ ଆମାଃ ଲୁତୁର୍ରେ କାଜିୟାକ,
‘ନେ ଠାୟାଦ୍ ଆବୁ ନାଗେନ୍ତେ ହୁଡିଙ୍ଗ୍ଗିୟା,
ଆଲେକେ ଠାୟାଦ୍ ଏମାଲେମ୍, ଆଲେ ଏନ୍ତାଃରେ ତାଇନାଃଲେ।’
ଇମ୍ତା ଆମ୍ ଆମାଃ ମନ୍ତେଗି କାଜିୟା,
‘ଆଇଁୟାଃ ହନ୍କ କୁମ୍ବୁଡ଼ୁକେଦ୍ତେ ସାଙ୍ଗିନ୍କାନା,
ଆଇଙ୍ଗ୍ ଏସ୍କାର୍ ସାଙ୍ଗିନ୍କେଦ୍ତେ ନେତେହେନ୍ତେ ହନର୍ବାଡ଼ା ତାନାଇଙ୍ଗ୍,
ଆଇଁୟାଃ ନେ ସବେନ୍କକେ ଅକଏ ଜାନାମ୍ ଏମାକାଦ୍କଆ
ଓଡ଼ୋଃ ଇନ୍କୁକେ ଅକଏ ଆସୁଲ୍କ ତାନାଏ ?
ନେଲେପେ, ଆଇଙ୍ଗ୍ ଏସ୍କାର୍ ତାଇନ୍ କେନାଇଙ୍ଗ୍,
ନେ ସବେନ୍କ କତାଃରେ ତାଇନ୍କେନା ?’”
ସବେନାଃତେ ପେଡ଼େୟାନ୍ ପ୍ରାଭୁ ନେ କାଜି କାଜିତାନାଏ,
“ନେଲେମେ, ଆଇଙ୍ଗ୍ ଏଟାଃ ଦିଶୁମ୍ରେନ୍ କିଲିକଆଃ ବିରୁଧ୍ରେ ତିଃଇ ଜିଲିଙ୍ଗ୍ ରିକାୟା
ଓଡ଼ୋଃ ସବେନ୍ ରାଇଜ୍ ବିରୁଧ୍ରେ ଆଇଁୟାଃ ଝାଣ୍ଡା ରିମେୟାଁଇଙ୍ଗ୍, ଏନ୍ତେ ଇନ୍କୁ ଆମାଃ ହନ୍କକେ କୟଙ୍ଗ୍କେଦ୍ତେ ଆଉକଆକ
ଓଡ଼ୋଃ ଆମାଃ କୁଡ଼ି ହନ୍କକେ ତାରାନ୍ରେ ଗଅଃ କେଦ୍ତେ ଅଡ଼ାଃତେ ରୁହାଡ଼୍ ଆଉକଆକ।
ରାଜାକ ଆପୁ ଲେକା ଆମାଃ ସେୱା ରିକାୟା
ଓଡ଼ୋଃ ରାନିକ ଏଙ୍ଗା ଲେକା ସେୱା ରିକାୟା।
ଇନ୍କୁ ଅତେରେ ଅମ୍ବାକେଦ୍ତେ ଜହାର୍ମେୟାଁ
ଓଡ଼ୋଃ ଆମାଃ କାଟା ତାଲ୍କାରେୟାଃ ଧୁଡ଼ିକେ ଚଟାବେୟା।
ଏନ୍ତେ ଆଇଙ୍ଗ୍ ଯେ ପ୍ରାଭୁ
ଓଡ଼ୋଃ ଆଇଙ୍ଗ୍କେ ତାଙ୍ଗିତାନ୍କ କାକ ଗିହୁଃ ଇଚିୟଃଆ, ଏନା ଆପେ ସାରି ଦାଡ଼ିୟାପେ।”
ଚିୟାଃ ପେଡ଼େୟାନ୍ ହଡ଼ତାଃଏତେ ଜିନିଷ୍ ରେଃକ୍ ଇଦିୟଃଆ,
ଚାଏ ଧାର୍ମାନ୍ ହଡ଼ରାଃ ତନଲ୍ ଚିୟାଃ ରାଡ଼ାଅଃଆ ?
ମେନ୍ଦ ପ୍ରାଭୁ କାଜିତାନାଏ,
“ପେଡ଼େୟାନ୍ ହଡ଼ରାଃ ତଲାକାନ୍ ହଡ଼କ ସାଙ୍ଗିନ୍ ରିକାଅଃଆ
ଓଡ଼ୋଃ ବରୱାନ୍ ହଡ଼ରାଃ ରେଃକ୍ ଜିନିଷ୍କ ଇଦିୟଃଆ।
ଚିୟାଃଚି ଆମାଃ ବିରୁଧ୍ ରିକାତାନ୍କଲଃ ଆଇଙ୍ଗ୍ ବିରୁଧ୍ ରିକାଏୟାଇଙ୍ଗ୍
ଓଡ଼ୋଃ ଆମାଃ ହନ୍କକେ ବାଞ୍ଚାଅକଆଇଙ୍ଗ୍।
ଆମ୍କେ ଅକଏ ସିଗିଦ୍ ରିକାମେ ତାନାକ,
ଇନ୍କୁକେ ଆକଆଃ ମାସ୍ ଜଜମ୍ ନାଗେନ୍ତେ ଆଚୁକଆ
ଓଡ଼ୋଃ ଦାଖ୍ରାସିତେ ବୁଲଃ ଲେକା ଇନ୍କୁ ଆକଆଃ ମାୟୋମ୍ତେ ବୁଲଃଆକ।
ଏନାରେ ଆଇଙ୍ଗ୍ ପ୍ରାଭୁ ଆପେୟାଃ ବାଞ୍ଚାଅନିଃ, ପାରିତ୍ରାଣ୍ ଏମଃନିଃ
ଓଡ଼ୋଃ ଯାକୁବ୍ଆଃ ପେଡ଼େୟାନ୍ନିଃ ତାନିଙ୍ଗ୍, ନେଆଁ ସବେନ୍କ ସାରି ଦାଡ଼ିୟାକ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.