Munda Bible
ଯିଶାୟ 51
ଯୀରୁଶାଲେମ୍ ନାଗେନ୍ତେ ପାର୍ମେଶ୍ୱାର୍ଆଃ ଜୀଉରାଡ଼େଃ
ପ୍ରାଭୁ କାଜିତାନାଏ,
“ହେ ଧାରାମ୍ ହରାରେ ସେସେନ୍ତାନ୍କ, ହେ ପ୍ରାଭୁକେ ଦାଣାଁଇତାନ୍ ହଡ଼କ,
ଆପେ ଆଇଁୟାଃ କାଜି ଆୟୁମେପେ,
ଆପେ ଅକ ଦିରିଏତେ ହାଦାକାନାପେ
ଓଡ଼ୋଃ ଅକ ଦିରି ଖାଦାନ୍ ଏତେ ଉର୍ଅଡଙ୍ଗ୍ କାନାପେ, ଏନାକେ ନେଲେପେ।
ଆପେୟାଃ ପୁର୍ଖାଆପୁ ଆବ୍ରାହାମ୍କେ
ଓଡ଼ୋଃ ଆପେୟାଃ ଏଙ୍ଗା ସାରାକେ, ନେ ବାରାନ୍କିନ୍କେ ନେଲ୍କିନ୍ପେ।
ଚିୟାଃଚି ଆଇଙ୍ଗ୍ ଚିମ୍ତା ଆବ୍ରାହାମ୍କେ କେଡ଼ାକିୟାଇଙ୍ଗ୍,
ଇମ୍ତା ଇନିଃ ଏସ୍କାର୍ଗି ତାଇକେନା।
ଓଡ଼ୋଃ ଆଇଙ୍ଗ୍ ଇନିଃକେ ଆଶିଷ୍ ତାନ୍ଲଃ ପୁରାଃ କିଲି ହବାୟାନାଏ।
“ପ୍ରାଭୁ ସିୟୋନ୍କେ ଜୀଉରାଡ଼େଃ ଏମ୍କିୟାଏ।
ଇନିଃ ଆୟାଃ ବିର୍ ଠାୟାଦ୍କକେ ଏଦାନ୍ ବାଗାଇଚା ଲେକା
ଓଡ଼ୋଃ ଗିତିଲ୍ ପିଡ଼ିକେ ପ୍ରାଭୁଆଃ ବାଗାଇଚା ଲେକା ବାଇୟାକାଦା।
ଲାନ୍ଦା, ରାସ୍କା, ଧାନ୍ୟାବାଦ୍ ଓଡ଼ୋଃ ଦୁରାଙ୍ଗ୍ରେୟାଃ ଲାବ୍ଜା ଏନ୍ତାଃରେ ହବାଅଃଆ।
“ହେ ଆଇଁୟାଃ ହଡ଼କ, ଆଇଁୟାଃ କାଜି ମନ୍ସୁରୁଦ୍ତେ ଆୟୁମେପେ,
ହେ ଆଇଁୟାଃ ଦିଶୁମ୍ରେନ୍ ହଡ଼କ, ଆଇଁୟାଃ କାଜିରେ ଲୁତୁର୍ ଏମେପେ।
ଚିୟାଃଚି ଆଇଙ୍ଗ୍ ଆନ୍ଚୁ ଓଡ଼ୋଃ ବିଧି ଏମାପେୟା
ଓଡ଼ୋଃ ସବେନ୍ କିଲିକ ନାଗେନ୍ତେ ଆଇଁୟାଃ ବିଚାର୍ ମାସ୍କାଲ୍ ଲେକା ହବାଅଃଆ।
ଆଇଁୟାଃ ଧାର୍ମାନ୍ ବିଚାର୍ ନାଡ଼େଃ ସେଟେର୍ ହିଜୁଃତାନା।
ଆଇଁୟାଃ ପାରିତ୍ରାଣ୍ ଲିଙ୍ଗିୟଃତାନା ଓଡ଼ୋଃ ଆଇଁୟାଃ ସୁପୁ ପୁରାଃ ହଡ଼କ ନାଗେନ୍ତେ ନ୍ୟାୟ ବିଚାର୍ ଆଉଇୟା।
ଟାପୁ ସବେନାଃ ଆଇଙ୍ଗ୍କେ ତାଙ୍ଗିୟାଁ
ଓଡ଼ୋଃ ଆଇଁୟାଃ ସୁପୁ ରେୟାଃ ପେଡ଼େଃରେ ଆସ୍ରା ରିକାୟା।
ଆପେ ସବେନ୍ ସିର୍ମା ସାଃତେ ଆରିଦ୍ ରିକାଏପେ
ଓଡ଼ୋଃ ଲାତାର୍ ରେୟାଃ ଅତେକେ ଆରିଦେପେ।
ଚିୟାଃଚି ସିର୍ମାସାଃ ସବେନାଃ ସୁକୁଲ୍ ଲେକା ହୁଇନାଃ
ଓଡ଼ୋଃ ଅତେ ଲାତାର୍ ଲିଜାଃ ଲେକା ଜିୟନ୍ ରିକାନାଃ
ଓଡ଼ୋଃ ଅତେରେ ତାଇନ୍ତାନ୍କ ପିଚୁରକ ଲେକା ଗଜଃଆକ।
ମେନ୍ଦ ଆଇଁୟାଃ ଜୀଉବାଞ୍ଚାଅ ଜାନାଅ ଜାନାଅଗି ତାଇନାଃ
ଓଡ଼ୋଃ ଆଇଁୟାଃ ଧାର୍ମାନ୍ କା ଟୁଣ୍ଡୁ ନାଃ।
“ହେ ଧାର୍ମାନ୍ ହଡ଼କ, ଅକେୟାଃ ମନ୍ସୁରୁଦ୍ରେ ଆଇଁୟାଃ ଆନ୍ଚୁକ ମେନାଃ,
ଆପେ ଆଇଁୟାଃ କାଜି ଆୟୁମେପେ,
ଆପେ ହଡ଼କଆଃ ହିସିଙ୍ଗା ନାଗେନ୍ତେ ଆଲପେ ବରୟା
ଚାଏ ନିନ୍ଦାଇ କାଜି ନାଗେନ୍ତେ ଆଲପେ ଆଡାଃ ଉଡ଼ୁଃ ରିକାନାଃ।
ଚିୟାଃଚି ନିଦିର୍ ଇନ୍କୁଆଃ ଲିଜାଃ ଜମ୍ ଲେକା,
ଇନ୍କୁକେ ଜମ୍କଆକ ଓଡ଼ୋଃ ତିଜୁକ ଇନ୍କୁକେ ପୁଣ୍ଡି ଉବ୍ ଲେକା ଜମ୍କଆକ।
ମେନ୍ଦ ଆଇଁୟାଃ ଧାର୍ମାନ୍ ଜାନାଅ ଜାନାଅଗି ତାଇନାଃ
ଓଡ଼ୋଃ ଆଇଁୟାଃ ପାରିତ୍ରାଣ୍ ପିଢ଼ି ପିଢ଼ି ଜାକେଦ୍ ତାଇନାଃ।”
ହେ ପ୍ରାଭୁ ବିରିଦ୍ମେ, ଚିର୍ଗାଲ୍ କେଦ୍ତେ ବିରିଦ୍ମେ
ଓଡ଼ୋଃ ପେଡ଼େଃତେ ସେକାଡ଼ଃମେ।
ସିଦା ଦିପିଲି ଇମ୍ତା, ପୁର୍ଖା ହାଡ଼ାମ୍କଆଃ ଦିପିଲିରେ
ଚିଲ୍କା ରିକାକାଦ୍ ତାଇକେନାପେ, ଏନ୍ଲେକା ସେକାଡ଼ଃମେ।
ଅକଏ ରାହାବ୍1କେ ଟୁକ୍ଡ଼ା ଟୁକ୍ଡ଼ାକିୟା ଓଡ଼ୋଃ ଏନ୍ ବିଙ୍ଗ୍କେ ସବଃକିୟା, ଚିୟାଃ ଇନିଃ ଆମ୍ ନାହାଁଲାମେ ?
ଅକଏ ଦରେୟା ରେୟାଃ ଇକିର୍ ଦାଆଃ ସବେନାଃକେ ଆଞ୍ଜେଦ୍ କେଦା,
ଇନିଃ ତନଲ୍ଏତେ ରାଡ଼ାକାନ୍ ହଡ଼କ ନାଗେନ୍ତେ ହରା ବାଇ ନାଗେନ୍ତେ
ଦରେୟା ରେୟାଃ ଇକିର୍ ଠାୟାଦ୍ ଏତେ ହରା ବାଇକେଦାଏ, ଇନିଃ ଚି ଆମ୍ ନାହାଁଲାମେ ?
ଓଡ଼ୋଃ ପ୍ରାଭୁଆଃ ବାଞ୍ଚାଅକାନ୍ ହଡ଼କ ହିଜୁଃରୁହାଡ଼ାକ
ଓଡ଼ୋଃ ଇନ୍କୁ ଦୁରାଙ୍ଗ୍ ତାନ୍ଲଃ ରାସ୍କାତାନ୍ଲଃ ସିୟୋନ୍ତେ ବଲଃଆ।
ଜାଉଜରଙ୍ଗ୍ ସୁକୁ ରାସ୍କାକ ନାମେୟା।
ଏୟମ୍ ଓଡ଼ୋଃ ରାନାଃ ଇନ୍କୁତାଃ ଏତେ ନିର୍କଆଃ।
ଆପେକେ ଜୀଉରାଡ଼େଃ ଏମଃନିଃ ଏସ୍କାର୍ ଆଇଙ୍ଗ୍ଗି ତାନିଙ୍ଗ୍।
ଅକନ୍ ମାନୱା ହଡ଼ ଗଜଃ ଲେକାନ୍ ତାସାଦ୍ ଲେକାନିଃ ତାନିଃ,
ଏନ୍ ଲେକାନ୍ ମାନୱା ହଡ଼ରାଃ ହନ୍କେ ଆପେ ଚିନାଃ ବରୱାଇ ତାନାପେ ?
ଅକଏ ରିମିଲ୍ ରେୟାଃ ସବେନାଃକେ ପାସ୍ରାଅ କେଦା
ଓଡ଼ୋଃ ଅତେରେୟାଃ ନିହିଁଗାଡ଼ାକେ ବାଇକେଦା,
ଆପେକେ ବାଇୟାକାଦ୍ ଏନ୍ ପ୍ରାଭୁକେ ରିଡ଼ିଙ୍ଗ୍ କାଇଜାପେ ?
ଓଡ଼ୋଃ ଅକଏ ଆପେକେ ଜିୟନ୍ ରିକାନାଙ୍ଗ୍ ସାନାଙ୍ଗ୍ତାନାଏ,
ଇନିୟାଃ ଖିସ୍କେ ସବେନ୍ ହୁଲାଙ୍ଗ୍ ସବେନ୍ ଇମ୍ତା ବର ତାନାପେ।
ଏନ୍ ବିରୁଧ୍ ରିକାତାନ୍ନିୟାଃ ଖିସ୍ କତାଃରେୟା ?
ତଲ୍କେଦ୍ତେ ଇଦିୟାକାନ୍ ତନଲ୍ ହଡ଼କ ଜାଲ୍ଦିଗି ରାଡ଼ାନାଃକ,
ଇନ୍କୁ ଜେହେଲ୍ ଭିତାର୍ରେ କାକ ଗଜଃଆ,
ଚାଏ ଇନ୍କୁଆଃ ଜଜମ୍ ରେୟାଃ ଘାଟି କା ହୁଇନାଃ।
ଚିୟାଃଚି ଅକଏ ଦରେୟାକେ ଏକ୍ଲାଅୟା, ଆଲ୍ପୁଙ୍ଗ୍କ ସାଡ଼ିୟା,
ଆଇଙ୍ଗ୍ ଆପେୟାଃ ଏନ୍ ପ୍ରାଭୁ ପାର୍ମେଶ୍ୱାର୍ ତାନିଙ୍ଗ୍।
ଇନିୟାଃ ନୁତୁମ୍ ସାଲାଙ୍ଗିଉତାର୍ ପ୍ରାଭୁ ପାର୍ମେଶ୍ୱାର୍ ତାନାଃ।
ଅକଏ ସିର୍ମାରେୟାଃ ସବେନାଃ ଠାୟାଦ୍ରେଗି ଦହକେଦା,
ଅତେରେୟାଃ ନିହିଁଗାଡା ବାଇକେଦାଏ
ଓଡ଼ୋଃ ସିୟୋନ୍ରେନ୍ ହଡ଼କକେ କାଜିକେଦ୍କଆ,
“ଆପେ ସବେନ୍କ ଆଇଁୟାଃ ହଡ଼କ ତାନ୍ପେ,
ଆଇଙ୍ଗ୍ ଇନିଃଗି, ଅକଏଚି ଆପେୟାଃ ମଚାରେ ବାଚାନ୍ ଏମାକାଦାଏ
ଓଡ଼ୋଃ ଆୟାଃ ତିଃଇ ରେୟାଃ ଉମ୍ବୁଲ୍ରେ ଆପେକେ ହାରୁବ୍ କାଦ୍ପେୟା।”
ଯୀରୁଶାଲେମ୍ରାଃ ଦୁକୁରାଃ ଟୁଣ୍ଡୁ
ହେ ଯୀରୁଶାଲେମ୍, ଆଦାଅଃମେଁ, ଆମ୍ ଆଦା କେଦ୍ତେ ବିରିଦ୍ମେ।
ଆମ୍ ପ୍ରାଭୁଆଃ ତିଃଇଏତେ, ଆୟାଃ ଖିସ୍ ରେୟାଃ କାଟୋରା ଏତେ ନୁଁ କେଦା।
ଆମ୍ ବୁଲଃ ଲେକାନ୍ ମାରାଙ୍ଗ୍ କାଟୋରା ଏତେ ଏନାକେ ନୁଁ କେଦ୍ତେ ଟୁଣ୍ଡୁ କାଦାମ୍।
ଇସ୍ରାଏଲ୍ ଅକ ହନ୍କକେ ଜାନାମ୍ କାଦ୍କଆଏ,
ଇନ୍କୁଆଃ ଥାଲାରେ ଜେତାଏ ନେ'ଲେକା ବାଙ୍ଗାଇୟାଃ ଯେ,
ଆମାଃ ତିଃଇ ସାବ୍କେଦ୍ତେ ଆମ୍କେ ସୁତୁଃ ଇଦିମା।
ଆମାଃ ଚେତାନ୍ରେ ବାର୍ ଗୁନା ଦୁକୁ ହବାଅଃ କାନା।
ଅକଏ ଆମ୍କେ ଜୀଉରାଡ଼େଃ ଏମାଇଁୟା ?
ସିଃସଏଃ ଓଡ଼ୋଃ ଜିୟନଃ, ରିଙ୍ଗା ଓଡ଼ୋଃ ଲାଡ଼ାଇ ସେଟେରାକାନା।
ଅକଏ ଆମ୍କେ ଜୀଉସୁକୁ ଏମାମେୟା ?
ଆଇଁୟାଃ ହନ୍କ ବେହୋସ୍କାନା,
ଜାଲୋମ୍ରେ ଉୟୁଃକାନ୍ ମିରିକ୍ ଲେକା ଇନ୍କୁ ହରା ଗେନାରେ ଉୟୁଃକାନା।
ଇନ୍କୁଆଃ ଚେତାନ୍ରେ ପ୍ରାଭୁଆଃ ଖିସ୍,
ଆପେୟାଃ ପାର୍ମେଶ୍ୱାର୍ଆଃ ମାରାଙ୍ଗ୍ ମଚାତେ ପେରେୟାକାନା।
ଏନାମେନ୍ତେ ହେ ଦୁକୁତାନ୍ନିଃ ଯୀରୁଶାଲେମ୍ ଆୟୁମେମେ,
ଆମ୍ ବୁଲଃନିଃ, ମେନ୍ଦ ଇଲିଆର୍ଖିତେ କାହାଗି।
ପେଡ଼େୟାନ୍ ପ୍ରାଭୁ ପାର୍ମେଶ୍ୱାର୍ ଅକଏ ଆପ୍ନା ହଡ଼କଆଃ ସାଃ ଏତେ କାଜିତାନା,
ନେଲେମେ, ଅକ କାଟୋରା ଏତେ ନୁଁ କେଦ୍ତେ ବୁଲଃ ତାନାମ୍,
ଏନା ଆମାଃ ତିଃଇ ଏତେ ରେଃ ଇଦିକେଦା।
ଆଇଁୟାଃ ଖିସ୍ ରେୟାଃ ଏନ୍ କାଟୋରାଏତେ
ଆମ୍ ଓଡ଼ୋଃ ଚିଉଲାହ କାମ୍ ନୁଁ ଦାଡ଼ିୟା।
ଓଡ଼ୋଃ ଅକନ୍କ ଆମ୍କେ ସିଗିଦିମେ ତାନାକ,
ଇନ୍କୁଆଃ ତିଃଇରେ ଏନାକେ ଏମେୟା, ଚିୟାଃଚି ଇନ୍କୁ ଆଇଙ୍ଗ୍କେ କାଜିକାଦ୍ ତାଇକେନା,
“ଇକ୍ଡ଼ୁମ୍ ମେଁ, ଆମାଃ ଚେତାନ୍ରେ ଆଲେ ସେସେନ୍ ରିକାୟା,”
ଓଡ଼ୋଃ ଇନ୍କୁଆଃ ସେସେନ୍ ନାଗେନ୍ତେ ଆମାଃ ଦୟାକେ ଅତେ ଲେକା ଓଡ଼ୋଃ ହରା ଲେକା ରିକାକେଦା।
Source notes (1)
- Footnote ମିସାର୍ରାଃ ଏତ୍କାନ୍ ପେଡ଼େଃରାଃ ଚିହ୍ନାଁ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.