Munda Bible
ଯିଶାୟ 28
ଇଫ୍ରାଇମ୍ ଓଡ଼ୋଃ ଯୀରୁଶାଲେମ୍ ନାଗେନ୍ତେ ବିଚାର୍
ଇଫ୍ରାଇମ୍ରାଃ ଦାଖ୍ରାସି ନୁଁ ବୁଲାକାନ୍ ହଡ଼କ ଆପାନ୍କେ ମାରାଙ୍ଗେନ୍ ମେନ୍ତେ କାଜିନ୍ତାନ୍ ଲେକାନ୍ ମୁକୁଟ୍ ତାନ୍କ। ପୁରାଃ ଜ ଏମ୍ତାନ୍ ବୁଗିନ୍ ହାସାରାଃ ବହଃରେ ତାଇକାନ୍ ଇନିୟାଃ ସୁଗାଡ଼ାନ୍ ମେଦ୍ମୁହାଁଡ଼୍, ଗସକାନ୍ ବାହା ଲେକାନାଃ ତାନାଃ, ହାଏ ଇନ୍କୁ ଚିମିନ୍ ଦୁକୁକ ନାମେୟା ! ନେଲେପେ, ପ୍ରାଭୁଆଃ ମିଆଦ୍ ପେଡ଼େୟାନ୍ ଓଡ଼ୋଃ ଜୀଉରେ କେଟେଃ ହଡ଼ ମେନାଇୟା, ଇନିଃ ଆରିଲ୍ ଦିରି ଗାମା ଲେକା, ଜିୟନ୍ ରିକାଏତାନ୍ ଆନ୍ଧିହୟ ହିଜୁଃ ଲେକା, ଜୋର୍ସେ ଆତୁଃତାନ୍ ଟୁଡାଦାଆଃ ହିଜୁଃ ଲେକା, ହିଜୁଃକେଦ୍ତେ ଇନିଃକେ ଅତେରେ ହୁରାଙ୍ଗ୍ଇୟା। ଇଫ୍ରାଇମ୍ରାଃ ବୁଲାକାନ୍ ହଡ଼କଆଃ ଆହାଙ୍କାର୍ରାଃ ମୁକୁଟ୍ କାଟାଲଃ ଲାତାର୍ରେ ତିକାଅଃଆ, ଓଡ଼ୋଃ ପୁରାଃଗି ଜ ଏମ୍ତାନ୍ ବୁଗିନ୍ ହାସାରାଃ ବହଃରେ ତାଇକାନ୍ ଇନିୟାଃ ସୁଗାଡ଼ାନ୍ ମେଦ୍ମୁହାଁଡ଼୍ ଗସକାନ୍ ବାହା ଲେକାଅଃଆ, ସିତୁଙ୍ଗ୍ସାହା ସିଦାରେ ଜ'କେଦ୍ତେ ମାତାକାନ୍ ଲଆ ଜ ଲେକା ହୁଇନାଃ, ଏନାକେ ନେଲ୍ ହଡ଼କ ଇମ୍ତାଗି ତିଃଇରେ ଇଦିକେଦ୍ତେ ଜମେୟାଃକ। ଏନ୍ ହୁଲାଙ୍ଗ୍ରେ ପେଡ଼େୟାନ୍ ପ୍ରାଭୁ ଆପ୍ନାଃ ସାରେୟାକାନ୍ ହଡ଼କ ନାଗେନ୍ତେ ମାନାରାଙ୍ଗ୍ରାଃ ମୁକୁଟ୍ ଓଡ଼ୋଃ ମଲଙ୍ଗ୍ରେ ସୁଗାଡ଼ାନ୍ ବାହା ନେଲଃତାନ୍ ଲେକା ହବାଅଃଆଏ। ଓଡ଼ୋଃ ଅକନ୍କ ବିଚାର୍ ରିକା ନାଗେନ୍ତେ ଦୁବାକାନାକ, ଏନ୍ ହଡ଼କ ନାଗେନ୍ତେ ବିଚାର୍ ରିକାରେୟାଃ ଆତ୍ମା ଓଡ଼ୋଃ ଅକନ୍କ ପେଡ଼େଃତେ ନାଗାର୍ ଦୁଆର୍ଏତେ ବାଇରିକକେ ସାଙ୍ଗିନ୍ତେ ହାର୍ ଇଦିକତାନା, ଇନ୍କୁ ନାଗେନ୍ତେ ଇନିଃ ପେଡ଼େୟାନ୍ନିଃ ଲେକା ହୁଇନାଃ।
ଯିହୁଦାରେନ୍ ବୁଲଃତାନ୍ ହଡ଼କ ନାଙ୍ଗ୍ ଆୟାର୍କାଜିକ
ମେନ୍ଦ ଇନ୍କୁ ଦାଖ୍ରାସି ହରାତେ ଡାଗ୍ମାଗାଅଃ ତାନାକ ଓଡ଼ୋଃ ଇଲିଆର୍ଖି ହରାତେ ଇନ୍କୁ ଏତ୍କାନ୍ ହରାରେ ସେସେନ୍କାନାକ, ଯାଜାକ୍କ ଓଡ଼ୋଃ ନାବୀକ ଇଲିଆର୍ଖି ହରାତେ ଡାଗ୍ମାଗାଅ କାନାକ, ଇଲିଆର୍ଖି ଇନ୍କୁକେ ଆକ୍ତେୟାର୍ କାଦ୍କଆଏ, ଇଲିଆର୍ଖି ନୁଁ ନାଗେନ୍ତେ ଇନ୍କୁ ଏତ୍କାନ୍ ହରାରେ ସେନାକାନାକ, ଇନ୍କୁ ଦାର୍ଶାନ୍ ନେନେଲ୍ ରେହ ନେତେହେନ୍ତେ ହବାଅଃତାନାକ ଓଡ଼ୋଃ ନ୍ୟାୟ ରିକା ନାଗେନ୍ତେ ତହଦଃ ତାନାକ। ଚିୟାଃଚି ସବେନାଃ ଜଜମ୍ ଠାୟାଦ୍ ଉସାଡ଼୍ତେ ଓଡ଼ୋଃ ମାଇଲାତେ ପେରେଜାକାନା, ଜେତାନ୍ ଠାୟାଦ୍ ଫାର୍ଚି ବାନଆଃ।
“ଇନିଃ ଅକଏକେ ସେଣାଁନ୍ରେୟାଃ ଇନିତୁ ଏମାଇୟା ? ଇନିଃ ଅକଏକେ ସୁକୁକାଜିରାଃ ମୁଣ୍ଡି ଉଦୁବାଇୟା ? ଚିନାଃ ଅକନ୍କ ତଆ ନୁଁ ବାଗିକାଦ୍କକେ ଚାଏ ଅକନ୍କ ତଆ ନୁଁ ଏତେ ଆତମାକାନ୍କକେ ? ଚିୟାଃଚି ନେଆଁଦ ଆନ୍ଚୁ ଚେତାନ୍ରେ ଆନ୍ଚୁ, ନିୟାମ୍ ଚେତାନ୍ରେ ନିୟାମ୍, ପାନ୍ତି ଚେତାନ୍ ପାନ୍ତି, ନେତାଃରେ କାଟିକାନ୍, ହାନ୍ତାଃରେ କାଟିକାନ୍।”
କାଗି, ମେନ୍ଦ ଇନିଃ କା ସାରି ଜାଗାର୍ତେ କାଜିତାନ୍ ଏଟାଃ ଦିଶୁମ୍ରେନ୍କଆଃ ମଚାତେ, ନେ ହଡ଼କକେ କାଜିକେଦ୍କଆ, ଓଡ଼ୋଃ ଇନିଃ ଇନ୍କୁକେ କାଜିକେଦ୍କଆ, “ନେଆଁ ଆପେ ନାଗେନ୍ତେ ରୁଡ଼ୁନ୍ ଠାୟାଦ୍ ତାନାଃ, ଲାଗାକାନ୍ ହଡ଼କ ନେତାଃରେ ରୁଡ଼ୁନ୍ପେ, ଓଡ଼ୋଃ ନେଆଁଗି ସୁକୁ ଠାୟାଦ୍ ତାନାଃ,” ମେନ୍ଦ ଇନ୍କୁ ଆୟୁମ୍ ନାଗେନ୍ତେ କାକ ସାନାଙ୍ଗ୍କେଦା। ଏନାମେନ୍ତେ ପ୍ରାଭୁଆଃ ବାଚାନ୍ ଇନ୍କୁତାଃରେ ଆନ୍ଚୁ ଚେତାନ୍ରେ ଆନ୍ଚୁ, ନିୟାମ୍ ଚେତାନ୍ରେ ନିୟାମ୍, ପାନ୍ତି ଚେତାନ୍ରେ ପାନ୍ତି, ନେତାଃରେ କାଟିକାନ୍, ଏନ୍ତାଃରେ କାଟିକାନ୍। ଅକ ହରାତେ ଚି ଇନ୍କୁ ତହଦ୍ କେଦ୍ତେ ଉୟୁଗଃଆକ ଓଡ଼ୋଃ ଇନ୍କୁ ଚେତାନ୍ରେ ନକ୍ସାନ୍ ସେଟେରା, ଓଡ଼ୋଃ ଫାଁସ୍ରିରେ ଉୟୁଃକେଦ୍ତେ ସାନାବଃକ।
ସିୟୋନ୍ ରେୟାଃ କଚାଦିରି
ମେନ୍ଦ ହେ ନିନ୍ଦା ରିକାତାନ୍ ହଡ଼କ, ଯୀରୁଶାଲେମ୍ରେ ରାଇଜ୍ତାନ୍କ, ଆପେ ସବେନ୍କ ପ୍ରାଭୁଆଃ କାଜି ଆୟୁମେପେ, ଆପେ ଲାନ୍ଦା କେଦ୍ତେ କାଜିତାନାପେ, ଆଲେ ଗନଏଃଲଃ ମିଆଦ୍ ରାଜିନାମା ରିକାକାଦାଲେ ଓଡ଼ୋଃ ଅତେ ଲାତାର୍ଲଃ ହଁ କିରିୟା କାଦାଲେ। ଏନାମେନ୍ତେ ପୁରାଃ ପେଡ଼େୟାନ୍ ଟୁଡା ଦାଆଃ ଲେକାନ୍ ଦୁକୁ ହିଜୁଃ ରେୟ ଏନା ଆଲେକେ କାଏ ଜୁଟିଦ୍ ଦାଡ଼ିୟା। ଚିୟାଃଚି ଆଲେ ହସଡ଼ତେ ଆସ୍ରା ଇଦିକାଦାଲେ, ଓଡ଼ୋଃ ଅକଆଃ ସାର୍ତି ନାହାଁଲାଃ ଏନାରେ ଆସ୍ରା ଇଦିତାନାଲେ। ମେନ୍ଦ ସାଲାଙ୍ଗିଉତାର୍ ପ୍ରାଭୁ ନେ କାଜି କାଜିତାନାଏ, ନେଲେପେ, ଆଇଙ୍ଗ୍ କେଟେୟାନ୍ ନିହିଁଗାଡ଼ା ନାଗେନ୍ତେ ସିୟୋନ୍ରେ ମିଆଦ୍ ଦିରି, ବିନିଡ଼ାଅକାନ୍ ମିଆଦ୍ ଦିରି, ପୁରାଃ କେଟେୟାନ୍ ନିହିଁଗାଡ଼ା ଲେକାନ୍ ମିଆଦ୍ ଗନଙ୍ଗ୍ଆଁନ୍ କଚା ଦିରି ଦୁବେତାନାଇଙ୍ଗ୍, ଅକଏ ଏନାକେ ବିଶ୍ୱାସ୍ ରିକାୟା, ଇନିଃ ଚିଉଲାହ କାଏ ନେତେହାନ୍ତେୟଃଆ। ଆଇଙ୍ଗ୍ ନ୍ୟାୟ ରେୟାଃ ବିଚାର୍କେ ସଙ୍ଗ୍ ରିକାତାନ୍ ବାଏହାର୍ତେ ଓଡ଼ୋଃ ଧାର୍ମାନ୍କେ ଉଲୁଙ୍ଗ୍ଲଃ ବିଡ଼ାଅ ରିକାୟାଇଙ୍ଗ୍। ଅକ ହସଡ଼ ଲେକାନ୍ କାଜିରେ ଆସ୍ରା ଇଦିକାଦାକ, ଏନାକେ ଆରିଲ୍ ଦିରି ଗାମା ହରାତେ ଜିୟନ୍ ରିକାୟାଇଙ୍ଗ୍ ଓଡ଼ୋଃ ଅକଆଃ ଉକୁ ଠାୟାଦ୍ ମେନ୍ତେପେ ଆଟ୍କାରେ ତାନା, ଏନାକେ ଟୁଡା ଦାଆଃ ଆତୁ ଇଦିୟା। ଓଡ଼ୋଃ ଗନଏଃ ଏତେ ଆପେୟାଃ ନିୟାମ୍ ସାଙ୍ଗିନ୍ ରିକାଅଃଆ ଓଡ଼ୋଃ ଅତେ ଲାତାର୍ ଏତେ ଆପେୟାଃ ରାଜିନାମା କା ତାଇନାଃ। ଟୁଡା ଦାଆଃ ଲେକା ସାଜାଇ ହିଜୁଃରେ ଆପେ ଏନାତେ ସିଗିଦ୍ ନାମେୟାପେ। ଏନା ଚିମିନ୍ ଧାଅଁ ହିଜୁଃଆ, ଇମିନ୍ ଧାଅଁ ଆପେକେ ଆତୁ ଇଦିପେୟା। ଏନା ସବେନ୍ ହୁଲାଙ୍ଗ୍ ସେତାଃଏତେ ପୁରା ସିଙ୍ଗିସାଟୁବ୍ ଓଡ଼ୋଃ ମିଦ୍ନୁବାଃ ହିଜୁଃଆ। ନେ ଚିର୍ଗାଲେନ୍ କାଜିକେ ଆପେ ସାରି ଉରୁମ୍ଲେରେ ଏସ୍କାର୍ ଆଡ଼ାଃଉଡ଼ୁଃରାଃ ବର ହିଜୁଃଆ। ଚିଆଃଚି ଆପାନ୍କେ ଜିଲିଙ୍ଗ୍ୟେଁନ୍ ନାଗେନ୍ତେ ଅକନ୍ ପାର୍କମ୍ ବାଇୟାକାନା ଏନା ହୁଡିଙ୍ଗ୍ ୟାନା ଓଡ଼ୋଃ ଲିଜାଃ ହାରୁବଃ ନାଗେନ୍ତେ ଚାକାର୍ ବାନଆଃ। ପ୍ରାଭୁ ପେରାସିମ୍ ବୁରୁରେ ଚିଲ୍କା ତିଙ୍ଗୁୟାନା, ଏନ୍ଲେକାଗି ତିଙ୍ଗୁନା ଓଡ଼ୋଃ ଗିବିୟୋନ୍ ବୁରୁରେ ଚିଲ୍କା ଖିସ୍ୟାନା, ଏନ୍ଲେକାଗି ଖିସ୍ଅଃଆ। ମିଆଦ୍ ଆକ୍ଦାନ୍ଦାଅ କାମି ରିକାୟାଏ ଓଡ଼ୋଃ ଇନିଃ ଆୟାଃ ଏଟାଃ ଦିଶୁମ୍ରାଃ କିରିଙ୍ଗ୍ ଆଖ୍ରିଙ୍ଗ୍ରାଃ ସୁସାର୍ କାମିକେ ପୁରାଏୟା। ଏନାମେନ୍ତେ ଆପେ ନିନ୍ଦାନିଃ ଆଲପେ ହବାଅଃଆ, କା'ରେଦ ଆପେୟାଃ ସାଜାଇ ରେୟାଃ ତନଲ୍ ସିକିଡ଼ି କେଟେୟାନ୍ଗି ହବାଅଃଆ। ଚିୟାଃଚି ସବେନ୍ ଅତେଦିଶୁମ୍ ନାଗେନ୍ତେ ଅକ ସାଜାଇ ଠାହାରାଅକାଦ୍ ମେନାଃ, ଏନ୍ ବିଷାଏ ପ୍ରାଭୁ ସବେନାଃତେ ପେଡ଼େୟାନ୍ ପ୍ରାଭୁ ଆଇଙ୍ଗ୍କେ ଉଦୁବାକାଦିୟାଁ।
ପାର୍ମେଶ୍ୱାର୍ଆଃ ସେଣାଁ
ଅକ କାଜି କାଜିତାନାଇଙ୍ଗ୍ ଏନ୍କାଜି ବୁଗି ଲେକାତେ ଆୟୁମେପେ। ଚାଷି ହଡ଼ ହିତା ହେର୍ ନାଗେନ୍ତେ ସବେନ୍ ଇମ୍ତା ସିହୁଃ ରିକାୟାଏ ଚି ? ଚାଏ ହିତା ହେର୍ ନାଙ୍ଗ୍ ପିଡ଼ି ବାଇକାତେୟାଃଏ ଚି ? ପିଡ଼ିକେ ସାମାନ୍ ରିକାକେଦ୍ତେ ଇନିଃ ଚିନାଃ ପାନ୍ମୁହୁରି ଓଡ଼ୋଃ ଜିରା କାଏ ହେରେୟା ଚି ? ଇନିଃ ଚିନାଃ ପାନ୍ତି ପାନ୍ତି ବାଇକେଦ୍ତେ ଗହମ୍, ମିପିଦ୍ତାଃରେ କଦେ ଓଡ଼ୋଃ ପିଡ଼ିରାଃ ଟୁଣ୍ଡୁରେ ମେକା କାଏ ହେରାଃ ଚି ? ଚିୟାଃଚି ଇନିୟାଃ ପାର୍ମେଶ୍ୱାର୍ ଇନିଃକେ ସେଣାଁ ଏମାଇତାନାଏ ଓଡ଼ୋଃ ଇନିଃକେ ବୁଗି ଲେକାତେ ଇତୁଇ ତାନାଏ। ଚିୟାଃଚି ହେନ୍ଦେ ଜିରା ଜେତାନ୍ ମେଡ଼େଦ୍ରାଃ ଲେସେର୍ ହାଁତେୟାର୍ଲଃ ଚାଏ ଜିରା ଉରିକ୍ ଗାଡ଼ିରାଃ ଚାକାଲଃ ମାଡ଼େନ୍ କା ରିକାନାଃ ? ମେନ୍ଦ ହେନ୍ଦେ ଜିରାକେ ସଟାତେ ଓଡ଼ୋଃ ଜିରାକେ ମାରାଙ୍ଗ୍ ଭଙ୍ଗାଟ୍ତେ କଟା ଲାଗାତିୟାଁଃ। ହଲଙ୍ଗ୍ ବାଇ ନାଗେନ୍ତେ ଜଅକେ ଗୁଣ୍ଡା ରିକାଃକ, ଏନାକେ ବାର୍ବାର୍ ଗୁଣ୍ଡା କାକ ରିକା। ଚିୟାଃଚି ଗାଡ଼ିରାଃ ଚାକାଲଃ ଓଡ଼ୋଃ ଏନ୍ ସାଦମ୍କ ହରାତେ ଛିତିବିତି ରିକାଏ ରେହ, ଏନା କା ଗୁଣ୍ଡାଅଃଆ। ନେ କାଜିଦ ସବେନାଃତେ ପେଡ଼େୟାନ୍ ପ୍ରାଭୁ କାଜିକାଦାଏ, ଇନିଃ ଉହାଟ୍ ରିକାଏରେ ଆକ୍ଦାନ୍ଦାଅ ଓଡ଼ୋଃ ସେଣାଁରେ ମାରାଙ୍ଗ୍ ତାନିଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.