Munda Bible
ଯିଶାୟ 29
ଦାଉଦ୍ ନାଗାର୍ ନାଗେନ୍ତେ ସାଜାଇ
ହେ ଅରିୟେଲ୍1, ଦାଉଦ୍ଆଃ ତାଇନ୍ ନାଗାର୍। ଏନାରେ ଓଡ଼ୋଃ ମିଦ୍ ବାରାଷ୍ ମେସାକେଦ୍ତେ ଆପେୟାଃ ମାନାତିଙ୍ଗ୍ ରିକାତାନ୍ ପାରାବ୍କ ମାଇନ୍ ରିକାଏପେ। ଏନ୍ରେୟ ଆଇଙ୍ଗ୍ ଅରିୟେଲ୍କେ ସାଙ୍କାଟ୍ରେ ଉୟୁଗିୟାଇଙ୍ଗ୍। ଏନ୍ତେ ଇନ୍କୁ ରାନାଃ ଓଡ଼ୋଃ ଏୟମ୍ ରିକାୟା, ଇନିଃ ଆଇଁୟାଃ ଆୟାର୍ରେ ଅରିୟେଲ୍, ଲେକା ଦାଣେଁ ରାକାବ୍ ଠାୟାଦ୍ ହୁଇନାଃ। ଆଇଙ୍ଗ୍ ଆମାଃ ବିରୁଧ୍ରେ ଚାରିଓସାଃ କୁମ୍ବା ବାଇୟାଇଙ୍ଗ୍ ଓଡ଼ୋଃ ଆମାଃ ବିରୁଧ୍ରେ ପାଚ୍ରି ବାଇକେଦ୍ତେ ଜାନୁମ୍ଲଃ କେସେଦ୍ମେୟାଁ ଓଡ଼ୋଃ ଆମାଃ ବିରୁଧ୍ରେ ଏନ୍ତାଃରେ ଗାଡ଼୍ ବିଦେୟାଏ। ଏନ୍ତେ ଆମ୍ ହାଦୁଡ଼୍କେଦ୍ତେ ଅତେରେ ଉୟୁଃନାଃ ଓଡ଼ୋଃ ଧୁଡ଼ି ଜାଗାର୍ ରିକାୟା। ଓଡ଼ୋଃ ଆମାଃ ଜାଗାର୍ ଧୁଡ଼ି ଏତେ ମାଡ଼ି ମାଡ଼ି ଆୟୁମଃଆ। ଆମାଃ ଜାଗାର୍ ଅତେ ଏତେ ବଙ୍ଗା ରାଃ ଲାବ୍ଜା ଲେକା ଆୟୁମଃଆ ଓଡ଼ୋଃ ଧୁଡ଼ି ଏତେ ଆମାଃ କାଜି ହାପା ହାପା ସାଡ଼ି ଆୟୁମଃଆ।
ଇମ୍ତା ଆମାଃ ଏଟାଃ ବାହାରି ଦିଶୁମ୍ରେନ୍ ବାଇରିକଆଃ ଝୁଣ୍ଡ୍ ଗୁଣ୍ଡା ଧୁଡ଼ି ଲେକା ହୁଇନାଃ ଓଡ଼ୋଃ ଏନ୍ ବରୱାନ୍ ହଡ଼କଆଃ ଝୁଣ୍ଡ୍ ହୟରେ ଅଟାଙ୍ଗଃତାନ୍ ପେଟେଃ ଲେକା ହବାନାଃ। ଇମ୍ତାଗି ମିସାତେ ହବାଅଃଆ ଓଡ଼ୋଃ ଇମ୍ତାଗି ସବେନାଃତେ ପେଡ଼େୟାନ୍ ପ୍ରାଭୁ, ବରୱାନ୍ ରିମିଲ୍ ସାଡ଼ି, ଅତେ ଏକ୍ଲାଅ, ଆନ୍ଧିହୟ, ପୁରାଃ ଦାଆଃ ଗାମା ଓଡ଼ୋଃ ଅଣ୍ଡର୍ ରିକାଏତାନ୍ ସେଙ୍ଗେଲ୍ ହୁକା ନେ ସବେନାଃଲଃ ପ୍ରାଭୁ ହିଜୁଆଃ। ଏନ୍ତେ ଅରିୟେଲ୍ ବିରୁଧ୍ରେ ଲାଡ଼ାଇତାନ୍, ଅକନ୍ କିଲିକ ଇନିଃଲଃ ଓଡ଼ୋଃ ଇନିୟାଃ ନାଗାର୍ ବିରୁଧ୍ରେ ଓଡ଼ୋଃ ଗାଡ଼୍ ବିରୁଧ୍ରେ ଲାଡ଼ାଇ କେଦ୍ତେ ଇନିଃକେ ସାଙ୍କାଟ୍ରେ ଉୟୁଃ କାଇୟାଃ, ଇନ୍କୁ ସବେନ୍ କୁମୁ କାଜି ଲେକାନ୍କ ତାନ୍କ, ଇନ୍କୁ ନୁବାଃ ରେୟାଃ ଦାର୍ଶାନ୍ ନେନେଲ୍ ହଡ଼କ ଲେକା ହୁଇନାଃ। ରେଙ୍ଗେଃତେ ତାଇକାନ୍ ହଡ଼ ଚିଲ୍କା କୁମୁରେ ଜଜମ୍ ତାନାଇଙ୍ଗ୍ ମେନ୍ତେ ନେଲେ। ମେନ୍ଦ, ଦୁଡ଼ୁମ୍ ଏତେ ବିରିଦ୍ ୟାନ୍ତେ ଇନିଃଦ ରେଙ୍ଗେଃତେ ମେନାଇୟା ଓଡ଼ୋଃ ତେତାଙ୍ଗ୍ ହଡ଼ ଦାଆଃ ନୁଁ ତାନାଇଙ୍ଗ୍ ମେନ୍ତେ, ଚିଲ୍କା କୁମୁ ନେଲେ, ମେନ୍ଦ ଦୁଡ଼ୁମ୍ ଏତେ ବିରିଦ୍ ୟାନ୍ତେ ଇନିଃଦ ନାରାଦୁରା ଓଡ଼ୋଃ ତେତାଙ୍ଗ୍ତେ ମେନାଇୟା। ଏନ୍ଲେକାଗି ସିୟୋନ୍ ବୁରୁ ବିରୁଧ୍ରେ ଲାଡ଼ାଇତାନ୍ କିଲିକଆଃ ଦାସା ଏନ୍କା ହୁଇନାଃ।
ହେଡ଼ାତାନ୍କକେ ଚେତ୍ନା
ଆପେ ସବେନ୍କ ଆକ୍ଚାକାଅ ଓଡ଼ୋଃ ଆକ୍ଦାନ୍ଦାଅ ରିକାଏପେ। ଆପେ ଆପାନ୍କେ ଆନ୍ଧାକେଦ୍ତେ ମେଦ୍ କା ନେଲ୍ତାନ୍ ଲେକା ହବାଅଃପେ। ଆପେ ବୁଲଃପେ, ମେନ୍ଦ ଦାଖ୍ରାସି ନୁଁ କେଦ୍ତେ କାହାଗି, ଟାଲ୍ମାଲାଅଃପେ, ମେନ୍ଦ ଇଲିଆର୍ଖି ନୁଁ କେଦ୍ତେ କାହାଗି। ପ୍ରାଭୁ ଆପେୟାଃ ଚେତାନ୍ରେ ପୁରାଃ ଦୁଡ଼ୁମ୍ରେୟାଃ ଆତ୍ମା ଆଉୱାକାଦାଏ। ଇନିଃ ନାବୀକଆଃ ମେଦ୍ ଜାପିଦ୍ ରିକାକାଦା ଓଡ଼ୋଃ ଦାର୍ଶାନ୍ ନେଲ୍ତାନ୍ ହଡ଼କଆଃ ବହଃ ହାରୁବା କାଦାଏ। ଏନାମେନ୍ତେ ନେ ସବେନ୍ ଦାର୍ଶାନ୍ ରେୟାଃ କାଜିକ ଆପେ ନାଗେନ୍ତେ ପୁଥିରେ ଅଲାକାନ୍ତେୟାଃ ମୋହର୍କାନ୍ ଲେକା ହବାକାନା। ପାଢ଼ାଅ ଦାଡ଼ିତାନ୍ ଜେତାଏ ହଡ଼କେ ଆପେ ଏନା ପାଢ଼ାଅ ନାଗେନ୍ତେ ଏମାଇ ରେଦ ଇନିଃ କାଜିୟା, “ଦାୟାକେଦ୍ତେ ନେ ଅନଲ୍କେ ପାଢ଼ାଏମେ,” ଏନ୍ତେ ଇନିଃ କାଜିୟାଃ, “ଆଇଙ୍ଗ୍ ନେ ଅନଲ୍କେ କାଇଙ୍ଗ୍ ପାଢ଼ାଅ ଦାଡ଼ିୟା, ଚିଆଃଚି ନେଆଁଦ ଠେପା କାନା।” ଓଡ଼ୋଃ ଏନ୍ ପୁଥିକେ ପାଢ଼ାଅ କା ଦାଡ଼ିତାନ୍ ହଡ଼କେ ଆପେ ଏନା ପାଢ଼ାଅ ନାଗେନ୍ତେ ଏମାଇପେ, ଇନିଃ କାଜିୟାଏ, “ଆଇଙ୍ଗ୍ ପାଢ଼ାଅ କାଇଙ୍ଗ୍ ସାରିୟା।”
ଏନ୍ତେ ପ୍ରାଭୁ ଆଡଃଗି କାଜିକେଦା, “ନେ ହଡ଼କ ଆଇଁୟାଃ ହେପାଦ୍ତେ ହିଜୁଃତାନାକ ଓଡ଼ୋଃ ଇନ୍କୁ ଆକଆଃ ମଚାତେ ଓଡ଼ୋଃ ଆଲାଙ୍ଗ୍ତେ ଆଇଙ୍ଗ୍କେ ମାଇନ୍ ରିକାଃକ, ମେନ୍ଦ ଆକଆଃ ମନ୍ସୁରୁଦ୍ରେ ଆଇଁୟାଃ ନାଗେନ୍ତେ ବର ବାନଃଆ ଓଡ଼ୋଃ ଆଇଁୟାଃତାଃ ଏତେ ସାଙ୍ଗିନ୍ରେ ମେନାକଆ। ଇନ୍କୁଆଃ ସୁନୁସାର୍ ଜୀନିଦ୍ ହଡ଼ହନ୍ ଇନିତୁତେ ବାଇୟାକାନ୍ ସେଣାଁ ଲେକାନାଃ ତାନାଃ। ଏନାମେନ୍ତେ ନେଲେପେ, ଆଇଙ୍ଗ୍ ନେ ହଡ଼କଆଃ ଥାଲାରେ ଆକ୍ଦାନ୍ଦାଅ କାମିକ ରିକାୟାଇଙ୍ଗ୍, ଆଡଃମିସା ଆକ୍ଦାନ୍ଦାଅ ଓଡ଼ୋଃ ହାଏକାଟ୍ କାମିକ ରିକାୟାଇଙ୍ଗ୍। ଇନ୍କୁଆଃ ସେଣାଁଁନ୍ ହଡ଼କଆଃ ସେଣାଁଁ ଜିୟନେୟାଇଙ୍ଗ୍, ଆଟ୍କାର୍ଉରୁମ୍ ହଡ଼କଆଃ ବୁଦ୍ଧିକେଇଙ୍ଗ୍ ଗେନାଆତମେୟା।”
ହିଜୁଃ ଦିପିଲି ନାଙ୍ଗ୍ ଆସ୍ରା
ଅକନ୍କ ଆପାନ୍ ଉହାଟ୍ ବିଷାଏକେ ପ୍ରାଭୁତାଃ ଏତେ ଉକୁକେଦ୍ତେ ଦହ ନାଗେନ୍ତେ ପୁରାଃଗି ସାନାଙ୍ଗ୍ ରିକାଃକ ଓଡ଼ୋଃ ଅକନ୍କ ନୁବାଃରେ ଆପାନ୍ କାମିକ ରିକାତାନ୍ଲଃ ଉଡ଼ୁଃକେଦ୍ତେ ପାହାମାଃକ, ଅକଏ ଆଲେକେ ନେଲ୍ତାନା, ଅକଏ ସାରି ଦାଡ଼ିୟା ? ଇନ୍କୁଆଃ ଜୀଦାନ୍ ସାର୍ପାଅଃକା। ଆପେ ସବେନ୍ ବିଷାଏକେ ନେତେହେନ୍ତେ ରିକାଏତାନାପେ। କୁମ୍ଭାର୍ ଚିନାଃ ହାଁସା ମେନ୍ତେ କାଜିୟଃଆ ? ଇନିଃ ଆଇଙ୍ଗ୍କେ କାଏ ବାଇ ମେନ୍ତେ ବାଇୟାକାନ୍ ଜିନିଷ୍ ଚିନାଃ ବାବାଇନିଃକେ କାଜି ଦାଡ଼ିୟା ? ଇନିଃ ଜେତ୍ନାଃ କାଏ ସାରିୟା ମେନ୍ତେ ହାଁସାରେ ବାଇୟାକାନ୍ ଜିନିଷ୍ ଚିନାଃ ବାବାଇନିଃକେ କାଜି ଦାଡ଼ିୟା ?
ଘାଡ଼ିକାଦ୍ ଦିପିଲିରେଗି ଲିବାନୋନ୍ ଚିନାଃ ଜ ଏମେତାନ୍ ପିଡ଼ିରେ ହବା ଦାଡ଼ିୟଃଆ ଓଡ଼ୋଃ ଜଅ ତାନ୍ ପିଡ଼ି ବିର୍ ଲେକା ହୁଇନାଃ ?
ଏନ୍ ହୁଲାଙ୍ଗ୍ ଲୁତୁର୍ କା ଆୟୁମ୍ନିଃ ପୁଥିରାଃ ବାଚାନ୍ ଆୟୁମେୟାଏ, ଓଡ଼ୋଃ କୁଲ୍କୁଲ୍ ନୁବାଃରେ ଓଡ଼ୋଃ ନୁବାଃରେ ହଗି କା ନେଲ୍ ଦାଡ଼ିନିଃ ନେଲ୍ ଦାଡ଼ିୟାଏ। ଲେବେଃ ମନ୍ରେନ୍ ହଡ଼କ ପ୍ରାଭୁତାଃରେ ରାସ୍କା ରିକାଏୟାକ ଓଡ଼ୋଃ ଗାରିବ୍ ହଡ଼କ ଇସ୍ରାଏଲ୍ରେନ୍ ପାବିତାର୍ ପାର୍ମେଶ୍ୱାର୍ତାଃରେ ରାସ୍କା ରିକାଏୟାକ। ଦାୟା କା ରିକାତାନ୍ ହଡ଼ ଜିୟନଃଆ, ନିନ୍ଦା ରିକାତାନ୍କ ଜିୟନଃଆ ଓଡ଼ୋଃ କା ଧାର୍ମାନ୍ ସାଃତେ ଅକନ୍କ ନେଲାଃକ, ଇନ୍କୁ ଜିୟନଃଆକ। ଅକନ୍ ହଡ଼କ ମିଦ୍ପଦ୍ କାଜିରେ ହଡ଼କେ ଚିଟା ରିକାଃକ, ବିଚାର୍ ଠାୟାଦ୍ରେ ନ୍ୟାୟ ନାମେ ନାଗେନ୍ତେ ଫାଁସ୍ରିରେ ଉୟୁଗଃତାନା, ହସଡ଼ ଗାୱାତେ ଧାର୍ମାନ୍ ହଡ଼କେ ସାଜାଇ ଏମ୍ତାନ୍ ହଡ଼କ ଜିୟନଃଆ।
ଏନାମେନ୍ତେ ଆବ୍ରାହାମ୍ଆଃ ବାଞ୍ଚାଅନିଃ ପ୍ରାଭୁ ପାର୍ମେଶ୍ୱାର୍ ଯାକୁବାଃ ବିଷାଏରେ କାଜିୟା, “ଯାକୁବ୍ କାଏ ଗିହୁଗଃଆ ଚାଏ ଇନିୟାଃ ଗସ ମେଦ୍ ମୁହାଁଡ଼୍ କା ହବାଅଃଆ। ମେନ୍ଦ ଚିମ୍ତା ଇନ୍କୁ ଆପାନ୍ ହନ୍କକେ ଚାଏ ଆଇଁୟାଃ ତିଃଇତେ କାମିକାନ୍ତେୟାଃ ଆକଆଃ ଥାଲାରେ ନେଲେୟାକ, ଇନ୍କୁ ଆଇଁୟାଃ ନୁତୁମ୍କେ ପାବିତାର୍ତେ ମାଇନ୍ ରିକାୟା, ଯାକୁବ୍ଆଃ ପାର୍ମେଶ୍ୱାର୍କେ ପାବିତାର୍ ମେନ୍ତେ ମାଇନ୍ ରିକାୟାକ ଓଡ଼ୋଃ ଇସ୍ରାଏଲ୍ରେନ୍ ପାର୍ମେଶ୍ୱାର୍କେ ବର ରିକାୟାକ। ଡଣ୍ଡ ହଡ଼କ ଆଟ୍କାର୍ଉରୁମ୍କ ନାମେୟା ଓଡ଼ୋଃ ଅକନ୍କ ଚୁପ୍ରା କାଜିକ କାଜିୟାଃ, ଇନ୍କୁ ଇନିତୁକ ନାମେୟା।”
Source notes (1)
- Footnote ପାର୍ମେଶ୍ୱାର୍ଆଃ ଦାଣେଁରାକାବ୍ ବେଦି
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.